E changé fason ti imprimengo ambeti ti e ti aidé “mara ti azo nde nde kue”

Jéhovah Nzapa aye si ‘mara ti azo nde nde kue .  . . awara tâ hingango ye na ndö ti tâ tënë.’ (1 Timothée 2:3, 4). Me, aita ti e nga na azo so e yeke fa tënë na ala ayeke tene gbâ ti ayanga ti kodro. Ngu oko oko, e yeke imprimé ambeti nduru na milliard use tongaso na ayanga ti kodro ni so. Aye wa la e sara ti sigi na ambeti na gbâ ti ayanga ti kodro? Nga tongana nyen la e yeke sara kua nzoni na a-offrande so e yeke wara?

Ando ti imprimengo ambeti ayeke mingi ape, me anzoni gbakuru ti kua ayeke dä

Na yâ ti angu 1980, e imprimé ambeti na yâ ti akodro ahon 40. Depuis na ngu ni so ti ga na ni, yeke yeke e changé fason ti imprimengo ambeti ti e, na laso e yeke imprimé ambeti gï na yâ ti akodro gumbaya. Me, na yâ ti oko ngu ni so, ayanga ti kodro so e yeke imprimé ka na ambeti ague na li ni fani omene. Nyen la e sara so amû lege na e ti imprimé ambeti na gbâ ti ayanga ti kodro, atâa so ando ti imprimengo ambeti ni ayeke mingi ape so? Mbeni raison ni ayeke so e yeke na anzoni gbakuru ti kua.

Afini imprimante a-aidé e ti imprimé gbâ ti ambeti na yâ ti kete temps. Agbene a-imprimante so e yeke na ni lani asara si ti imprimé ambeti amû ngoi mingi ndali ti so a hunda ti tene e changé ni ngoi na ngoi. Fadeso, grâce na anzoni ye ti kua so e yeke na ni, a sara si e yeke changé aye ti imprimengo na ambeti ni hio hio. E peut ti sara gbâ ti akua hio hio, atâa so aye ti imprimengo na ambeti na ayanga ti kodro so azo ayeke tene ni mingi ape ayeke gbâ ni ape. Ti tâ tënë ni, akua ni oko oko kue ahunda afini plaque ti imprimengo na ambeti. Na yâ ti anze 12 so ahon ade ti ninga ape, e dépensé nduru na million use ti dollar gï ndali ti aplaque ti imprimengo na ambeti.a Me, ti akete kete kua, e yeke sara kua na aye ti imprimengo na ambeti so ayeke ti électronique so abezoin aplaque si a imprimé na ni ape. Aye ti imprimengo na ambeti so, andu nga sarango kua na mbeni fini gbakuru ti kua so a iri ni laser, ti sigi na kete wungo ti ambeti so e yeke dépensé nginza mingi ape ti imprimé na ni nga e yeke buba aye ti kua ni kirikiri ape.

Na yâ ti angu ota so ahon, e dépensé ahon million bale-oko tongaso ti dollar na yâ ti dunia kue ti vo afini ye ti imprimengo na ambeti nga na aye ti sarango na reliure. Bâ tongana nyen la e sara kua na aye ni so ti sigi na aBible. Ândö, ti tene aita asigi na mbeni Bible na peko ti so a imprimé ni, ala bezoin ti sara ambeni ye 40, na tapande ti fü ni, ti coupé ni, ti leke ni, ti sara si aga lisse nga ti kpaka mbeni ye dä ti tene a za. Na ndö ni, na temps so e yeke sara aye ni so, e yeke déplacé aBible ni na maboko nga e yeke zia ni na ndö ti terê. Laso, gï aye bale-oko la aita ni abezoin ti sara ndali ti so afini gbakuru ti kua ayeke dä, ye so a sara si a bungbi mingi ti ambeni ye ni oko nga mbeni machine la ayeke yô aBible ni. Sigingo na aBible na fason ni so asara si aréduire ndambo ti akua ni. Ândö na filiale ti Japon, atelier ti reliure ayeke sigi na aBible 2 000 na yâ ti l’heure miombe. Laso, gï na yâ ti oko l’heure ni so, a yeke sigi na aBible 35 000 tongaso.

Batango apapier nga na sigingo na ambeti mingi ape asara si e bata nginza

Achangement so a sara so a fa na nduzu ge asara si e bata a-offrande so e yeke wara. Na tapande, so fadeso e yeke sara kua na akete imprimante nga e yeke sara gbâ ti achangement, a sara si e réduire wungo ti ambeti so e sara stock ni na yâ ti imprimerie oko oko. Gary, so asara kua na filiale ti États-Unis, atene: “Na début ni, a yeke ngangu na e ti comprendre so ti imprimé gï kete wungo ti ambeti fani mingi ayeke lani mbeni pendere idée la. Peut-être na bango ni ayeke nzoni ti imprimé gbâ ti ambeti fani mingi ape.” Lo kiri lo tene: “Na yâ ti akozo ngu so e komanse ti imprimé ambeni mbeti kete kete fani mingi, e mû dollar ahon 60 000 ti vo na aplaque ti imprimengo na ambeti nga ti payé asaleté ti apapier ni. Me, na yâ ti oko ngu ni so, e bata nginza ahon million oko na ndambo ti dollar so e peut fade ti dépensé ni ndali ti stockengo apapier nga na alivre so a imprimé ni.” Anginza so e bata ni a-aidé e ti sara na ambeni ye so ayeke important so e yeke na bezoin ni, na tapande lekengo aDa ti Royaume nga ti aidé aita na ngoi ti akota kpale.

So e stocké aye mingi ape asara si na yâ ti ambeni filiale ti e, place ayeke dä. Afiliale ni so apeut ti sara kua na ando ni so ndali ti bezoin ti ambeni Béthel. Na ndö ni, so ando so e yeke imprimé ambeti dä ayeke mingi ape, ye so asara si fani mingi e yeke réduire konongo ti afini filiale so e yeke leke ni. Na tapande, a yeke imprimé lani ambeti na filiale ti Grande-Bretagne, me na ngu 2018, a kiri na ni na filiale ti Europe centrale nga na ambeni ndo ti imprimengo ambeti ni nde. Ye so asara si e bata adollar million mingi ti leke na fini filiale so ayeke na Chelmsford, na Angleterre.

“Mo pensé na mbi”

Kota ye ni ayeke so, so e changé yâ ti fason so e yeke imprimé na ambeti ti e a-aidé azo ti ga nduru na Jéhovah. E peut fadeso ti imprimé ambeti na ayanga ti kodro mingi, même si e yeke gï na bezoin ti kete wungo ti ambeti. Na tapande, na Nouvelle-Calédonie nga na Wallis et Futuna, a yeke gï azo 35 000 tongaso la ayeke tene yanga ti Wallis. Me, na août 2024, e sigi na Mbeti ti Nzapa ti fini dunia kue na yanga ti Wallis. Selafina, mbeni wafango tënë so ayeke tene yanga ti Wallis, atene: “Atënë so mbi yeke diko ka na yâ ti Bible ti Français, mbi comprendre ni ape. Me, na temps so e wara lani Bible na yanga ti Wallis, ngu ti lê ti mbi ayuru. Mbi sambela mbi tene: ‘O Jéhovah, mo pensé na mbi. Mo yeke mbeni Nzapa so ayeke sara kangbi na popo ti azo ape.’”

Atâa so na République Démocratique du Congo gï azo 500 000 tongaso la ayeke tene yanga ti Sanga, a sigi na buku Ngbâ na fini lakue lakue! na yanga ti kodro ni so. Josué, so ayeke na congrégation so ayeke tene yanga ti Sanga, atene: “Mbi yeke sara effort mingi ti expliqué wala ti traduire ambeni tënë so ayeke na yâ ti livre ni na azo so mbi yeke manda Bible na ala, me parfois, ala yeke mä yâ ti atënë ni ape. Bê ti mbi adë so e wara livre ni na yanga ti Sanga. Fadeso, azo so mbi yeke manda Bible na ala ayeke mä yâ ti aye so mbi yeke fa nga mbi yeke expliqué na ala gbâ ti aye ape.”

E sigi na gbâ ti ambeti nga e kangbi ni na azo na ayanga ti kodro mingi ahon ti kozo. Grâce a-offrande so ala yeke mû wala ati so ala yeke mû na lege ti donate.jw.org la a-aidé e ti sara akua so. E tene merci mingi na ala ndali ti bibe ti mungo ye so ala yeke na ni.