පැනයට පිළිතුර බයිබලයෙන්

යේසුස් දිවි පිදුව නිසා ලැබෙන ආශීර්වාද මොනවාද?

දෙවියන් මිනිසුන්ව නිර්මාණය කළේ දුක් විඳලා මැරිලා යන්න නෙමෙයි, සදහටම ජීවත් වෙන්නයි. ඒත් මුල් මිනිසා වූ ආදම් දෙවියන්ට අකීකරු වෙලා සදහටම ජීවත් වීමේ ප්‍රස්තාව නැති කරගත්තා. අපි පැවතෙන්නේ ආදම්ගෙන් නිසා අපිටත් මරණය උරුම වුණා. (රෝම 5:8, 12; 6:23) ඒත් ආදම් නිසා අහිමි වුණ දේ නැවත ලබා දෙන්න යෙහෝවා දෙවියන් යේසුස්ව මේ පොළොවට එව්වා. ඔහු දිවි පිදුව නිසා මිනිසුන්ට සදහටම ජීවත් වීමේ ප්‍රස්තාව තිබෙනවා.—යොහන් 3:16 කියවන්න.

අපේ පව්වලට සමාව ලැබෙන්නෙත් අපිට සදහටම ජීවත් වෙන්න පුළුවන් වෙන්නෙත් යේසුස් දිවි පිදුව නිසයි. මහලු විය, ලෙඩ දුක් හා මරණය නැති කාලයක මේ පොළොව මොන තරම් ලස්සන තැනක් වෙයිද කියලා බයිබලයේ සඳහන් වෙනවා.—යෙසායා 25:8; 33:24; එළිදරව් 21:4, 5 කියවන්න.

යේසුස්ගේ මරණය සිහි කරන්න ඕන කොහොමද?

මිය යන්න කලින් දවසේ යේසුස් තමාගේ මරණය සිහි කරන්න කියලා ගෝලයන්ට කිව්වා. හැම අවුරුද්දකම යේසුස්ගේ මරණය සිහි කරද්දී යෙහෝවා දෙවියන් සහ යේසුස් මිනිසුන්ට මොන තරම් ප්‍රේම කරලා තියෙනවාද කියලා අපිට මතක් වෙනවා.—ලූක් 22:19, 20; 1 යොහන් 4:9, 10 කියවන්න.