Ngbâ ti duti na ngia na ngoi so mo ga mbakoro

1-2. Jéhovah ayeke bâ azo so aga mbakoro so ayeke be-ta-zo tongana nyen? (Psaume 92:​12-14; bâ nga foto.)

NA YÂ ti dunia, sarango ye ti azo ayeke nde nde na ndö ti gango mbakoro. Na tapande, imaginé ye so: Eskê mo dabe ti mo na ngoi so ti kozoni mo bâ vuru kuä ti li na yâ ti li ti mo? Peut-être bê ti mo apusu mo ti gboto ni kozo si mbeni zo abâ ni. Me mo bâ so tongana mo gboto ni, a yeke kanga lege ape na ambeni ti sigi. Tapande so afa tongana nyen la ambeni zo aye ti ga mbakoro ape.

² Me, bango ndo ti Babâ ti e ti yayu na ndö ti awakua ti lo so ayeke mbakoro ayeke nde (aProv 16:31). Lo tene so ala yeke tongana apendere keke. (Diko Psaume 92:​12-14.) Tënë so aye ti tene nyen? Mingi ni, akeke so aninga mingi ayeke pendere mingi ndali ti so gbâ ti akugbe nga na afleur ni ayeke dä. Na tapande, mbeni keke ayeke dä na Japon so asara angu mingi. Ambeni keke ni so ayeke pendere mingi aninga ahon ngu saki oko. Legeoko nga, Jéhovah abâ na nene ni mingi awakua ti lo so ayeke ambakoro. Lo bâ apendere sarango ye so ala yeke na ni. Ala sara na lo teti angu mingi nga ala ngbâ be-ta-zo na lo na yâ ti angoi so ayeke nzoni nga na angoi so ayeke sioni.

3. Mû mbeni tapande so afa tongana nyen la Jéhovah asara kua na azo so ayeke ambakoro ti sara ye so lo leke na bê ti lo ti sara.

³ Tongana zo aga mbakoro, na lê ti Jéhovah, nengo ti lo akiri na gbe ni ape.a Ti vrai ni, Jéhovah asara kua na ambakoro fani mingi ti sara ye so lo leke na bê ti lo ti sara. Na tapande, ngu ti Sara ague lani na li ni mingi na ngoi so Jéhovah atene so lo yeke ga mama ti mbeni kota mara nga kotara ti Messie (Gen. 17:​15-19). Moïse ayeke lani mbakoro na ngoi so Jéhovah atokua lo ti zi azo ti Israël na Égypte (Ex. 7:​6, 7). Bazengele Jean ayeke nga lani mbakoro na ngoi so Jéhovah amû na lo yingo vulu ti sû ambeti oku ti Bible.

4. Ti gue oko na aProverbe 15:​15, nyen la apeut ti aidé ambakoro ti gbu ngangu na yâ ti akpale so ala wara? (Bâ nga foto.)

⁴ Azo so aga mbakoro ayeke wara akpale nde nde. Mbeni ita-wali atene na tënë ti ngia, atene: “Ti ga mbakoro, mo bezoin ti duti zo ti mbeto ape ndali ti so gango mbakoro ayeke kete ye ape.” Me ti duti na ngiab apeut ti aidé azo so ayeke ambakoro ti gbu ngangu na yâ ti akpale so ala wara ndali ti so ngu ti ala ague na li ni. (Diko aProverbe 15:15.) Na yâ ti article so, e yeke sara tënë na ndö ti aye so azo so aga mbakoro apeut ti sara ti ngbâ ti duti na ngia. E yeke bâ nga tongana nyen la aita apeut ti aidé aita so ayeke ambakoro na yâ ti congrégation ti ala. Kozoni, zia e bâ ndani so a peut ti duti ngangu ti ngbâ ti duti na ngia na ngoi so e ga mbakoro.

NDANI SO A PEUT TI DUTI NGANGU TI NGBÂ TI DUTI NA NGIA NA LÂ TI MBAKORO

5. Nyen la apeut ti sara si ambeni mbakoro adécouragé?

⁵ Nyen la apeut ti sara si mo découragé? Peut-être mo découragé ndali ti so mo peut ti sara encore ape aye so mo yeke sara ândö. Peut-être mo ye mingi ngoi so mo de lani maseka nga mo yeke na nzoni seni (Zo-ti. 7:10). Na tapande, Ita-wali Ruby atene: “So peko ti mbi ayeke son nga mbi peut ti bougé tongana ti kozo ape, a sara si yungo bongo ayeke ngangu na mbi. Même gï ti yô gere ti mbi na nduzu ti yü chaussette ayeke kete ye ape. Amaboko ti mbi ayeke son mbi mingi na mbi peut ti bougé ali ti maboko ti mbi nzoni ape. A yeke même ngangu na mbi mingi ti sara akete ye.” Harold, so asara lani kua na Béthel, atene: “Na ambeni ngoi, bê ti mbi ason ndali ti so mbi peut ti sara ape ye kue so a nzere na mbi ti sara ândö. Mbi yeke lani na ngangu mingi na ngoi so mbi yeke maseka. Mbi ye lani pikango ballon ti maboko mingi. Ambeni zo ayeke tene ka: ‘Mû ballon ni na Harold ndali ti so lo peut ti aidé e ti gagné.’ Me fadeso, mbi pensé so mbi peut même ti bi ballon ape.”

6. (a) Ambeni raison wa la ndali ni ambakoro apeut ti découragé? (b) Nyen la apeut ti aidé ambakoro ti bâ wala ala doit ti ngbâ ti kpe na oto wala pëpe? (Bâ article “Eskê a yeke nzoni mbi zia ti kpe na oto wala moto?” na yâ ti Tour ti Ba Ndo so.)

⁶ Mo peut ti découragé ndali ti so mo bezoin ti tene azo la a-aidé mo ti sara aye so mo yeke sara ândö. Mo peut ti découragé tongana mo bezoin mbeni zo ti bâ lege ti mo wala mo doit ti gue na ndo ti mbeni molenge ti mo. Peut-être mo peut ti fâ yaka encore ape wala ti gue na ambeni ndo mo oko ape ndali ti so mo yeke na ngangu ape wala mo yeke bâ ndo nzoni encore ape. Ye so apeut ti sara mo vundu mingi. Mo peut ti sara gbâ ti aye so mo yeke sara ândö ape. Me girisa ape so Jéhovah nga na ambeni zo abâ mo na nene ni. E peut nga ti duti sûr so Jéhovah acomprendre atënë ti bê ti e. Jéhovah ahinga so e ye lo nga na aita mingi. Ye so asara si lo bâ e na nene ni mingi.—1 Sam. 16:7.

7. Tongana mo pensé so mo yeke bâ Harmaguédon ape, nyen la apeut ti aidé mo?

⁷ Peut-être vundu asara mo ndali ti so mo pensé so mo peut ti vivre aninga ti bâ Harmaguédon ape. Tongana mo pensé tongaso, nyen la apeut ti aidé mo? Dabe ti mo so Jéhovah ayeke na mbeni raison so ndali ni lo ngbâ ti ku kozo si lo futi sioni dunia so (És. 30:18). Me ngbanga ti nyen la Jéhovah akanga bê lo ku? So lo kanga bê amû lege na azo kutu mingi ti hinga lo nga ti sara na lo (2 Pi. 3:9). Tongaso, tongana mo découragé, gbu li na ndö ti gbâ ti azo so ayeke bâ nzoni ndali ti so Jéhovah akanga bê kozo si lo futi dunia so. Ambeni apeut ti duti afami ti mo.

8. Tongana terê ti azo so aga mbakoro ason, a peut ti pusu ala ti sara ye tongana nyen?

⁸ Atâa ngu ti e ayeke oke, tongana e yeke nzoni ape, e peut ti tene mbeni tënë wala ti sara mbeni ye so e regretté ni (Zo-ti. 7:7; Jacq. 3:2). Na tapande, na ngoi so lani Job so ayeke be-ta-zo ayeke bâ pasi, lo “diko tënë gï kirikiri”. (Job 6:​1-3). Na ndö ni, ambakoro apeut ti tene mbeni tënë wala ti sara mbeni ye so ala yeke sara kozo ape ndali ti so terê ti ala ason wala ndali ti yorö so ala nyon. Me, même tongana e yeke mbakoro wala terê ti e ason, a yeke na lege ni ape ti sara ye na nzoni bê ape wala ti ku lakue ti tene azo asara aye ndali ti e. Nga, tongana e bâ so e tene tënë na nzoni bê na mbeni zo ape, a yeke nzoni e sara kamene ape ti hunda pardon.—Mat. 5:​23, 24.

AYE TI SARA TI NGBÂ TI DUTI NA NGIA

9. Ngbanga ti nyen la a yeke nzoni ti yeda ti tene ambeni zo a-aidé mo? (Bâ nga afoto.)

⁹ Yeda ti tene azo a-aidé mo (aGal. 6:2). Na tongo nda ni, mo peut ti bâ so a yeke ngangu na mo ti yeda. Mbeni ita-wali so iri ti lo ayeke Gretl atene: “Na ambeni ngoi, a yeke ngangu na mbi ti yeda ti tene azo a-aidé mbi ndali ti so mbi bâ so mbi yeke ga mbeni nengo kungba na ndö ti ala. A mû lani ngoi ti tene mbi changé bango ndo ti mbi nga ti sara terê ti mbi kete ti yeda so mbi bezoin mungo maboko.” Tongana mo yeda ti tene azo a-aidé mo, mo yeke mû lege na ala ti wara ngia so zo ayeke wara tongana lo mû ye na azo (Kus. 20:35). Na kite ayeke dä ape so a yeke nzere na mo ti bâ tongana nyen la azo aye mo nga ala yeke bâ lege ti mo.

10. Ngbanga ti nyen la a yeke nzoni mo girisa ti kiri singila ape? (Bâ nga foto.)

¹⁰ Kiri singila (aCol. 3:15; 1 aThes. 5:18). Tongana azo asara anzoni ye na e, a yeke nzere na e me e peut ti girisa ti kiri singila na ala. Ye oko, tongana e he ngia nga e tene merci, e yeke sara si ala bâ so e bâ na nene ni ye so ala sara na e. Leah, so ayeke bâ lege ti aita so aga mbakoro na Béthel, atene: “Mbeni ita-wali so mbi yeke bâ lege ti lo ayeke zia na mbi ambeni kete note so na yâ ni lo tene merci. Lo tene gbâ ti tënë ape, me a yeke apendere tënë. Mbi ye mingi ti diko atënë so lo tene. A nzere na mbi so lo kiri singila so mbi aidé lo.”

11. Tongana nyen la mo peut ti aidé ambeni zo? (Bâ nga foto.)

¹¹ Gi ti aidé azo. Tongana mo mû ngoi nga na ngangu ti mo mingi ti aidé azo, peut-être mo yeke pensé mingi ape na akpale ti mo. Mbeni mato ti Afrika ahaka ambakoro na ambeti so gbâ ti atënë ti ndara ayeke na yâ ni. Me tongana azo adiko ambeti ni ape, ala peut ti manda ye na lege ni ape. So mo yeke mbeni “bibliothèque so ayeke na fini,” mû li ni ti fa aye so mo hinga nga so mo vivre ni na azo so ngu ti mo ahon ti ala. Hunda tënë na ala nga mä ala. Fa na ala ndani so ti sara ye so Jéhovah ahunda ayeke lakue nzoni ye ti sara nga ayeke sara lakue si ala duti na ngia. Kite ayeke dä ape so tongana mo dë bê ti akamarade ti mo so ngu ti mo ahon ti ala nga mo kpengba ala, mo yeke duti na ngia.—Ps. 71:18.

12. Ti gue oko na Ésaïe 46:​4, Jéhovah amû zendo ti sara nyen ndali ti ambakoro? (Bâ nga foto.)

¹² Sambela Jéhovah ti mû na mo ngangu. Na ambeni ngoi, mo peut ti fatigué na a peut ti sara si mo découragé. Me girisa ape so Jéhovah ayeke na ngangu mingi. Bible atene so lo “yeke woko wala lo yeke fatigué lâ oko pëpe.” (És. 40:28). Tongaso, lo peut ti mû na mo ngangu so mo bezoin ni (És. 40:​29-31). Ti vrai ni, Jéhovah amû zendo ti aidé mo. (Diko Ésaïe 46:4.) Na lo yeke sara ye lakue alingbi na azendo ti lo (Jos. 23:14; És. 55:​10, 11). Tongana mo sambela, Jéhovah ayeke mû na mo aide so mo bezoin ni. Na pekoni, mo yeke bâ so lo ye mo mingi na ayeke sara si mo duti na ngia mingi.

13. Ti gue oko na 2 aCorinthien 4:​16-18, nyen la a yeke nzoni e girisa ape? (Bâ nga foto.)

¹³ Dabe ti mo so mo yeke ngbâ ande gï lakue mbakoro ape. Tongana e hinga so mbeni kpale so e yeke na yâ ni ayeke gï teti kete ngoi, a yeke ngangu na e ape ti gbu ngangu dä. Nga Bible adë bê ti e so gango mbakoro nga na kobela ayeke hunzi ande (Job 33:25; És. 33:24). Tongaso, mo peut ti duti na ngia ndali ti so na yâ ti angoi so ayeke ga, mo yeke duti na nzoni seni, na ngangu nga mo yeke ga pendere mingi. (Diko 2 aCorinthien 4:​16-18.) Me, nyen la azo apeut ti sara ti aidé mo?

AYE SO AZO APEUT TI SARA TI AIDÉ MO

14. Ngbanga ti nyen la a yeke kota ye ti gue ti bâ ambakoro nga ti iri ala na téléphone?

¹⁴ Gue mo bâ aita so ayeke mbakoro nga iri ala na téléphone (aHéb. 13:16). Ambakoro apeut ti bâ so ala yeke gï ala oko. Ita-koli Camille so ayeke gï na yanga-da atene: “Mbi yeke gï na yanga-da ndapre juska lakui. Tongaso, mbi bâ so ye ti sarango ni ayeke dä ape. Na ambeni ngoi, mbi bâ terê ti mbi tongana mbeni bamara so a kanga lo na yâ ti da ti lo. Mbi yeke gi bê ti mbi nga bê ti mbi ason.” Tongana e gue e bâ ambakoro, e yeke fa na ala so e bâ ala na nene ni nga e ye ala. Peut-être e kue e dabe ti e na mbeni ngoi so e ye ti iri mbeni mbakoro ti congrégation ti e na téléphone wala ti gue ti bâ lo me e sara ni ape. E kue e yeke na aye mingi ti sara. Tongaso, nyen la apeut ti aidé e ti “hinga biani aye so ayeke akota ye mingi ahon atanga ni,” so na popo ni mo yeke wara guengo ti bâ ambakoro? (aPhil. 1:10). Mo peut ti sû na mbeti iri ti ambakoro ti congrégation ti mo nga na lango so mo ye ti tokua na ala message wala ti iri ala na téléphone. Mo peut nga ti leke kapa ti gue ti bâ ala. Soro lango ni tongaso si mo girisa ni ape.

15. Nyen la amaseka nga na ambakoro apeut ti sara ndo oko?

¹⁵ Tongana mo yeke maseka, peut-être mo yeke gi bê ti mo na ndö ti aye so mo na ambakoro apeut ti sara lisoro na ndö ni wala aye so mo na ala apeut ti sara ndo oko. Me mo bezoin ti gi bê ti mo ape. Duti gï nzoni kamarade (aProv. 17:17). Sara lisoro na ambakoro kozo na bungbi nga na pekoni. Peut-être mo peut ti hunda ala ti fa na mo versê so ala ye ni mingi wala mbeni ye so ala sara na ngoi so ala de maseka so asara ala ngia. Mo peut nga ti tisa ala ti tene ala ga, mo na ala abâ kapa ti Télé JW. Mo peut nga ti sara ambeni ye ti aidé ala. Na tapande, mo peut ti aidé ala ti sara kua nzoni na téléphone wala tablette ti ala wala mo peut ti téléchargé na ala ambeti so asigi fini fini. Ita-wali Carol atene: “Hunda ambakoro ti tene mo na ala asara aye so anzere na ala ti sara ni. Atâa so ngu ti mbi ague na li ni, mbi ngbâ na nzara ti sara aye so anzere na mbi. Mbi ye mingi ti gue ti vo ye, ti te ye place oko na akamarade ti mbi nga ti gue ti bâ aye so Jéhovah acréé.” Ita-wali Maira atene: “Mbeni kamarade ti mbi ayeke na ngu 90. Lo hon mbi na ngu 57. Me fani mingi, mbi yeke girisa na ndö ni ndali ti so mbi na lo e yeke he ngia nga e yeke bâ afilm. Nga na ngoi so e yeke na akpale, e yeke hunda wango na mba.”

16. Ngbanga ti nyen la a peut ti duti nzoni ti gue ti zia ambakoro na ngoi so ala gue ti bâ docteur?

¹⁶ Gue na ala ti bâ docteur. Mo peut ti gue na ala ti bâ docteur, me mo peut nga ti ngbâ na terê ti ala ti bâ wala docteur ni wala infirmier ni ayeke bâ lege ti ala nzoni (És. 1:17). Tongana mo sû na mbeti aye so docteur ni afa apeut ti aidé mbakoro ni. Ita-wali Ruth so ayeke mbakoro atene: “Fani mingi, tongana mbi gue mbi oko ti bâ docteur, lo yeke mû atënë ti mbi tongana tënë ti ngia. Adocteur apeut ti tene mara ti tënë so: ‘Terê ti mo ason ape, mo imaginé so terê ti mo ason.’ Me tongana mbi na mbeni zo la e gue, docteur ni ayeke soigné mbi nzoni mingi. Mbi kiri singila mingi na aita so amû ngoi ti gue ti zia mbi.”

17. Ambage ti fango tënë wa la mo na ambakoro apeut ti sara?

¹⁷ Fa tënë legeoko na ala. Ambeni mbakoro ayeke na ngangu ti fa tënë da na da ape. Tongaso, mo peut ti tisa mbeni ita-wali so ayeke mbakoro ti tene mo na lo afa tënë na présentoir. Mo peut même ti ga na mbeni chaise si lo duti na yâ ni nduru na présentoir ni. Wala mo peut ti hunda mbeni ita-koli so ayeke mbakoro ti tene mo na lo amanda Bible na mbeni zo, mo peut ti hunda même ti tene ala ga na ndo ti ita ni. A-ancien apeut ti leke ti tene a sara abungbi ti fango tënë na ndo ti aita so ayeke mbakoro tongaso si ala peut ti mû mbage dä nzoni mingi. Ye kue so e sara ti ne ambakoro anzere na Jéhovah.—aProv. 3:27; aRom. 12:10.

18. Nyen la e yeke bâ na yâ ti article ti peko?

¹⁸ Article so adabe ti e so Jéhovah aye ambakoro mingi nga lo bâ ala na nene ni. E nga kue e ye ala nga e bâ ala na nene ni. Gango mbakoro ayeke kete ye ape, me grâce na aide ti Jéhovah, mo peut ti ngbâ ti duti na ngia (Ps. 37:25). So mo hinga so na yâ ti angoi so ayeke ga mo yeke duti ande na ngia mingi, a peut ti kpengba mo. Ka ti e so e yeke bâ lege ti mbeni sewa so aga mbakoro awe, ti mbeni molenge wala mbeni kamarade so terê ti lo ason, tongana nyen la e peut ti ngbâ ti duti na ngia? E yeke kiri tënë na hunda so na yâ ti article ti peko.