Nda ti apasi so kue gi nyen?

AYE TI PEKO TI SIONI KOMANDEMA TI AZO

Bible atene: “Tongana zo ti sioni akomande, azo abima.”​—aProverbe 29:2.

Na yâ ti gigi ti azo, gbâ ti azo akomande na ngangu, a sara si azo ti gbe ti ala abâ pasi mingi. Tâ tënë, azo ti komande kue la si akomande na ngangu ape. Ambeni aye mingi ti sara mbeni ye ndali ti azo ti ala. Ye oko, tongana ala ga gbia awe, ala bâ so nzoni ye so ala ye ti sara so atï na ngu ngbanga ti so ambeni zo na popo ti ala ayeke te tere nga ala ye ti ga gbia. Wala peut-être ala mû kota ndo ti ala ti wara go na ndo ti ambeni ye, sân ti pensé na azo ti gbe ti ala. Henry Kissinger, mbeni ngbene gbenyon-gbia ti États-Unis, atene tënë so lani, lo tene: “Mbaï ayeke mbeni tondo ti aye so azo asara na so atï na ngu awe, ayeke nga tondo ti aye so azo aleke lani na bê ti ala ti sara na so aga tâ tënë pëpe.”

Bible atene nga so “a yeke na bê ti zo so atambela ti fa lege na gere ti lo nga pëpe.” (Jérémie 10:23). Azo ayeke na ndara kue ape ti sara si aye ti ala kue atambela nzoni. Tongana zo akpa ti fa lege na gere ti lo wani ape, ka lo yeke fa lege na gere ti gbâ ti azo ti kodoro ti lo tongana nyen? Biani, ye so afa atene azo ti komande alingbi pëpe ti zi pasi na ndo ti sese so. Mbeni ye ni nga ayeke so tongana zo akomande amba ti lo nzoni ape, a yeke sara si azo ayeke bâ pasi mingi.

YE SO ABUNGBI TI VORONGO NZAPA TI WATAKA ASARA

“A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.”​—Jean 13:35.

Amokonzi-nzapa ti abungbi nde nde kue afa ye na ndo ti ndoye nga na dutingo beoko. Me ti tâ tënë ni, ala sara pëpe si azo ti ala aye amba ti ala azo ngangu ti kanga lege na atënë so aga na kangbi na popo ti azo. Ahon ti tene abungbi ti Nzapa amû maboko na azo ti duti na ndoye, mingi ni ka ala yeke na gunda ti akangbi so ayeke na popo ti azo, atënë ti kengo zo senge senge nga na ambeni bira so azo ayeke tiri na popo ti ala. Na yâ ti ndangba mbage ti buku ti lo so iri ni ayeke Le christianisme et les religions du monde, Hans Küng atene: “Atiri so azo ayeke tiri sioni sioni, atâa a yeke ndali ti poroso wala ndali ti so azo ni ayeke ti kodoro ti ala ape wala ti bungbi ti vorongo ti ala ape, tâ gi bungbi ti vorongo Nzapa la ayeke na pekoni kue.”

Mbeni ye ni nga ayeke so akota zo ti a-eglize mingi ayeda polele ti tene azo abungbi koli na wali na gigi ti mariage wala na ngoi so ala de ti sara mariage ape. Ala yeda nga ti tene akoli abungbi na amba ti ala akoli, wala awali abungbi na amba ti ala awali. Ye so asara si kobela amû ndo, azo atuku ngo, azo amû ngo sân ti tene ala wani aye. A sara nga si yâ ti ambeni mariage abuba, wala yâ ti asewa akangbi, na ye so asara si azo ayeke na vundu mingi.

SIOKPARI SO AYEKE NA YÂ TI TERE TI ZO NGA NA SIONI NZARA TI BÊ TI ZO

“Zo oko oko ayeke wara tara tongana nzara ti bê ti lo agboto lo na ahanda lo. Na pekoni, tongana nzara ti bê ni amû ngo awe, a yeke dü siokpari.”​—Jacques 1:14, 15.

Teti so e yeke na siokpari na tere ti e, e kue e yeke sara ka ambeni ye na lege ni ape, nga e yeke tiri ka na “anzara ti mitele ti e”. (aÉphésien 2:3). Me tongana asioni nzara ayeke na yâ ti bê ti e awe si lege ti sarango ni azi na e, a yeke tâ ngangu mingi ti kpe ni. Tongana e tï na yâ ni, ye ti pekoni ayeke duti ande tâ sioni mingi.

Wasungo mbeti Phiroz Mehta atene: “Mingi ti apasi so e yeke bâ so ayeke ndali ti anzara ti bê ti e wani, wala ndali ti so e ye ngia ahon ndo ni, wala ndali ti so e sara bê ti ye mingi.” Nyongo sämba ahon ndo ni, nyongo mbangi, sarango angia ti nginza, gingo koli wala wali kirikiri nga na ambeni ye nde abuba iri ti ambeni “kota zo” na asara si sewa ti ala, akamarade ti ala nga ambeni zo nde abâ pasi na pekoni. Teti so e yeke nzoni kue ape, e yeda na tënë ti Bible so, so atene: ‘Aye ti dunia kue ayeke bâ pasi si ala yeke dema tongana wali so ayeke dü molenge.’​—aRomain 8:22, Fini Mbuki, 2001.

YE SO ASIONI YINGO AYEKE SARA

Bible afa so Satan ayeke “Nzapa ti sese so” na so asioni yingo amû peko ti lo na ala yeke ngangu mingi.​—2 aCorinthien 4:4, La Sainte Bible en sango; Apocalypse 12:9.

Tongana ti Satan, asioni yingo ayeke sara ngangu na ndo ti azo na ala yeke handa ala. Ni la si bazengele Paul atene: “E yeke tiri na mitele na mênë pëpe, me e yeke tiri na angorogbia, akomandema, amokonzi ti dunia ti bingo so nga na asioni yingo so ayeke na yayu.”​—aÉphésien 6:12.

Asioni yingo aye ka ti sara pasi na azo, me tâ mbilimbili ye so ala ye ayeke ti sara si azo ague yongoro na Jéhovah Nzapa, Lo ti Nduzu Ahon Kue (Psaume 83:19). Ala yeke sara kusala na aye tongana magie, likundu, na aye ti nganga ti handa azo na ti wara ala na gbe ti ala. Ndani la si Jéhovah agboto mê ti e na mara ti asioni ye tongaso nga lo tene so ni yeke bata zo kue so ake Satan nga na asioni yingo.​—Jacques 4:7.

E YEKE NA “ALANGO TI NDA NI”

A sara ngu 2 000 tongaso awe, Bible atene tënë so, lo tene: “A yeke nzoni mo hinga tënë so: Na alango ti nda ni, angoi ti akpale so ayeke ngangu na zo ti kanga bê na yâ ni ayeke duti dä.”

Na fango ye so ayeke sara si gigi ni ayeke kpengba, lo ngbâ lo tene: “Azo ayeke duti ande azo so andoye gi tere ti ala wani, azo so andoye nginza, azo so abâ tere ti ala kota na ndo ti amba ti ala, azo ti baba, . . . azo so aye amba ti ala zo pëpe, azo so aye oko pëpe ti mä tere na amba ti ala, azo ti pango amba ti ala, azo so akanga nzara ti bê ti ala pëpe, azo so ayeke asioni zo, azo so andoye nzoni ye pëpe, azo ti kango amba ti ala, azo so li ti ala akpengba, azo so wuma ti ala ahon ndo ni, azo so andoye angia ahon ti ndoye Nzapa.” Biani, tâ mbilimbili ye so asara si azo ayeke bâ pasi mingi laso so ayeke so e yeke na “alango ti nda ni”.​—2 Timothée 3:1-4.

Na lege ti aye so kue e londo ti bâ so, a yeke polele so azo akpa pëpe ti zi pasi na ndo ti sese so, même tongana ala ye biani ti sara ni. Tongaso, na ndo wa la e lingbi ti gi mungo maboko? A yeke gi na mbage ti Jéhovah, lo so asara e. Lo tene lani so lo yeke “futi akusala ti Zabolo” ande nga na ti azo ti lo (1 Jean 3:8). Fade article ti peko afa ye so Nzapa ayeke sara ti futi aye kue so ayeke na gunda ti pasi ti azo.