Maatewoosi Wongeella
18 Hatte yannara rosaanosi Yesuusiwa shiqqi yite, “Gordu Gashshootira baalanka roorannohu ayeti?” yitu. 2 Hakko daafira Yesuusi mitto shiima qaaqqo woshshe mereeronsa uurrise, 3 togo yii: “Halaale yeemmoꞌnena, higa* gibbinironna qaaqquullu gede ikka hoogginiro, gordu Gashshoote horonta dieꞌinanni. 4 Konnira, gordu Gashshootira baalanka roorannohu konni shiimu qaaqqi gede umosi heeshshi assannoho; 5 togooha shiima qaaqqo suꞌmiꞌyanni haaꞌrannohu baalu aneno haaꞌranno. 6 Ikkollana ane ammantannori kuri shiimmaaddu giddonni mittoho guficho ikkannohu baalu, goowaho jawa daamma* usudhe baaru diimera bairo woyyannosi.
7 “Tini alame mannaho guficho ikkitanno daafira isera aanneꞌe! Hige guficho ikkannori daasi digattannote; ikkollana wolootu gufidhanno gede assanno manchira aanneꞌe! 8 Konnira, angakki woy lekkakki guficho ikkituhero murte huni. Lame anga woy lame lekka heedheennahe hegere giirara tugamattonte, kotticha woy naaficha ikkite heeshsho afiꞌrittoro woyyannohe. 9 Qoleno illekki guficho ikkituhero fushshite huni; lame ille heedheennahe Gaannaamete* giirara tugamattonte, mitte illeha ikkite heeshsho afiꞌrittoro woyyannohe. 10 Iima noo sokkaasinensa, iima noo Anniꞌya albira woꞌmanka woyite shiqqanno daafira, kuri shiimmaaddu giddonni mittono mishshinannikki gede qorophe. 11* ——
12 “Kiꞌnera ma lawannoꞌne? Mittu manchira 100 geꞌreewi heeꞌrisironna insa giddonni mitte baꞌusiro, 99 ilaalaho agure hattee baꞌinota mitte hasiꞌrara dihaꞌranno? 13 Halaale yeemmoꞌnena afiꞌranno woyite, bainokkiri 99 geꞌreewinni roore baꞌeenna afiꞌri geꞌrechonni hagiidhanno. 14 Hatteente gede, iima heeꞌranno Anniꞌya* kuri shiimmaaddu giddonni mittu nafa baꞌꞌara dihasiꞌranno.
15 “Konnira rodiikki koffi assihero, hadhe isinna ati callu heedhinoonniwa soꞌrosi xawisse kulisi.* Macciishshihero rodookki gatisatto. 16 Macciishsha giwihero kayinni, aye coyino lame woy sase naqaashshe farcidhannorinni* kaajjanno daafira, mitto woy lame mancho haadhe mari. 17 Insa macciishsha giwiro, songote kuli. Songono macciishsha giwiro dagatenna qaraxaasinchu gede assite aguri.
18 “Halaale yeemmoꞌnena, uulla usurtinanni coyi baalu balaxe iima usuraminoha ikkanno; uulla tirtinanni coyi baaluno balaxe iima tidhaminoha ikkanno. 19 Qoleno halaale kuleemmoꞌnena, uullate aana kiꞌne giddo lamu mitto lowo geeshsha hasiisanno coye huucciꞌrate sumuu yituro, iima heeꞌranno Anniꞌya aannonsa. 20 Lamu woy sasu suꞌmiꞌyanni gamba yitannowa anino hakko mereeronsa heeꞌreemmo.”
21 Hakkiinni Pheexiroosi Yesuusiwa daye togo yii: “Mooticha, rodiiꞌya koffi assiero meꞌꞌe hige gatona yoosi? Lamala hige?” 22 Yesuusino “Lamalayina lamala higge* ikkinnina lamala higge calla diyeemmohe” yiisi.
23 “Hakko daafira gordu Gashshooti borojjootisi asalensa qoltara hasiꞌrino moote gedeeti. 24 Woxesi gamba assiꞌra hanafita 10,000 taalaante* liqiiꞌrino borojjicho isiwa abbitu. 25 Ikkollana kuni borojjichi asale baaxxa hoogino daafira, mootichisi iso, minaamasi, oososinna noosire baala hirre asale baantanni gede hajaji. 26 Konnira borojjichu lekkate uwe kumbuule ‘Mootichaꞌya, nooe asale baala baaxxeemmona cincie ballo’ yii. 27 Mootichisino lowo geeshsha marare asalesi agure haꞌrisisi. 28 Ikkollana kuni borojjichi hakkiinni fule haꞌranni heeꞌre, isiwiinni 100 diinaare* liqiiꞌrinohu miilasi ikkino borojjichinni xaadi; hakkiinni qalxe amade ‘Liqiissummohe woxe qolie’ yii. 29 Konnira miilasi ikkino borojjichi lekkasira uwe, ‘Qoleemmohena yanna uue’ yee huucciꞌri. 30 Isi kayinni giwe, asalesi baaxxa geeshsha usuramanno gede assi. 31 Miillasi ikkitino borojjooti tenne affuti lowo geeshsha dadillitu; hakkiinni hadhe baalanka coye mootichinsara kultu. 32 Mootichisino hakkonne borojjicho woshshiishe togo yiisi: ‘Ati bushu borojjichi, huucciꞌroottoe daafira asalekki baala agurummohe. 33 Ani maarummohente gede, atino miilakki ikkino borojjicho maara dihasiissannohe?’ 34 Mootichisino lowo geeshsha hanqe asalesi baala baaxxa geeshsha, usuru mini agaraasinera sayise uyi. 35 Kiꞌneno mittu mittunku rodooꞌne godowinta gatona yitinannikkiha ikkiro, iimi Anniꞌya kiꞌneno gatona diyaannoꞌne.”