Lege ti mû wango na azo

1. Zo wa la adoit ti mû wango na azo? Fa ndani so mo tene tongaso.

MO BÂ mungo wango na azo tongana nyen? A nzere na ambeni zo ti mû wango. Ti ambeni, mbeto asara ala ti mû wango na azo wala a sara ala nzoni ape. Atâa ti e ayeke tongana nyen, ngoi na ngoi e kue e doit ti mû wango na azo. Ngbanga ti nyen? Ngbanga ti so Jésus atene so a yeke hinga atâ disciple ti lo na lege ti ndoye so ayeke na popo ti ala (Jean 13:35). Mbeni lege so e yeke fa so e ye aita ti e ayeke ti mû wango na ala tongana bezoin ni ayeke dä. Bible atene so “pendere songo ti kamarade” abâ gigi na peko ti “wango so a mû na bê kue”.—aProv. 27:9.

2. Nyen la a-ancien adoit ti sara? Ngbanga ti nyen? (Bâ nga encadré “Wango so a mû na ngoi ti bungbi ti milieu ti yenga.”)

² A-ancien adoit ti hinga ti mû na azo nzoni wango. Jéhovah na Jésus amû na ala kua ti bango lege ti congrégation (1 Pi. 5:​2, 3). Mbeni lege so ala yeke sara ni ayeke ti mû wango so alondo na yâ ti Bible na yâ ti adiskur so ala yeke mû na congrégation. Ala doit nga ti mû wango na e oko oko, même na aita so ague yongoro na Jéhovah. Tongana nyen la e kue nga na a-ancien e peut ti mû nzoni wango?

3. (a) Tongana nyen la e peut ti manda ti duti nzoni zo ti mungo wango? (Ésaïe 9:6; bâ nga encadré “Mû tapande ti Jésus na ngoi so mo yeke mû wango na zo.”) (b) Nyen la e yeke bâ na yâ ti article so?

³ E peut ti manda ye mingi na ndö ti dutingo nzoni zo ti mungo wango na lege ti tapande ti azo so Bible asara tënë ti ala, mbilimbili Jésus. Mbeni iri so a mû na lo ayeke “Zo ti mungo wango ti ndara”. (Diko Ésaïe 9:6.) Na yâ ti article so, e yeke bâ ye so e peut ti sara tongana mbeni zo ahunda na e wango nga na ye so e peut ti sara tongana e doit ti mû wango na mbeni zo sân ti tene lo hunda ni. E yeke bâ nga so ti mû wango na zo na nzoni ngoi nga na mbeni nzoni fason ayeke kota ye.

TONGANA A HUNDA NA E WANGO

4-5. Tongana mbeni zo ahunda na e wango, hunda wa la a yeke nzoni e hunda terê ti e na ni kozo? Mû mbeni tapande ti fa ni.

⁴ Tongana mbeni zo ahunda na e wango, nyen la a yeke nzoni e sara ni kozo? Peut-être a nzere na e, nga hio e ye ti aidé lo. Me a yeke nzoni ti tene kozoni e hunda terê ti e: ‘Eskê mbi hinga ye nzoni na ndö ti tënë ni tongaso si mbi lingbi ti mû wango dä?’ Na ambeni ngoi, nzoni lege so e peut ti aidé mbeni zo ayeke ti mû na lo wango ape me ti fa na lo mbeni zo so alingbi so apeut ti mû na lo wango na ndö ti tënë ni.

⁵ Gbu li na ndö ti tapande so. Imaginé so mbeni kota kamarade ti mo awara mbeni ngangu kobela. Lo tene na mo so lo komanse ti sara recherche na ndö ti akode nde nde so lo peut ti soigné na terê ti lo, na pekoni lo hunda bango ndo ti mo ti hinga nzoni kode ni. Atâa so mbeni kode ni anzere na mo, mo yeke docteur ape nga mo manda ye na ndö ti kaïngo kobela so ape. Tongaso, nzoni ye so mo peut ti sara ti aidé kamarade ti mo ni ayeke ti aidé lo ti wara mbeni zo so alingbi so apeut ti aidé lo.

6. Ngbanga ti nyen la peut-être a yeke nzoni e dö terê ape ti mû wango na mbeni zo?

⁶ Même tongana e bâ so e hinga ye nzoni na ndö ti mbeni mbilimbili tënë, peut-être e yeke ku teti mbeni kete ngoi kozo si e kiri tënë na zo so ahunda na e wango ni. Ngbanga ti nyen? A-Proverbe 15:28 atene so “zo ti mbilimbili ayeke gbu li na yâ ti bê ti lo kozo si lo kiri tënë.” Ka tongana e pensé so e hinga tënë so e peut ti tene na lo? E peut kamême ti mû ngoi ti sara recherche, ti sambela nga ti gbu li na ndö ti tënë ni. Tongana e sara tongaso, e peut ti hinga biani so wango so e mû na lo ague oko na apensé ti Jéhovah na ndö ti tënë ni. Zia e gbu li na ndö ti tapande ti prophète Nathan.

7. Nyen la tapande ti prophète Nathan afa na e?

⁷ Gbia David atene lani na prophète Nathan so lo ye ti leke mbeni temple na Jéhovah. Hio, Nathan atene na lo ti sara ni. Me Nathan adoit lani ti mû ngoi kozo ti hunda Jéhovah si. Ngbanga ti nyen? Ngbanga ti so Jéhovah aye lani ape ti tene David la aleke temple ni (1 Chron. 17:​1-4). Tongana ti so tapande so afa, tongana a hunda na e wango, a yeke duti ande lege ti ndara ti ‘sara tënë hio pëpe’.—Jacq. 1:19.

8. Mbeni raison wa la ndali ni a yeke nzoni e gbu li nzoni na ngoi so e yeke mû wango na zo?

⁸ Mbeni raison so ndali ni a yeke nzoni e gbu li nzoni na ngoi so e yeke mû wango na zo ayeke so: Tongana e mû na mbeni zo wango so ayeke nzoni ape si lo wara kpale, mbage ti tënë ni ayeke na li ti e. Tongaso, a yeke kota ye ti tene e gbu li nzoni kozo si e mû wango na mbeni zo.

TONGANA E YEKE MÛ WANGO NA ZO SÂN TI TENE LO HUNDA NI

9. Kozo ti tene a-ancien amû wango na mbeni zo, nyen la ala doit ti duti sûr na ni? (aGalate 6:1).

⁹ Na ambeni ngoi, a-ancien adoit ti mû wango na mbeni ita so “amû sioni lege”. (Diko aGalate 6:1.) Mbeni zo apeut ti mû ambeni desizion na lege ti ndara ape na apeut ti gue na lo ti sara mbeni kota siokpari. Ye so a-ancien aye ayeke ti aidé zo ni ti ngbâ na ndö ti lege so ague na fini ti lakue lakue (Jacq. 5:​19, 20). Me ti tene ala mû na lo nzoni wango, kozoni ala doit ti duti sûr so lo mû biani sioni lege. Jéhovah amû lege na e kue ti mû adesizion alingbi na conscience ti e (aRom. 14:​1-4). Me ka tongana mbeni ita amû biani mbeni sioni lege na a-ancien aye ti mû na lo wango, ala peut ti sara ni tongana nyen?

10-12. Nyen la a yeke nzoni a-ancien asara tongana ala doit ti mû wango na mbeni zo so ahunda ni ape? Fa mbeni tapande ni. (Bâ nga afoto.)

¹⁰ A yeke kete ye na a-ancien ape ti mû wango na mbeni zo so ahunda ni na ala ape. Ngbanga ti nyen? Bazengele Paul atene mbeni zo apeut ti mû sioni lege sân ti hinga. Tongaso, kozo ti tene a-ancien amû wango na mbeni zo, ambeni ye ayeke dä so a yeke nzoni ala sara tongaso si a duti ngangu na zo ni ape ti mä ala.

¹¹ A peut ti haka mungo wango na mbeni zo so ahunda ni ape na lungo alê ti kobe na mbeni ndo so ahule. Kozo ti tene zo ti fango yaka alu alê ti kobe, lo yeke tourné sese ni. Ye so ayeke sara si sese ni ayeke woko na pekoni lo peut ti lu ye dä. Na nda ni, lo yeke tuku ngu dä ti aidé ni ti kono. Legeoko nga, ambeni ye ayeke dä so mbeni ancien apeut ti sara tongaso si a yeke ngangu ape na mbeni ita ti mä wango ti lo. Na tapande, ancien ni ayeke ku mbeni nzoni ngoi, na pekoni lo yeke tene na ita ni so lo pensé na lo nga so mbeni tënë ayeke dä so lo ye ti tene ala sara lisoro na ndö ni. Tongana zo ti mungo wango ni ayeke zo so aye azo nga ayeke sara ye na nzoni bê, a yeke duti ngangu na aita ape ti yeda na wango ti lo.

¹² Na ngoi ti lisoro ni, ancien ni apeut ti ngbâ ti leke sese ni na lege so lo dabe ti zo ni so zo kue ayeke sara afaute na abezoin wango ngoi na ngoi (aRom. 3:23). Ancien ni ayeke fa na lo polele na lege ti aversê ti Bible so lo mû sioni lege, me lo yeke sara tënë na lo yeke nga na nengo lo. Na peko ti so zo ni ayeda so lo sara faute, ancien ni ayeke “lu lê ti kobe ni” na lege so lo fa na lo na mbeni lege so akpengba ape ye so lo doit ti sara ti leke dutingo ti lo. Na nda ni, ancien ni ayeke “tuku ngu dä” na lege so lo yeke gonda zo ni na bê kue nga lo yeke sambela na lo.—Jacq. 5:15.

13. Nyen la a-ancien apeut ti sara ti duti sûr so zo ni amä yâ ti wango ni?

¹³ Na ambeni ngoi, tënë so a tene na mbeni zo na ngoi so a yeke mû na lo wango, lo yeke mä yâ ti tënë ni tongana ti so a tene na lo so ape. Nyen la a-ancien apeut ti sara ti duti sûr so mbeni zo ayeke mä yâ ti wango ti ala? Na nzoni bê, ala peut ti hunda atënë ti bâ wala zo ni amä yâ ti wango ni nga lo hinga tongana nyen la lo peut ti sara ye alingbi na ni.—Zo-ti. 12:11.

MUNGO WANGO NA NZONI NGOI NGA NA NZONI FASON

14. Eskê a yeke nzoni e mû wango na ngoi so bê ti e ason? Fa ndani so mo tene tongaso.

¹⁴ So e kue e yeke mbilimbili-kue ape, nyen na nyen e yeke tene mbeni tënë wala e yeke sara mbeni ye so ason bê ti azo (aCol. 3:13). Bible atene so na ambeni ngoi e peut même ti son bê ti mba (aÉph. 4:26). Me e doit ti mû wango pëpe na mbeni zo na ngoi so bê ti e ason. Ngbanga ti nyen? Ngbanga ti so “ngonzo ti zo ayeke sara pëpe si mbilimbili ti Nzapa aga.” (Jacq. 1:20). Tongana e mû wango na ngoi so bê ti e ason, e peut ti sara si kpale ni akiri aga sioni. So aye ti tene ape so a yeke nzoni e fa lâ oko ape apensé ti e nga na atënë ti bê ti e na zo so ason bê ti e. Me a yeke nzoni e ku juska bê ti e adë awe si e sara tënë na zo ni. E peut ti manda ye na lege ti tapande ti Élihu so amû nzoni wango na Job.

15. Nyen la e manda na lege ti tapande ti Élihu? (Bâ nga foto.)

¹⁵ Na yâ ti alango mingi, Élihu amä Job so ayeke gbu koko ti lo wani na ngoi so amba ti lo abi tënë na li ti lo. Élihu abâ mawa ti lo. Me ngonzo asara nga Élihu ndali ti so Job atene tâ tënë na ndö ti Jéhovah ape nga lo gi ti fa so tënë ayeke na li ti lo ape. Atâa so kue, Élihu akanga bê lo ku, na pekoni na ngoi so lo yeke mû wango na Job, lo sara tënë yeke nga lo ne lo mingi (Job 32:2; 33:​1-7). Tapande ti Élihu afa na e mbeni kpengba tâ tënë: A yeke nzoni ti mû wango na nzoni ngoi nga na nzoni fason, so ti tene na nengo zo nga na ndoye.—Zo-ti. 3:​1, 7.

NGBÂ TI MÛ WANGO NGA TI YEDA NA NI

16. Nyen la e manda na lege ti Psaume 32:8?

¹⁶ Versê so ayeke mama-tene ti article so atene: ‘Jéhovah ayeke mû na e wango, na lê ti lo ayeke gï na ndö ti e.’ (Diko Psaume 32:8.) Ye so afa so lo yeke ngbâ ti mû maboko na e. Lo yeke mû na e wango nga lo yeke aidé e ti sara ye alingbi na ni. So ayeke mbeni pendere tapande! Tongana e yeke na pasa ti mû wango na azo, e peut nga ti ngbâ ti kpengba ala na ti aidé ala ti mû anzoni desizion.

17. Tongana a-ancien amû na e wango so alondo na Bible ayeke sara e tongana nyen? (Ésaïe 32:​1, 2).

¹⁷ E bezoin laso mingi ti mû wango na azo nga ti yeda na wango (2 Tim. 3:1). A-ancien so amû na e wango so e yeke tâ na bezoin ni so alondo na Bible ayeke “tongana mbeni ngu so asua na yâ ti ndo so ngu ayeke dä pëpe”. (Diko Ésaïe 32:​1, 2.) Akamarade so ahinga tënë so e ye ti mä me so atene na e tënë so e bezoin ni amû na e mbeni cadeau ti ngangu ngere so ayeke tongana “apomme ti lor na yâ ti apendere sembe ti argent.” (aProv. 25:11). Zia e kue e ngbâ ti manda nzoni fason ti mungo nzoni wango nga ti yeda na ni.