Fa tâ tënë na azo na nzoni bê

1. Nyen la e doit ti sara ti duti na yâ ti sewa ti Jéhovah?

TONGANA e wara terê na mbeni mba ti e wakua ti Jéhovah ti kozoni, mbeni hunda so e yeke hunda ka ayeke so: “Mo hinga tâ tënë tongana nyen?” Ambeni ayeke tene so ala “kono na yâ ti tâ tënë.” Ambeni apeut ti tene so ala “ga na yâ ti tâ tënë” ade ti ninga ape. E yeke kiri tënë tongaso ndali ti so tâ tënë ti Bible la ayeke fa lege na e na yâ ti fini ti e kue. Ngbanga ti nyen? Ngbanga ti so e hinga so e peut ti duti na yâ ti sewa ti Jéhovah gï tongana e fa so e ye tâ tënë nga e sara ye alingbi na ni. Mbeni lege so e peut ti sara ni ayeke ti tene tâ tënë lakue nga ti sara ye lakue na lege ni.—Ps. 15:​1-3.

2. (a) Nyen la azo ahinga lani na ndö ti Jésus? (b) Tongana azo amä atâ tënë so Jésus afa, ala sara ye tongana nyen?

² Jésus atene lakue tâ tënë. Awato ti lo atene lani so lo tene tâ tënë même tongana tënë so lo tene ayeke ye so ala ye ti mä ape (Mat. 22:16). Jésus atene na ndö ti atâ tënë so lo fa, lo tene: “Mbi ga ti zia kangbi: Molenge-koli ayeke ke babâ ti lo, molenge-wali ayeke ke mama ti lo nga wali ayeke ke mama ti koli ti lo.” (Mat. 10:35). Jésus aye ape ti tene azo ake tënë so lo na adisciple ti lo afa, me lo hinga so a yeke si tongaso (Mat. 23:37). Lo hinga so tënë so lo fa ayeke kangbi yâ ti azo: ambeni ayeke ye ni, ambeni ayeke ke ni.— 2 aThes. 2:​9-11.

3. Nyen la e yeke bâ na yâ ti article so?

³ Tongana Jésus, e yeke gi lakue ti tene tâ tënë, même tongana a yeke sara si azo aye e ape. E yeke fa nga tâ tënë ti Bible, même tongana a son bê ti ambeni zo. Eskê so aye ti tene so e yeke gbu li pëpe na ndö ti fason so e yeke tene tâ tënë na azo nga na ngoi wa la e yeke tene ni na ala? Ên-ën. Na yâ ti article so, e yeke kiri tënë kozoni na hunda so: E peut ti wara tâ tënë na ndo wa? Na pekoni, e yeke kiri tënë na ambeni hunda so ague oko na ni: Ngbanga ti nyen la a yeke nzoni e tene tâ tënë? E yeke tene ni tongana nyen? Na ngoi wa la a yeke nzoni e tene ni? Kiringo tënë na ahunda so ayeke aidé e ti maï kode ti e ti fango tâ tënë na azo na nzoni bê, so ti tene, ti fa tâ tënë na azo na kode nga na nzoni ngoi.

E PEUT TI WARA TÂ TËNË NA NDO WA?

4. Ngbanga ti nyen la e peut ti tene so tâ tënë alondo na Jéhovah?

⁴ Tâ tënë alondo na Jéhovah. Tënë kue so lo tene ayeke tâ tënë. Na tapande, tënë so lo tene na ndö ti ye so ayeke na lege ni nga na ye so ayeke na lege ni ape ayeke tâ tënë (Ps. 19:9; 119:​142, 151). Ye kue so lo tene ayeke si kekereke ayeke si (És. 55:​10, 11). Lo yeke sara lakue ye so lo mû zendo ni (Nom. 23:19). Ti vrai ni, Jéhovah apeut ti tene mvene ape (aHéb. 6:18). A yeke na lege ni so a iri Jéhovah “Nzapa ti tâ tënë”.—Ps. 31:5.

5. Ngbanga ti nyen la a yeke ngangu ape ti wara “Nzapa ti tâ tënë”? Fa ndani so mo tene tongaso. (Kusala 17:27).

⁵ Atâa tënë wa la ambeni zo atene, a yeke ngangu ape ti wara Jéhovah, “Nzapa ti tâ tënë.” Ye kue so Nzapa acréé afa so lo yeke dä (aRom. 1:20). Na ngoi so bazengele Paul ayeke sara tënë na aGrec so ahinga mbeti mingi na Athènes, lo tene so Nzapa aye ti tene e “wara lo” nga “lo yeke yongoro pëpe na e oko oko kue.” (Diko Kusala 17:27.) Ti vrai ni, Jéhovah agboto na mbage ti lo azo so asara terê ti ala kete so ayeke gi tâ tënë.—Jean 6:44.

6. Ambeni tâ tënë wa la ayeke na yâ ti Bible? Ngbanga ti nyen la a nzere na mo so mo hinga atâ tënë so?

⁶ Mbeni lege so e peut ti wara Jéhovah ayeke ti manda Bible. Akoli so asû Bible asû ni na gbe ti yingo vulu ti Nzapa (2 Pi. 1:​20, 21). Tongaso, tënë kue so ayeke na yâ ti Bible ayeke tâ tënë na e peut ti sara confiance na ni. Na tapande, e peut ti sara confiance na tënë so a tene na ndö ti fason so dunia abâ gigi nga tongana nyen la fini akomanse na ndö ti sese (Gen. 1:​1, 26). E peut ti yeda na tënë so Bible atene na ndö ti ndani so e kue e yeke sara siokpari nga ndani so pasi nga na kuâ ayeke mingi (aRom. 5:12; 6:23). Bible atene so Jéhovah ayeke sara kua na Molenge ti lo ti zi asioni ye kue so Satan, “babâ ti mvene”, aga na ni, na e yeke na kite oko na ndö ni ape (Jean 8:44; aRom. 16:20). E peut nga ti sara confiance na zendo ti Bible so atene so Jésus ayeke futi asioni zo, lo yeke zingo akuâ, lo yeke sara si sese aga Paradis nga lo yeke aidé e ti ga mbilimbili-kue (Jean 11:​25, 26; 1 Jean 3:8). Jéhovah afa na e tâ tënë nga lo mû lege na e ti fa ni na azo. So pendere pasa la lo mû na e so!—Mat. 28:​19, 20.

NDANI SO E YEKE TENE TÂ TËNË

7-8. Eskê ye so apusu e ti tene tâ tënë ayeke kota ye? Mû mbeni tapande ti fa ni. (Marc 3:​11, 12). (Bâ nga afoto.)

⁷ Tongana ti so e tene fade, e doit ti tene tâ tënë tongana e ye ti duti na yâ ti sewa ti Jéhovah. Me ti zia ngia na bê ti lo, e doit ti ngbâ gï na ndö ti tenengo tâ tënë ape. Ndani so e yeke tene tâ tënë ayeke kota ye na lê ti Jéhovah. Gbu li na ndö ti mbeni ye so apassé na ngoi ti fango tënë ti Jésus na sese. (Diko Marc 3:​11, 12.) Na ngoi so Jésus ayeke fa tënë lani nduru na Kota ngu ti Galilée, gbâ ti azo abungbi na terê ti lo. Na popo ti ala a yeke wara ambeni zo so asioni yingo ayeke na yâ ti ala, ala tï na devant ti Jésus, ala dekongo ala tene: “Mo yeke Molenge ti Nzapa.” Ngbanga ti nyen la asioni yingo so atene tâ tënë na ndö ti Jésus? Peut-être ala ye ti tene azo so amä ala asara confiance na ala, na pekoni ala pusu azo ni ti zia ti sara na Jéhovah. Na tongo nda ni, asioni yingo ni atene tâ tënë, me ala sara ni ndali ti nzoni ti ala wani. Ala handa Jésus ape nga ye so ala sara anzere na lo ape. Ti vrai ni, Jésus amû yanga na asioni yingo ni ti fa tënë na ndö ti lo ape.

⁸ Nyen la e manda na lege ti mbaï so? Ye so apusu e ti tene tâ tënë ayeke kota ye na lê ti Jéhovah. Tongaso, a yeke kota ye mingi ti tene e fa na azo tâ tënë na ndö ti Jéhovah ndali ti so e ye lo, nga tongana azo agi ti gonda e ndali ti tënë so e yeke fa, e yeke mû gonda ni na Jéhovah.—Mat. 5:16; bâ Kusala 14:​12-15.

9. Nyen la a yeke nzoni e ke ti gi ti sara ni? Ngbanga ti nyen?

⁹ Bâ mbeni ye nde so na yâ ni a yeke nzoni e ke ti gi ti tene azo agonda e. Imaginé so mbeni ita-koli so ayeke mû li ni atene na e mbeni tënë so zo adoit ti mä ni kirikiri ape na e tene ni na ambeni zo. Na ngoi so azo so e tene tënë ni na ala aga ti hinga so tënë ni ayeke tâ tënë, ala peut ti pensé so mingi ni e hinga atënë so zo adoit ti mä ni kirikiri ape. A peut ti pusu azo ti gonda e, me a yeke nzere na Jéhovah ape (aProv. 11:13). Ngbanga ti nyen? Ngbanga ti so atâa so tënë ni ayeke tâ tënë, e yeke na droit ape ti tene ni na ala nga ye so apusu e ti tene ni ayeke na lege ni ape.

FASON TI TENENGO TÂ TËNË

10. Ti mo, tënë so ayeke “nzoni” aye ti tene nyen? (aColossien 4:6).

¹⁰ Diko aColossien 4:6. Bazengele Paul adabe ti aChrétien ti Colosses ti tene tënë ti yanga ti ala ‘aduti lakue nzoni.’ Tënë so aye ti tene nyen? Tënë ti Grec so a sara kua na ni ge aye ti tene tënë so e tene adoit ti aidé azo nga e doit ti tene ni na nzoni bê nga na mbeni lege so anzere na ala.

11-12. Ngbanga ti nyen la e doit ti sara hange na fason so e yeke fa tâ tënë na azo? Mû mbeni tapande ti fa ni. (Bâ nga afoto.)

¹¹ E doit ti sara ye alingbi na wango ti Paul ti tene tënë ti e aduti lakue nzoni na ngoi so e yeke fa tâ tënë na azo. Bible ahaka atâ tënë na mbeni epée so yanga ni aza so apeut ti kangbi popo ti âme na yingo. So ti tene, a peut ti fa atënë ti gbe ti bê ti e nga na aye so apusu e ti sara ye (aHéb. 4:12). Me tongana e sara kua na Bible na lege ni ape, e peut ti son bê ti azo senge senge nga ala peut ti papa na e senge senge. Ye so apeut ti si tongana nyen?

¹² Imaginé ye so. Na fango tënë, e wara mbeni koli so ayeke sambela ka na bê ti lo kue a-image nga a nzere na lo ti sara matanga ti Noël nga na Pâques legeoko na azo ti sewa ti lo. E peut ti sara kua na Bible ti fa na lo so a yeke ye ti buba ti sambela astatue nga ti fa na lo so matanga ti Noël nga na Pâques ayeke amatanga ti apaïen (És. 44:​14-20; 2 aCor. 6:​14-17). Tongana e sara ni na ngoi ti kozo lisoro so e sara na lo, e yeke fa na lo tâ tënë la, me so ayeke sarango kua na Bible na kode la ape.

13. Tongana nyen la e peut ti zia ingo na terê ti atënë ti e?

¹³ Paul atene nga so a yeke nzoni e zia ingo na terê ti atënë ti e. Lo ye ti tene ape so a yeke nzoni e gi ti ba yâ ti tâ tënë wala ti honde ndö ni. Me lo wa e ti tene atënë so a “zia ingo dä” tongaso si e tene tâ tënë na mbeni fason so a nzere na azo ti mä ni, tongana ti so kobe anzere na yanga ti zo so ‘atara’ ni (Job 12:11). Ti sara ni apeut ti duti kete ye ape. Ti vrai kobe, e peut ti pensé so kobe so anzere na e ayeke nzere nga na azo. Legeoko nga, e peut ti pensé so fason so e yeke sara na tënë ayeke nzere na azo kue. Me a peut ti duti tongaso ape. Na tapande, na ambeni ndo, zo apeut ti fa bango ndo ti lo polele même tongana lo sara tënë na zo so ayeke kota zo na lo. Na ambeni ndo nde, azo apeut ti pensé so sarango tënë tongaso ayeke na lege ni ape wala même ason bê ti zo. Paul atene so e doit ti hinga tongana nyen la e doit ti “kiri tënë na zo oko oko.” So aye ti tene so a yeke nzoni e zia ingo na terê ti atënë so e tene ti gue oko na ngobo ti zo so ayeke mä e, me pëpe ti gue oko na ngobo ti e.

NGOI TI TENENGO TÂ TËNË

14. Na ngoi so Jésus ayeke lani na sese, eskê lo fa na adisciple ti lo ye kue so lo hinga? Fa ndani so mo tene tongaso.

¹⁴ Jésus atene lakue na adisciple ti lo atënë so ayeke nzoni nga na nzoni bê lo fa na ala gbâ ti aye (Marc 6:34). Me aye mingi angbâ lani ti tene ala manda ni. Jésus agi lani ape ti fa na ala ye kue so lo hinga. Lo hinga so ala peut ti mä yâ ti aye kue ape. Lo hinga so nzoni ngoi ti tene ala hinga ambeni ye la ape. Ti vrai ni, lo tene so ala peut ti mä yâ ni kue ape na ndembe ni so (Jean 16:12). Ye so afa na e nyen?

15. Eskê e doit ti fa na azo ye kue so e hinga gï na ngoi so e komanse ti manda Bible na ala? Fa ndani so mo tene tongaso. (aProverbe 25:11). (Bâ nga foto.)

¹⁵ Tapande ti Jésus afa na e so, so e hinga tâ tënë aye ti tene ape so e doit ti fa na azo ye kue so e hinga na ngoi so e komanse ti manda Bible na ala. E peut ti mû tapande ti Jésus tongana nyen? E doit ti gbu li na ndö ti dutingo ti azo. Kiri mo gbu li na ndö ti koli so a nzere na lo mingi ti sara matanga ti Noël nga na Pâques na azo ti sewa ti lo. E hinga so amatanga so alondo na apaïen nga anzere na Nzapa ape. Me imaginé so mo komanse ti manda Bible na lo yenga oko wala use kozo na matanga ti Noël. Tongana mo fa na lo ye so Bible atene na ndö ti amatanga ti apaïen nga mo hunda na lo ti zia ti sara ni, eskê tënë ti mo ayeke nzoni la? A yeke tâ tënë so hio ambeni zo so e yeke manda Bible na ala ayeke sara ye alingbi na ye kue so ala manda. Me ti ambeni, a yeke mû ngoi mingi ti tene ala changé bango ndo ti ala nga na aye so ala yeke sara. E peut ti aidé azo so e yeke manda Bible na ala ti gue na li ni tongana e fa na ala ye so ala bezoin ti hinga na ngoi so ala bezoin ti mä ni, so ti tene na ngoi so ala peut ti mä yâ ni.—Diko aProverbe 25:11.

16. Tongana nyen la e peut ti aidé azo so e yeke manda Bible na ala ti ‘ngbâ ti tambela na yâ ti tâ tënë’?

¹⁶ Mbeni ye so asara si e yeke na ngia mingi ayeke ti aidé azo ti hinga tâ tënë na ndö ti Jéhovah. E peut ti aidé ala ti ‘ngbâ ti tambela na yâ ti tâ tënë’ tongana e sara aye so: E ngbâ ti zia na ala nzoni tapande (3 Jean 3, 4). E sara kue ti tene fason so e vivre na ni afa so e mä na bê na azendo so ayeke na yâ ti Bible. E sara si nzoni bibe la apusu e ti tene tâ tënë. E sara si atënë ti e aduti nzoni nga e sara tënë na nzoni bê na ngoi so e yeke fa tâ tënë na azo. Nga e kiri na gonda so a mû na e na Jéhovah. Tongana mo sara tongaso, mo yeke fa so mo yeke ti Jéhovah, Nzapa ti tâ tënë.