Aye so e peut ti sara ti ngbâ be-ta-zo na Jéhovah tongana e wara akpale

1-2. Nyen la apassé na ngoi so Jésus ayeke fa ye lani na Capernaüm?

MBENI lâ, Jésus ayeke fa ye na mbeni groupe ti azo na Capernaüm. Lo tene: “Tongana ala te nyama ti terê ti Molenge ti zo pëpe na ala nyon mênë ti lo pëpe, ala yeke na fini na yâ ti ala pëpe.” Lo kiri lo tene: “Zo so ate nyama ti terê ti mbi na lo nyon mênë ti mbi, lo yeke na fini ti lakue lakue, na mbi yeke zingo lo na kuâ ande na ndangba lango ni.” (Jean 6:​53, 54). Tënë so anzere lani na mingi ti adisciple ti Jésus ape. Ala tene: “So tënë ti songo bê la. Zo wa si alingbi ti mä ni?”—Jean 6:60.

² Azo so bê ti ala ason mingi azia lani ti mû peko ti Jésus. Eskê ala yeke lani na mabe na lo ape? Ên-ën. Ndali ti so kozo ti tene ye so asi, aye so Jésus asara nga na atënë so lo tene apika bê ti adisciple ti lo mingi. Ala tene: “Biani, koli so ayeke Prophète so a fa kozoni awe so lo yeke ga na dunia so.” (Jean 6:14). Tongaso, a yeke polele so adisciple ti Jésus ayeke lani na mabe na lo. Me na ngoi so lo tene mbeni tënë so ala mä yâ ni ape, ala ngbâ be-ta-zo na lo ape.

3. Na ngoi so abazengele amä atënë ti Jésus, ala sara nyen? Ngbanga ti nyen? (Bâ nga foto.)

³ Abazengele asara ti ala ye nde. Na ngoi so Jésus ahunda ala atene eskê ala nga kue ala ye ti zia lo? Pierre akiri tënë, atene: “Seigneur, e gue ande na mbage ti zo wa? Mo yeke na atënë so amû na zo fini ti lakue lakue. E mä na bê nga e hinga so mo yeke Lo so ayeke nzoni-kue so alondo na Nzapa.” (Jean 6:​68, 69). Bâ so Pierre atene ape so lo na tanga ti abazengele ni amä yâ ti atënë ti Jésus ni nzoni. Atâa so ala mä yâ ti atënë ni na ngoi ni so ape, ala soro ti ngbâ be-ta-zo na Jésus. Ngbanga ti nyen? Ngbanga ti so ala yeke lani sûr so Jésus ayeke “Christ ti Nzapa.”—Luc 9:​20, 35.

4. Aye wa la apeut ti sara si a yeke ngangu na e ti duti be-ta-zo na Jéhovah?

⁴ Gbâ ti aye apeut ti sara si a yeke ngangu na e ti duti be-ta-zo na Jéhovah. Na tapande, e yeke sara ye tongana nyen tongana a changé fason so e mä na yâ ti mbeni versê wala a changé fason so e yeke fa na tënë? Wala e yeke sara ye tongana nyen tongana a yeke ngangu na e ti comprendre ndani so Jéhovah azia si e wara mbeni ngangu kpale? Tongana mbeni kota kamarade ti e so ayeke Chrétien ason bê ti e wala mbeni zo so e ne lo asara ye na e na lege ni ape, a peut nga ti sara si a yeke ngangu na e ti duti be-ta-zo na Jéhovah.

5. Ngbanga ti nyen la e doit ti duti na kpengba mabe? Mû mbeni tapande ti fa ni. (aColossien 1:23).

⁵ Ti ngbâ be-ta-zo na Jéhovah na yâ ti angangu kpale, e doit ti duti na kpengba mabe na lo. Na tapande, e peut ti haka mabe ti e na mbeni keke. Tongana a lu ni na nzoni ndo ape si gunda ni alï sese nzoni ape, mbeni ngangu pupu apeut ti kinda ni. Legeoko nga, e doit ti duti na kpengba mabe si e ngbâ be-ta-zo na Jéhovah na ngoi so e wara akpale tongana ti so e londo ti sara tënë ni. Tongaso, e doit ti kpengba mabe ti e tongaso si e ngbâ be-ta-zo na Jéhovah atâa nyen la asi. —1 aCor. 15:58; diko aColossien 1:23.

6. Nyen la a-aidé lani abazengele ti ngbâ be-ta-zo na Jésus?

⁶ Nyen la a-aidé lani abazengele ti ngbâ be-ta-zo na Jésus na ngoi so gbâ ti azo adö lo azia? Abazengele ahinga lani na bê ti ala kue so Jéhovah la alingbi ti tene a voro lo ndali ti so lo la lo créé aye kue. Jésus ayeke molenge ti Nzapa so ayeke na “atënë so amû na zo fini ti lakue lakue” nga Jéhovah ayeke mû maboko na lo. E manda gbâ ti aye na ndö ti Jéhovah so apeut ti aidé e ti ngbâ be-ta-zo na lo na ngoi so e wara akpale. E yeke bâ ambeni ota: (1) Jéhovah la acréé aye kue. (2) Bible alondo na Jéhovah. (3) Jéhovah ayeke mû maboko na awakua ti lo laso. Tongana e hinga biani so aye ota so ayeke tâ tënë, e yeke ngbâ be-ta-zo na Jéhovah atâa kpale wa la e wara.

JÉHOVAH LA ACRÉÉ AYE KUE

7. Apocalypse 4:11 adabe ti e na nyen? Tënë ni so apeut ti aidé e tongana nyen na ngoi so e wara akpale?

⁷ Diko Apocalypse 4:11. Versê so adabe ti e so Jéhovah la acréé aye kue. Tënë so a-aidé e ti hinga so gï lo oko la lo lingbi ti tene e voro lo. Tongana e gbu nga li na ndö ti kota ngangu ti lo, e yeke hinga na bê ti e kue so lo peut ti aidé e na yâ ti akpale kue so e wara. Me dunia ti Satan asi singo na atënë ti mvene so apeut ti sara si e yeke na kite so Nzapa ayeke dä. Awandara atene so fini abâ gigi gï tongaso. Tongana e hinga na bê ti e kue ape so Jéhovah la acréé aye kue nga so lo ye e, e peut ti komanse ti duti na kite so lo yeke dä nga e peut ti duti na kite so lo yeke aidé e na ngoi so e wara akpale.—aHéb. 11:6.

8-9. Tongana mo komanse ti dë kite so Jéhovah la acréé aye kue, nyen la a yeke nzoni mo sara? (Bâ nga foto.)

⁸ Tongana mo komanse ti dë kite so Jéhovah la acréé aye kue, sara ye hio. Gi na yâ ti ambeti ti e asango so afa ndani so mo peut ti mä na bê so Jéhovah la acréé aye kue. Mo peut ti wara gbâ ti asango na ndö ti tënë ni so na yâ ti brochure La vie a-t-elle été créée? nga na Cinq questions à se poser sur l’origine de la vie. Ambeni ye so afa so Jéhovah la acréé aye kue ayeke na yâ ti molongo ti a-article “A créé ni crééngo?” so ayeke na ndö ti jw.org. Jessica, mbeni ita-wali so ade maseka so ayeke na États-Unis, atene: “Na peko ti so mbi diko brochure Origine de la vie, mbi hinga na bê ti kue so aye so afa so mbeni Zo so ayeke na ndara ayeke dä so acréé aye kue. Mbi hinga aye ni so kozo awe, me so mbi kiri mbi diko ni a-aidé mbi ti duti na kite oko ape. Gbâ ti azo awara nga aye ti nzoni na lege ti buku Y a-t-il un Créateur qui se soucie de vous? Peut-être mo diko ni awe, me mo peut ti kiri ti diko ni.

⁹ Na ngoi ti mandango ye ti mo ti peko, mo peut ti manda ye na ndö ti aye so afa so Nzapa ayeke dä. Aye so mo yeke wara ayeke aidé ande mo ti duti sûr so Jéhovah ayeke dä nga ayeke aidé mo ti hinga lo nzoni (aRom. 1:20). Na ndö ni, mo peut ti sara kua na aye so mo manda ti aidé azo so ayeke na kite so Nzapa ayeke dä. Kota ye ni ayeke so gbâ ti aye so Jéhovah acréé afa so lo yeke dä.

Nebula: IAC/RGO/David Malin Images; susu na oto: Mercedes-Benz USA; avion: Kristen Bartlett/University of Florida

JÉHOVAH LA AYEKE WA TI BIBLE

10. Ngbanga ti nyen la Bible ayeke kota ye mingi na lê ti e? (2 Timothée 3:​16, 17).

¹⁰ Diko 2 Timothée 3:​16, 17. Atënë ti yâ ti Bible ayeke atënë so Jéhovah aye ti tene azo ahinga ni. A kiri tënë na akota hundango ndo ti e nga afa na e ye so bê ti Jéhovah aye nga na ye so lo ye ti tene e sara. E mä na bê so Jéhovah la ayeke Wa ti Bible, ye so asara si Bible ayeke kota ye mingi na yâ ti fini ti e. E ye ti comprendre atënë so ayeke na yâ ti Bible nga ti sara kue ti sara ye alingbi na ni.

11. Nyen la afa na mo so Nzapa la ayeke Wa ti Bible?

¹¹ Ngbanga ti nyen la e hinga biani so Jéhovah la ayeke Wa ti Bible? Araison ni ayeke mingi. Na tapande, atënë so Bible atene na ndö ti aye so asi ândö ayeke tâ tënë (Luc 3:​1, 2). A fa nga aye so ayeke na yâ ti dunia na lege ni (Job 26:7). Bible ayeke mbeti so a kangbi ni mingi ahon tanga ti ambeti kue atâa so Satan asara kue ti futi ni. Azo 40 tongaso la asû ni na yâ ti angu 1600 tongaso, me atënë ti yâ ni kue ague oko. Atâa so a sû Bible asara angu mingi, awango ti yâ ni angbâ ti aidé azo kutu mingi laso (aProv. 13:20; 15:21; Mat. 7:12). Nga gbâ ti aprophétie ti Bible aga tâ tënë awe asara si e yeke na confiance na Bible (Jos. 23:14). Biani, e hinga na bê ti e kue so Bible alondo na Nzapa.

12. Nyen la a yeke nzoni e sara tongana e komanse ti duti na kite so Bible alondo na Nzapa?

¹² Nyen la a yeke nzoni e sara tongana e komanse ti duti na kite so Bible alondo na Nzapa? A yeke nzoni e sambela ndali ni nga e doit ti sara ye alingbi na asambela ti e ni. Mä tënë so mbeni ita-koli so ade maseka, so iri ti lo Jordan, so akono na yâ ti sewa ti aTémoin, atene: “Mbi yeke yeda ka gï tongaso ape na aye kue so a fa na mbi. Mbi bezoin ti gbu li na ndö ti aye ni mbi wani. Ti vrai ni, na ambeni ngoi mbi yeke sûr ape na aye so mbi mä nga mbi diko. Me tongana mbi yeke sûr na mbeni ye ape, mbi yeke sara kue ti sara recherche na yâ ti ambeti ti e ti wara kiringo tënë na ahunda so mbi yeke na ni nga ti zi kite so ayeke na li ti mbi.” Tongana e ngbâ ti dabe ti e na ndani so e mä na bê so Jéhovah la ayeke Wa ti Bible, mabe ti e ayeke kpengba mingi.—1 aCor. 3:​12, 13.

JÉHOVAH AYEKE MÛ MABOKO NA AZO TI LO LASO

13. Nyen la a yeke nzoni e sara tongana e komanse ti duti na kite na ndö ti azo so ayeke awakua ti Nzapa laso?

¹³ Tongana e yeke na kite so aTémoin ti Jéhovah ayeke awakua ti Nzapa so lo yeke mû maboko na ala laso, a yeke nzoni e sara hio ti zi ni. Ti zi kite so na li ti e, e peut ti hunda terê ti e na mara ti ahunda so: ‘Ti vrai ni, azo wa la ayeke sara kue ti sara ye alingbi na aye so Bible ahunda? Bungbi wa la aye so azo ni amä na bê na ni alondo na Bible?’ (2 Tim. 4:​3, 4). ‘Azo wa la ayeke sara ye so bê ti Jéhovah aye laso?’—Mat. 7:​20, 21.

14. Tongana nyen la Jéhovah ayeke sara kua na aTémoin ti lo ti sara si Matthieu 24:14 aga tâ tënë?

¹⁴ Na ndö ti sarango ye so bê ti Nzapa aye laso, e peut ti hunda terê ti e, e tene: ‘Azo wa la ayeke sara kua ti fango tënë so Jésus atene lani atene a yeke sara ni na lâ ti nda ni?’ (Mat. 24:14). Kiringo tënë ni ayeke polele. Nzapa ayeke sara kua na awakua ti lo, aTémoin ti Jéhovah, ti sara kua so. Gï e aTémoin ti Jéhovah la e yeke fa nzoni tënë ti Royaume ti Nzapa na yâ ti akodro ahon 240. E yeke sara kua so ahon ngu 100 oko awe na gbe ti komandema ti Royaume. Kua ti fango tënë ayeke lakue kua so ayeke kota mingi na lê ti awakua ti Nzapa.—Mat. 28:​19, 20.

15. Tongana nyen la aTémoin ti Jéhovah ayeke mû gonda na iri ti Nzapa laso? (Matthieu 6:9; Ésaïe 43:10).

¹⁵ Diko Matthieu 6:9 nga na Ésaïe 43:10. Iri ti Nzapa wani, Jéhovah, ayeke na ndö ti e nga a nzere na e so a iri e aTémoin ti Jéhovah. Mingi ti azo ti dunia laso ahinga ape so iri ti Nzapa ayeke Jéhovah. Me e sara ngangu ti sigi na mbeni Bible so iri ti Nzapa ayeke na yâ ni tongana ti so ayeke na yâ ni lani na tongo nda ni. A yeke wara iri ti Nzapa na yâ ti Mbeti ti Nzapa ti fini dunia ahon 7000.

16. Ngbanga ti nyen la e peut ti tene so aTémoin ti Jéhovah ayeke sara ye alingbi na commandement so ayeke na Jean 13:​34, 35? (Bâ nga foto.)

¹⁶ Diko Jean 13:​34, 35. Laso azo mingi amä terê na mba ape nga ala ke terê. Me awakua ti Jéhovah ayeke tongaso ape. Ala ye terê biani nga ala yeke beoko. E londo na ando nde nde na yâ ti dunia, ngobo ti e nga ndo so e kono dä ayeke nde nde. Me e yeke sara kue ti duti na siriri na mba nga ti ye terê. Eskê mo gue na mbeni congrégation so ayeke nde na ndo so mo yeke dä awe? Tongana mo sara ni, mo bâ awe so aita aye terê nga ala yeke beoko atâa ala yeke na ndo wa. Ye so afa polele so ti vrai ni Jéhovah ayeke sara kua na aTémoin ti lo laso ti sara ye so bê ti lo aye. Tongana e girisa ape so Jéhovah ayeke mû maboko na aTémoin ti lo laso ayeke aidé e ti ngbâ be-ta-zo na lo na angoi ti kpale.

ZIA JÉHOVAH LÂ OKO APE

17-18. Akpale wa la e peut ti wara? Tënë wa la e peut ti tene na bê ti e kue?

¹⁷ Na ngoi ti nda ni ti dunia so, e yeke wara akpale (2 Tim. 3:​1, 13). Ambeni ye apeut ti si so asara si e gi bê ti e. Bungbi ti Jéhovah apeut ti mû ambeni desizion so e mä yâ ni nzoni ape. Wala e peut ti bâ so mbeni ita acomprendre e ape wala mbeni ita ason bê ti e. Peut-être e hinga ape tongana nyen ti leke kpale ti e ni wala e comprendre ape ndani so mbeni ye asi.

¹⁸ Atâa so e peut ti sara vundu wala e gi bê ti e ndali ti aye so ayeke si na e, e peut lakue ti ngbâ be-ta-zo na Jéhovah. Ngbanga ti nyen? Ngbanga ti so e hinga so Lo la lo créé e, lo yeke Wa ti Bible nga so lo yeke mû maboko na e aTémoin ti lo. Tongana ti so Pierre atene lani na Jésus, e kue e peut ti tene na Jéhovah, e tene: “E gue ande na mbage ti zo wa? Mo yeke na atënë so amû na zo fini ti lakue lakue.”