Maatewoosi Wongeella
20 “Gordu Gashshooti woyinete irshasi loosanno manna hasiꞌrara gute kae haꞌrinohu gatu anni gedeeti. 2 Loosaasinete ledo barraho mitte diinaare* baatansara coyiꞌrame insa woyinete irshasi soyi. 3 Sase saate balla fuli woyiteno, dikkote looso hooge uurre nooha wole manna afi; 4 hakkiinni isi, ‘Hunkiiꞌne waaga baateemmoꞌnena kiꞌneno woyinete irshaꞌya hadhine loosse’ yiinsa. 5 Insano hadhu. Xaano lee saatenna honse saate balla fule hatto assi. 6 Jeefote 11 saate balla fule uurre nooha wole manna afe togo yiinsa: ‘Barra woꞌma kowiicho loosiweelo uurritinoonnihu mayiraati?’ 7 Insano, ‘Loosiisiꞌrannonkeha hoongeeti’ yite qoltu. Isino ‘Hakkawoyiteetiro kiꞌneno woyinete irshaꞌya hadhine loosse’ yiinsa.
8 “Hawarrita woyinete irshi anni loosiisanno mancho togo yii: ‘Loosaasine woshshite gedensoonni daggurinni hanaffe umo dagguri geeshsha hunkiinsa waaga baati.’ 9 Looso 11 saatenni hanaffuri mittu mittunku dagge mitte mitte diinaare* adhitu. 10 Looso umo hanaffuri woxe adhitara daggu woyite insara roorsine baantanninsaha lawinonsa; ikkollana insarano mitte mitte diinaarella* baantoonni. 11 Insa woxe adhitu woyite woyinete irshi annira gunguntanni 12 togo yitu: ‘Kuri gedeꞌnite dagguri mitte saate calla loossino; ati kayinni insa barra woꞌma daafurranninna arrishshote giirammanni honsoommori ledo taashshootto!’ 13 Ikkollana isi insa giddonni mitto togo yii: ‘Jaala, baddaloommoheri mitturino dino. Coyiꞌrammoommohu dimitte diinaare* baateemmohe gedeeti? 14 Qeechakki adhite haꞌri. Kuri gedeꞌnite daggurirano atera uyummo geeshshiha aa hasiꞌroommo. 15 Woxiꞌyanni hasiꞌroommore assa didandeemmo? Woy ani shaqqado ikkoommo daafira dhiibbifatoottoni?’* 16 Konni garinni, gedensiidiri albiidire, albiidiri kayinni gedensiidire ikkitanno.”
17 Yerusaalame hadhanni heedheenna Yesuusi 12 rosaanosi calla bade doogote togo yiinsa: 18 “Kuneeti Yerusaalame haꞌnanni heeꞌnoommo; manchi Beetto kakkalaanote roorrootinna borreessaanote angara sayinse uyinanni. Insano shinannisi gede yoo yitanno; 19 qoleno dagate sayisse uyitannosi; insano qacifattannosi, halangetenni gantannosi, hattono haqqaho suttannosi; isino sayikki barra kaꞌꞌanno.”
20 Hakkiinni Zebidewoosi ooso ama oosose ledo Yesuusiwa shiqqi yite guluphite* mitto coye huuccidhu. 21 Isino “Maa hasiꞌrootta?” yiise. Iseno “Tenne lamenta oosoꞌya Gashshootikkira mittu qiniitekkiinni mittu gurakkiinni ofoltanno gede assie” yitu. 22 Yesuusi togo yee qoli: “Huuccidhinannire diegentinoonni. Ani muli yannara ageemmo finiinchinni aga dandiitinanni?” Insano “Ee dandiineemmo” yitusi. 23 Isino togo yiinsa: “Agate woyite finiinchiꞌyanni agginanni; ikkollana qiniiteꞌyaanninna guraꞌyaanni ofollinanni gede asseemmohu ane diꞌꞌikkoommo; konne darga ofoltannori Anniꞌya doorinoreeti.”
24 Gattinori tonnu tenne macciishshituti kuri lamu roduuwira hanqitu. 25 Yesuusi kayinni isiwa woshshe togo yiinsa: “Dagate gashshaano manninsara mootooꞌmitannota, roorrootinsano kadde gashshitannonsata affinoonni. 26 Kiꞌne mereero kayinni hattoo coyi dihasiisanno; mereeroꞌne rooriidiha ikka hasiꞌrannohu baalu soqqamaanchoꞌne ikka hasiissannosi; 27 mereeroꞌne albiidiha ikka hasiꞌrannohu baaluno borojjichoꞌne ikka hasiissannosi. 28 Manchi Beettino dayinohu soqqamaranna heeshshosi* lowo mannira* wodo asse aaraati ikkinnina soqqammasira diꞌꞌikkino.”
29 Iyyaarko hadhanni heedheenna lowo manni hoodesi haꞌri. 30 Hakkiinni doogote qaccera ofolte noori lamu ille ballitino mannooti Yesuusi hakkaanni hige saꞌꞌanni noota macciishshite, “Mooticha, Daawiti Beetto, mararinke!”* yite raartu. 31 Ikkollana mannu sammi yitanno gede ufinsa; insa kayinni wonanni roorsite raartanni, “Mooticha, Daawiti Beetto, mararinke!”* yitu. 32 Yesuusino uurre woshshinsahu gedensaanni, “Maa assammoꞌnera hasidhinanni?” yiinsa. 33 Insano, “Mooticha, illenke faninke” yitusi. 34 Yesuusino lowo geeshsha marare illensa amammadi; hakkawoyintenni illensa faꞌniteenna galagalte laꞌu; insano hoodesi hadhu.