දෙවියන් අහසත් පොළොවත් හැදුවා

යෙහෝවා දෙවියන් තමයි අපිව හැදුවේ. අපිව විතරක් නෙවෙයි අපිට පේන දේවලුයි පේන්නේ නැති දේවලුයි හැම දේම හැදුවේ දෙවියන්. අපිට පේන්න තියෙන දේවල් හදන්න ඉස්සෙල්ලා ඔහු ගොඩක් දේවදූතයන්ව හැදුවා. අපිට දෙවියන්ව පේන්නේ නැහැ වගේ එයාලවත් පේන්නේ නැහැ. යෙහෝවා හදපු පළවෙනි දේවදූතයා තමයි හැම දේම හදන්න ඔහුට උදව් කළේ. තරු, ග්‍රහලෝක වගේ අනිත් හැම දේම හදද්දී ඒ දේවදූතයා උදව් කළා. ඒ එක ග්‍රහලෝකයක් තමයි අපේ මේ ලස්සන පොළොව.

ඊළඟට යෙහෝවා මිනිස්සුන්ටයි සත්තුන්ටයි ඉන්න පුළුවන් විදිහට මේ පොළොව ලෑස්ති කළා. ඉර එළියත් දුන්නා. ලස්සන කඳු, මුහුදු, ගංගාවල් හැදුවා.

ඊළඟට මොකද වුණේ කියලා දන්නවාද? යෙහෝවා කිව්වා ‘මම තණකොළත් පැළත් ගසුත් හදනවා’ කියලා. ඊටපස්සේ එක එක ජාතියේ පලතුරු, එළවළු, මල් වැවෙන්න පටන්ගත්තා. ඉගිලෙන, පීනන, බඩගාගෙන යන එක එක විදිහේ සත්තුන්වත් යෙහෝවා හැදුවා. හාවෝ වගේ පුංචි සත්තුන්වත් අලි වගේ ලොකු සත්තුන්වත් හැදුවා. ඔයා වැඩියෙන්ම ආස මොන සතාටද?

ඉස්සෙල්ලාම හදපු දේවදූතයාට යෙහෝවා කිව්වා ‘අපි මිනිස්සුන්ව හදමු’ කියලා. මිනිස්සු සත්තුන්ට වඩා වෙනස්. එයාලට පුළුවන් හොඳට හිතලා දේවල් කරන්න. කතා කරන්න, හිනා වෙන්න, යාච්ඤා කරන්නත් පුළුවන්. පොළොවයි සත්තුන්වයි බලාගන්න දුන්නෙත් එයාලට.