Jéhovah afa ye na mbi ngbene ye so mbi ngbâ maseka

Mbi yeke kiri ande na ndö ti tënë so, me kozoni zia mbi sara na ala tënë na ndö ti mbi wani. A dü mbi na Calgary na Canada, na ngoi ti Use bira so amû sese kue. Na hunzingo ti ngu 1940, Donald Fraser so ayeke mbeni pionnier so ade maseka, aga ti fa tënë na yanga-da ti e, Mama ayeda ti manda Bible. Lo ye atâ tënë so lo manda so mingi. Me, lo yeke na angangu kpale ti seni so akanga lege na lo ti sara ye mingi na yâ ti bungbi. Me lo gue na li ni juska lo wara batême na ngu 1950. Mawa ni ayeke so gï ngu use na pekoni, lo kui. Babâ ti mbi ayeke Témoin ape na ngoi ni so, me lo yeda ti tene mbeni ita-koli amû diskur na ngoi ti lungo kuâ ni.

Ambeni lango na peko ti lungo kuâ ni, Alice, mbeni ita-wali mbakoro so a soro lo ti gue na yayu, atisa mbi ti gue na mbeni bungbi. Lo hinga mbi ndali ti so mbi na Mama e yeke gue lani na abungbi ti nda-yenga na ngoi so lo yeke na ngangu ti gue. Mbi hunda babâ ti mbi wala mbi peut ti gue, lo yeda na lo tene mbi na lo la e yeke gue gï fani oko awe ndali ti so lo ye ti tene merci na ita-koli so asara diskur ti kuâ ti mama ti mbi. Na bï ni so, a sara lani Ekole ti kusala ti aChrétien nga na Bungbi ti kusala; abungbi ni so anzere lani na babâ ti mbi mingi. Lo mû desizion ti ga na abungbi ti milieu ti yenga kue. Yeke yeke, lo komanse ti ga na ambeni bungbi.

Na angoi ni so, ita so ayeke mû li ni na Ekole ti kusala ti aChrétien ayeke di iri ti azo kue so ayeke sara devoir. Na zo oko oko, so ayeke dä so amä iri ti lo, ayeke tene: “Mbi la.” Na mbeni bï, mbi hunda ita ni ti di iri ti mbi na ngoi ti bungbi ti peko. Ita ni agonda mbi. Me lo fa na mbi ape nda ti mungo iri ni.

Mbi hinga lani ape so, so mbi hunda ti tene a di iri ti mbi na ngoi ti bungbi aye ti tene a yeke hunda ande na mbi ti sara diskur na ngoi ti bungbi ni. Mbi ye lani gï ti tene a di iri ti mbi. Na yenga ti peko, a di iri ti mbi na terê ti mbi anzere, mbi tene: “Mbi la.” Na peko ti bungbi ni, aita agonda mbi. Ambeni yenga na pekoni, a mû na mbi mbeti so mbi sara tënë ni fade na tongo nda ti article so.

Li ti mbi aga lani kirikiri, na ngoi ni so a yeke hunda na a-élève ti sara diskur so aninga penze ngbonga omene ti si na miombe. Devoir so ayeke gï dikongo Bible ayeke lani dä ape. Babâ ti mbi a-aidé mbi ti leke diskur ni nga mbi tara pekoni fani 20 kozo ti sara ni. Na pekoni, ita so ayeke mû li ni amû na mbi nzoni wango. Tongana angu ayeke hon, Jéhovah afa ye na mbi na lege ti babâ ti mbi, na lege ti aita so ahinga ye nga na lege ti bungbi ti lo.

JÉHOVAH ANGBÂ TI FA YE NA MBI

Alice, so mbi sara tënë ti lo fade, afa lani na mbi tongana nyen ti fa tënë. Na angoi ni so, a wa lani e ti diko versê ota na azo so e wara ala na fango tënë na pekoni ti mû na ala mbeni buku. Tongana a yeke tour ti mbi ti fa tënë na mbeni zo, Alice ayeke fa terê ti lo, lo komanse lisoro ni na lo hunda na mbi ti diko kozo versê ni. Na pekoni, mbi yeke hunzi lisoro ni na lege so mbi diko use versê ni nga na ota ni nga mbi yeke mû mbeti na zo ni. Ambeni ngoi na pekoni, mbi wani mbi hinga ti to nda ti lisoro na mbeni zo na kozo tingbingo terê ti mbi na lo. Na peko ti so babâ ti mbi awara batême na hunzingo ti ngu 1954, lo ngbâ ti fa na mbi tongana nyen ti fa tënë. So lo oko la lo yeke bata mbi, lo sara kue ti fa ye na mbi na ndö ti Jéhovah. Abungbi nga na fango tënë ayeke lani kota ye mingi na lo. Mbi hinga lakue so e doit ti gue na abungbi nga ti fa tënë.

Na ekole, mbi hinga lani ye mingi ape, me ambeni ye so mbi manda na yâ ti angu 12 so mbi sara na ekole a-aidé mbi na yâ ti gigi ti mbi kue. Na tapande, mbi manda lani ye mingi na ndö ti mathématiques nga na grammaire ti anglais. Aye so mbi manda na ndö ti kode ti sungo ambaï a-aidé mbi juska laso na yâ ti kua so mbi yeke sara na Ndokua ti sungo ambeti.

Azo ayeke hunda ka mbi ndani so mbi ye mozoko mingi. Babâ na mama ti mbi aye lani mozoko mingi. Na ngoi so mbi yeke na ngu mbasambala, mbi komanse ti manda ti pika piano, me zo so ayeke fa ni na mbi abâ so mbi hinga ti pika ni nzoni ape. Tongaso, lo hunda babâ ti mbi ti tene mbi zia ti manda ni. Mbi comprendre lo ndali ti so na ngoi ni so mbi ye lani mandango ye ni ape.

Ambeni nze na pekoni, babâ ti mbi awara mbeni zo nde ti fa ni na mbi. Na ngoi ni so, mbi manda pikango piano nga na hengo bia na mbi sara ni nzoni. Na ngoi so mbi dë kete, mbi yeke na pendere go nga mbi sö benda na yâ ti ambeni mandako. Mbi manda lani mozoko ti wara diplôme tongaso si mbi peut ti fa mozoko na azo ti wara nginza ti bâ lege ti abezoin ti mbi na ngoi so mbi yeke sara kua ti ngoi kue. Me mbi ga ti bâ so, mbi doit ti mû ngoi mingi ti manda ye na ndö ti mozoko nga ti leke terê ti mbi ndali ti a-examen. Tongaso, mbi zia lege ti mandango ye ni na mbi komanse kua ti pionnier permanent. A yeke lani na ngu 1963.

KUA TI PIONNIER AGA NA NGIA

Na peko ti so mbi sara kua ti pionnier ngu oko, a tokua mbi pionnier spécial na Kapuskasing na Ontario. Mba ti mbi pionnier spécial ni so iri ti lo ayeke Daniel Skinner, ngu ti lo ahon ti mbi fani use. Lo fa na mbi tongana nyen la a yeke leke aye na yâ ti congrégation. A soro mbi ti duti na yâ ti Komite ti kusala na ngoi so mbi yeke na ngu 20. Tongaso, mbi yeke lani na gbâ ti aye ti manda. A nzere na mbi mingi so bungbi ti Jéhovah aluti mingi na ndö ti fango ye na aita-koli so ade maseka. Tongana ala sara ye alingbi na aye so a fa na ala, Jéhovah apeut ti sara kua na ala même na ngoi so ala de maseka mingi.

Na ambeni ngoi, a yeke ngangu mingi ti vivre na Kapuskasing. Na ambeni ngoi dê ayeke mingi, na ambeni ngoi ndowa ayeke mingi. Mbi na Dan e fa tënë na mingi ti ando ni. Me mbeni ye so anzere na mbi mingi ayeke warango terê ti mbi na Ita-wali Linda Cole, so na pekoni aga wali ti mbi.

Linda ayeke mbeni ita-wali so ayapu na fango tënë nga lo yeke na gbâ ti anzoni vizite. Lo mû ye na zo mingi, lo ye azo nga lo ye mingi ti duti na terê ti azo. Mama ti lo Goldie ayeke lani be-ta-zo. Me babâ ti lo Allen aye aTémoin ti Jéhovah ape. Atâa so kue, Goldie ayeke gue lakue na Linda nga na aita ti lo John na Gordon na abungbi nga lo fa na ala tongana nyen ti fa tënë. A si na mbeni ngoi, Goldie, Linda, John nga na Gordon, ala kue aga apionnier. Ambeni ngu na pekoni, Allen ayeda ti ga Témoin ti Jéhovah na lo sara kua mingi na yâ ti congrégation.

Na ngu 1965, a tisa mbi ti gue na Ekole ti kusala ti Royaume na Béthel na Canada ti manda ambeni ye encore, ekole ni aninga nze oko. Na ekole ni, a hunda na mbi ti sû demande ti guengo na Ekole ti Galaad. Mbi pensé lâ oko ape so mbi lingbi ti sara kua ti missionnaire, me mbi sû demande ni. A tisa mbi na klase 42 ti ekole ni. Kâ, azo so ayeke fa ye na e ayeke sû ka rapport na ndö ti e. Na yâ ti kozo rapport so a sû na ndö ti mbi, a wa mbi ti sara kue ti manda ye mingi na ndö ti bungbi ti Jéhovah na ngoi so mbi yeke na ekole ni. So mbi yeke lani gï na ngu 21, a yeke lani tâ nzoni wango mingi ndali ti mbi.

Mbeni ye so e manda lani na Ekole ti Galaad ayeke na ndö ti sarango lisoro na azo ti sango, na tapande, azo ti radio, azo ti télé nga na azo ti mbeti-sango. Mbage so anzere lani na mbi mingi. Me mbi hinga lani ape tongana nyen la mbage so ayeke aidé e na yâ ti angoi so ayeke ga tongana ti so mbi yeke fa ande.

A TOKUA MBI NA SÉNÉGAL

Ambeni lango na peko ti so e wara diplôme ti e, mbi na Michaël Höhle, so ayeke mba ti mbi missionnaire e gue na Sénégal, ndo so a tokua e dä na Afrika. Na ngoi ni so, awafango tënë ayeke 100 tongaso na yâ ti kodro ni.

Na peko ti so mbi sara anze mingi kâ, a tisa mbi ti sara kua na Béthel lango oko yenga oko oko. Mbeni chambre ti da ti amissionnaire la a sara na bureau ti Béthel ni. Atâa so ndo ni akono ape, Ita Emmanuel Paterakis so ayeke serviteur ti filiale adabe ti mbi ti girisa lâ oko ape so Béthel ayeke sara kua na iri ti bungbi ti Jéhovah na yâ ti kodro ni. Mbeni lâ, Ita Paterakis amû desizion ti tokua lettre na amissionnaire kue ti kpengba ala. Na angoi ni so, a yeke lani kete ye ape ti sara copie ti ambeti na ngere ni ayeke ngangu, tongaso e doit ti pika alettre ni oko oko kue na machine ti pikango na mbeti. Kua ni ayeke lani ngangu ndali ti so e doit ti sara même faute oko na yâ ti alettre ni ape.

Kozo ti tene mbi kiri na da ti mbi ti missionnaire na lakui ni so, Ita Paterakis amû na mbi mbeni enveloppe. Lo tene: “David, bungbi atokua na mo mbeti.” Na ngoi so mbi si na yanga-da, mbi zi yanga ti enveloppe ni na mbi wara mbeni oko ti alettre so mbi pika fade. Ye so apusu mbi ti ne bungbi ti Jéhovah atâa Béthel ti ndo so mbi yeke dä ayeke kete wala ayeke kota.

Mbi sara kamarade na gbâ ti awafango tënë ti congrégation ti mbi nga mbi mû ngoi ti duti na terê ti ala na asamedi na lakui, a yeke angoi so anzere na mbi mingi. Mbi na ala e ngbâ ti sara lisoro juska laso. So mbi hinga Français a-aidé mbi na ngoi so mbi yeke sara vizite ti afiliale na yâ ti dunia.

Na ngu 1968, mbi na Linda e fiancé. Anze mingi na pekoni, mbi gi ti wara mbeni kua so amû ngoi ti mbi mingi ape tongaso si mbi na Linda e peut ti sara kua ti pionnier legeoko na Sénégal, me azo so ayeke mû azo na kua aye ti mû gï azo ti ndo ni me awande ape. Na nda ni, na peko ti so mbi kiri na Canada, e sara mariage na a tokua e apionnier spécial na Edmundston, na Nouveau-Brunswick, so ayeke mbeni kete gbata na terê ti Québec.

E SARA KUA TI PIONNIER NA NOUVEAU-BRUNSWICK NGA NA QUÉBEC

Awafango tënë ayeke lani na yâ ti gbata ni ape nga kete wungo ti azo la ayeke manda Bible. Mingi ti azo ni ayeke lani aCatholique. A sara mbeti na terê ti ada kue a tene e bezoin aTémoin ti Jéhovah ge ape. Na ngoi ni so, e gi bê ti e mingi ape na ndö ti atënë ni so, tongaso e fa tënë na ada kue. Yenga oko oko, mbeni bungbi ti Eglize Catholique ayeke tene tënë so na yâ ti mbeti-sango ti ndo ni: “Zia e gue e gi aTémoin ti Jéhovah e hunzi na ala.” A-Témoin ayeke lani gï osio na gbata ti Edmundston. A yeke Victor na Velda Norberg nga mbi na Linda, tongaso e hinga so e la ala yeke sara tënë ti e so!

Mbi yeke girisa lâ oko ape kozo vizite so surveillant ti circonscription asara na e. Na peko ti so lo sara yenga oko na terê ti e, lo tene: “Peut-être oko ye so ala peut ti sara na ngoi so ala yeke ge ayeke ti aidé azo ti changé bango ndo ti ala na ndö ti aTémoin.” Ti londo na ngoi ni so ti gue na ni, a yeke ye so e leke na bê ti e ti sara na aga na nzoni ye. Yeke yeke azo akomanse ti bâ kangbi so ayeke na popo ti aTémoin ti Jéhovah so asara terê ti ala kete na akota zo ti Eglize Catholique so ayeke azo ti baba. Laso, mbeni kete congrégation ayeke na yâ ti gbata so.

Na peko ti so e sara ngu oko tongaso na yâ ti kete gbata so, a tokua e na yâ ti mbeni kota congrégation na Québec. E sara nze omene kâ, aita ti kâ ayeke yamba azo mingi; na pekoni, a tisa e ti sara kua ti circonscription.

Na yâ ti angu 14 so aga na pekoni, e sara kua na yâ ti acirconscription na kete gbata ti Québec. Angoi ni so anzere lani na e mingi! Kua ti fango tënë na Québec aga na anzoni ye. Na yâ ti acongrégation so e sara vizite dä, fani mingi e yeke bâ azo ti yâ ti sewa so ayeke manda Bible aga aTémoin ti Jéhovah.

E DABE TI E NA AITA SO AYEKE BE-TA-ZO

Aita ti Canada so ayeke tene Français ayeke lani na apendere sarango ye. Ala yeke sara ye na lege ni, ala yeke na ngia nga ala yapu na kua ti Jéhovah. Me a yeke lani lakue kete ye na ala ape ti yeda na tâ tënë ndali ti so azo ti sewa ti ala apeut ti kanga lege na ala ngangu. Ababâ na amama ti ambeni ita so ade kete atene na ala atene: “Tongana aTémoin ti Jéhovah angbâ ti manda Bible na mo, mo yeke quitté yanga-da ti mbi.” Me ala ngbâ be-ta-zo na Jéhovah atâa so a kanga lege na ala. Ala zi kamene na lê ti Jéhovah.

Mbi ye nga ti sara tënë na ndö ti apionnier permanent nga na apionnier spécial so afa tënë na Québec. Mingi ti ala alondo na ambage ti Canada. Na ndö ti so ala doit ti manda Français, ala doit nga ti gi ti hinga ye na ndö ti ngobo nga na fason ti gbungo li ti azo ti ndo ni so afango ye ti Eglize Catholique alï ala ngangu.

Mingi ni a yeke tokua lani apionnier spécial na yâ ti aterritoire so ayo, so wafango tënë oko ayeke dä ape. So azo ti ando ni aye aTémoin ape, a yeke lani ngangu ti wara mbeni ndo ti lango dä nga a yeke même lani ngangu mingi ti wara mbeni kua so amû ngoi ti ala mingi ape. Même ala so asara mariage fini fini adoit ti lango na groupe ala osio, omene wala miombe tongaso si ala dépensé nginza mingi ape. Ala peut lani ape ti loué da ala wani. Apionnier so ayeke fa lani tënë mingi. Tongana ala komanse ti manda Bible na mbeni zo, ala yeke sara kue ti aidé zo ni. Fadeso, awafango tënë ayeke mingi na Québec, tongaso mingi ti apionnier ague na ando so a bezoin awafango tënë mingi dä.

Na ngoi so e yeke sara vizite na acongrégation, mingi ni e na amaseka la e yeke fa ka tënë na samedi na ndapre. Ye so asara si e hinga ala nzoni nga e hinga akpale so ala tingbi na ni. Ambeni maseka ni ayeke fadeso amissionnaire na akodro-wande nga ambeni nde ayeke sara akua nde nde na yâ ti bungbi ti Jéhovah.

Na ngoi ni kâ, ambeni congrégation ayeke na nginza ti vo na e kobe wala ti payé lege na e ape, ye so asara si na ambeni ngoi e yeke na kpale ti nginza. Tongana ye tongaso asi, e zia bê ti kue na Jéhovah e hinga so lo hinga kpale ti e ni. Lo zia e lâ oko ape. Ye so asara si lakue e wara ngangu ti gue na vizite ti peko.

AYE SO MBI MANDA NA TERÊ TI AITA

Na ngoi so mbi yeke lani na Québec, lege azi na e ti fa tënë na radio, na télé nga na yâ ti ambeti-sango na a nzere na mbi mingi so mbi manda lani ye na ndö ni na ngoi so mbi yeke na Galaad. Fani mingi, a hunda ti tene mbi na Ita Léonce Crépeault e sara kua, lo kue lo yeke surveillant ti circonscription nga lo hinga nzoni mingi ti sara kua na azo ti sango. Na ngoi so lo yeke sara tënë na azo ti sango, lo yeke tene ka lo tene: “Akota zo, mbi na ita ti mbi so e yeke gï asenge zo ti kua, e hinga ye mingi na ndö ti publicité ape. Me e ye ti fa na azo so aTémoin ti Jéhovah ayeke sara mbeni kota bungbi ti ala, ye kue so ala peut ti sara ti aidé e, e yeke nduru ti yeda na ni.” Ndali ti so lo sara terê ti lo kete, mingi ti azo ti sango ni ayeke ka nduru ti mû maboko na e.

Mbi wara ye ti nzoni mingi na Galaad nga na terê ti Ita Léonce. Ambeni ngoi na pekoni, filiale ahunda na mbi ti sara kua na terê ti Ita Glen How, oko ti a-avocat ti e na ndö ti mbeni tënë so ayeke kota mingi so a yeke tene ni na yâ ti asango. A yeke mbeni kota pasa ti sara kua na terê ti lo. Lo yeke mbeni zo so ayeke sara ye na mbeto ape na ngoi so lo yeke gbu koko ti e na gbele ngbanga nga lo ye Jéhovah mingi.

Na ngu 1985, e sara kua ti circonscription na ouest ti Canada, nduru na ndo so babâ ti mbi alango dä na amû lege na e ti mû maboko na lo. Me nze ota na pekoni, lo kui. E sara kua kâ juska na ngu 1989 na li ti e akpe ti bâ so a tisa e ti ga amembre ti sewa ti Béthel ti États-Unis. So aye ti tene so e doit ti zia kua ti e so e sara ni nduru na ngu 19. Na yâ ti angu ni so kue, e lango na ando nde nde nga aita nde nde atisa e ti te kobe legeoko na ala. E tene merci mingi na aita so ayamba e nga na ala so e na ala e te kobe place oko.

E GUE NA ÉTATS-UNIS

Na ngoi so e si na Brooklyn, mbi sara lani kua na Ndokua ti kusala na mbi tene merci lakue ndali ti aye kue so mbi manda kâ. Mbeni oko ti aye so mbi manda ayeke so mbi doit ti gi ti hinga anzene nzene ye kue na ndö ti mbeni ye kozo si mbi tene mbi comprendre ni. Na ngu 1998, a tokua mbi na Ndokua ti sungo mbeti, kâ mbi ngbâ ti manda ye mingi. Teti angu mingi, mbi wara lani pasa ti mû maboko na Ita John Barr so lo yeke coordinateur ti ndokua ni. Mbi bâ na nene ni mingi afango ye so mbi wara kâ nga na ngoi so mbi na ita ni e sara kua maboko na maboko. Lo yeke mbeni zo so ayeke na anzoni sarango ye mingi.

A nzere na mbi mingi ti sara kua maboko na maboko na aita so asara terê ti ala kete na Ndokua ti sungo mbeti. Ala yeke sambela lakue na hingango so yingo vulu ti Jéhovah la ayeke mû maboko na ala ti sara kua ti ala nzoni, me a yeke na ngangu ti ala wani ape.

Mbi na Linda e wara pasa ti sara vizite na aita be-ta-zo na yâ ti akodro ahon 110. A nzere na e mingi ti bâ ndoye ti amissionnaire, ti amembre ti Komite ti filiale nga na ti ambeni ita so ayeke na yâ ti kua ti ngoi kue. Na e bâ tongana nyen la aita ayapu na yâ ti kua ti fango tënë nga na vorongo Jéhovah na yâ ti kodro so bira ayeke dä, kpale ti nginza ayeke dä nga a kanga lege na kua ti e dä. Jéhovah adoit ti ye ala mingi.

Na yâ ti angu ni so kue, Linda ayeke mbeni zo so amû maboko na mbi mingi na yâ ti kua ti mbi. Lo ye azo mingi nga lo yeke gi alege kue ti mû maboko na azo. Lo hinga nzoni mingi ti fa tënë na alege kue so azi na lo nga lo ga na azo mingi na yâ ti tâ tënë, même aita so adë na lege ti yingo. Linda ayeke mbeni cadeau so Jéhovah amû na mbi. So ngu ti e ague na li ni, e kiri singila mingi na amaseka so a-aidé e na ngoi so e yeke voyagé nga so ayeke mû maboko na e ti bâ lege ti abezoin ti e.—Marc 10:​29, 30.

Tongana mbi gbu li na ndö ti angu 80 so ahon, mbi kiri singila mingi na Jéhovah. Bibe ti mbi ague oko na ti zo ti sungo psaume so atene: “Nzapa, mo fa ye na mbi ngbene ye so mbi ngbâ maseka, nga juska laso mbi ngbâ ti fa tënë ti akusala ti mo so adö bê.” (Ps. 71:17). Mbi ye ti ngbâ ti sara tongaso na yâ ti gigi ti mbi kue.