Ziango ye kue ti wara ‘perle ti ngele ngangu’ laso
“Fade a fa Tene-nzoni so ti royaume na sese so kue teti tënë ti témoin na amara kue.”—MATTHIEU 24:14.
NA NGOI so Jésus aga na sese, tënë ti Royaume ti Nzapa ayeke ye so agbu lani bê ti aJuif ngangu (Matthieu 3:1, 2; 4:23-25; Jean 1:49). Ye oko, mingi ti ala ahinga mbilimbili pëpe ndo so Royaume ni ayeke komande juska ti si dä nga tongana nyen a yeke komande; ala hinga nga pëpe so Royaume ni ayeke duti fade mbeni ngorogbia na yayu (Jean 3:1-5). Même ambeni zo so aga adisciple ti Jésus ahinga tâ Royaume ti Nzapa ni kue pëpe, nga ala hinga mbilimbili pëpe aye so a lingbi ala sala ti wara matabisi ti duti azo so ayeke komande legeoko na Christ.—Matthieu 20:20-22; Luc 19:11; Kusala 1:6.
2 Tongana ngoi ayeke hon, na be-nze-pepe, Jésus afa aye mingi na adisciple ti lo, so a yeke wara na popo ni toli ti perle ti ngele ngangu so e bâ na article so ahon. Lo gboto lê ti ala na ndo nene ti tene ala mveni asala ngangu ti mû peko ti Royaume ti yayu (Matthieu 6:33; 13:45, 46; Luc 13:23, 24). Ye so andu bê ti ala ngangu, ngbanga ti so kete na pekoni ala ga awafango tënë ti Royaume so anze pëpe na ayeke na mbito pëpe. Na ala fa ni juska na ambage ti sese so ayo tongana ti so buku ti Kusala asala tënë mingi na ndo ni.—Kusala 1:8; aColossien 1:23.
3 Ka ti laso a yeke tongana nyen? A yeke fa na azo kutu mingi aye ti nzoni so ayeke duti na yâ paradis na ndo sese na gbe ti Royaume ni. Na yâ kota prophétie ti lo na ndo “nda ti ngoi so,” Jésus atene polele: “Fade a fa Tene-nzoni so ti royaume na sese so kue teti tënë ti témoin na amara kue; na tongaso fade nda ni aga.” (Matthieu 24:3, 14; Marc 13:10). Lo tene nga so a yeke sala kota kusala so atâa akota kangango lege, angangu kpale, même salango ngangu. Ye oko, lo mû dengo bê so: “Zo so agbu ngangu juska na nda ni, fade A sö lo.” (Matthieu 24:9-13). Aye so kue ahunda ti duti na mara bibe ti wadengo buze so ague na ando nde nde ti yâ ti toli ti Jésus. Wadengo buze so agbanzi ye na tele ti lo nga lo mû bê ti lo kue na kua. Azo tongaso ayeke dä laso? Ala so ayeke na mabe nga na wâ na yâ tombango peko ti Royaume.
Ngia so ala yeke na ni ti wara tâ tënë
4 Wadengo buze ti yâ ti toli ti Jésus ayeke na kota ngia tongana lo wara ye so lo bâ ni tongana ‘perle ti ngele ngangu’. Kota ngia so apusu lo ti sala ye kue so lo lingbi ti sala ti wara perle ni (aHébreu 12:1). Legeoko nga laso, tâ tënë na ndo Nzapa nga na ndo Royaume ti lo ayeke gboto azo na ayeke pusu ala ti sala ye. Ye so adabe ti e na tënë so Ita Alexander Hugh Macmillan asû na yâ buku Akpengba tapande ti mabe (Angl.) na ndo ngangu so lo sala ti gi Nzapa na ye so Lo leke ti sala teti azo. Lo tene: “Ngu oko oko azo saki mingi angbâ ti wara ye so mbi wara ni awe. Na azo so ayeke tongana mbi na mo, teti ala londo na akodoro kue, amara kue, angobo ti salango ye kue nga ngu ti ala ayeke nde nde. Tâ tënë ayeke sala kangbi na popo ti azo pëpe, a yeke gboto mara ti azo kue.”
5 A bâ so atënë so ayeke tâ tënë na lege so, ngu oko oko, nzo tënë ti Royaume ti Nzapa ayeke pusu azo ti bê ti mbilimbili saki mingi ti mû fini ti ala na Jéhovah na ti sala ye so bê ti lo aye. Na a yeke nga ye so asi na ngu ti kusala 2004, so alondo na nze ti septembre 2003 ti si na août 2004. Na yâ ti anze 12 so, azo 262 416 amû tele ti ala dandara na Jéhovah na lege ti batême. Ye so asi na yâ ti akodoro 235, so na yâ ni aTémoin ti Jéhovah ayeke sala a-étude 6 085 387 yenga oko oko ti mû maboko na azo so angobo ti salango ye ti ala ayeke nde nde nga so alondo na amara, akete mara na ayanga ti kodoro mingi ti wara tâ tënë ti Mbeti ti Nzapa so amû fini.—Apocalypse 7:9.
6 Ye nyen amû lege ti sala aye so kue? Kite ayeke pëpe so Jéhovah si agboto na mbage ti lo azo so ayeke na yâ mbilimbili dutingo so a hunda (Jean 6:65; Kusala 13:48, NW ). Ye oko, mbeni ye so e lingbi ti girisa ni pëpe ayeke bibe ti gbanzingo ye na tele nga na kota ngangu so ambeni zo asala ti zia tele ti ala kue na yâ kusala ti Royaume. Tongana lo yeke na ngu 79, Ita Macmillan asû na mbeti: “Ngbele ye na ngoi so mbi mä ti kozoni azendo so andu zingo azo na yâ ti kobela nga na kuâ, beku ti mbi na ndo atënë ti Bible so awoko pëpe. Tâ gi na ngoi ni so mbi leke na bê ti mbi ti manda ye mingi na ndo aye so Bible afa, si mbi lingbi ti mû maboko na mara ti azo tongana mbi so ayeke gi ti hinga ye na ndo Jéhovah, Nzapa ti Ngangu Ahon Kue, nga na anzoni ye so lo leke teti azo.”
7 A yeke bâ nga bibe ti salango ye na wâ so na popo ti awakua ti Jéhovah ti laso. Mbeni tapande ni ayeke ti Daniela so lo yeke na Vienne na kodoro ti Autriche. Lo tene: “Ngbele ye so mbi de lani kete, Nzapa ayeke tâ kamarade ti mbi. Lani mbi yeke lakue na nzara ti hinga iri ti lo ngbanga ti so ti mbi tënë ‘Nzapa’ ayeke tâ iri ti zo pëpe. Me a yeke na ngoi so mbi wara ngu 17 si aTémoin ti Jéhovah aga na da ti mbi. Ala fa na mbi aye kue so mbi ye ti hinga na ndo Nzapa. Biani, mbi wara tâ tënë fadeso awe, na a nzere na mbi mingi! Teti so tele ti mbi anzere mingi, mbi to nda ti fa tënë na zo oko oko kue.” Wâ ti lo ti fa tënë na zo oko oko kue asala si akamarade ti lo ti ekole ato nda ti he lo. Daniela angbâ ti tene: “Ye oko, ti mbi, ye ni ayeke mo bâ mo tene mbi yeke bâ gango tâ tënë ti aprophétie ti Bible, teti mbi manda so Jésus atene a yeke sala ngangu na adisciple ti lo nga a yeke ke ala ngbanga ti iri ti lo. Mbi yeke na kota ngia nga ye ni apika bê ti mbi mingi.” Kete na pekoni, Daniela amû tele ti lo na Jéhovah, lo wara batême na lo to nda ni lani ti gi ti ga missionnaire. Na peko ti mariage ti lo, Daniela na koli ti lo Helmut ato nda ti fa tënë na azo ti Afrika, ti Chine, ti Philippines na ti Inde so ayeke na Vienne. Fadeso Daniela na Helmut ayeke sala kusala ti missionnaire na mbeni kodoro na mbongo-do ti Afrika.
Ala zia lege ni pëpe
8 Biani, kusala ti missionnaire ayeke mbeni oko ti alege so azo ti Jéhovah ti laso ayeke fa ndoye ti ala teti Nzapa nga na be-biani ti ala na Royaume ti lo. Legeoko tongana wadengo buze ti yâ ti toli ti Jésus, azo so amû kusala so ayeke ndulu ti gue na ando so ayo ngbanga ti Royaume. Ti tâ tënë ni, amissionnaire so ayeke tambela pëpe ti wara nzo tënë ti Royaume; ala yeke gue na ni na azo so ayeke lango yongoro kâ na ambeni mbage ti sese ti fa ye nga ti mû maboko na ala ti ga adisciple ti Jésus Christ (Matthieu 28:19, 20). Na yâ mingi ti akodoro ni, a hunda na ala ti kanga bê na yâ ti aye so ayeke tâ ngangu mingi. Me ala yeke wara aye ti nzoni mingi na peko ti kangango bê so.
9 Mbeni tapande ni ayeke ti République Centrafricaine so, na ngu so ahon, azo 16 184 aga na Matanga ti Dango Bê na kuâ ti Christ. A mû awafango tënë ti kodoro ni fani mbasambala tongaso si ayeke lingbi na wungo so. Teti so wâ ti dada ayeke na yâ mingi ti ambage ti kodoro ni pëpe, mingi ni, azo ayeke sala akua ti ala ti lâ oko oko na gigi na gbe ti mbeni keke. Tongaso amissionnaire ayeke sala nga kusala ti ala ti fango tënë alingbi na salango ye ti azo ni: Ala yeke mû li ni na yâ amandango Bible na gigi na gbe ti akeke nga. Na gigi ni zo alingbi ti bâ ndo nzoni nga ndo ni adë pendere. Me mbeni nzoni ye ni nga ayeke dä: Azo ni aye Bible mingi, na tongaso ti sala lisoro na ndo tënë ti Nzapa ayeke ye so azo mingi aye. Fani mingi, mbeni zo so ayeke hon hongo ayeke ga ti mû mbage na lisoro ni nga a yeke ngangu pëpe ti tene lo ga na yâ mandango ye ni.
10 Ni la, na ngoi so mbeni missionnaire ayeke sala lani mbeni étude na gigi, mbeni maseka-koli so alango na mbage ti lege ni aga, lo tene teti so mbeni zo aga ti bâ ni pëpe, a yeke nzoni lo missionnaire ni lo ga na ndo ti ni ti manda Bible na ni nga. Biani, missionnaire so ayeke lani na ngia ti yeda, na maseka-koli so ague na li ni hio mingi. Na yâ ti kodoro ni, lege mingi aturugu ti lapolice ayeke hunda na aTémoin so ayeke hon na kutukutu ti luti, pëpe ngbanga ti mbeni kota tënë wala ti mû na ala lamande, me ti hunda afini Tour ti Ba Ndo na Réveillez-vous! wala ti kiri singila teti mbeni mbilimbili article so anzere na ala mingi.
11 Mingi ti ala so alinda na yâ kusala ti missionnaire asala ngu 40 wala 50 awe angbâ lakue ti sala kusala ti ala be-ta-zo. Ala yeke tâ mbeni nzoni tapande ti mabe nga ti gbungo ngangu teti e kue! A sala ngu 42 awe so mbeni koli na wali ti lo ayeke sala kusala ti missionnaire na yâ ti akodoro asi fadeso ota awe. Koli ni atene: “Akpale ayeke dä. Na tapande, e tiri na kobela ti palu ngu 35. Me e yeke na vundu lâ oko pëpe teti desizion ti e ti duti missionnaire.” Wali ti lo azia tënë so na ndo ni: “Aye ayeke dä lakue so e lingbi ti kiri singila mingi ngbanga ni. Kusala ti fango tënë amû na e ngia mingi, nga a yeke ngangu pëpe ti to nda ti manda Bible na azo. Tongana e bâ awamandango ye so aga na bungbi nga ala hinga tele na popo ti ala, a yeke tongana mbeni sewa so ayeke bungbi lakue.”
Ala “diko ye kue tongana ye senge”
12 Tongana wadengo buze so ague na ando nde nde awara perle oko ti ngele ngangu, “lo gue lo kä ye ti lo kue, na lo vo perle so.” (Matthieu 13:46). A yeke hinga ala so ahinga tâ nene ti Royaume na lege ti dutingo ndulu ti zia aye so azo abâ ni tongana ye ti ngele mingi. Teti so lo yeke mbeni oko ti ala so ayeke duti legeoko na Christ na yâ gloire ti Royaume, bazengele Paul atene: “Biani, mbi diko ye kue tongana ye senge teti a yeke nzoni ahon ti hinga Christ Jésus, Seigneur ti mbi; mbi girisa ye kue teti Lo, mbi bâ ye so kue tongana [zende] si mbi lingbi wara Christ.”—aPhilippien 3:8.
13 Laso nga azo mingi ayeke ndulu ti ga na akota gbiango ye na yâ fini ti ala ti wara adeba nzoni ti Royaume ni. Na tapande, na nze ti octobre 2003 na République tchèque, wayinda ti mbeni da-mbeti so lo yeke na ngu 60 awara buku Hingango Ye So Ague na Fini ti Lakue Lakue. Na peko ti so lo diko ni, fade fade lo bâ aTémoin ti Jéhovah ti ndo so lo yeke dä ti manda Bible. Lo gue na li ni nzoni na lege ti yingo nga kete na pekoni lo to nda ti gue na abungbi kue. Kozo, lo leke lani ti dë gaba ti ga mokonzi-gbata nga na pekoni ti ga wabada-halezo. Ye nyen lo sala? Lo soro lani ti sala mbeni ye nde: Lo ga wafango tënë ti Royaume. Lo tene: “Mbi wara lani lege ti zia ambeti ti Nzapa mingi na amolenge so mbi yeke fa mbeti na ala.” Lo fa mungo tele ti lo na Jéhovah na lege ti batême na mbeni kota bungbi ti district na nze ti juillet ti ngu 2004.
14 Na yâ ti ambeni kodoro, azo kutu mingi asala nga ye tongaso na mbage ti nzo tënë. Ala sigigi na yâ sioni sese so, ala zia ngbele salango ye ti ala, angbele kamarade ti ala nga ala zia lege ti aye so ala ye fade ti sala na yâ sese so (Jean 15:19; aEphésien 4:22-24; Jacques 4:4; 1 Jean 2:15-17). Ala sala aye so kue ngbanga ti nyen? Ngbanga ti so ala bâ adeba nzoni ti Royaume ti Nzapa tongana ye so ayeke na ngele mingi ahon aye kue so sese ti laso alingbi ti mû na ala. Mo yeke na oko bibe so na ndo nzo tënë ti Royaume? Bibe so ayeke pusu mo ti leke dutingo ti mo nga na aye so mo ye ti wara ti lingbi na aye so Nzapa ahunda? Salango tongaso ayeke ga na mo gbâ ti adeba nzoni, fadeso nga na ngoi so ayeke ga.
Kongo le-kobe ni aga ndulu ti hunzi
15 Wasungo psaume atene: “Azo ti Mo amû ala mveni na nzobe [“na bê ti ala”, NW ], na lâ ti bira ti Mo.” A yeke wara na popo ti ala so amû tele ti ala na bê ti ala mveni ‘apendere so ayeke tongana mamio ti ndapelele’ nga na “kota bungbi ti aturugu”, “awali so ayeke fa nzo tënë”. (Psaume 68:11, NW; 110:3). Na ngoi ti nda ni so, azo ti Jéhovah, so a yeke wara na popo ti ala akoli na awali, amaseka na ambakoro, ayeke gbanzi ye na tele ti ala nga ala yeke sala kusala na bê ti ala kue. Ye ti pekoni ayeke so wa?
16 Na Inde, mbeni pionnier (wafango tënë ti ngoi kue) ayeke gi lani bê ti lo na ndo tongana nyen ti mû maboko na azo ti kodoro ni so mê ti ala akanga na so wungo ti ala ahon kutu use ti manda ye na ndo Royaume (Esaïe 35:5). Lo mû desizion ti lï na mbeni da-mbeti na Bangalore ti manda yanga ti azo so mê ti ala akanga. Kâ lo wara lege ti fa beku ti Royaume na azo mingi so mê ti ala akanga, na tongaso mbeni bungbi ti azo so ayeke manda Bible abâ gigi. A sala ayenga mingi pëpe, azo so wungo ti ala ahon 12 ato nda ti ga na bungbi na Da ti Royaume. Na pekoni, na ngoi ti mbeni matanga ti mariage, pionnier so atingbi na mbeni maseka-koli so mê ti lo akanga so lo londo na Calcutta. Lo yeke na gbâ ti ahundango tënë nga lo yeke tâ na nzara ti hinga ye mingi na ndo Jéhovah. Me mbeni kpale ayeke dä. Maseka-koli so ayeke ku ti kiri na Calcutta, so ayo kilomètre 1 600 tongaso, ngbanga ti ekole. Nga, kâ na Calcutta ni mbeni Témoin so ahinga yanga ti azo so mê ti ala akanga ayeke dä pëpe. Maseka-koli so ague na babâ ti lo juska babâ ni ayeda na lo ti gue ti sala ekole na Bangalore si lo lingbi ti ngbâ ti manda Bible. Lo gue na li ni nzoni na lege ti yingo, nga ngu oko tongaso na pekoni, lo mû fini ti lo na Jéhovah. Lo nga kue lo yeke manda lani Bible na ambeni zo so mê ti ala akanga, so a yeke wara na popo ti ala mbeni kamarade ti lo na ngoi so lo de lani kete. Filiale ti Inde aleke ye fadeso ti tene apionnier amanda yanga ti azo so mê ti ala akanga ti fa tënë na yâ territoire ni.
17 Na lembeti 19 ti si na 22 ti mbeti so, mo yeke wara tondo ti kusala ti aTémoin ti Jéhovah na ndo sese kue teti ngu ti kusala 2004. Mû mbeni kete ngoi ti bâ ni nzoni, na mo mveni mo bâ tongana nyen azo ti Jéhovah na ndo sese kue azia lê ti ala gi na ndo ‘perle ti ngele ngangu’ laso.
Ngbâ ti ‘gi royaume kozoni’
18 Tongana e kiri e bâ toli ti Jésus na ndo wadengo buze so ague na ando nde nde, e yeke bâ so Jésus afa pëpe tongana nyen wadengo buze so ayeke wara kobe ti yanga ti lo na peko ti so lo kä aye ti lo kue. A yeke na lege ni so ambeni zo alingbi ti hunda: ‘So lo bata nga mbeni ye oko pëpe so, tongana nyen si wadengo buze so ayeke wara kobe, bongo na da ti lango? Ye ti nzoni wa si lo yeke wara na tele ti perle ti ngele ngangu so?’ Na lege ti mitele, ahundango tënë so alingbi ti duti nzoni. Me Jésus atene tënë so na adisciple ti lo pëpe? Lo tene: “I gi royaume ti Nzapa na mbilimbili ti Lo kozoni, na fade A mû ye so kue na i nga.” (Matthieu 6:31-33). Kota tënë ti yâ ti toli so ayeke ti fa na gigi mungo bê kue na Nzapa nga dutingo na wâ teti Royaume. E lingbi ti manda mbeni ye dä?
19 Tongana ade ti ninga pëpe so e mä pendere nzo tënë so wala a sala ngu mingi awe so e yeke tomba peko ti Royaume nga e yeke fa na azo aye ti nzoni ti Royaume ni, a yeke ngbanga ti e ti ngbâ ti bata bê nga na bibe ti e gi na ndo ni. Ngoi so e yeke dä ayeke ngoi ti ngangu, me e yeke na akpengba nda ti tënë ti mä na bê so ye so e yeke tomba pekoni ayeke tâ ye nga ngele ni ahon tanga ti aye kue, legeoko tongana perle so wadengo buze so awara. Aye so ayeke si na sese so nga aprophétie ti Bible so ayeke ga tâ tënë afa biani so e yeke na hunzingo ti aye ti “ngoi so”. (Matthieu 24:3). Ni la, legeoko tongana wadengo buze so ague na ando nde nde, zia e fa na bê kue wâ ti e teti Royaume ti Nzapa nga e duti na ngia teti matabisi ti fango nzo tënë.—Psaume 9:2, 3.
Mo dabe mo na ni?
• Tongana ngoi ayeke hon, ye nyen asala si atâ wavorongo Nzapa ague na li ni?
• Bibe wa a yeke bâ ni na popo ti ala so ayeke amissionnaire?
• Aye wa azo agbian na yâ fini ti ala ngbanga ti nzo tënë ti Royaume?
• Kpengba tënë wa e lingbi ti manda na yâ toli ti Jésus na ndo perle ti ngele ngangu?
[Ahundango tënë ti manda na ye]
1, 2. (a) Tënë ti bê ti aJuif ti ngoi ti Jésus na ndo Royaume ti Nzapa ayeke so wa? (b) Ye nyen Jésus asala ti fa nda ti Royaume ni nzoni? Na ye ti pekoni ayeke so wa?
3. Na salango tënë na ndo ngoi ti e, ye nyen Jésus atene na ndo Royaume ni?
4. Tâ tënë ti Royaume ayeke sala nyen na ndo azo laso?
5. Aye ti nzoni wa ayeke na yâ tondo ti ngu ti kusala 2004?
6. Ye nyen asala si guengo na li ni ayeke dä lakue?
7. Ye wa so asi afa tapande ti ngia nga na ti wâ ti azo so awara tâ tënë ti Bible?
8. Azo mingi ayeke fa ndoye ti ala teti Nzapa nga be-biani ti ala na Royaume ti lo na mbeni lege so ayeke ga na aye ti nzoni. A yeke so wa?
9, 10. Aye ti ngia wa amissionnaire ayeke wara na ayongoro ndo tongana République Centrafricaine?
11. Atâa atara, bibe wa amissionnaire so aninga na kua ni ayeke na ni na ndo kusala ti ala?
12. Tongana nyen mbeni zo ayeke fa so lo hinga tâ nene ti Royaume?
13. Tongana nyen mbeni zo na République tchèque afa ndoye ti lo teti Royaume?
14. (a) Ye wa nzo tënë ti Royaume apusu azo kutu mingi ti sala? (b) Atënë wa so asala si zo agbu li e oko oko e lingbi ti hunda na tele ti e?
15. Mbeni prophétie atene so azo ti Nzapa ayeke sala nyen na ngoi ti nda ni so?
16. Mû mbeni tapande so afa tongana nyen awakua ti Nzapa ayeke kono yâ ti kusala ti ala ti mû maboko na azo ti manda ye na ndo Royaume.
17. Fa mbilimbili ye ti nzoni so mo wara na yâ tondo ti ngu ti kusala 2004 so ayeke na lembeti 19 ti si na 22.
18. Na yâ toli ti wadengo buze so ague na ando nde nde, tënë wa Jésus afa ni pëpe? Na ngbanga ti nyen lo fa ni pëpe?
19. Kota tënë wa e lingbi ti manda na ndo toli ti Jésus ti perle ti ngele ngangu?
[Foto na lembeti 14]
“Tâ tënë ayeke . . . gboto mara ti azo kue.”—A. H. Macmillan
[Foto na lembeti 15]
Daniela na Helmut na fango tënë na awande so ayeke na Vienne
[Foto na lembeti page 16]
Na tapande ti wadengo buze so ague na ando nde nde, laso amissionnaire awara gbâ ti anzoni ye
[Foto na lembeti 17]
‘Azo ti Mo amû tele ti ala na bê ti ala mveni’