Mo peut ti ke asioni nzara ti bê

1. Azo kue so ayeke mbilimbili-kue ape ayeke tiri na nyen?

ESKÊ a si na mo lâ oko awe ti tene nzara ti sara mbeni ye so Jéhovah aye ape agbu mo ngangu? Tongana a yeke tongaso, découragé ape. Bible atene: “Mbeni tara nde asi na ala pëpe, gï ti so ayeke si ka na azo kue.” (1 aCor. 10:13). So ti tene so atâa sioni nzara wa la mo yeke tiri na ni, ambeni zo nga ayeke tiri na ni. Mo yeke gï mo oko ape nga grâce na mungo maboko ti Jéhovah, mo peut ti ke asioni nzara ti bê.

2. Asioni nzara wa la ambeni Chrétien nga na ambeni zo so ayeke manda Bible ayeke tiri na ni? (Bâ nga afoto.)

² Bible atene nga atene: “Zo oko oko ayeke wara tara tongana nzara ti bê ti lo agboto lo na ahanda lo.” (Jacq. 1:14). Ye so azo asara nzara ni ayeke nde nde. Na tapande, mbeni Chrétien so ayeke koli apeut ti sara nzara ti sara lango-sioni na mbeni wali, nga mbeni Chrétien so ayeke wali apeut ti sara nzara ti sara lango-sioni na mbeni koli. Me ti ambeni Chrétien ni, ala peut ti sara nzara ti sara lango-sioni na mba ti ala koli wala na mba ti ala wali. Ambeni zo so azia ti bâ porno, nzara ti bango ni apeut ti kiri ti sara ala ngangu. Gbâ ti azo so ayeke lani angbâa ti drogue wala ti sämba ayeke wara nga a-oko kpale ni. So ayeke ambeni nzara so ambeni Chrétien nga na ambeni zo so ayeke manda Bible ayeke tiri na ni la. Peut-être e kue nga na mbeni ngoi e yeke na oko pensé ti bazengele Paul so atene lani, atene: “Tongana mbi ye ti sara ye so ayeke mbilimbili, ye so ayeke sioni la si ayeke na yâ ti mbi.”—aRom. 7:21.

3. Tongana fani mingi mbeni zo ayeke sara nzara ti sioni ye apeut ti sara si lo pensé nyen?

³ Tongana nzara ti sarango mbeni sioni ye asara mo fani mingi, peut-être mo bâ so mo peut ti ke ni ape. Peut-être mo bâ nga so Jéhovah ake mo awe ndali ti so mo sara nzara ti mbeni sioni ye. Hinga biani so apensé ni so ayeke na lege ni ape. Ti hinga ndani so a yeke tongaso, article so ayeke kiri tënë na ahunda use: (1) Zo wa la aye ti tene e wara mara ti apensé so, so ayeke na lege ni ape? (2) Tongana nyen la e peut ti ke asioni nzara ti bê?

FASON SO “ZO TI SIONI” AYE TI TENE E PENSÉ NA NI

4. (a) Ngbanga ti nyen la Satan aye ti tene e bâ so e peut ti ke asioni nzara ape? (b) Ngbanga ti nyen la e peut ti duti sûr so e peut ti ke asioni nzara ti bê?

⁴ Satan aye ti tene e bâ so e peut ti ke asioni nzara ape. Jésus atene so Satan ayeke gi ti zia e na yâ ti tara na ngoi so lo tene na adisciple ti lo ti sambela, lo tene: “Gue na e na yâ ti tara pëpe, me zi e na maboko ti Zo ti sioni.” (Mat. 6:13). Satan atene so tongana nzara ti sarango sioni ye asara azo, ala yeke mä yanga ti Jéhovah ape (Job 2:​4, 5). Nyen la apusu Satan ti pensé tongaso? Satan la nzara ti bê ti lo ahanda lo na lo ye ti ngbâ be-ta-zo na Jéhovah ape. Na bango ni, lo pensé so e yeke tongana lo nga tongana mbeni ye atara e, hio tongaso e yeke dö Jéhovah ti zia. Satan apensé même so lo peut lani ti pusu Molenge ti Nzapa so ayeke mbilimbili-kue ti sara ye so ayeke sioni (Mat. 4:​8, 9). Gbu li kete si: Eskê ti vrai ni e peut pëpe ti ke asioni nzara? E peut ti ke ni. Pensé ti e ague oko na ti bazengele Paul so atene: “Mbi wara ngangu ti sara aye kue ndali ti lo so lo mû ngangu ni na mbi.”—aPhil. 4:13.

5. Nyen la afa so Jéhovah ahinga so e peut ti ke asioni nzara ti bê?

⁵ Pensé ti Jéhovah ayeke nde na ti Satan ndali ti so lo hinga so e peut ti ke asioni nzara. E hinga tongana nyen? Jéhovah afa kozoni awe so azo mingi mingi ayeke ngbâ be-ta-zo na lo nga ala yeke sö kuâ na yâ ti kota ye ti vundu. Gbu li na ndö ti ye so tënë so aye ti tene. Jéhovah, so apeut ti tene mvene ape, atene so gbâ ti azo, mê a yeke gï kete wungo ti azo ape, ayeke lï na yâ ti fini dunia ti lo. “Ala sukula yongoro bongo ti ala na ala sara si avuru na yâ ti mênë ti Molenge ti taba ni.” Ye so afa so Jéhovah abâ so sioni ye ayeke na terê ti ala ape (Apoc. 7:​9, 13, 14). A yeke polele so Jéhovah abâ so e peut ti ke asioni nzara.

6-7. Ngbanga ti nyen la Satan apensé so e peut ti luti na lê ti atara ape?

⁶ Satan aye nga si e pensé so, so e yeke na asioni nzara, e peut ti zia ngia na bê ti Jéhovah ape. Nyen la apusu Satan ti pensé tongaso? Satan la apeut ti zia ngia na bê ti Jéhovah ape, lo yeke ngbâ na fini lakue lakue ape nga a yeke futi lo biani biani (Gen. 3:15; Apoc. 20:10). Kite ayeke dä ape so Satan aye si e bâ so e yeke na beku ape, mbilimbili ndali ti so e la e yeke na beku ti wara atufa so lo peut ti wara ni ape. Me ti e, beku ayeke dä. Ti vrai ni, Bible afa na e so Jéhovah aye ti aidé e me ti fâ ngbanga na ndö ti e ape. Lo “ye si a futi zo oko pëpe, me lo ye si azo kue achangé bê ti ala.”—2 Pi. 3:9.

⁷ Ti vrai ni, tongana e pensé so e peut ti ke asioni nzara ape nga so Jéhovah aye ape, e yeke pensé tongana ti so Satan aye. So e hinga ni apeut ti aidé e ti leke na bê ti e ti ngbâ ti luti na lo.—1 Pi. 5:​8, 9.

DUTINGO TI E TI AWASIOKPARI APEUT TI SARA SI E PENSÉ NYEN?

8. Mbeni ye nde so apeut ti sara si e bâ so e peut ti ke asioni nzara ape nga so Jéhovah aye e ape ayeke so wa? (Psaume 51:5). (Bâ nga “Nda ti mbeni tënë.”)

⁸ Mbeni ye nde ayeke nga dä so apeut ti sara si e bâ so e peut ti ke asioni nzara ape nga so Jéhovah aye e ape. Ye ni so ayeke nyen? Ye ni so ayeke dutingo ti e ti awasiokpari so e wara na mbage ti kozo babâ na mama ti e.a—Job 14:4; diko Psaume 51:5.

9-10. (a) Dutingo ti Adam na Ève ti awasiokpari asara nyen na ndö ti ala? (Bâ nga foto.) (b) Dutingo ti e ti awasiokpari asara nyen na ndö ti e?

⁹ Bâ aye so dutingo ti Adam na Ève ti awasiokpari asara na ndö ti ala. Na peko ti so ala ke yanga ti Jéhovah, ala gi mbeni ye ti kanga na terê ti ala. Étude perspicace des Écritures atene tënë so na ndö ni: “Siokpari asara si ala bâ so tënë ayeke na li ti ala, ala gi bê ti ala, ala bâ so ala yeke nzoni ape nga kamene asara ala.” Ye ni ayeke mo bâ mo tene a kanga lani Adam na Ève na yâ ti mbeni dä so gï achambre osio la ayeke dä. Ala peut ti gue na yâ ti achambre ni kue me ala peut ti sigi na yâ ti da ni ape. Ala peut lani ti kpe dutingo ti ala ti awasiokpari ape.

¹⁰ Ti vrai ni, dutingo ti e ayeke tâ gï tongana ti ala ape. Ye so a futa ti zi azo abâ ala ape, me a sara si e wara pardon ti asiokpari ti e nga na mbeni nzoni conscience (1 aCor. 6:11). Atâa so kue, e wara siokpari so ayeke na terê ti ala. Tongaso, e nga kue e bâ so tënë ayeke na li ti e, e yeke gi bê ti e, e bâ so e yeke nzoni ape nga kamene ayeke sara e. Bible atene so siokpari ayeke sara ngangu mingi na ndö ti zo. Na a yeke tongaso na azo kue “même na ndö ti [azo] so asara lani pëpe siokpari tongana ti so Adam ake lani ndia”. (aRom. 5:14). E doit pëpe gï ti bâ so, so a dü e na siokpari na terê ti e, e yeke wara ande lege lâ oko ape ti sara ye na lege ni wala e yeke na beku ti kekereke ape. E peut ti ke asioni pensé so. Me tongana nyen?

11. A yeke nzoni e sara ye tongana nyen na ngoi so e bâ so e peut ti ke asioni nzara ape? Ngbanga ti nyen? (aRomain 6:12).

¹¹ Na ngoi so e bâ so e peut ti ke asioni nzara ape, a yeke dutingo ti e ti awasiokpari la ayeke pusu e ti pensé tongaso, me e doit ti ke pensé ni so. Ngbanga ti nyen? Ngbanga ti so Bible atene so e doit pëpe ti zia si siokpari angbâ ti “komande tongana gbia” na ndö ti e. (Diko aRomain 6:12.) So aye ti tene so e peut ti soro ti ke ti sara ye so bê ti e apusu e ti sara (aGal. 5:16). Jéhovah ahinga so e peut ti ke ti tï na yâ ti tara; tongaso ape, lo yeke hunda ni na e ape (Deut. 30:​11-14; aRom. 6:6; 1 aThes. 4:3). A yeke polele so e peut ti ke asioni nzara.

12. A yeke nzoni e sara ye tongana nyen na ngoi so e bâ so Jéhovah ake e awe? Ngbanga ti nyen?

¹² Legeoko nga, na ngoi so e bâ so Jéhovah ake e awe ndali ti asioni nzara so ayeke na bê ti e, a yeke dutingo ti e ti awasiokpari la ayeke pusu e ti pensé tongaso, me e doit ti ke pensé ni so. Ngbanga ti nyen? Ngbanga ti so Bible atene so Jéhovah acomprendre dutingo ti e ti awasiokpari (Ps. 103:​13, 14). Lo “hinga ye kue” na ndö ti e, tongaso lo hinga ngangu so dutingo ti e ti awasiokpari ayeke sara na ndö ti e oko oko kue (1 Jean 3:​19, 20). Tongana e ngbâ ti tiri na asioni nzara ti bê ti e na e sara ye alingbi na ni ape, Jéhovah ayeke bâ so sioni ye ayeke na terê ti e ape. Ngbanga ti nyen la e peut ti hinga so a yeke biani tongaso?

13-14. So asioni nzara ayeke na yâ ti bê ti e, a ye ti fa so e peut ti zia ngia na bê ti Jéhovah ape? Fa ndani so mo tene tongaso.

¹³ Bible afa so kota kangbi ayeke na popo ti sarango nzara ti sara sioni ye nga na sarango mbeni sioni ye. E peut lakue ape ti kanga lege na asioni nzara so ayeke sara e, me e peut ti ke ti sara ye alingbi na ni. Na tapande, ambeni ita ti Corinthe ayeke bungbi lani koli na koli kozo si ala ga aChrétien. Paul atene: “Ambeni na popo ti ala ayeke ândö tongaso.” So aye ti tene so nzara ti bungbi koli na koli akiri asara ala lâ oko ape? A yeke tongaso ape, ndali ti so nzara ti sara ni alï ala lani ngangu. Me aChrétien so akanga lani nzara ti terê ti ala nga ake ti sara ye alingbi na nzara ti bê ti ala azia ngia na bê ti Jéhovah. Lo bâ ala tongana azo so “a sukula ala si ala ga nzoni” awe (1 aCor. 6:​9-11). Mo kue Jéhovah apeut ti bâ mo tongaso.

¹⁴ Atâa asioni nzara wa la mo yeke tiri na ni, mo peut ti hon ndö ni. Même tongana asioni nzara so angbâ ti sara mo, mo peut ti kanga nzara ti bê ti mo nga ti ngbâ ti ke ti “sara aye so mitele na bibe aye”. (aÉph. 2:3). Tongaso, aye wa la mo peut ti sara ti aidé mo ti hon ndö ti asioni nzara ti bê ti mo?

AYE SO MO PEUT TI SARA

15. Ti hon ndö ti asioni nzara ti bê ti e, ngbanga ti nyen la e doit ti handa terê ti e ape?

¹⁵ Ti hon ndö ti asioni nzara ti bê ti mo, mo doit ti hinga awokongo ti mo. Sara hange si mo handa terê ti mo ape na “atënë ti mvene.” (Jacq. 1:22). Na tapande, mbeni zo so ayeke na kpale ti nyongo sämba apeut ti pensé so kpale ti lo ayeke ngangu ape na lege so lo tene so ambeni zo ayeke nyon ye ahon lo. Wala mbeni zo so ayeke bâ porno apeut ti gi ti bi tënë na li ti ambeni zo, lo tene: ‘Nzara ti bango porno ayeke sara mbi ape tongana wali ti mbi afa so lo ye mbi mingi.’ Tongana mo komanse ti pensé tongaso, a yeke duti ngangu na mo ape ti tï na yâ ti tara. Gi araison ape ti sara ye ti sioni. Yeda na aye ti peko ti aye so mo sara.—aGal. 6:7.

16. Nyen la apeut ti aidé mo ti ngbâ na ndö ti desizion ti mo ti sara ye na lege ni?

¹⁶ Na ndö ti so mo doit ti hinga awokongo ti mo, mo doit nga ti ngbâ na ndö ti desizion ti mo ti sara ye alingbi na asioni nzara ti mo ape (1 aCor. 9:​26, 27; 1 aThes. 4:4; 1 Pi. 1:​15, 16). Gi ti hinga nyen la nzara ni ayeke gbu ka mo mingi nga na ngoi wa la nzara ni ayeke gbu mo. A peut ti duti mbeni mbilimbili tara wala mbeni mbilimbili ngoi na yâ ti lango ni la nzara ti ye ni so apeut ti gbu mo ngangu. Na tapande, eskê a yeke ngangu na mo ti ke atara na ngoi so mo fatigué wala na ngoi so l’heure ahon? Leke terê ti mo kozo nga gbu li na ndö ti ye so mo peut ti sara ti ke tara ni. Nzoni ngoi ti sara ni ayeke kozo ti tene mo tingbi na tara ni.—aProv. 22:3.

17. Nyen la e peut ti manda na lege ti tapande ti Joseph? (Genèse 39:​7-9). (Bâ nga afoto.)

¹⁷ Gbu li na ndö ti fason so Joseph asara ye na ngoi so wali ti Potiphar agi ti pusu lo ti bungbi na lo. Hio lo ke na lo na kuru go. (Diko Genèse 39:​7-9.) Nyen la e peut ti manda dä? Joseph ahinga awe ye so lo doit ti sara kozo si wali ti Potiphar agi ti pusu lo ti bungbi na lo. Mo nga kue mo peut ti leke na bê ti mo ti sara ye na lege ni kozo si mo tingbi na mbeni tara. Tongaso, na ngoi so mo tingbi na mbeni tara, a yeke duti ande ngangu na mo ape ti sara ye alingbi na desizion so mo mû kozo awe.

‘NGBÂ TI BÂ WALA MO YEKE TONGANA NYEN’

18. Mbeni ye nde wa la mo peut ti sara ti ke asioni nzara so ayeke sara mo? (2 aCorinthien 13:5).

¹⁸ Ti ke asioni nzara so ayeke sara mo, mo bezoin ti ‘ngbâ ti bâ terê ti mo ti bâ wala mo yeke tongana nyen’, so ti tene, ti ngbâ ti bâ yâ ti asarango ye ti mo. (Diko 2 aCorinthien 13:5.) Ngoi na ngoi, gbu li na ndö ti apensé ti mo nga na aye so mo yeke sara nga sara achangement so mo doit ti sara. Na tapande, même tongana mo wara lege ti ke mbeni tara, hunda terê ti mo: ‘A hunda ngoi oke na mbi ti tene mbi ke ni?’ Tongana mo bâ so mo ke ni hio ape, fâ ngbanga na li ti mo ape. Me gbu li na ndö ti ye so mo peut ti sara ti tene ti peko mo ke ni hio. Hunda terê ti mo na mara ti atënë tongaso: ‘Tongana mbeni sioni pensé aga na li ti mbi, eskê mbi peut ti tomba ni hio ahon ti kozo? Eskê angia so mbi soro ti sara asara si a yeke ngangu na mbi ti ke atara? Tongana lê ti mbi atï na ndö ti mbeni sioni image, eskê hio mbi yeke zi lê ti mbi na terê ni? Eskê mbi hinga so andia ti Jéhovah ayeke lakue ndali ti nzoni ti mbi même tongana a hunda ti tene mbi kanga nzara ti bê ti mbi?’—Ps. 101:3.

19. Tongana nyen la adesizion so e mû na yâ ti ambeni ye so akpa akete kete ye apeut ti sara si a yeke ngangu na e ti tiri na asioni nzara?

¹⁹ Na ngoi so mo yeke bâ yâ ti asarango ye ti mo, kpe ti gi araison ti ngbâ ti sara ye alingbi na anzara ti bê ti mo. Bible atene: “Bê ti zo ayeke handa zo mingi ahon ambeni ye kue, nga ayeke sioni mingi.” (Jér. 17:9). Jésus atene so “asioni pensé” ayeke sigi na yâ ti bê ti zo (Mat. 15:19). Na tapande, mbeni zo so azia ti bâ porno apeut ti pensé so, na peko ti ambeni ngoi, lo peut ti bâ afoto so azingo nzara ti terê ti zo ndali ti so azo ti yâ ti foto ni, terê ti ala ayeke senge ape. Wala lo peut ti tene: ‘A yeke sioni ape ti gbu li na ndö ti asioni pensé ndali ti so mbi sara ni vrai tongaso ape.’ Tongana mbeni zo ayeke gbu li tongaso, a yeke tongana ti so lo ‘leke kozoni ti sara aye ti nzara ti mitele.’ (aRom. 13:14). Tongana nyen la mo peut ti ke ti sara mara ti ye tongaso? Sara hange ti tene mo mû asioni desizion na yâ ti aye so akpa akete kete ye, tongaso si a gue na mo pëpe ti mû asioni desizion na yâ ti aye so ayeke akota ye, na tapande sarango ye ti sioni.b Ke nga pensé kue wala “asioni pensé” so apeut ti pusu mo ti gi araison ti sara ye alingbi na asioni nzara ti bê ti mo.

20. Nyen la e yeke ku ni kungo na yâ ti angoi so ayeke ga? Nyen la ayeke mû maboko na e laso?

²⁰ Tongana ti so e manda fade, na mungo maboko ti Jéhovah, e peut ti ke ti tï na yâ ti tara. Nga, so lo sara nzoni bê na e, e yeke na beku ti wara fini ti lakue lakue na yâ ti fini dunia. Terê ti e ayeke nzere ande mingi na ngoi so e yeke sara na Jéhovah sân ti tene e tiri na asioni nzara. Juska ti si na ngoi ni so, e peut ti duti sûr so e peut ti ke asioni nzara nga so Jéhovah ake e ape na ngoi so e yeke tiri na asioni nzara. So Jéhovah asara tufa na ndö ti a-effort so e sara, e peut ti ke asioni nzara ti bê.