Duti sûr so Jéhovah aye mo

1. Nyen la apusu mo ti mû terê ti mo na Jéhovah? (Ba nga afoto.)

ESKÊ mo dabe ti mo na lango so mo mû lani terê ti mo na Jéhovah? Mo mû lani desizion so ndali ti so mo hinga lo nga mo ye lo. Mo tene na lo so vorongo lo aga kozo na yâ ti fini ti mo nga mo yeke ngbâ ti ye lo na bê ti mo kue, na âme ti mo kue, na bibe ti mo kue nga na ngangu ti mo kue (Marc 12:30). Ngbene ye na ngoi ni so ti ga na ni, ndoye ti mo na mbage ti lo ayeke ngbâ ti kono gï konongo. Ka tongana mbeni zo ahunda mo, atene: “Eskê mo ye Jéhovah biani?” mo yeke tene nyen na lo? Sân ti gbu li mo yeke tene: “Mbi ye lo mingi ahon zo kue nga ahon ye kue.”

2-3. Nyen la Jéhovah aye ti tene e duti sûr na ni? Nyen la e yeke bâ na yâ ti article so? (Jérémie 31:3).

² Me ka tongana mbeni zo ahunda mo, atene: “Eskê mo yeke sûr so Jéhovah aye mo?” Eskê mo yeke ku kete si mo kiri tënë, peut-être mo pensé so mo lingbi ti tene Jéhovah aye mo ape? Mbeni ita-wali so abâ so a ye lo na kete ti lo ape atene: “Mbi hinga so mbi ye Jéhovah. Mbi yeke na kite oko na ni ape. Me fani mingi, ye so mbi yeke na kite na ni ayeke so: Eskê Jéhovah aye mbi?” Tongaso, nyen la apeut ti aidé mo ti hinga so Jéhovah aye mo biani?

³ Jéhovah aye ti tene mo hinga na bê ti mo kue so lo ye mo. (Diko Jérémie 31:3.) Ti vrai ni, Jéhovah la agboto mo na mbage ti lo. Na ngoi so mo mû terê ti mo na lo na yâ ti sambela nga mo wara batême, lo mû na mo mbeni cadeau so ngere ni ayeke ngangu mingi: ta ndoye ti lo. So aye ti tene ndoye so ayeke kota mingi nga lo yeke zia mo lâ oko ape. Ndoye so apusu lo ti bâ awakua ti lo kue so ayeke be-ta-zo, so mo kue mo yeke na yâ ni, tongana ‘ye ti lo ti mosoro.’ (Mal. 3:​17, kete tënë na gbe ni.) Jéhovah aye ti tene mo duti sûr so lo ye mo tongana ti so bazengele Paul ayeke lani sûr so lo ye lo. So lo hinga tongaso, lo tene: “Mbi hinga biani mbi tene atâa kuâ, wala fini, wala a-ange, wala agouvernement, wala aye so ayeke dä fadeso, wala aye so ayeke ga ande, wala angangu, wala yongo ti ye na nduzu, wala lingo ti ye na gbe ni, wala mbeni ye nde so a leke alingbi ande ti kangbi e na ndoye ti Nzapa pëpe.” (aRom. 8:​38, 39). Na yâ ti article so, e yeke bâ ndani so a yeke kota ye ti hinga biani so Jéhovah aye e nga nyen la e peut ti sara ti duti sûr na ni.

NDANI SO A YEKE KOTA YE TI DUTI SÛR SO JÉHOVAH AYE E

4. Tongana nyen la e peut ti ke mbeni mayele so Satan asara kua na ni mingi?

⁴ Tongana e yeke sûr so Jéhovah aye e, e peut ti ke mbeni ‘mayele’ ti Satan (aÉph. 6:11). Satan ayeke sara ye kue so lo peut ti sara ti kanga lege na e ti voro Jéhovah. Mbeni mayele so Satan ayeke sara na kua ayeke mvene so lo tene so Jéhovah aye e ape. Girisa ape so Satan ayeke gi gï alege ti handa e. Fani mingi lo yeke gi ti wara e na ngoi so e woko: peut-être vundu asara e ndali ti aye so asi na e ândö, akpale so e wara laso wala agingo bê so e yeke na ni na ndö ti kekereke (aProv. 24:10). Satan ayeke tongana mbeni bamara so ayeke gi ti gbu mbeni nyama so mbeni ye ti batango lo ayeke dä ape. Tongaso, lo yeke profité na vundu so asara e ti sara si e découragé. Me tongana e yeke na kite oko ape so Jéhovah aye e ayeke aidé e ti “luti ti ke” Satan na amayele ti lo.—1 Pi. 5:​8, 9; Jacq. 4:7.

5. Ngbanga ti nyen la a yeke kota ye ti tene mo hinga so Jéhovah aye mo nga lo bâ mo na nene ni mingi?

⁵ Tongana e yeke sûr so Jéhovah aye e, e peut ti ga nduru mingi na lo. E peut ti tene tongaso ngbanga ti nyen? Jéhovah acréé e ti tene e ye azo nga ti tene ala ye e. Tongana mbeni zo aye e ayeke pusu e ti ye nga lo. Tongaso, tongana e bâ so Jéhovah aye e mingi, e nga kue e yeke ye lo mingi (1 Jean 4:19). Nga tongana ndoye ti e na mbage ti Jéhovah ayeke maï, ndoye ti lo na mbage ti e ayeke maï nga. Bible atene na e polele, atene: “Ala ga nduru na Nzapa, na lo yeke ga ande nduru na ala.” (Jacq. 4:8). Nyen la e peut ti sara ti duti sûr so Jéhovah aye e?

NYEN LA E PEUT TI SARA TI DUTI SÛR SO JÉHOVAH AYE E?

6. Tongana mo yeke sûr so Jéhovah aye mo ape, nyen la mo peut ti sara?

⁶ Ngbâ ti hunda Jéhovah ti aidé mo ti comprendre ndani so lo ye mo (Luc 18:1; aRom. 12:12). Lâ oko oko, hunda na Jéhovah même fani mingi ti aidé mo ti bâ terê ti mo tongana ti so lo bâ na mo. Na ambeni ngoi, so mo yeke na nzoni bango ndo na ndö ti mo ape asara si mo bâ so a yeke ngangu ti tene Jéhovah aye mo. Me girisa ape so Jéhovah ayeke kota ahon bê ti mo (1 Jean 3:​19, 20). Lo bâ anzoni sarango ye so mo yeke na ni atâa so mo wani mo bâ ni ape (1 Sam. 16:7; 2 Chron. 6:30). Tongaso, fa na lo polele atënë ti bê ti mo nga hunda na lo ti aidé mo ti duti sûr so lo ye mo (Ps. 62:8). Na pekoni, a yeke kota ye ti sara ye alingbi na awango so ayeke na gbe ni so.

7-8. Tongana nyen la apsaume a-aidé e ti hinga biani so Jéhovah aye e?

⁷ Sara confiance na tënë ti Jéhovah. Yingo vulu apusu azo so asû Bible ti fa tâ tënë na ndö ti lo. Bâ tongana nyen la David so asû apsaume afa pendere mingi so Jéhovah aye e mingi. Lo tene: “Jéhovah ayeke nduru na azo so mbeni ye amû vundu na ala ngangu; lo sö azo so bê ti ala awoko kue.” (Ps. 34:18). Tongana mo découragé, mo peut ti bâ so mo yeke gï mo oko. Me Jéhovah atene, na angoi tongaso, lo yeke nduru na mo ndali ti so lo bâ so mo bezoin ti tene lo aidé mo mingi. Na yâ ti mbeni psaume nde, David atene: “Zia ngu ti lê ti mbi kue na yâ ti ngbenda ti mo.” (Ps. 56:8). Na ngoi so mo yeke nzoni ape, Jéhovah abâ ni. Lo pensé na mo mingi nga lo bâ mawa ti mo. Goutte ti ngu oko oko so ayeke na yâ ti mbeni bouteille ayeke kota ye na lê ti zo so ayeke voyagé na yâ ti benyama. Legeoko nga, angu ti lê ti mo so ayuru ayeke kota ye na lê ti Jéhovah na lo yeke girisa ape ngoi kue so mo yeke toto. Psaume 139:3 atene: “Mo [Jéhovah mo] hinga alege ti mbi kue nzoni.” Jéhovah ayeke bâ aye kue so mo sara, me lê ti lo ayeke na ndö ti anzoni ye so mo sara (aHéb. 6:10). Ngbanga ti nyen? Ngbanga ti so lo bâ na nene ni mingi effort kue so mo sara ti zia ngia na bê ti lo.a

⁸ Na lege ti mara ti aversê so adë bê so ayeke na yâ ti Bible, Jéhovah ayeke tene na mo, atene: “Mbi ye mo hinga so mbi ye mo mingi nga mbi yeke pensé na mo mingi.” Me tongana ti so e manda fade, Satan ayeke maï mvene so atene Jéhovah aye mo ape. Tongaso, tongana na ambeni ngoi mo yeke sûr ape so Jéhovah aye mo, hunda terê ti mo: ‘Zo wa la mbi ye ti yeda na tënë ti lo: “babâ ti mvene” wala “Nzapa ti tâ tënë”?’—Jean 8:44; Ps. 31:5.

9. Zendo wa la Jéhovah amû na azo so aye lo? (Exode 20:​5, 6).

⁹ Gbu li na ndö ti fason so Jéhovah ayeke sara ye na mbage ti azo so aye lo. Mä tënë so Jéhovah atene na Moïse nga na azo ti Israël. (Diko Exode 20:​5, 6.) Jéhovah amû zendo so lo yeke ngbâ ti fa tâ ndoye na azo so aye lo. So Jéhovah ayeke be-ta-zo, e peut ti duti sûr so tongana mbeni wakua ti lo aye lo, lo yeke ye nga lo (Néh. 1:5). Tongaso, tongana na ambeni ngoi mo bezoin ti duti sûr so Jéhovah aye mo, hunda terê ti mo: ‘Eskê mbi ye Jéhovah?’ Na pekoni, gbu li na ndö ti tënë so: Tongana mo ye lo na mo yeke sara kue ti zia ngia na bê ti lo, hinga biani so lo ye mo mingi (Dan. 9:4; 1 aCor. 8:3). So ti tene, tongana mo yeke sûr so mo ye Jéhovah, dë kite ape so lo ye mo. Mo peut ti duti sûr so lo yeke ngbâ gï lakue ti ye mo nga lo yeke zia mo lâ oko ape.

10-11. Tongana nyen la Jéhovah aye ti tene mo bâ ye so a futa ti zi azo? (aGalate 2:20).

¹⁰ Gbu li na ndö ti ye so a futa ti zi azo. Kota cadeau so Jéhovah amû na azo ayeke fini ti Jésus Christ so lo mû na sandaga (Jean 3:16). Me eskê Jésus akui nga ndali ti mo? En! Gbu li na ndö ti ye so asi na bazengele Paul. Lo sara lani asioni ye mingi kozo ti ga Chrétien, nga même na pekoni, lo ngbâ ti tiri na awokongo ti lo (aRom. 7:​24, 25; 1 Tim. 1:​12-14). Me lo bâ ye so a futa ti zi azo tongana cadeau so Jéhovah amû na lo wani. (Diko aGalate 2:20.) Girisa ape so yingo ti Jéhovah la apusu Paul ti sû atënë so na yâ ti Bible. Na aye kue so a sû na yâ ti Bible ayeke ti tene a fa ye na e (aRom. 15:4). Atënë ti Paul so afa tongana nyen la Jéhovah aye mo bâ ye so a futa ti zi azo: tongana mbeni cadeau so Lo mû ndali ti mo. Tongana mo bâ ye so a futa ti zi azo tongaso, mo yeke hinga na bê ti mo kue so Jéhovah aye mo.

¹¹ E kiri singila na Jéhovah so lo tokua Jésus na sese ti kui ndali ti e. Me mbeni raison so ndali ni Jésus aga na sese ayeke ti fa na azo tâ tënë na ndö ti Nzapa (Jean 18:37). Mbeni tâ tënë ni ayeke so Jéhovah aye amolenge ti lo mingi.

FASON SO JÉSUS A-AIDÉ E TI DUTI SÛR SO JÉHOVAH AYE E

12. Ngbanga ti nyen la e peut ti yeda na tënë so Jésus atene na ndö ti Jéhovah?

¹² Na ngoi so Jésus ayeke lani na ndö ti sese, a nzere na lo ti fa na azo mara ti zo so Jéhovah ayeke ni (Luc 10:22). E peut ti yeda na tënë so Jésus atene na ndö ti Jéhovah ndali ti so lo yeke na terê ti lo na yayu a ninga kozo ti ga na sese (aCol. 1:15). Jésus ahinga so Jéhovah aye lo mingi. Lo hinga nga so Babâ ti lo aye mingi amolenge ti lo so ayeke na yayu nga na ala so ayeke na sese so ayeke be-ta-zo na lo. Tongana nyen la Jésus a-aidé e ti hinga so Jéhovah aye e?

13. Jésus aye ti tene e bâ Jéhovah tongana nyen?

¹³ Jésus aye ti tene e bâ Jéhovah tongana ti so lo bâ na lo. Na yâ ti aÉvangile, Jésus airi Jéhovah “Babâ” ahon fani 160. Nga na ngoi so lo yeke sara tënë lani na adisciple ti lo, lo sara kua na atënë tongana “Babâ ti ala” wala “Babâ ti ala so ayeke na yayu”. (Mat. 5:16; 6:26). Kozo ti tene Jésus aga na sese, awakua ti Jéhovah so ayeke lani be-ta-zo na lo ayeke iri lo “Lo so ngangu ti lo ahon angangu kue,” “Lo so ayeke na nduzu na ndö ti aye kue,” ‘Lo so asara aye kue, so ayeke kota mingi’ nga na ambeni iri tongaso. Me fani mingi Jésus airi Jéhovah “Babâ” ti e. Ye so aye ti fa so Jéhovah aye si awakua ti lo abâ so lo yeke nduru mingi na ala tongana ti so mbeni molenge abâ so lo yeke nduru mingi na babâ ti lo so aye lo. A yeke polele so Jésus aye ti tene e bâ Jéhovah tongana ti so lo bâ na lo: Babâ ti e ti yayu so aye e amolenge ti Lo mingi. Zia e bâ angoi use so Jésus asara kua na tënë “Babâ” ti sara tënë ti Jéhovah.

14. Tongana nyen la Jésus afa so e oko oko kue e yeke ye ti ngangu ngere na lê ti Babâ ti e ti yayu? (Matthieu 10:​29-31). (Bâ nga foto.)

¹⁴ Kozoni, mä tënë so Jésus atene na Matthieu 10:​29-31. (Diko ni.) Anzêrë ayeke akete ndeke so apeut ti ye Jéhovah wala ti voro lo lâ oko ape. Me Babâ ti e abâ na nene ni mbeni nzêrë, lo hinga même ngoi so lo tï na sese. So lo bâ na nene ni mbeni kete ndeke tongaso, e peut ti duti sûr so lo ye e oko oko kue mingi ndali ti so e ye lo nga e voro lo. Jésus atene nga so Jéhovah ahinga wungo ti kuä ti li ti e oko oko kue. So Jéhovah ahinga même akete kete ye na ndö ti e, e peut ti duti sûr so lo ye e mingi. A yeke polele so Jésus aye ti tene e oko oko kue e hinga so e yeke ye ti ngangu ngere na lê ti Babâ ti e ti yayu.

15. Atënë ti Jésus so ayeke na Jean 6:44 afa na mo nyen na ndö ti Babâ ti mo ti yayu?

¹⁵ Bâ mbeni ngoi nde so Jésus asara kua na tënë “Babâ”. (Diko Jean 6:44.) Babâ ti mo ti yayu agboto mo, so ti tene, na ndoye lo ga na mo na yâ ti tâ tënë. Lo sara tongaso ngbanga ti nyen? Ngbanga ti so lo bâ so mo yeke na anzoni sarango ye (Kus. 13:48). Na ngoi so Jésus ayeke tene lani tënë so ayeke na Jean 6:​44, peut-être lo yeke pensé na tënë so Jéhovah atene so ayeke na Jérémie 31:3. Na yâ ni, Jéhovah atene na azo ti lo, atene: “Tâ ndoye apusu mbi ti gboto mo na mbage ti mbi.” (Jér. 31:3; bâ Osée 11:4.) Gbu li ti bâ ndani so a tene so ndoye ti lo ayeke tâ ndoye. Babâ ti e ti yayu abâ lani anzoni sarango ye ti mo so peut-être mo bâ ni ape nga lo ngbâ ti bâ ni.

16. (a) Nyen la Jésus afa na e? Ngbanga ti nyen la a yeke nzoni e yeda na ni? (b) Nyen la apeut ti aidé mo ti duti sûr so Jéhovah ayeke Babâ so mo bezoin ni? (Bâ encadré “Babâ so e kue e ye ti wara.”)

¹⁶ So Jésus atene Jéhovah ayeke Babâ ti e, lo yeke fa na e na mbeni lege, lo tene: “Jéhovah ayeke gï Babâ ti mbi ape, lo yeke nga Babâ ti ala. Lo ye ala nga lo pensé na ala mingi.” Tongaso, tongana na ambeni ngoi mo yeke sûr ape so Jéhovah aye mo, girisa ape tënë so Jésus atene nga yeda na ni ndali ti so lo yeke tene lakue tâ tënë nga lo la lo hinga Babâ ti e nzoni mingi.—1 Pi. 2:22.

DUTI LAKUE SÛR SO JÉHOVAH AYE MO

17. Ngbanga ti nyen la e doit ti duti lakue sûr so Jéhovah aye e?

¹⁷ E doit ti sara kue ti duti lakue sûr so Jéhovah aye e. Tongana ti so e bâ fade, wato ti e Satan so ayeke sara ye na mayele ayeke sara kue ti kanga lege na e ti sara na Jéhovah. Lo ye ti sara si e découragé. Tongaso, lo ngbâ ti sara si e bâ so Jéhovah aye e ape. E doit ti yeda na mvene ti lo so ape.—Job 27:5.

18. Nyen la mo peut ti sara ti ngbâ ti duti sûr so Jéhovah aye mo?

¹⁸ Ti ngbâ ti duti sûr so Jéhovah aye mo, ngbâ ti sambela lo ti aidé mo ti bâ terê ti mo tongana ti so lo bâ na mo. Gbu li mingi na ndö ti aversê ti Bible so afa so Jéhovah aye mingi azo so aye lo. Girisa ape so Jéhovah ayeke ye lakue zo so aye lo. Gbu li na ndö ti ndani so mo peut ti bâ ye so a futa ti zi azo tongana mbeni cadeau so a mû na mo. Nga yeda so Jéhovah ayeke Babâ ti mo ti yayu, tongana ti so Jésus atene. Na pekoni, tongana mbeni zo ahunda mo, atene: “Eskê mo yeke sûr so Jéhovah aye mo?” Na bê ti mo kue, mo yeke tene: “En, lo ye mbi. Nga lâ oko oko mbi yeke sara ye kue so mbi peut ti sara ti fa so mbi ye lo.”