Leke terê ti mo ndali ti akpale so apeut ti si na peko ti batême ti mo

1-2. Aye wa la e peut ti sara ti leke terê ti e ndali ti akpale so e aChrétien e peut ti wara? Mû mbeni tapande ti fa ni.

E HINGA so e yeke wara akpale na yâ ti dunia ti Satan so. Jésus atene na adisciple ti lo, atene: “Aye so asara si zo apika gere ti lo adoit gï ti ga.” (Mat. 18:7). So e hinga tongaso, e doit ti leke terê ti e ti ku na akpale, ambeni kpale ni apeut ti duti na popo ti e na amba ti e aChrétien.

² Gbu li na ndö ti tapande so. Bungbi ti Jéhovah awa e lakue ti leke terê ti e ti ku na akota kpale tongana ngu so asuku amû ndo. E yeke leke terê ti e tongana nyen? Kozo ni, e yeke gi ti hinga kpale wa la apeut ti si na ndo so e yeke dä. E yeke sara tongaso mbilimbili tongana e ga na ndo ni fini fini. Tongana e hinga kpale wa la apeut ti si, e peut ti bâ ye so e peut ti sara ti bata terê ti e tongana kpale ni asi (aProv. 21:5). Legeoko nga, a yeke nzoni e hinga mara ti akpale wa la apeut ti si na peko ti so e wara batême tongaso si e hinga ye ti sara tongana a si. Tongana e sara tongaso, e yeke wara lege ti gbu ngangu nga ti ngbâ nduru na Jéhovah (Ps. 17:5). Tongaso, zia e bâ akpale ota so apeut ti si nga tongana nyen la e peut ti leke terê ti e ndali ni.a

MBENI ITA ASON BÊ TI MO

3. Kpale wa la e peut ti wara na yâ ti congrégation?

³ Na ngoi so mo ga lani na mbeni bungbi ti kozoni na mo bâ ndoye so ayeke na popo ti awakua ti Jéhovah, a sara mo tongana nyen? Eskê mo hinga biani so mo wara tâ tënë awe? (Jean 13:35; aCol. 3:12). A yeke tënë ti bê ti Blancab lani la. Me na peko ti so lo wara batême, mbeni ye asi so lo pensé apeut ti si ape. Lo tene: “Mbeni ita-wali asara ye na mbi na nzoni bê oko ape. Mbi bâ nga so lo yeke tene sioni tënë ti ambeni ita. Mbi ku terê ti mbi na ye so ape; mbi manda so aTémoin ti Jéhovah ayeke sara ngangu ti duti na siriri na popo ti ala nga ti ye terê.” Ti vrai ni, aita ti mo ayeke sara ngangu ti duti na anzoni sarango ye ti aChrétien, me awakua ti Jéhovah ayeke mbilimbili-kue ape (aÉph. 4:​23, 24; 1 Jean 1:8). Tongaso na ambeni ngoi, mbeni ita apeut ti tene mbeni tënë wala ti sara mbeni ye so ason bê ti mo (Jacq. 3:8). Mawa ni ayeke so mara ti akpale tongaso asara si ambeni ita azia ti sara na Jéhovah.

4. Nyen la apeut ti aidé e ti leke terê ti e ti ku na ngoi so mbeni ita ayeke son bê ti e? (aÉphésien 4:32).

⁴ Nyen la mo peut ti sara fadeso ti leke terê ti mo ti ku na ngoi so mbeni ita ayeke son bê ti mo? Sara si wango so ayeke na aÉphésien 4:32 aga sarango ye ti terê ti mo. (Diko ni.) Tongana mo sara kue ti ngbâ ti sara ye na nzoni bê nga ti bâ mawa ti zo, kpale ti mango terê ayeke duti mingi ape na popo ti mo na aita. Leke na bê ti mo ti pardonné aita na bê ti mo kue na ngoi so ala sara afaute. Nyen la apeut ti aidé mo ti sara ni? Girisa ape so fani mingi mo hunda Jéhovah ti pardonné mo ndali ti afaute so mo sara, na mo kiri singila so lo sara ni na bê ti lo kue (Mat. 6:12). Tongana mo gbu li na ndö ti so Jéhovah apardonné mo fani mingi, a yeke duti ngangu na mo ape ti pardonné aita.

5. Mama-ndia wa ti Bible la apeut ti aidé e na ngoi so mbeni ita ason bê ti e? (aProverbe 19:11). (Bâ nga afoto.)

⁵ Diko aProverbe 19:11. Bible atene so tongana mbeni zo ason bê ti e, ti hinga ti bâ yâ ti aye nzonic apeut ti sara si ngonzo agbu e hio ape. Mama-ndia so a-aidé lani Rima, so awara batême ade ti sara ngu mingi ape. Lo tene: “Tongana ambeni ita atene mbeni tënë wala asara mbeni ye so ason bê ti mbi, mbi yeke pensé na aProverbe 19:11. Mbi yeke gbu li na ndö ti aye so asi na ala ândö nga na ye so asara si ala tene tënë wala ala sara ye na nzoni bê ape. Mbi yeke hunda nga ala ti tene mbi na ala e fa tënë legeoko. A aidé mbi ti hinga ala nzoni mingi.” So nzoni wango la. Mo peut ti gi ti hinga aita ti mo nzoni fadeso. Tongana mo comprendre ala nzoni, a yeke duti ngangu na mo ape ti pardonné ala tongana ala sara mbeni ye so ason bê ti mo.

6. Nyen la apeut ti aidé e ti duti kamarade ti aita?

⁶ Nyen la apeut ti aidé mo ti duti kamarade ti aita? Gi ti bâ anzoni sarango ye ti ala. (Bâ aProverbe 10:12; aRom. 12:10; aPhil. 2:​2, 3.) Bâ tongana nyen la sarango tongaso a-aidé Mark, mbeni ita-koli so awara batême fini fini. So lo mû ngoi mingi ti duti na terê ti aita ti congrégation, lo komanse ti bâ awokongo ti ala. Nyen la a-aidé lani Mark ti tene awokongo ti aita asara si lo pika gere ti lo ape? Lo tene: “Mbi ga ti bâ so afaute ti aita ayeke kete mingi tongana a haka ni na asioni ye so azo ti dunia so ayeke sara. A sara si mbi bâ so a yeke nzoni ape ti tene mbi mû ngoi ti gbu li na ndö ti akete faute so aita ti mbi ayeke sara. Tongaso, mbi komanse ti gi ti bâ gï anzoni sarango ye ti ala.” Tongana mo nga kue mo sara tongaso, mo na aita ayeke duti akamarade.

NZARA TI AYE SO MO DÖ NI MO ZIA ASARA MO

7. Nyen la apeut ti gue na e ti sara nzara ti aye so e dö ni e zia?

⁷ Na ngoi so mo manda tâ tënë pan, kite ayeke dä ape so a nzere na mo ti dö aye ti sioni dunia ti Satan ti zia. Mo peut ti pensé, mo tene: ‘Zo apeut ti kiri ti sara nzara ti aye so tongana nyen?’ Ye oko, na ngoi so mo wara kpale, mo peut ti pensé na ambeni ye so mo sara ândö kozo ti voro Jéhovah. Na mo peut ti komanse ti ye aye ni so encore. (Bâ Nombre 11:​4-6.) Na tapande, ambeni ita apeut ti ke mbeni kota kua so asara si azo ahinga ala mingi me so amû ngoi ti ala mingi. Ambeni ayeke lani na akota kamarade so ake ti sara kamarade na ala na peko ti so ala komanse ti manda Bible. Peut-être ambeni atiri ti hon ndö ti ambeni sioni sarango ye so anzere na ala. A yeke duti ye ti mawa mingi tongana mbeni Chrétien azia lege na mbeni ye so lo yeke sara ândö ti gue na lo yongoro na Jéhovah. Nyen la mo peut ti sara tongaso si atâa nyen la asi, mo kiri ape na terê ti aye so mo dö ni mo zia awe?

8. Nyen la e manda na lege ti tapande ti Abraham na Sara?

⁸ Na yâ ti Bible, e peut ti diko mbaï ti akoli na awali so ayeke lani be-ta-zo so apeut lani ti regretté aye so ala dö ni ala zia. Na tapande, Abraham na Sara amä yanga ti Jéhovah na ala quitté pendere gbata ti Ur, so kota gbagba ayeke na terê ni, na ala gue ala vivre na yâ ti atente (aHéb. 11:​8, 9). A yeke polele so ala peut lani ti pensé na anzoni ye so ayeke na Ur. Me “tongana ala ngbâ fade ti zia bê ti ala na” ndö ni, wala tongana ala ye mingi aye ti ândö, bê ti ala apeut ti pusu ala ti kiri na terê ni. Ye oko, ala zia li ti ala na ndö ti aye so ayeke na devant.—aHéb. 11:​15, 16.

9. Tongana nyen la bazengele Paul abâ lani aye so lo dö ni lo zia ti sara na Jéhovah? (aPhilippien 3:​7, 8, 13).

⁹ Bazengele Paul asara achangement na yâ ti fini ti lo ti sara na Jéhovah. Kozo ti ga Chrétien, lo manda ye na gbe ti Gamaliel, kota zo ti fango Ndia so azo ane lo mingi (Kus. 22:3). Paul apeut lani ti ga mbeni kota zo ti nzapa ti aJuif (aGal. 1:​13, 14). Me na peko ti so lo yeda na nzoni tënë, lo dö aye so kue lo zia. Me eskê gigi ayeke lani ngangu na lo ape na peko ti so lo ga Chrétien? Ên-ën. A pika lo, a kanga lo nga azo ti mara ti lo wani ake lo (2 aCor. 11:​23-26). Tongana lo zia li ti lo gï na ndö ti akpale so nga lo haka gigi ti lo na ti kozo, lo peut ti tene so gigi ti lo ti ândö ayeke nzoni ahon ti so lo ga Chrétien. Me Paul azia li ti lo na ndö ti kota pasa so lo yeke na ni ti ga disciple ti Christ Jésus nga na ndö ti gloire so angbâ ti ku lo na devant. Paul ahinga na bê ti lo kue so achangement so lo sara ayeke nzoni mingi.—Diko aPhilippien 3:​7, 8, 13.

10. Nyen la a yeke nzoni e gbu li na ndö ni lakue? (Marc 10:​29, 30). (Bâ nga afoto.)

¹⁰ Ye ti manda ni ayeke so wa? Tongana mo komanse ti pensé na aye so mo dö ni mo zia ti ga Chrétien, a yeke nga nzoni mo dabe ti mo na ndani so mo dö ni mo zia (Zo-ti. 7:10). Haka aye so mo dö mo zia na atufa so mo wara na peko ti so mo ga na yâ ti tâ tënë. Mo yeke na kpengba songo na Gbia ti dunia kue (aProv. 3:32). Mo yeke na gbâ ti aita na yâ ti congrégation nga na yâ ti dunia kue so aye mo mingi. (Diko Marc 10:​29, 30.) Nga mbeni pendere gigi ti kekereke ayeke ku mo (És. 65:​21-23). Tongana lakue mo gbu li na ndö ti atufa so mo wara ndali ti so mo yeke sara na Jéhovah, mo yeke sara pëpe nzara ti aye so mo dö ni mo zia.

11. Nyen la mo manda na lege ti ye so asi na Rose-Marie?

¹¹ Mbeni ita-wali so iri ti lo Rose-Marie awara batême na ngoi so lo yeke na ngu 50 tongaso. Bâ ye so lo sara so a-aidé lo ti ke ti kiri na terê ti aye so lo dö ni lo zia. Lo tene: “Na tongo nda ni, matanga ti Noël amanke mbi, ndali ti so a yeke lani lakue mbeni nzoni ngoi ti duti na sewa. Mbi ye lani ti mû acadeau na azo so mbi ye ala. A nzere na mbi ti bâ amolenge aduti na terê ti keke ti Noël nga ti bâ ngia so amolenge ayeke na ni na ngoi so ala yeke zi acadeau so mbi mû na ala.” Nyen la a-aidé lani lo? Rose-Marie atene: “Mbi sara mbeni ye so amû place ti Noël. Ngu oko oko na alango nde nde, mbi yeke bungbi azo ti sewa ti mbi, mbi mû na ala acadeau nga mbi fa na ala ndani so mbi ye ala mingi.” Rose-Marie awara nga mbeni kpale nde. Lo tene: “Na ngoi so mbi manda tâ tënë, angbene kamarade ti mbi adö mbi azia. Na ambeni ngoi, ala manke mbi nga mbi bâ so mbi yeke mbi oko.”d Nyen la a-aidé lo? Lo komanse ti mä terê na aita-wali nde nde ti gue na fango tënë. Lo tene: “So mbi sara tongaso, mbi wara afini kamarade so mbi ye ala nga mbi bâ ala na nene ni.” Nyen la mo peut ti manda na lege ti tapande ti lo? Mbeni ye so asara si mo yeke lani na ngia kozo ti manda tâ tënë apeut ti manke mo, me mo peut ti zia mbeni nzoni ye na place ni (aPhil. 4:​8, 9). Girisa ye so ape: Jéhovah ayeke mû na mo lakue aye mingi ahon ti so mo perdre ni.

AMBENI ZO ADÖ JÉHOVAH AZIA

12. Nyen la apeut ti si na yâ ti congrégation so apeut ti duti ngangu mingi?

¹² Na ngoi so mo ga Témoin, peut-être bê ti mo adë ti dö sioni dunia ti Satan ti zia ti duti na popo ti azo so ayeke fa tâ tënë nga so ayeke gi ti sara ye so ayeke na lege ni (És. 65:14). Me na ambeni ngoi, mo peut ti mä tënë ti mbeni sioni ye so mbeni ita asara. A peut ti zi même mbeni zo na yâ ti congrégation (1 aCor. 5:13). Mä tënë so Ita-wali Samar atene na ngoi so ye tongaso asi. Lo tene: “Kete na peko ti so mbi wara batême, mbeni ancien asara mbeni kota siokpari na a zi lo na yâ ti congrégation. A ngbâ kete mbi pika gere ti mbi ndali ti so mbi bâ so mbeni ancien apeut ti sara siokpari na terê ti Jéhovah nga na congrégation ape.” Ti tâ tënë ni, a yeke nzoni e hinga so aita ti e aye Jéhovah na ala ye ti ngbâ be-ta-zo na lo (1 aCor. 13:​4, 7). Me mawa ni ayeke so ngu oko oko a yeke zi ambeni zo na yâ ti congrégation. Na a peut ti duti ngangu na mo mingi tongana zo so azia ti sara na Jéhovah ayeke kamarade ti mo, mbeni fami ti mo wala mbeni zo so mo ne lo mingi.

13. Nyen la e peut ti sara ti pika gere ti e ape tongana mbeni zo so e ye lo adö Jéhovah azia?

¹³ Nyen la mo peut ti sara ti pika gere ti mo ape tongana mbeni zo so mo ye lo adö Jéhovah azia? Ngbâ ti kpengba songo ti mo na Jéhovah (Jacq. 4:8). Girisa ape so zo oko oko la adoit ti kpengba songo ti lo na Jéhovah. Na tapande, atâa so e yeke voro Jéhovah legeoko na sewa nga na congrégation, e bezoin nga ti sambela Jéhovah nga ti diko Bible e wani.—Ps. 1:2; 62:8.

14. Nyen la e manda na lege ti tapande ti bazengele Pierre? (Jean 6:​66-68).

¹⁴ E peut nga ti manda ye na lege ti sarango ye ti bazengele Pierre na ngoi so gbâ ti adisciple azia ti mû peko ti Jésus. Peut-être li ti Pierre kue aga kirikiri na ngoi ni so. Me mä tënë so lo tene na Jean 6:​66-68. (Diko ni.) Ahon ti tene Pierre asara ye so ambeni zo asara, lo gbu li ti lo mingi na ndö ti atâ tënë so Jésus afa na lo. Ye so asara si lo pika gere ti lo ape. Legeoko nga, sarango ye ti ambeni zo achangé ape apendere tâ tënë so e wara grâce na bungbi ti Jéhovah. Hule na terê ti tâ tënë. Samar, so e sara tënë ti lo fade, atene: “Mbi yeke dabe ti mbi lakue so sioni ye so mbeni ita asara aye ti tene ape so azo kue na yâ ti congrégation ayeke sara tongaso wala so aye so bungbi ti Jéhovah afa ayeke na lege ni ape; nga asarango ye ti Jéhovah ayeke pendere mingi, atâa nyen la azo asara.”

15. Nyen la mo manda na lege ti ye so asi na Émilie?

¹⁵ Gbu li na ndö ti tapande ti Émilie. Yenga oko na peko ti batême ti lo, mama ti lo adö sewa ti ala azia nga a zi lo na yâ ti congrégation. Émilie atene: “Mbi imaginé lâ oko ape so ye so apeut ti si. So kota kpale so mbi wara la, na mama ti mbi amanke mbi mingi.” Nyen la a-aidé lani Émilie? Lo tene: “Mbi yeke gï mbi oko ape. Mbi wara mungo maboko ti babâ ti mbi nga na ti aita ti congrégation so ayeke tongana afami ti mbi. Zo kue so asara na Jéhovah ayeke na akpale. Ndani la a yeke kota ye ti ngbâ nduru na mba nga ti kpengba mba.” (1 Pi. 5:9). Mo doit pëpe ti ku ti wara kpale awe si mo kpengba songo ti mo na aita. Ngbâ ti sara ni laso. Tongaso, atâa nyen la asi, peut-être mo yeke bâ so mo yeke mo oko ape.

16. Nyen la a yeke nzoni e girisa ni ape? (Bâ nga foto.)

¹⁶ Girisa nga ape so Jéhovah ayeke gboto mê ti azo kue so lo ye ala (aHéb. 12:6). Lo ye ti tene azo kue so a zi ala na yâ ti congrégation akiri (2 Pi. 3:9). Tongaso, tongana a zi na yâ ti congrégation mbeni zo so mo ye lo mingi, duti sûr so a-ancien ayeke sara ye kue so ala peut ti sara ti aidé lo ti kiri na Jéhovah.—2 Tim. 2:​24, 25.

17. Nyen la e peut ti duti sûr na ni?

¹⁷ E bâ gï ambeni kpale so mo peut ti wara na peko ti batême ti mo. Ti vrai ni, ambeni apeut ti duti ngangu me mo doit ti sara mbeto ape. Mo peut ti sara aye mingi ti leke terê ti mo. Nga girisa ape so Jéhovah Nzapa ayeke aidé mo ti duti be-ta-zo na lo. Lo aidé mo awe nga lo ye ti ngbâ ti sara ni lakue (1 Pi. 5:10). Lo yeke mû na mo lakue ngangu so mo bezoin ni ti gbu ngangu na yâ ti akpale kue. Tongana mo ngbâ ti zia si Jéhovah a-aidé mo, mo yeke ngbâ lakue nduru na lo atâa akpale kue so mo peut ti wara.—Ps. 119:165; aRom. 8:​38, 39.