Gingo ti wara anzoni wango

TONGANA mo yeke gi ti wara mbeni wango, warango ni ason pëpe, a si singo. Azo ayeke sigigi na abuku mingi ti tene azo awara awango ti bê ti ala dä. Na yâ ti akodoro tongana Angleterre, Amerika ti Mbongo, Japon nga na Amerika, azo ayeke vo mingi ambeti ti mungo wango na zo. Alimon, abungbi so azo ayeke sara, akuasinga ti télé so ayeke fa na zo ye so lo lingbi ti sara ti duti nzoni ayeke aye so azo aye tënë ni mingi. Azo aye mara ti aye so mingi ndali ti so a fa na ala so ala wani ala lingbi ti leke akpale ti ala sân ti bâ mbeni wamungo wango, ti bâ mbeni zo so ayeke mû maboko na akoli na awali ti leke akpale ti mariage wala ti bâ mbeni kota zo ti eglize. Abuku ni wala alimon ni so aluti mingi na ndo ti nyen?

Mingi ni, azo aye awango na ndo ti aye so zo wani alingbi ti sara si gigi ti lo ane na lê ti lo, na ndo ti warango zo so lo na lo aye tere nga na ndo ti batango amolenge. Ambeni tënë ni andu tënë ti hongo ndo ti kota vundu so agbu zo, ti akpale so divorce aga na ni nga na ti ambeni ye so ayeke si mingi na azo. Azo mingi nga aye ti wara ambeti so asara tënë na ndo ti tongana nyen ti hon ndo ti tengo ye ahon ndo ni, ti nyongo manga nga ti nyongo sämba ahon ndo ni. Awango ni ayeke nzoni? Ngoi na ngoi, a yeke nzoni, me mingi ni a yeke nzoni pëpe. Nda ni la si a yeke na lege ti ndara ti dengi mê na tënë ti Bible so: “Zo so li ti lo ayeke dä pëpe, lo yeda na tënë kue, me zo ti ndara abata lege ti lo nzoni.”​—aProverbe 14:15.

Abuku so a sigigi na ni ti tene zo lo wani awara awango so alingbi ti fa lege na lo ayeke nde mingi na ambeni buku so ayeke fa na zo kode ti sarango aye tongana foto, batango nginza wala mandango mbeni yanga ti kodoro nde. Abuku tongaso alingbi ti mû maboko mingi na mo ahon ti futa nginza mingi na mbeni zo ti wara awango. Me ti abuku so ayeke mû wango na zo na ndo ti buze, mariage, batango molenge wala seni, a yeke nde mingi. Mingi ni, abuku so ayeke fa na zo mbeni lege so zo alingbi ti sara na ye na yâ ti gigi ti lo wala ti gbu li ti lo. Tongaso, a yeke na lege ti ndara ti hunda tere ti mo: ‘Zo wa la ayeke mû wango ni so? Lo wara ni na ndo wa?’

Awandara alingbi lakue pëpe ti gi nda ti aye nzoni na ndo ti atënë ti bê ti ala so ala yeke fa. Ambeni alingbi ti soro ti fa gi awango so azo aye tënë ni mingi na hingango so ala yeke wara gbâ ti nginza tongana ala fa na azo ni gi atënë so ala ye ti mä. Nda ni la si na yâ ti mbeni kodoro, andokua ti sigingo na abuku nga na alimon ti fango lege na zo awara anginza ti dollars ngbundangbu mingi ngu oko oko.

Abuku so a sigigi na ni ti fa lege na zo ayeke nzoni?

Tongana mo yeke gi ti wara ambeni buku ti fa lege na mo, a fa so mo ku ti wara mbeni nzoni wango. Ye oko, ngoi na ngoi, awango so azo ayeke wara na yâ ti abuku ni so ayeke ndu tâ kpale ti ala ni pëpe. Mingi ni, abuku ni ayeke tene gi mara ti atënë so: ‘Tongana bango ndo ti mo ayeke na lege ni, mo lingbi ti hon ndo ti akpale ti mo ni. Aye kue so mo ye ti wara ni, atâa nginza, nzoni seni wala nzoni songo, mo yeke wara ni gi tongana mo bâ ndo na lege ni.’ Mara ti awango tongaso ayeke sara nzoni biani na zo la? A yeke mû maboko na zo ti luti na gbele ti akpale na aye ti vundu so ayeke sara zo na yâ ti gigi so?

Bâ na tapande ambeti so ayeke sara tënë na ndo ti songo nga na mariage, so ayeke na popo ti ambeti so azo aye ni mingi. A yeke mû maboko biani na zo ti leke mbeni sewa so ayeke na ngia na so gere ni aluti nzoni? A yeke lakue tongaso pëpe. Mbeni wali so kua ti lo ayeke ti gi nda ti atënë ti abuku so a yeke sigigi na ni atene so mbeni zo ti sungo abuku ti mungo maboko na zo na ndo ti tënë ti yengo tere na popo ti koli na wali, na so azo aye tënë ni mingi na Amerika ti Mbongo, “afa na awadikongo ni tongana nyen ti leke mbeni nzoni songo nga ti sara si azo ane tere ti ala wani.” Wasungo ni atene so ti ngbâ na wali wala koli ti mo atâa so mo na lo amä tere pëpe ayeke kango mo wani la. Tënë so lo ye ti tene ayeke so kota ye ni ayeke ti sara ye so mo bâ ayeke nzoni ahon ti tene mo hinga akpale ti mo na mo tara ti leke ni.

Tâ tënë, abuku so alingbi ti mû ambeni nzoni wango na zo. Ye oko, ala lingbi nga ti mû asioni wango na zo. Mbeni wandara alingbi ti fa na mo ambeni nzoni ye ti sarango ni na ndo ti mbeni tënë, me wango ti lo na ndo ti mbeni tënë ni nde alingbi biani ti sara si ye aga sioni mingi ahon ti kozo. A yeke ngangu mingi ti soro popo ti gbâ ti awango so, so mingi ni amä tere pëpe, na so abuku ti fango lege na zo amû ni na mo. Mo lingbi ti zia bê ti mo na zo wa? Hunda tere ti mo: ‘A gi nda ti awango ni so nzoni awe si a mû ni so? Wala a yeke gi bango ndo ti wasungo buku ni? Tënë ti tombango peko ti mosoro na ti warango kota ndo asara ye na ndo ti bango ndo ti wasungo buku ni?’

Mbeni buku ti fango lege na zo so amû maboko nzoni mingi na azo teti angu mingi awe ayeke Bible. A yeke mû anzoni wango na ndo ti atënë nde nde so abuku so ayeke fa lege na zo asara tënë na ndo ni nga na ndo ti ambeni ye nde. A pusu azo kutu na kutu ti sara ye alingbi na wango so: “Ala kiri gi fini ni na yâ ti ngangu so ayeke fa lege na bibe ti ala, . . . ala ngbâ lakue ti yü fini zo.” (aÉphésien 4:23, 24). Bible amû na e ndara ti hinga aye so ayeke na gunda ti akpale ti e nga tongana nyen ti hon ndo ni. Mingi ahon so, a fa na e tâ ye so ayeke pusu e ti sara ye so ayeke nzoni. Fade article ti peko ayeke fa ande tënë na ndo ni.