Mo lingbi ti sara nyen si gigi ti mo aga nzoni?
LEGEOKO tongana ti so ababâ na mama ayeke bâ lege ti amolenge ti ala na ala ye si gigi ti amolenge ni aga nzoni, Babâ ti e ti yayu Jéhovah ayeke bâ lege ti e na lo ye si gigi ti e aga nzoni. Ti fa so lo ye e mingi, lo mû wango mingi na ndo aye so ayeke sara si gigi ti e aga nzoni na aye so alingbi ti buba gigi ti e. Biani, tongana Bible ayeke sara tënë ti mbeni zo so adengi mê na ye so Nzapa atene, lo tene tënë so e lingbi ti zia bê dä: “Ye kue so zo so asara aga nzoni.”—Psaume 1:3.
Me tongana a yeke tongaso, ngbanga ti nyen gigi ti azo mingi aga nzoni pëpe nga ala yeke na ngia pëpe? Ti gbu nda ti versê ti psaume so nzoni ayeke mû maboko na e ti kiri tënë na hundango tënë so. A yeke fa nga na e ye so e kue e lingbi ti sara ti tene gigi ti e aga nzoni.
“Wango ti azo ti sioni”
Wasungo psaume agboto mê ti e na ndo aye ti sioni so e lingbi ti wara tongana e sara ye alingbi na “wango ti azo ti sioni”. (Psaume 1:1). Kota “wato-sioni” ayeke Satan Zabolo (Matthieu 6:13). Bible atene na e so lo yeke “mokonzi ti sese so” na so “sese so kue ayeke na tïtî wato-sioni.” (Jean 16:11; 1 Jean 5:19). Tongaso, a yeke ye ti dongo bê pëpe so mingi ti awango so azo ti sese so ayeke mû afa na gigi bibe ti sioni zo so.
Mara ti wango wa azo ti sioni ayeke mû ka ni? Mingi ni, azo ti sioni ake Nzapa (Psaume 10:13). Na ndo kue, a yeke wara awango ti ala so na yâ ni ala ke tënë ti Nzapa wala ala sara sanka ti aye so lo tene. Azo ti laso aye si azo asara ye na lege ti “nzara ti mitele, nzara ti lê, na fandara ti fini”. (1 Jean 2:16). Aye so e yeke mä na radio, e yeke bâ na télé nga e yeke diko na yâ ti ambeti-sango ayeke pusu e ti “gi ti wara aye kue ti gigi so.” Na ndo ti sese kue, ngu oko oko, andokua ti dengo buze ayeke mû anginza mingi mingi ti sara na asabango ti akungba ti ala ti pusu azo ti vo ni, atâa azo ni ayeke na bezoin ni wala pëpe. Sarango sabango so asara ye mingi ahon gi ti pusu azo ti vo aye mingi ahon ti kozo. A sara si azo ayeke na bibe so ayeke na lege ni pëpe na ndo ye so ayeke sara si gigi ti zo aga nzoni.
Ye ti pekoni ayeke so, atâa so azo ayeke laso na akungba so giriri ala yeke na nzara ti wara ni, ala ngbâ lakue na nzara ti wara afini kungba. Azo mingi atene tongana mo wara afini kungba pëpe, mo lingbi pëpe ti duti na ngia wala gigi ti mo alingbi pëpe ti ga nzoni. Bibe so ayeke na lege ni pëpe nga ‘a londo na Babâ pëpe, me a londo na sese so.’—1 Jean 2:16.
Wasarango e ahinga ye so ayeke sara si gigi ti e aga nzoni biani. Wango ti lo ayeke nde na “wango ti azo ti sioni”. Tongaso, gingo ti wara deba nzoni ti Nzapa na oko ngoi so e yeke sara ye tongana azo ti sese so ayeke legeoko tongana gingo ti mû alege use na oko ngoi. Zo alingbi ti sara ni pëpe. A dö bê ti e pëpe so Bible agboto mê ti e, atene: “I tambela na lege ti sese so pëpe”!—aRomain 12:2.
Zia pëpe si azo ti sese so afa na mo ye ti sara
Azo ti sese so, so ayeke na gbe ti ngangu ti Satan, ayeke tara ti fa na e so tënë ti nzoni duti ti e agbu bê ti ala mingi. Ye oko, a lingbi e sara hange! Dabe ti mo so Satan ahanda lani kozo wali Eve ti tene lo Satan ni lo wara ye so lo yeke gi. Na pekoni, Satan asara kua na Eve ti pusu Adam ti sara siokpari. Laso, Satan ayeke sara nga kusala na azo ti kangbi asioni wango ti lo.
Na tapande, a ku ti tene David, so e sara tene ti lo na yâ ti article so ahon, asara kua angbonga mingi nga a sara gbâ ti avoyage ti kua. David atene: “Mbi yeke hon na lundi na kota ndapre na mbi yeke kiri na yanga-da na jeudi na lakui.” Akamarade ti David, afami ti lo nga na amba ti lo ti place ti kua awa lo atene: “Sara aye so teti nzoni ti sewa ti mo.” Ti ala, a hunda ti sara mara ti asacrifice so ti tene gigi ti zo aga nzoni. Ala tene na lo so a yeke hunda na lo ti bata kapa so teti angu mingi pëpe juska na ngoi so lo ga tâ kota zo. David atene: “Ala tene so kua so ayeke ga na aye ti nzoni mingi na sewa ti mbi ndali ti so mbi yeke wara gbâ ti nginza, na tongaso gigi ti mbi alingbi ti ga nzoni. Atâa so mbi yeke duti na sewa ti mbi pëpe, akamarade ti mbi ague na mbi ti bâ so mbi yeke sara ye mingi ndali ti sewa ti mbi.” Azo mingi tongana David ayeke sara kua ngangu mingi ti mû na asewa ti ala ye kue so ala pensé asewa ni ayeke na bezoin ni. Me mungo peko ti mara ti wango tongaso ayeke sara si gigi ti mo aga nzoni? Sewa ayeke tâ na bezoin ti nyen?
David aga ti hinga ye so sewa ti lo ayeke tâ na bezoin ni na ngoi so lo yeke na voyage. Lo tene: “Na ngoi so mbi yeke sara lisoro na molenge ti mbi ti wali Angèle na téléphone, lo hunda mbi lo tene: ‘Papa, ngbanga ti nyen mo ye ti duti na yanga-da na e pëpe?’ Tënë so asara mbi vundu mingi.” Tënë so molenge ti lo ti wali atene apusu lo ti ke kua ni. David amû desizion ti mû na sewa ti lo tâ ye so ala yeke na bezoin ni: ngoi ti lo.
Sarango ye alingbi na awango ti Nzapa asara si gigi ti zo aga nzoni
Ye wa mo lingbi ti sara si asioni wango ti sese so asara ngangu na ndo ti mo pëpe? Wasungo psaume afa na e so zo so ayeke na ngia na so gigi ti lo aga nzoni ayeke zo so “ngia ti lo ayeke na yâ Ndia ti L’Eternel, na lo bi bê ti lo na lege ti Ndia so lâ na bï.”—Psaume 1:2.
Tongana Nzapa asoro lani Josué ti ga mokonzi ti mara ti Israël, lo tene na lo: “A lingbi mo bi bê ti mo [na Tënë ti Nzapa] lâ na bï.” Biani, a yeke kota ye ti tene Josué adiko Mbeti ti Nzapa na lo gbu li na ndo ni, me lo yeke nga na bezoin ti “bata ti sara na lege ti tënë kue so a sara na yâ ni”. Ti tâ tënë ni, gi mbeni senge dikongo Bible tongaso alingbi pëpe ti sara si gigi ti mo aga nzoni. A lingbi mo sara ye alingbi na ye so mo diko. A tene lani na Josué a tene: “Tongaso mo lingbi sara si lege ti mo aga nzoni na ye kue so mo sara aga nzoni.”—Josué 1:8.
Tara ti bâ mbeni molenge so ahe ngia na so aduti na ndo ti gere ti babâ wala mama ti lo, ala yeke diko mbeni mbaï so anzere na ala mingi. Atâa so ala diko ni fani mingi awe, ngoi kue so ala yeke mû ti diko na ni anzere na ala mingi. Legeoko nga, mbeni zo so andoye Nzapa awara ngia ti lo na yâ dikongo Bible lâ oko oko, na lo bâ ngoi so tongana mbeni nzoni ngoi so lo duti nduru na Babâ ti lo ti yayu. Na sarango ye alingbi na wango ti Jéhovah nga na fango lege ti lo, mara ti zo tongaso aga “tongana keke so a lu na tere ti ngu so ayeke sua, keke so alë na ngoi ti lo, kugbe ti lo ahule nga pëpe. Na ye kue so zo so asara aga nzoni.”—Psaume 1:3.
Keke so wasungo psaume asara tënë ni ge amaï gi tongaso pëpe. A yeke mbeni wafango yaka si alu ni na tere ti ngu nga lo bâ lege ni nzoni. Legeoko nga, Babâ ti e ti yayu ayeke leke bango ndo ti e na lege ti awango ti Bible. Ye ti pekoni ayeke so, e yeke maï nzoni nga e yeke duti na anzoni sarango ye so Nzapa ahunda.
Ye oko, “azo ti sioni ayeke tongaso pëpe”. Peut-être a bâ so ala duti nzoni teti mbeni ngoi, me na nda ni, ala yeke wara sioni. Ala ‘lingbi ti luti na ngbanga pëpe’. Nde na so, “lege ti azo ti sioni ague na kui.”—Psaume 1:4-6.
Tongaso, zia pëpe si azo ti sese so afa na mo ye so mo lingbi ande ti sara ni nga aye so a lingbi mo bâ na nene ni. Atâa so mo lingbi ti duti na akode nga lege azi na mo ti wara aye mingi na yâ ti sese so, sara hange na lege so mo yeke sara kusala na akode ti mo wala lege so mo zia azo ti sese so ti sara kusala na ni. Sarango akusala so aga na tâ nzoni ye pëpe nga gingo gbâ ti mosoro na akungba alingbi ti sara si mbeni zo “ahule”. Nde na so, ti duti na nzoni songo na Nzapa ayeke sara si gigi ti mbeni zo aga nzoni nga lo yeke wara tâ ngia na yâ ti fini ti lo.
Lege so gigi ti mo alingbi ti ga nzoni
Zo so asara ye alingbi na wango ti Nzapa, aye kue so lo sara aga nzoni. Ngbanga ti nyen? Wasungo psaume ayeke sara pëpe tënë ti gango zo na yâ ti sese so. Ti mbeni zo so akpe mbeto ti Nzapa, gigi ti lo ayeke ga nzoni ndali ti so lo sara ye so bê ti Nzapa aye, na ye so bê ti Nzapa aye ayeke ga lakue nzoni. Zia e bâ tongana nyen sarango ye alingbi na akpengba-ndia ti Bible alingbi ti sara si gigi ti mo aga nzoni.
Sewa: Bible awa akoli ti ‘ndoye awali ti ala legeoko tongana tere ti ala mveni’, na a hunda na mbeni wali Chrétien ti ‘yekia koli ti lo.’ (aEphésien 5:28, 33). A wa ababâ na mama ti mû ngoi ti duti ndo oko na amolenge ti ala, ti sara ngia na ala nga ti fa na ala aye so ayeke akota ye na yâ ti gigi ti zo (Deutéronome 6:6, 7; Zo-ti-fa-tene 3:4). Mbeti ti Nzapa awa nga ababâ na mama, atene: “I gi amolenge ti i na tënë pëpe.” Tongana ababâ na mama asara ye alingbi na wango so, a yeke duti ngangu pëpe ti tene amolenge ‘amä tënë ti ababâ na amama ti ala’ nga ti “yekia babâ na mama ti [ala]”. (aEphésien 6:1-4). Sarango ye alingbi na awango ti Nzapa so ayeke sara si sewa aduti na ngia.
Akamarade: Mingi ti azo aye ti wara akamarade. Nzapa aleke e na mbeni lege so e lingbi ti ndoye amba ti e nga ti ku ti tene amba ti e andoye e. Jésus atene na adisciple ti lo so a yeke nzoni ala ‘ndoye tere ti ala na popo ti ala’. (Jean 13:34, 35). Na popo ti amba ti e Chrétien, e yeke wara akamarade so e lingbi ti ndoye ala na ti zia bê ti e kue na ala; e lingbi même ti fa atënë ti bê ti e kue na ala (aProverbe 18:24). Ahon kue, na sarango ye alingbi na akpengba-ndia ti Bible, e lingbi ti “ga nduru na Nzapa,” na legeoko tongana Abraham, a lingbi même ti iri e “ndeko ti Nzapa.”—Jacques 2:23; 4:8.
Nzoni ye ti sarango ni na fini ti mo: Ahon ti duti gi tongaso lâ oko oko, azo so gigi ti ala aga nzoni biani ayeke ala so ayeke na nzoni ye ti sarango ni na fini ti ala. Fini ti ala aluti pëpe na ndo ti aye ti sese ti laso, so gere ni aluti nzoni pëpe. Aye so ala zia na gbele ala aga na ala tâ ngia so aninga, teti so aye so ala gi ti wara aluti gi na ndo tâ nzoni ye so zo alingbi ti sara na yâ ti fini ti lo. Ye wa ayeke tâ nzoni ti sara na yâ ti fini ti mo? Ye ni ayeke ti tene “mo kpe mbeto ti Nzapa, na mo bata komandema ti Lo, teti so ayeke kusala ti azo kue.”—Zo-ti-fa-tene 12:13.
Beku: Tongana Nzapa aduti Ndeko ti e, a yeke sara si e duti na mbeni nzoni beku ti kekereke. Bazengele Paul awa aChrétien ti “zia bê ti ala pëpe na mosoro so fade awe, me na Nzapa”. Na sarango tongaso, ala “bungbi [ye] teti ala mveni, ala leke nzo gere teti lâ ni so ayeke ga, si ala lingbi gbu fini so ayeke tâ fini biani.” (1 Timothée 6:17-19). Na yâ ngoi kete, azo ayeke wara ande tâ fini so na ngoi so Royaume ti Nzapa so ayeke na yayu ayeke sara ande si sese akiri aga Paradis.—Luc 23:43.
Tongana mo sara ye alingbi na akpengba-ndia ti Bible, a ye pëpe ti tene so mo yeke wara akpale pëpe, me ti sara tongaso ayeke mû maboko na mo ti kpe aye ti vundu so azo ti sioni ayeke ga na ni na ndo ti ala wani. David so e sara tënë ti lo fade nga na ambeni zo kutu mingi so asara ye tongana ti lo ahinga nene ti sarango ye alingbi na akpengba-ndia ti Bible na yâ ti fini ti ala. Na pekoni so David awara mbeni kua so angbonga ni alingbi na lo, lo tene: “Mbi kiri singila mingi ndali ti songo so mbi yeke na ni na wali ti mbi nga na amolenge ti mbi. Nga, mbi yeke na ngia ti sara na Jéhovah Nzapa tongana ancien na yâ ti kongregation.” A yeke ye ti dongo bê pëpe so mbeni psaume atene tënë so na ndo ti zo so ayeke dengi mê na wango ti Nzapa: “Ye kue so zo so asara aga nzoni.”
[Tableau na lembeti 6]
AYE OKU SO AYEKE SARA SI GIGI TI ZO AGA NZONI
1 Zia pëpe si azo ti sese so afa na mo ye so a lingbi mo bâ na nene ni.
2 Diko Mbeti ti Nzapa lâ oko oko na gbu li na ndo ni.
3 Sara ye alingbi na wango ti Bible na yâ fini ti mo.
4 Sara si Nzapa aga ndeko ti mo.
5 Kpe mbeto ti Nzapa na bata akomandema ti lo.
[Afoto na lembeti 7]
Mo yeke sara ye alingbi na aye so si gigi ti mo aga nzoni?