KOTA MAMA-TENE NI: NYEN LA PASI AHON NDO NI TONGASO? A YEKE HUNZI LAWA?
Gbâ ti azo akui senge senge
Noelle, mbeni kete molenge ti wali, aye ka lani ti sara adessin mingi nga azo aye lo. Me mbeni lâ, na lakui, lo ngoro na peko ti da, na e hinga tongana nyen ape lo tï na yâ ti piscine ti ala, si lo kui. A ngbâ gi yenga use ti tene lo wara ngu osio lani.
Charlotte, Daniel, Olivia, Joséphine na ambeni nde ayeke na popo ti azo 26 so lani mbeni zo apika ala na ngombe na yâ ti ekole si lo fâ ala. Ngu ti ala ayeke na popo ti ngu 6 na 7. Ye so asi lani na gbata ti Connecticut, na États-Unis, na 14 décembre 2012. Na ngoi so azo abungbi ti dabe ti ala na amolenge so, Président Obama adi iri ti ala 20 na lo tene na azo ni so mawa ahon ndo ti ala so, lo tene: “Zia si mara ti ye tongaso akiri asi ape.”
Bano, so ayeke lani na ngu 18, alondo lani na Irak na ngu 1996, lo na babâ na mama ti lo, aga asara kodoro na Norvège. Mawa ni ayeke so na 22 juillet 2011, mbeni sioni zo afâ lo na ambeni mingi. Li ti azo kue so akui lani asi 77. Sioni zo ni so atene na baba so ni regretté so ni fâ azo mingi ape so.
E yeke mä tënë ti aye ti mungo vundu na bê ti azo so gbani gbani na yâ ti dunia kue. E mä tënë ti andao, afango zo, abira, ayengingo ti sese wala ti ngu so asuku si abuba ye kue, aye so aterroriste asara nga na ambeni ye ti ngangu tongaso so asara si vundu ahon ndo ti bê ti azo. Gbâ ti azo akui senge senge, nga ambeni mingi abâ pasi, mo hinga ndani ape.
Ambeni zo amû tënë ni abi na li ti Nzapa, ala tene so lo yeke pensé na azo ape. Ti ambeni, ala tene so Nzapa ahinga pasi ti e ni me lo ye ti sara ye oko ape ti zi e na yâ ni. Me ambeni nde atene ti ala so Nzapa la adiko asioni ye so ti si. Tongana a bâ ni nzoni, azo ayeke na apensé nde nde na ndo ni. Me na ndo wa la si e lingbi ti wara tâ kiringo tënë ni? Na yâ ti a-article so ayeke ga, e yeke bâ ande ye so Bible atene ti lo na ndo ti ye so ayeke na gunda ti pasi ti e azo. A fa nga na e tongana nyen la apasi ni so ayeke hunzi.