Aye so a leke ti bata aye so angoro e ayeke ga na aye ti nzoni na aita ti e nga na sese

E aTémoin ti Jéhovah, e hinga so na yâ ti angoi so ayeke ga, Nzapa ayeke sara ande si sese aga nzoni nga lo yeke futi azo so ayeke buba ni (Apocalypse 11:18). Me, e nga kue e yeke sara ye so e peut ti bâ lege ti sese laso. Na tapande, e yeke leke ada so e yeke sara kua na ni ti voro Jéhovah dä na mbeni lege so ayeke buba pëpe aye so angoro e.

Ye so a iri ni initiative verte, wala aye so a leke ti bata aye so angoro e, ayeke aprojet so ndani ayeke ti réduire akpale ti aye so angoro e. Aye wa la e leke ti bata aye so angoro e? Nga tongana nyen la aye so a-aidé e ti sara kua nzoni na a-offrande ti e?

Mbeni solution ndali ti Da ti assemblée ti e

Kozo, a sara li ti Da ti assemblée ti Matola so ayeke na Mozambique na tôle nga terê ni ayeke gï polele tongaso. Ye so asara si tongana lâ asû, ndo ayeke chauffé mingi. Mbeni ita ti ndo ni atene: “Chauffengo ndo ni asara si gbiki ayeke sigi na terê ti e. Na hunzingo ti programme ni, aita ayeke sigi na loro ti tene pupu aya ala tongaso si terê ti ala adê.” Nyen la e peut ti sara ti tene aita ti e awara mbeni ndo so ayeke nzoni?

E décidé ti leke ambeni ye so apeut ti bata aye so angoro e: e sara installation ti aventilateur éolien, nga e zia mbeni ye so a iri ni isolation na li ti da ni ti tene ndo achauffé mingi ape. Ye ni so ayeke réduire chaleur so lâ ayeke tokua na yâ ti abâtiment ni nga aventilateur éolien ni asara si ndo adê. Aventilateur ni ayeke na bezoin ti courant ape me gï pupu, nga a yeke gboto chauleur tongaso si ndo ni adê. Ngere ti aventilateur ni ayeke dollar 50 (wala 31 440 FCFA).a

Ye so asara si pupu aya nzoni mingi na yâ ti Da ti assemblée ni. So pupu ni aya nzoni, a sara si humidité ayeke mingi ape nga amoisissure amû terê ti da ni ape. A sara nga si asioni pupu ayeke mingi ape, me gï oxygène la ayeke mingi. Ye ti peko ni ayeke so, azo so aga ayeke à l’aise. Ita-koli, so a sara tënë ti lo fade, atene: “Fadeso, tongana programme ti assemblée ni ahunzi, e yeke pressé ti sigi ape. Me, e yeke ngbâ na gbe ti da ni na ngoi ti wungo terê ti te ye nga ti sara lisoro na aita ti e. Dutingo na gbe ti da ni ayeke mo bâ mo tene e duti na gbe ti mbeni kota keke.”

E wara courant na lege ti lâ

E installé mbeni ye so a iri ni photovoltaïque (PV) na ndö ti abâtiment ti e nde nde na yâ ti dunia. Aye ni so ayeke sara kua na apanneau solaire ti changé lumière ti lâ ti tene aga mbeni courant. Ye so asara si e dépend mingi ape na courant so alondo na lege ti aye tongana pétrole, charbon nga na gaz. Asystème photovoltaïque ayeke buba yâ ti pupu mingi ape nga a-aidé e ti bata a-offrande so e wara.

Na ngu 2022, a installé système photovoltaïque (PV) na filiale ti Slovénie. A yeke produire 30 pourcent ti énergie so filiale ni ayeke na bezoin ni. Parfois, système ni so ayeke tokua courant mingi ahon ti so a bezoin ni, a peut ti tokua mbage ti courant ni so angbâ na yâ ti réseau ti akamba ti wâ ti gbata ni. Ngere ti système photovoltaïque (PV) ni so ayeke dollar 360 000 (wala 226 166 027 FCFA). Ti fadeso, filiale ni ayeke payé courant mingi ape, a yeke kiri ti payé ni ande na yâ ti ngu osio.

Na ngu 2024, a installé apanneau photovoltaïque nga na akota batterie na filiale ti Sri Lanka. Nginza so a sara na projet ni so asara dollar 3 000 000 (wala 1 877 855 514), nga système ni so acouvrir 70 pourcent ti courant so filiale ni ayeke na bezoin ni. Nginza so a bata ni apeut ti vo na apanneau na yâ ti ngu ota. Gï na yâ ti oko ngu ni so, e installé nga système photovoltaïque na filiale ti Pays-bas. Ngere ti système photovoltaïque ni so ayeke dollar 1 100 000 (wala 691 062 861 FCFA) na ayeke mû 35 pourcent ti courant na filiale ni. A yeke kiri ti payé ande système photovoltaïque ni na yâ ti ngu ngumbaya.

E installé nga système photovoltaïque na li ti abureau ti traduction nde nde so ayo na béthel ti Mexique. Bâ mbeni tapande ni: abureau ti traduction so ayo na béthel ti Tarahumara (Central) ayeke na Chihuahua. Na ngoi ti dê, température apeut ti descend na gbe ti 0 degré celsius, nga na temps ti ndowa apeut ti hon 40 degré celsius. Me, ndali ti so ngere ti courant ayeke cher, aita ni aye ape ti sara kua na asystème so ayeke sara si ndo achauffé wala ndo adê. Jonathan, mbeni ita-koli so ayeke sara kua na bureau ti traduction so ayo na Béthel, atene: “E yeke sara kua na acouverture nga na abongo so ane na ngoi ti dê nga e yeke zi afenêtre na ngoi ti ndowa.”

Na ngu 2024, e installé système photovoltaïque na yâ ti abureau ti traduction so ayo na Béthel. Ngere ti système photovoltaïque ni so ayeke dollar 21 480 (wala 13 494 572 FCFA), me nginza so a bata ni apeut ti vo ande na mbeni système photovoltaïque na yâ ti ngu oku. Fadeso, ngoi na ngoi, aita ti e apeut ti sara kua na asystème so ayeke sara si ndo achauffé wala ndo adê. Jonathan atene: “Anzere na e ti mû ngoi ti e ti sara akua mingi, nga e yeke wara aye ti nzoni mingi na peko ni. Na oko ngoi ni, anzere na e ti hinga so bungbi ti e ayeke sara kua na nginza nga na aye so angoro e na mbeni lege so ayeke nzoni mingi.”

Sarango kua na ngu-nzapa

Na Afrique, ambeni Da ti Royaume ayeke na nzoni ngu ape. Ye so asara si aita ayeke gue ayo akilomètre mingi ti gi ngu ti ga na ni na aDa ti Royaume ti ala. Ti ambeni Da ti Royaume ni, aita ayeke vo ngu so mbeni kota oto la ayeke livré ni, me a yeke cher nga ayeke buba aye so angoro e.

Ti tene aita ti e awara nzoni ngu, e installé atuyau na yanga ti atôle nga na akota réservoir ti ngu na yâ ti mingi ti aDa ti Royaume so ayeke na Afrique. Kozo ti installé aye ni so, aita ayeke gi ti bâ wala climat ti ndo ni alingbi na ni tongaso si ala peut ti installé asystème so alingbi na Da ti Royaume ni. Ti installé aye ni so na mbeni Da ti Royaume, ngere ni apeut ti duti na popo ti dollar 600 (wala 374 187 FCFA) nga na dollar 3 000 (wala 1 870 938 FCFA). Me, aye ni so a installé so asara si a réduire adépense so a yeke sara ndali ti aDa ti Royaume. Ye so asara si aita abezoin ti payé ngu encore ape.

Aye so a leke ti tene aita awara ngu na lege ti ngu-nzapa so aga na aye ti nzoni mingi. Noemia, mbeni ita-wali so ayeke na Mozambique, atene: “Kozo, e yeke gue lani ayo ti tene e wara ngu. Na temps so e si na salle, e fatigué kue. Nga ndali ti so warango ngu ason mingi, a yeke lani ngangu ti tene azo asukula maboko ti ala. Ti fadeso, zo kue apeut ti sukula maboko ti lo. E peut ti gue na Da ti Royaume ti wara aye ti nzoni na lege ti bungbi ni sân ti tene e fatigué. Merci mingi.”

Tongana nyen la bungbi ti e ayeke wara nginza ti sara na aprojet ni so? A yeke na lege ti a-offrande so a yeke mû na yâ ti dunia kue, so mingi ni a yeke mû na alege nde nde na lege ti donate.jw.org. Merci mingi na ala ndali ti a-offrande so ala yeke mû.