Aye ti sara ti tene e na aita e ngbâ akamarade

1. E peut ti wara atâ kamarade na ndo wa?

GIGI ayeke ngangu na lâ ti nda ni so. Me tongana e yeke na atâ kamarade ape, a yeke ngangu encore mingi. Jéhovah ahinga ni, ni la lo mû na e atâ kamarade na popo ti aita (Ps. 119:63). E yeke na yâ ti sewa ti awakua ti Jéhovah nga e ye terê na popo ti e.

2. E ye ti tene songo ti kamarade ti e na aita aduti tongana nyen?

² E ye ti hinga aita nzoni, me e ye nga ti duti akota kamarade so ayeke be-ta-zo. E yeke na yâ ti sewa ti awakua ti Jéhovah so aye lo nga na Jésus, na ndoye so asara si e yeke beoko (Jean 13:35). Me ti duti kota kamarade ti aita ayeke ga gï na bê ti lo ape, e doit ti sara effort. So e yeke mbilimbili-kue ape, na ambeni ngoi e yeke wara akpale so apeut ti sara si a yeke ngangu ti tene e na aita e ngbâ akamarade.

3. Ngbanga ti nyen la a peut ti duti ngangu ti ngbâ ti duti kamarade ti aita?

³ Peut-être e yeke nduru mingi na ambeni ita, ndali ti so aye so e na ala e ye ayeke oko, wala e pensé nga e sara ye tongana ala. Me a peut nga ti duti ngangu ti ngbâ ti duti kamarade ti ambeni ita. Tongana e mä terê na ndö ti ambeni ye ape apeut ti sara si a yeke ngangu na e ti ngbâ ti ye terê. Tongana pensé ti e nga na sarango ye ti e ayeke nde na ti ambeni mba ti e ayeke sara si e ye même ape ti duti na terê ti ala. Na ambeni ngoi, songo ti e na aita apeut ti duti tongana ti kozo ape ndali ti so terê ti ala ason ngangu wala ala yeke na kota vundu. Na yâ ti article so, e yeke bâ tongana nyen la tapande ti Jésus apeut ti aidé e ti tene e na aita e ngbâ kamarade na ngoi ti akpale. Me kozoni, zia e bâ tongana nyen la asarango ye ti aChrétien apeut ti aidé e ti ngbâ kamarade ti aita.

ASARANGO YE TI ACHRÉTIEN APEUT TI AIDÉ E TI NGBÂ KAMARADE TI AITA

4. Nyen la e peut ti sara ti kpengba songo ti e na aita?

⁴ Ti kpengba songo ti e na aita, e doit ti bâ anzoni ye so ala yeke sara. Tongana e duti na terê ti aita, e peut ti hinga apendere sarango ye ti ala. Bazengele Paul ayeke lani na nzara ti duti na terê ti aita. Lo tene na aita ti Thessalonique, lo tene: “E sara ngangu kue ti bâ lê ti ala.” (1 aThes. 2:17). Aita mingi abâ so nzoni fason ti kpengba songo ti akamarade ayeke ti tene ala duti ndo oko ti sara lisoro. E peut ti sara ni na fango tënë, na ngoi ti abungbi nga na akota bungbi. Me na ngoi so e na mbeni zo e wara kpale, gï ti duti na terê ti lo ayeke leke kpale ni ape.

5. Nyen la apeut ti aidé e ti ngbâ kamarade ti mbeni zo na ngoi so a yeke ngangu ti sara ni? Mû mbeni tapande ti fa ni. (aColossien 3:12).

⁵ Asarango ye ti aChrétien apeut ti aidé e ti ngbâ kamarade ti mbeni zo na ngoi so a yeke ngangu ti sara ni. (Diko aColossien 3:12.) Tongana e sara terê ti e kete, e kanga bê, e sara nzoni na zo nga e bâ mawa ti zo, e peut ti hon ndö ti akpale so apeut ti buba songo ti e na mbeni zo. Na tapande, gï tongana ti so huile ti oto asara si moteur ni angbâ ti tourné nzoni, asarango ye ti aChrétien ayeke aidé e ti ngbâ ti mä terê na amba ti e. Zia e bâ fadeso akpale ota so apeut ti buba songo ti e na aita. Na ngoi so e yeke sara ni, e yeke bâ tongana nyen la tongana e sara terê ti e kete tongana Jésus, e kanga bê, e sara nzoni na zo nga e bâ mawa ti zo, a yeke aidé e ti ngbâ tâ kamarade ti aita.

NA NGOI SO ALA MÄ TERÊ APE

6. Ngbanga ti nyen la a peut ti duti ngangu ti tene mo ngbâ kamarade ti mbeni zo tongana mo na lo amä terê ape?

⁶ Ndani so a yeke mbeni kpale. Tongana azo use amä terê ape, mingi ni zo oko oko ayeke bâ so bango ndo ti lo ayeke na lege ni. Imaginé so aita-koli use amä terê ape na ndö ti nzoni fason ti leke kapa ti fango tënë na yâ ti groupe ti ala. Zo oko oko ayeke sûr so kode ti lo la ayeke nzoni ni. Tongana mara ti ye tongaso asi, a yeke ngangu ape ti tene kete ye so asara si ala mä terê ape aga mbeni kota kpale na apeut ti sara si a yeke ngangu ti tene ala ngbâ akamarade. Ala peut ti zia si baba abuba yâ ti songo ti ala. Tongana ala leke kpale ni ape, ala peut ti sara ngonzo na terê ti mba. Tongana ngoi ayeke hon, ala peut ti kpe mba kpengo na a gue ngbii ala ngbâ akamarade encore ape. Ye so asi ndali ti mbeni kete ye so asara si ala mä terê ape.

7. Nyen la Jésus asara ti fa na adisciple ti lo so a yeke kota ye ti tene ala sara terê ti ala kete si ala mä terê?

⁷ Manda ti sara terê ti mo kete tongana Jésus. Lo fa lani na adisciple ti lo so ti mä terê, ala doit ti sara terê ti ala kete. Na ambeni ngoi, ala papa lani ti hinga zo so ayeke kota na popo ti ala. Tënë so agbu lani bê ti ala mingi, tongaso, ti tene Jésus a-aidé ala ti changé bango ndo ti ala, lo fa na ala so ala doit ti bâ amba ti ala kota ahon ala (Mat. 20:​25-28). Ti vrai ni, lo yeke fa lani na ala ti sara terê ti ala kete la. Même na bï so na ndade ni Jésus ayeke kui, lo ‘zia na ala tapande ni’ na lege so lo sara terê ti lo kete lo sara kua so mbeni zo ti kua la adoit ti sara ni: lo sukula gere ti ala (Jean 13:​3-5, 12-16). So lo sara tongaso, lo fa na ala tongana nyen ti bata songo ti kamarade so ayeke na popo ti ala. Tongana ala bâ amba ti ala kota ahon ala, a yeke duti ngangu na ala ape ti yeda na bango ndo ti amba ti ala même tongana a yeke nde na ti ala. A yeke duti nga ngangu na ala ape ti ngbâ akota kamarade même tongana ala mä terê ape.

8. Tongana nyen la sarango terê kete apeut ti aidé mo ti ngbâ kamarade ti mbeni ita so mo na lo amä terê ape? (aColossien 3:13). (Bâ nga afoto.)

⁸ Tongana nyen la ala peut ti ngbâ kamarade? Tongana mo sara terê ti mo kete apeut ti aidé mo ti kanga lê na ndö ti akete kete mango terê ape so ayeke na popo ti mo na aita nga ti pardonné amba ti mo na bê ti mo kue. (Diko aColossien 3:13.) Tongana mo sara terê ti mo kete ayeke aidé mo ti sara ngonzo ape, na tongana mo na mbeni zo amä terê ape, ala yeke ngbâ akamarade (Ps. 4:4). Même tongana mbeni zo atene na mo mbeni sioni tënë, girisa ape so e kue e yeke tene ka ambeni tënë so e regretté na pekoni (Zo-ti. 7:​21, 22). Mo peut ti hunda terê ti mo, mo tene: ‘Nyen la ayeke kota ye mingi na lê ti mbi, ti fa so mbi yeke na raison wala ti tene e ngbâ akamarade?’ Mo peut ti yeda na bango ndo ti mba ti mo ni. Hon na ndö ti tënë ni nga kiri na ndö ni encore ape.

9. Tongana a yeke ngangu ti tene mo na mbeni ita amä terê, tongana nyen la sarango terê kete apeut ti aidé mo? (aProverbe 17:9).

⁹ Sarango terê kete apeut nga ti aidé mo tongana a yeke ngangu ti mä terê na mbeni ita. Gi ti papa na lo ape ti fa so mo la mo yeke na raison. (Diko aProverbe 17:9; 1 aCor. 6:7.) Tongana mo leke na bê ti mo ti tene ala ngbâ kamarade ayeke aidé mo mingi. Aita mingi angbâ akamarade ndali ti so na nzoni bê ala leke tënë so ayeke na popo ti ala (Ps. 34:14). Mo peut ti tene: ‘E yeke akamarade aninga awe, eskê e peut ti sara lisoro na ndö ti ye so asi so?’ Yeda so mbage ti faute ni ayeke ti mo, tene na lo so mo hinga so bê ti lo ason na hunda pardon. Tongana kamarade ti mo ni nga ahunda pardon, sara terê ti mo kete yeda na ni (Luc 17:​3, 4). Girisa ape so ye so mo yeke gi ayeke pëpe ti fa zo wa la ayeke na raison wala zo wa la ayeke na faute, me a yeke ti leke tënë ni nga ti ngbâ kamarade.—aProv. 18:24.

TONGANA ASARANGO YE TI ALA AYEKE NDE NDE

10. Nyen la apeut ti sara si a yeke ngangu ti ngbâ kamarade?

¹⁰ Ngbanga ti nyen la a yeke mbeni kpale? A peut ti duti ngangu na e ti sara kamarade na aita so sarango ye ti e na ala ayeke nde nde nga ti ngbâ akota kamarade. Ambeni ayeke na asarango ye so ason bê ti e. Ambeni ayeke na anzoni sarango ye ape ndali ti so a sara ye na ala ândö na lege ni ape wala ndali ti so na ndo so ala kono dä, mingi ni azo ayeke fa atënë ti bê ti ala polele ape. Ambeni ayeke na sarango ye so e pensé ayeke na lege ni ape me a yeke ndali ti so mbeni zo asara ye na ala lani na lege ni ape. Wala e peut ti duti nde na mba ndali ti so amba ti e aye ti ala ti duti ndo oko na azo me e ye ti e ape.

11. Nyen la a-aidé lani Jésus ti ngbâ ti sara kamarade na azo so sarango ye ti ala ayeke nde na ti lo?

¹¹ Kanga bê tongana Jésus. Lo ngbâ lani ti sara kamarade na azo so sarango ye ti ala ayeke nde na ti lo. Na tapande, bazengele Jacques na Jean aye lani ti tene azo abâ ala kota na ngoi so ala hunda ti wara kota ndo na yâ ti Royaume (Marc 10:​35-37). Me Jésus asara lani terê ti lo kete lo zia kota ndo nga na kota kua ti lo na yayu, lo ga na sese (aPhil. 2:​5-8). Gbu li na ndö ti bango ndo use so. A yeke nde na mba mingi. Me Jésus akanga bê na Jacques na Jean nga na ambeni zo.

12. Nyen la a-aidé lani Jésus ti kanga bê na akamarade ti lo?

¹² Jésus ahunda lani ape na akamarade ti lo ti duti lakue na nzoni bango ndo. Lo hinga lani so tënë ti kota ndo agbu bê ti gbâ ti adisciple ti lo mingi gï tongana ti Jacques na Jean (Marc 9:34). Ngobo so Jésus akono na yâ ni ayeke lani oko na ti ala. Azo abâ na nene ni mingi tënë ti kota ndo, tongaso Jésus acomprendre lani ala. Me lo kanga bê na ala, lo zia ngoi na ala ti changé bibe ti baba nga na ti kota ndo so ala maï ni a sara angu mingi awe.—Marc 10:​42-45.

13. Tongana nyen la ti kanga bê ayeke aidé e ti ngbâ akamarade? (aÉphésien 4:2).

¹³ Tongana nyen la ala peut ti ngbâ akamarade? Ngbâ ti kanga bê, gi ti yeda na asarango ye ti akamarade ti mo so asara si bê ti mo ason (aProv. 14:29). E kue e yeke na asarango ye so gï e la e yeke na ni so mingi ni ayeke nga sioni ape. Tongaso, a yeke nzere na e tongana amba ti e akanga bê na e. (Diko aÉphésien 4:2.) A yeke nga kota ye ti tene e sara ye ahon ndö ni ape, e yeda na asarango ye ti amba ti e. Bâ effort so mbeni zo so ayeke kpô nga ayeke kamene ayeke sara ti duti na amba ti lo nga ti sara lisoro na ala. Na mbage, ngbâ ti kanga bê na mbeni zo so aye ti duti na azo nga so ayeke sara tënë mingi. E peut ti duti kota kamarade ti azo kue ape, me e doit ti girisa ape so même aChrétien so sarango ye ti ala ayeke nde na ti mba apeut ti sara kua nzoni ndo oko.

14. Tongana e kanga bê ayeke aidé e ti gi ti bâ nyen?

¹⁴ Kangango bê ayeke aidé e ti bâ gï anzoni sarango ye ti aita ti e. Tongana e sara ni, asarango ye ti e so ayeke nde na ti mba ayeke kanga lege na e ape ti duti akamarade. Na tapande, so Jacques na Jean apensé gï na ala apusu ala ti sara nzara ti kota ndo, me bango ndo ti ala ni afa so Royaume ayeke tâ ye na lê ti ala. Jésus abâ so ala yeke na mabe na lo gonda ala. Tongana e gi ti bâ anzoni sarango ye ti akamarade ti e, andâ e yeke mû tapande ti Jésus nga na ti Babâ ti lo Jéhovah la.

15. Zo wa la apeut ti aidé e ti ngbâ ti duti kamarade ti azo so sarango ye ti e na ala ayeke nde?

¹⁵ Kota ye ni, e peut ti sambela Jéhovah ti aidé e ti ngbâ kamarade ti azo so sarango ye ti e na ala ayeke nde. Gbu li na ndö ti aye so apeut ti sara si bê ti mo ason na terê ti mbeni zo, na sambela ti tene bê ti mo ason ape. Girisa ape so Jéhovah so acréé e ahinga so e kue e yeke nde nde. Tongaso na ngoi so mo yeke sambela, duti sûr so Jéhovah ahinga ye so mo bezoin ni ti ngbâ ti gbu ngangu. Nga tongana mo bâ so a yeke ngangu na mo ti kanga bê, hunda Jéhovah ti mû na mo yingo vulu ti aidé mo ti kanga bê.—Luc 11:13; aGal. 5:​22, 23.

NA NGOI SO AITA AYEKE BÂ PASI

16. Akpale wa la e peut ti wara na ngoi so aita ayeke bâ pasi?

¹⁶ Ngbanga ti nyen la a yeke mbeni kpale? Na ngoi so aita ayeke bâ pasi wala ala yeke na vundu, ala peut ti tene mbeni tënë wala ti sara mbeni ye so ason e. Na tapande, ala peut ti ye ti duti gï ala oko, bê ti ala apeut ti son hio hio wala même ala peut ti sara ambeni ye so ahon gbungo li ti e (Job 6:​2, 3). A peut ti si so aita awara akpale so e hinga ni ape, tongaso a peut ti duti ngangu na ala ti sara ye tongana ti so e pensé ala doit fade ti sara.

17. Nyen la mo manda na lege ti fason so Jésus asara ye na Bartimée so lê ti lo abuba?

¹⁷ Sara ye na nzoni bê nga bâ mawa ti zo tongana Jésus. Lo sara ye lani na nzoni bê nga lo bâ mawa ti azo so ayeke bâ pasi, même azo so lo tingbi terê na ala kozo ape. Na tapande, bâ tongana nyen la lo sara ye na mbeni koli so iri ti lo ayeke Bartimée so ayeke bâ ndo ape. Na ngoi so Bartimée amä a tene Jésus ayeke hon, lo dekongo ti tene Jésus abâ lo. Ambeni zo so ayeke na popo ti gbâ ti azo ni ahunda na Bartimée ti duti kpô, me so lo ye gï ti tene Jésus asava lo, lo kiri lo dekongo ngangu. Eskê sarango ye ti lo so ason lani bê ti ambeni zo? Peut-être! Me “mawa ti lo” asara Jésus, so ti tene Jésus abâ mawa ti Bartimée mingi na lo ye ti aidé lo (Mat. 20:34; Marc 10:​46-52). Lo sara tënë na Bartimée na nzoni bê na lo gonda lo ndali ti mabe ti lo. Nga Jésus azi lê ti lo na lege ti miracle.

18. A yeke nzoni mo sara ye na akamarade ti mo so ayeke bâ pasi tongana nyen? (1 aThessalonicien 5:14).

¹⁸ Tongana nyen la ala peut ti ngbâ akamarade? Sara ye na nzoni bê nga bâ mawa ti zo. Apendere sarango ye so ayeke aidé mo ti “sara tënë so adë bê” ti aita so ayeke bâ pasi wala so ayeke na vundu. (Diko 1 aThessalonicien 5:14.) Girisa ape so tâ kamarade ayeke nduru ti aidé mba ti lo, mbilimbili na “angoi ti vundu.” (aProv. 17:17). Mara ti kamarade tongaso ayeke zia terê ti lo na place ti azo so ayeke bâ pasi. Lo yeke sara nga kue ti dë bê ti ala, ti kpengba ala nga ti sara ambeni ye ti mû maboko na ala.

19. Tongana nyen la e peut ti sara ye na nzoni bê nga ti bâ mawa ti zo? (Bâ nga afoto.)

¹⁹ Ambeni ye wa la e peut ti sara ti fa so e sara ye na nzoni bê nga e bâ mawa ti zo? Tâ tënë, mo peut ti kaï ye so ayeke son mbeni ita ape, me mo peut ti gi ti comprendre atënë ti bê ti lo nga na ye so asi na lo (Mat. 7:12; 1 Pi. 3:8). Mä lo na ngoi so lo yeke fa ye so lo yeke hon na yâ ni. Tongana a yeke nzoni ti sara ni, tene atënë so ayeke dë bê ti lo (aProv. 12:25). Tene ape so mo hinga ye kue so asi na lo atâa so mo hinga ni ape (aProv. 18:13). Kanga bê na lo nga ku pëpe ti tene lo sara ye tâ na lege ni.—aÉph. 4:32.

20. Mo ye ti duti mara ti kamarade wa?

²⁰ E bâ na nene ni akamarade so e yeke na ni na yâ ti bungbi ti Jéhovah. Me e kue e yeke mbilimbili-kue ape nga asioni ye asi na mingi ti e. Ni la na ambeni ngoi, e kue e yeke tene mbeni tënë wala e yeke sara mbeni ye so ason bê ti amba ti e. Tongaso, a yeke nzere na e mingi tongana aita asara terê ti ala kete, ala kanga bê na e, ala sara ye na e na nzoni bê, ala bâ mawa ti e nga ala sara kue ti ngbâ akamarade ti e. Tongaso, e ye ti sara kue ti duti nga mara ti kamarade tongaso ndali ti ala.