Ogo mwanzi gwa Solomoni guyerekine ebyakahikira ngasi mukozi wa Yehova. Anarhogera omu caha cizibu na buzinda aciyumve nka ngasi kantu kajirikine ho n’aho. Erhi kandi anaderha erhi, “byampikire kone.” Cikone, erhi akarhanya kobinali oku bintu byamuhikire, nkaba anahikira okuhugûkwa oku hali bintu bilebe birhali bya bwenge anajijire byamulongozagya ahikire okujira ecaha. Ebyo bintu bibi byanahiramwo okukomera abîra babi, okucishagalusa n’ebintu birhashinganini, erhi okukomera hantu halebe habi, kugerera e Enternete erhi busu oku busu. Nkaba kandi anaba erhi ali amaleka okusalira, okusoma Ebibliya, okuja oku ntimanano z’ecigamba erhi omu mahubiri. Ak’omusole guganirirwe omu citabu c’Emigani, nkaba anaba arhajiraga ecaha ho n’aho. Isomo lihi rhukuzire aho? Arhali caha cone rhushinganine rhuyake, ci n’ebyakarhulongoza rhujire ecaha. Solomoni ayerekine ntyo bwinja enyuma z’okuganirira ogo mwanzi.​—Mt. 5:29, 30. w24.07 buk. 16 cif. 10-11

Obwo buhirhi byo bici? Guli mukolo guyokola obuzine gw’okuyalagaza omwanzi mwinja gw’Obwami. (2 Kr. 4:1) Ebyo birugu by’ibumba byo bici? Bishushanyize abakozi ba Nnâmahanga bayalagaliza abandi omwanzi mwinja. Omu nsiku za Paolo, abarhimbuzi bakag’ikolesa orhubindi rhw’ibunda lyo bahêkamwo ebintu by’obulagirire nk’ebiryo, idivayi, n’ensaranga. Ko n’oko, nirhu Yehova arhuhîre olukengwa lw’okuhêka omwanzi mwinja gw’obulagirire bwenene. Kugerera oburhabale bwa Yehova, rhwanaba n’emisi rhulagirireko lyo rhugendekera rhwayalagaza ogo mwanzi n’obwishwekerezi. Hali amango rhwakayoboha bene bantu. Gurhi rhwakahimamwo ago mazibu? Orhanye okw’isala entumwa zajiraga amango babahanzagya okuhubiri. Ahali h’okugogomerwa n’oboba, bahûna Yehova abarhabale bayigirize akanwa kage buzira bwoba. Yehova ashuza isala lyabo ho n’aho. (Ebj. 4:18, 29, 31) Erhi akaba hali amango oyoboha bene bantu, oshinganine ohûne Yehova akurhabale ozibuhye obuzigire bwawe oku bantu ly’ orhakag’iyoboha okubaganirira omwanzi mwinja. w24.04 buk. 16 cif. 8-9

Obuzigire bwirhu kuli Yehova bunarhushumye rhucêse izino lyage. Rhuba rhulonzize okujira ecirhu cigabi: kucêsa izino lyage omu kulikulako izinga Shetani alihizireko kugerera obunywesi bwage bw’obulyalya. (Murh. 3:1-5; Ayu. 2:4; Yn. 8:44) Omu mukolo gwirhu gw’amahubiri, rhuba babidu okuhalira Mungu wirhu, omu kubwira abantu boshi balonzize okurhuyumvirhiza okuli okubimuyerekire. Rhuba rhulonzize ngasi muntu amanye oku oborhere bwage bukulu buba buzigire, oku enjira yage y’okurhegeka eba ya bushinganyanya, n’oku Obwami bwage bwayusa amalibuko goshi hano hofi-hofi n’okulerhera abantu omurhûla n’omwishingo. (Enna. 37:10, 11, 29; 1 Yn. 4:8) Erhi rhuhalira irenge lya Yehova omu mahubiri, rhunacêse izino lyage. Kandi rhunashagaluke bulya rhuli rhwajira ebi rhuhûnyirwe okujira nka Bahamirizi ba Yehova. w24.05 buk. 18 cif. 12