Ti mo, nyen la ayeke sara si gigi ti zo aga nzoni?

JESSE LIVERMORE ayeke lani mbeni kota wadengo buze so azo ayeke mû na lo nginza ti ala ti tene lo dë na buze si ala wara mbeni ye na ndo ni. A hinga lo tongana mbeni zo so ayeke na akode ti dengo buze mingi. Ye ti pekoni ayeke so lo wara gbâ ti mosoro. Lo yü pendere bongo ti nginza mingi, lo lango na yâ ti mbeni kota da ti achambre 29 nga lo yeke na mbeni kutukutu ti nginza mingi so lo mû mbeni zo ti kpe na ni.

Davida nga aleke na bê ti lo ti ga kota zo tongana Jesse. Teti so lo yeke use kota wayinda nga zo so ayeke bâ ndo na ndo ti mbeni kota ndokua so a yeke zia afoto na yâ ti ambeti, lo lingbi mbeni lâ ti ga kota wayinda ti ndokua ni. Tënë ti gango wamosoro nga ti wara yango iri agbu bê ti lo mingi. Ye oko, David amû mbeni desizion so ague na lo ti ke kua ni. Lo tene: “Mbi hinga so mbi lingbi ande mbeni pëpe ti kiri ti wara kota ndo tongaso.” Ti mo, David amû nzoni desizion la?

Azo mingi apensé so ti tene gigi ti mbeni zo aga nzoni, a lingbi lo duti na gbâ ti mosoro nga azo ahinga lo mingi. Ye oko, azo so ayeke na mosoro alingbi ti bâ so mbeni ye amanke ala nga ala yeke pëpe na mbeni nzoni ye ti sarango ni na yâ ti fini ti ala. E lingbi ti tene so a yeke ye so asi na Pakara Livermore. Atâa gbâ ti mosoro so lo yeke na ni, fini ti lo asi singo na gbâ ti akpale nga na kota vundu. Lo yeke lakue na kota vundu, lo sara adivorce nga lo yeke na nzoni songo pëpe na amolenge ti lo ti koli. Na nda ni, na peko ti so lo girisa nginza ti lo mingi, mbeni lâ, Pakara Livermore ague na yâ ti mbeni da ti nyongo sämba na lo dema tere mingi ndali ti aye so asi na lo. Lo hunda ti tene a ga na lo sämba, lo sigigi na carnet ti lo na lo sû ndangba lettre ti bara wali ti lo. Na peko ti so lo hunzi nyongo sämba ni awe, lo lï na yâ ti mbeni chambre so avuko na lo fâ tere ti lo.

Atâa so a yeke ngangu ti hinga ye so ayeke pusu mbeni zo ti fâ tere ti lo, ye so asi na lo afa polele so tënë so Bible atene ge ayeke tâ tënë: “Ala so aye ti wara mosoro. . . ala kpo tere ti ala mveni na ye ti vundu nde nde.”​—1 Timothée 6:9, 10.

Azo mingi apensé so ti tene gigi ti mbeni zo aga nzoni, a lingbi lo duti na gbâ ti mosoro, kota ndo wala yango iri. Me, e lingbi ti tene so mara ti bango ndo tongaso ayeke na lege ni? Ti mo, mo bâ tere ti mo so gigi ti mo aga nzoni awe? Ngbanga ti nyen? Nyen la amû lege na mo ti tene tongaso? Bibe wa ayeke sara ngangu na ndo ti mo? Article ti peko ayeke sara ande tënë na ndo ti ambeni wango so azo kutu mingi asara ye alingbi na ni na a sara si gigi ti ala aga nzoni. Zia e bâ tongana nyen mo nga kue mo lingbi ti sara si gigi ti mo aga nzoni.

[Kete tënë na gbe ni]