Nyen la mo yeke sara ti kiri singila ndali ti ye so a futa ti zi azo?

1-2. A yeke nzoni ye so a futa ti zi azo apusu e ti sara nyen? Ngbanga ti nyen? (2 aCorinthien 5:​14, 15). (Bâ nga foto.)

TONGANA a zi mo na gbe ti mbeni da so a kungbi na ndö ti mo, mo yeke bâ so bon ti zo so a sö mo ayeke na li ti mo. Même tongana a sö ambeni zo nga, peut-être mo yeke ye ti fa singila ti bê ti mo ti fa so mo bâ ye so a sara na mo so tongana senge ye ape.

² Tongana ti so article so ahon afa, e wani e peut ti zi terê ti e na gbe ti aye ti peko ti siokpari ape. Ye oko, sandaga ti Jésus apeut ti zi e na lege so a mû lege na e (1) ti wara pardon ti asiokpari ti e, (2) ti duti na beku ti ga mbilimbili-kue nga (3) ti kiri ti duti na nzoni songo na Jéhovah. Ye so asara si e yeke na beku ti ngbâ na fini lakue lakue na yâ ti fini dunia ti Jéhovah. Ti vrai ni, ye so a futa ti zi azo afa ndoye so Jésus ayeke na ni na mbage ti azo, ndoye so lo yeke na ni ngoi mingi kozo ti tene lo ga na sese (aProv. 8:​30, 31). Bazengele Paul atene so “ndoye so Christ ayeke na ni apusu e ti sara ye”. (Diko 2 aCorinthien 5:​14, 15.) Ye so aye ti tene so ndoye ti Jésus adoit ti pusu e ti sara mbeni ye ti fa so e bâ sandaga so lo mû ti zi e tongana senge ye ape.

3. Ngbanga ti nyen la fason so mo yeke kiri singila ndali ti ye so a futa ti zi azo apeut ti duti nde na ti ambeni zo?

³ Nyen la mo yeke sara ti kiri singila ndali ti ye so a futa ti zi azo? Kiringo tënë ti mo apeut ti duti nde na ti ambeni zo. Ti fa ndani so e tene tongaso, imaginé so azo ota aye ti gue na même ndo, me ala londo na agbata nde nde. Alege so ala yeke mû ayeke nde nde. Legeoko nga, “lege” so mo yeke mû ti si na ndo so mo ye ti gue dä, so ti tene ye so mo leke ti sara ti kiri singila ndali ti ye so a futa ti zi azo, adépend na songo so mo yeke na ni laso na Jéhovah. Ti lingbi na tënë so, article so ayeke sara tënë na groupe ti azo ota: (1) Azo so ayeke manda Bible, (2) aChrétien so awara batême awe nga na (3) ataba so ague yongoro na kundu ni.

AZO SO AYEKE MANDA BIBLE

4. Jéhovah apensé nyen na ndö ti azo so ayeke manda Bible?

⁴ Tongana mo yeke manda Bible, gbu li na ndö ti ye so: Fason so mo yamba na nzoni tënë afa so mo yeke na popo ti azo so Jéhovah agboto ala na mbage ti lo (Jean 6:44; Kus. 13:48). “Jéhovah la ayeke bâ yâ ti bê ti zo.” Ye so aye ti tene lo yeke bâ a-effort so mo yeke sara ti manda ye na ndö ti lo nga a nzere na lo ti bâ so mo yeke gue na li ni na ngoi so mo yeke sara achangement ti lingbi na aye so lo hunda (aProv. 17:3; 27:11). Ye so a futa ti zi azo amû lege na mo ti ga kamarade ti lo (aRom. 5:​10, 11). Bâ ni lâ oko ape tongana senge ye.

5. Tongana nyen la awamandango Bible apeut ti sara ye alingbi na wango so ayeke na aPhilippien 3:16?

⁵ So mo yeke manda Bible, tongana nyen la mo peut ti kiri singila ndali ti ye so a futa ti zi azo? Mbeni lege ni ayeke ti sara ye alingbi na wango so bazengele Paul amû na aPhilippien, lo tene: “Ndo so e maï ngbii si e si dä awe so, zia e ngbâ ti tambela mbilimbili na ndö ti oko lege ni so.” (aPhil. 3:16). Mbeni Bible akiri peko ti versê so, atene: “E ngbâ ti tambela gï na lege so e tambela dä ngbii asi fadeso.” Ti sara ye alingbi na wango so, zia mbeni ye akanga lege na mo ape ti ngbâ ti tambela na ndö ti lege so ague na fini.—Mat. 7:14; Luc 9:62.

6. Nyen la awamandango Bible apeut ti sara tongana ala bâ so a yeke ngangu na ala ti sara achangement? (Deutéronome 30:​11-14). (Bâ nga foto.)

⁶ Ka tongana a yeke ngangu na mo ti sara ye alingbi na mbeni fango ye ti Bible so mo manda ade ti ninga ape? Sara recherche na ndö ti fango ye ni nga sambela Jéhovah ti aidé mo ti mä yâ ni nzoni (Ps. 86:11). Tongana mo mä yâ ni gbä, zi li ti mo na ndö ni, me ngbâ ti sara étude ti mo. Ka tongana a yeke ngangu na mo ti zia lege ti mbeni ye so Bible ake? Girisa ape so Jéhovah ayeke hunda lâ oko ape na azo so ayeke mbilimbili-kue ape ti sara mbeni ye so ahon ngangu ti ala. Mo peut ti sara ye alingbi na aye so lo hunda. (Diko Deutéronome 30:​11-14.) Jéhovah amû nga zendo ti aidé mo (És. 41:​10, 13; 1 aCor. 10:13). Tongaso, découragé ape. Pensé mingi ape na aye so ayeke ngangu na mo me gbu li na ndö ti anzoni ye kue so Jéhovah asara ndali ti mo, mbilimbili ye so a futa ti zi azo. Tongana mo ye Jéhovah mingi, mo yeke bâ so “acommandement ti lo ayeke ye so ane pëpe”.—1 Jean 5:3.a

7. Nyen la amaseka so ayeke kono na yâ ti tâ tënë apeut ti gbu li na ndö ni?

⁷ Ka ti ala amaseka so ayeke kono na yâ ti tâ tënë? Ala nga kue ala yeke awamandango Bible. Ti vrai ni, ala yeke awamandango Bible so ababâ na amama ti ala abâ ala na nene ni mingi. Bible atene: “Ala ga nduru na Nzapa, na lo yeke ga ande nduru na ala.” (Jacq. 4:8; 1 Chron. 28:9). Tongana mo gi ti ga nduru na Jéhovah, lo yeke ga nduru na mo. A yeke pëpe ndali ti so mo kono na yâ ti mbeni sewa ti aTémoin ti Jéhovah la Jéhovah ayeke pensé na mo. Lo yeke pensé na mo ndali ti so lo ye si mo ga kota kamarade ti lo. Nyen la Jéhovah asara ti mû lege na mo ti ga kota kamarade ti lo? Lo mû Molenge ti lo ndali ti mo. Girisa kota cadeau so lâ oko ape (aRom. 5:​1, 2). Tongaso, kozo ti gue na Mémorial na ngu so, gbu li mingi na ndö ti ye so Jéhovah na Jésus asara ndali ti mo. Na pekoni, gbu li na ndö ti fason so mo ye ti vivre na ni nga na aye so mo peut ti leke ti sara ti kiri singila mingi na Jéhovah.b

ACHRÉTIEN SO AWARA BATÊME AWE

8. Tongana nyen la aChrétien so awara batême awe afa so ala mä na bê na ye so a futa ti zi azo?

⁸ Tongana mo yeke mbeni Chrétien so awara batême awe, mo fa na alege mingi so mo mä na bê na ye so a futa ti zi azo. Na tapande, mo sara achangement ti zia ngia na bê ti Jéhovah nga ti ga nduru mingi na lo. Mo sara ye alingbi na yanga so Jésus amû na adisciple ti lo ti fa nzoni tënë na azo nga ti fa ye na ala. Mo mû terê ti mo na Jéhovah nga mo wara batême. Peut-être azo asara aye ti ngangu na mo ndali ti so mo yeke sara na Jéhovah (2 Tim. 3:12). Me mo ngbâ ti sara na Jéhovah be-ta-zo ndali ti so mo ye lo nga mo kiri singila ndali ti so lo mû Molenge ti lo ti futa ye so azi azo.—aHéb. 12:​2, 3.

9. Nyen la a yeke nzoni aChrétien so awara batême awe asara hange na ni?

⁹ E aChrétien so e wara batême awe, e doit ti sara hange na mbeni kpale. Tongana ngoi ayeke hon, e peut ti komanse ti bâ ye so a futa ti zi azo tongana senge ye. Ye so apeut ti si tongana nyen? Gbu li na ndö ti akozo Chrétien ti Éphèse. Jésus so a zingo lo na kuâ agonda ala ndali ti gbungo ngangu ti ala. Me lo tene na ala, lo tene: ‘Ye so mbi ke na ala ayeke so: ndoye so ala yeke na ni kozo, ala zia ni awe.’ (Apoc. 2:​3, 4). Tongana ti so atënë ti Jésus so afa, mbeni Chrétien apeut ti komanse ti sara na Jéhovah gï tongaso. Mara ti zo tongaso apeut ti sambela, ti gue na abungbi nga ti fa tënë me lo sara ni ndali ti so a yeke ye so lo yeke sara ka la. Lo sara ni encore ape ndali ti so ndoye la apusu lo ti sara ni. Tongana mo bâ so mo ye Jéhovah tongana ti kozo ape, nyen la mo peut ti sara?

10. Tongana nyen la mo peut ti “gbu li ti mo na ndö ti” aye so mo yeke sara ti voro Jéhovah nga ti “bi terê ti mo kue na yâ” ni? (1 Timothée 4:​13, 15).

¹⁰ Bazengele Paul atene na Timothée ti ‘gbu li ti lo na ndö ti’ aye so lo yeke sara ti voro Jéhovah nga ti ‘bi terê ti lo kue na yâ’ ni. (Diko 1 Timothée 4:​13, 15.) Mo nga kue mo peut ti gbu li na ndö ti aye so mo peut ti sara ti ngbâ ti yapu na yâ ti kua ti Jéhovah tongaso si “yingo aduti tongana wâ na yâ ti terê” ti mo. (aRom. 12:11; bâ note ti étude ni na Français na ndö ti tënë “Débordez de zèle grâce à l’esprit.”) Na tapande, mo peut ti mû ngoi mingi ti leke abungbi, ye so ayeke aidé mo ti dengi mê nzoni na ngoi ti abungbi ni. Wala na ngoi so mo yeke manda Bible, mo peut ti gue na mbeni ndo so ayeke kpô so a yeke ngangu na mo ape ti gbu li na ndö ti ye so mo manda. Na mo yeke bâ nzoni dä mingi. Gï tongana ti so mo yeke zia keke ti wâ na lê ti wâ si a mingo ape, mo doit ti ngbâ ti sara aye so ti ngbâ ti kiri singila na Jéhovah ndali ti ye so a futa ti zi azo nga na tanga ti anzoni ye kue so lo mû na mo. Nga, na yâ ti ayenga so aga kozo na Mémorial, mo peut ti gbu li na ndö ti anzoni ye so e wara ndali ti so e yeke aTémoin ti Jéhovah. Tongana mo sara ni, kite ayeke dä ape so a yeke aidé mo ti bâ na nene ni mingi ye so a futa ti zi azo, so ayeke ye so asara si mo yeke na nzoni songo na Jéhovah.

11-12. Tongana teti mbeni ngoi mo yapu na kua ti Jéhovah ape, a ye ti fa so lo zi yingo ti lo na ndö ti mo awe? Fa ndani so mo tene tongaso. (Bâ nga foto.)

¹¹ Tongana teti mbeni ngoi mo bâ so mo yapu na kua ti Jéhovah encore ape, découragé ape wala tene ape so lo zi yingo ti lo na ndö ti mo awe. Dabe ti mo na tënë so bazengele Paul atene na aChrétien ti Corinthe na ndö ti fango tënë, lo tene: “Même tongana mbi sara ni na bê use, kamême a zia mbeni ye na maboko ti mbi ti bata ni.” (1 aCor. 9:17). Lo ye lani ti tene nyen la?

¹² Na ambeni ngoi, Paul ayeke na nzara ti fa tënë ape. Me, lo leke lani na bê ti lo ti ngbâ ti fa tënë atâa so na ambeni ngoi lo yeke na nzara ti sara ni ape. Mo peut nga ti leke na bê ti mo ti sara tongaso. Leke na bê ti mo ti ngbâ ti sara ye so ayeke na lege ni, même tongana mo yeke na nzara ti sara ni ape. Tongaso, sambela Jéhovah ti ‘zia na yâ ti bê ti mo nzara ti sara ye nga na ngangu ti sara ye ni so.’ (aPhil. 2:13). Ngbâ ti sara aye so mo yeke sara ti voro Jéhovah. Tongana mo sara tongaso, mo peut ti hinga biani so a si na mbeni ngoi mo peut ti kiri ti ye Jéhovah mingi.

13. Tongana nyen la e peut ti ngbâ ti bâ wala e yeke “na yâ ti mabe”?

¹³ Ngoi na ngoi, a yeke nzoni e bâ terê ti e ti bâ wala e sara ye alingbi na atënë so ayeke na 2 aCorinthien 13:​5, so atene: “Ala ngbâ ti bâ yâ ti asarango ye ti ala ti bâ wala ala yeke na yâ ti mabe, ala ngbâ ti bâ terê ti ala nzoni wala ala wani ala yeke tongana nyen.” Ngoi na ngoi, e peut ti hunda terê ti e, e tene: ‘Eskê mbi yeke zia aye ti Royaume na kozo ndo na yâ ti fini ti mbi?’ (Mat. 6:33). ‘Eskê angia so mbi soro ti sara afa so mbi ke sioni ye?’ (Ps. 97:10). ‘Eskê mbi yeke maï siriri nga na beoko na popo ti aita?’ (aÉph. 4:​2, 3). Ngoi ti Mémorial ayeke mbeni ngoi so amû lege na e ti gbu li mingi na ndö ti ye so a futa ti zi azo so Jéhovah amû, a mû nga lege na e ti bâ yâ ti asarango ye ti e nzoni nga ti sara kue ti vivre ndali ti Christ me ndali ti e wani ape.c

ATABA SO AGUE YONGORO NA JÉHOVAH

14. Nyen la apeut ti sara si ambeni ita ti e aga encore na bungbi ape?

¹⁴ Ambeni ita azia ti ga na bungbi na peko ti so ala sara na Jéhovah be-ta-zo anze mingi wala même angu mingi. Ngbanga ti nyen? Ngbanga ti so “gingo bê ndali ti aye ti gigi” ahon ndö ti ambeni (Luc 21:34). Ambeni apika gere ti ala ndali ti mbeni tënë wala sarango ye ti mbeni mba ti ala Chrétien (Jacq. 3:2). Ti ambeni, ala sara mbeni kota siokpari na kamene asara ala ti hunda mungo maboko. Atâa nyen la asara si mo gue yongoro na kundu ni, nyen la mo peut ti sara? Ye so a futa ti zi azo nga na yengo so Jéhovah na Jésus aye na mo apeut ti pusu mo ti sara nyen?

15. Tongana nyen la Jéhovah afa so lo pensé na ataba so ague yongoro? (Ézéchiel 34:​11, 12, 16).

¹⁵ Gbu li na ndö ti tënë ti bê ti Jéhovah na ndö ti azo so ague yongoro na lo. Lo ke ala ape. Me lo yeke gi peko ti ataba ti lo so agirisa. Lo yeke mû na ala kobe nga lo yeke aidé ala ti kiri na lo. (Diko Ézéchiel 34:​11, 12, 16.) Eskê Jéhovah apeut nga ti sara tongaso ndali ti mo? En. So mo yeke diko article so afa so mo ye ti zia ngia na bê ti lo. Gï tongana ti so lo bâ lani anzoni ye na yâ ti bê ti mo na lo ga na mo na yâ ti tâ tënë, lo peut nga ti kiri na mo na mbage ti lo.

16. Nyen la apeut ti aidé ataba so agirisa ti kiri na Jéhovah? (Bâ nga foto.)

¹⁶ Brochure Kiri na Jéhovah atene pendere tënë ti dengo bê so: “Hinga na bê ti mo kue so Jéhovah ayeke mû maboko na mo tongana mo kiri na lo. Lo yeke mû maboko na mo ti hon ndö ti agingo bê, lo yeke sara si bê ti mo adë nga mo yeke wara siriri ti bê so zo ayeke wara tongana bê ti lo afâ ngbanga na ndö ti lo ape. Na pekoni bê ti mo ayeke pusu mo ti kiri ti voro Jéhovah legeoko na awakua ti lo.” Girisa nga ape so a-ancien aye mingi ti aidé mo. Ala peut ti duti “tongana ndo ti honde terê dä ndali ti pupu nga tongana ndo ti kpe dä ti bata terê ndali ti ngu-nzapa so apika na kota pupu.” (És. 32:2). Ti kiri singila ndali ti ye so a futa ti zi azo, hunda terê ti mo: ‘Aye wa la mbi peut ti sara ti “leke tënë” na Jéhovah?’ (És. 1:18; 1 Pi. 2:25). Na tapande, eskê mo peut ti gue na mbeni bungbi na Da ti Royaume? Eskê mo peut ti hunda mbeni ancien ti aidé mo ti kiri na Jéhovah? Lo peut ti leke ti tene mbeni zo amanda Bible na mo teti mbeni ngoi. Mo peut ti duti sûr so Jéhovah ayeke iri tufa na ndö ti aye kue so mo sara ti kiri na lo nga ti kiri singila ndali ti ye so a futa ti zi azo.

NYEN LA MO YEKE SARA?

17-18. Tongana nyen la e peut ti sara kua nzoni na ngoi ti e kozo na Mémorial ti ngu so?

¹⁷ Jésus atene so Jéhovah atokua lo ti mû fini ti lo “si zo kue so amä na bê na lo, a lingbi ti futi lo pëpe, me lo yeke na fini ti lakue lakue.” (Jean 3:16). Ye so a futa ti zi azo ayeke ye so na lege ni Jéhovah ayeke zi e na gbe ti siokpari na kuâ. E doit ti bâ ni tongana senge ye ape (aRom. 3:​23, 24; 2 aCor. 6:1). Alango so aga kozo na Mémorial amû lege na e ti gbu li na ndö ti ndoye so Jéhovah na Jésus afa na e, ndoye so adoit ti pusu e ti kiri singila na ala.

¹⁸ Tongana nyen la mo yeke fa so mo kiri singila ndali ti ye so a futa ti zi azo? Kiringo tënë ti mo apeut ti duti nde na ti ambeni zo. Me mo peut ti duti sûr so Jéhovah ayeke iri tufa na ndö ti a-effort ti mo nga na ti awakua ti lo kutu mingi so ‘angbâ na fini ndali ti ala wani mbeni pëpe, me ndali ti lo so akui ndali ti ala’.—2 aCor. 5:15.