Omuhigo gw’obulagirire bwenene ngasi muntu akarhôla guba gwa kucihâna emwa Yehova n’okuja omu mulala gw’abakozi bage. Yehova aba alonzize ngasi muntu ajire ntyo. Bulya gurhi? Aba alonzize babe n’obwîra haguma naye banalame ensiku n’amango. (Lush. 30:19, 20; Gl. 6:7, 8) Ciru akaba ntyo, nta muntu Yehova aseza amukolere. Analeke ngasi muntu ahige ebi ajira. Gurhigi byakaba erhi Omukristu mubatize akavuna irhegeko lya Mungu n’okujira ecaha cizibu? Erhi akaba arhaciyunjuzizi, agwasirwe arhenzibwe omu cigamba. (1 Kr. 5:13) Cikone, ciru omuntu akarhenzibwa omu cigamba, kobinali Yehova aba alonzize oyo muntu aciyunjuze n’okucib’iba n’obwîra bwa hofi-hofi haguma naye. Kobinali, eco co cirhumire c’obulagirire carhumaga ahâna engombôlo: ayihânyire ly’ahashisa okubabalira abanya-byaha baciyunjuzize. Yehova aba Mungu w’obuzigire oyinginga abajijire ebyaha bizibu baciyunjuze.​—Zak. 1:3; Rm. 2:4; Yk. 4:8. w24.08 buk. 14 cif. 1-2

Amango Yowane ayandikaga amaruba gage ga kasharhu, bantu baguma na baguma bakag’iyaliza enyigirizo z’obunywesi banarhuma haba okugabikanamwo omu cigamba. Ciru akaba ntyo, abandi bagendekire ‘bashimba enjira y’okuli.’ Bakag’irhumikira Yehova n’‘okushimba amarhegeko gage.’ (2 Yn. 4, 6) Abo Bakristu bishwekerezi balerhire Yowane na Yehova omwishingo. (Mig. 27:11) Isomo lihi rhuciyigirizize? Obwishwekerezi bunalerhe omwishingo. (1 Yn. 5:3) Kwa lwiganyo, rhunabe n’omwishingo omu kumanya oku rhuli rhwashagalusa Yehova. Anashagaluke erhi abona rhuli rhwahagalika amashumi g’er’igulu n’okuyemera okuli. Bamalahika baba empingu nabo banashagaluke. (Lk. 15:10) Nirhu rhwanaba n’omwishingo omu kubona abandi bagendekire babêra bishwekerezi. (2 Ts. 1:4) Muli ntyo hano er’igulu ligera, rhwayish’irhimukwa omu kumanya oku rhwabêzire bishwekerezi kuli Yehova, ciru n’omw’igulu lyal’irhambwirwe na Shetani. w24.11 buk. 12 cif. 17-18

Kasanzi kanganaci oshinganine okulabiriza omuntu embere omubwire oku omusimire? Erhi wakabwîra muntu mulebe duba-duba, wanabonekana nka oba muntu orhôla emihigo buzira kurhanya. (Mig. 29:20) Oku bundi, erhi wakajira kasanzi kanji, wanabonekana nk’oba muntu oyabirwa okurhôla omuhigo, bwenene erhi akaba oyo muntu ahugûsirwe oku omusimire. (Muh. 11:4) Okengere oku, embere oyegere muntu mulebe, orhalagiriri oku kuyemezibwa n’obwalagale oku oyo muntu ye mwarhôlana naye. Cikone, oshinganine oyemere n’obwalagale oku oli tayari lugenda obuhya n’oku oyo muntu anaba mulume erhi mukazi mwinja kuli we. Gurhigi wakajira erhi wakahugûkwa oku muntu mulebe asimisibwe na nawe? Erhi akaba wehe orhali waciyumva oku osimisibwe naye, ocihangane okuyerekana ntyo n’obwalagale kugerera ebijiro byawe. Kurhakaba kwinja okujira muntu mulebe arhanye oku hanaba obulyo bw’okurhondeza obwîra n’obo arhali ntyo kobiri.​—Ef. 4:25. w24.05 buk. 23 cif. 9-10