Mo yeke yeda na mungo maboko ti Jéhovah?

“[ Jéhovah, NW ] ayeke Zo ti sala na mbi, fade mbito asala mbi pëpe.”​—AHÉBREU 13:6.

BÂ SO mo yeke tambela na ndo ti mbeni lege so ahon na yâ ti ahoto. Me mo yeke gi mo oko pëpe. Mbeni wafango lege a hunda ti gue legeoko na mo, na lo yeke tâ nzoni wafango lege. Lo hinga ye nga lo yeke na ngangu ahon mo, me na be-nze-pepe lo yeda ti tambela yeke na tele ti mo. Lo bâ so ngoi na ngoi mo yeke pika gere ti mo. Teti so lo bi bê ti lo mingi na nzoni duti ti mo, na ngoi so ala si na ndo so ayeke sioni mingi, lo yôro tïtî lo ti gbu maboko ti mo. Mo yeke ke? Oko pëpe! Ge so, a yeke gigi ti mo si ayeke na yâ ti kpale.

² E aChrétien, e yeke na ndo ti mbeni lege so akpale ayeke dä mingi. A lingbi e tambela na ndo ti kete lege so gi e oko? (Matthieu 7:14). Oko pëpe. Bible afa so Wafango lege ti nzoni ahon atanga ni kue, Jéhovah Nzapa, amû lege na azo ti tambela na lo (Genèse 5:24; 6:9). Jéhovah ayeke mû maboko na awakua ti lo tongana ala yeke tambela? Lo tene: “Mbi, L’Eternel Nzapa ti mo, Mbi gbu maboko ti mo ti koti. Mbi tene na mo, Zia mbito; fade Mbi sala na mo.” (Esaïe 41:13). Na tapande ti wafango lege so, na nzoni bê Jéhovah ayeke gbu maboko ti zo so ayeke gi ti tambela na lo, nga lo yeke sala kamarade na zo ni so. Ti tâ tënë ni, e kue e ye mungo maboko so.

³ Na yâ article so ahon, e sala tënë na ndo alege osio so Jéhovah amû lani maboko na azo ti lo ti giriri. Laso, lo yeke mû maboko na azo ti lo na a-oko lege so? Na tongana nyen e lingbi ti hinga biani so e yeda na mara ti mungo maboko so? Zia e gi nda ti ahundango tënë so. Na gingo nda ni, e yeke kiri ti hinga biani so Jéhovah ayeke tâ Zo ti mungo maboko na e.​—aHébreu 13:6.

Mungo maboko na lege ti a-ange

⁴ A-ange ayeke mû maboko na awakua ti Jéhovah ti laso? Biani, ala yeke sala ni. Ti tâ tënë ni, laso, a-ange ayeke mû pëpe tele ti zo ti zi atâ wavorongo Nzapa na yâ kpale. Même na ndembe so a sû na Bible, a yeke gi ngoi na ngoi si ala sala tongaso. Legeoko tongana ti laso, mingi ti aye so a-ange asala ândö ayeke na mbeni lege so azo abâ pëpe. Ye oko, awakua ti Nzapa ti ngoi ni kâ ahinga so a-ange ayeke dä ti mû maboko na ala; hingango ye so amû ngangu na ala mingi (2 aGbia 6:14-17). E yeke nga na kpengba nda ti tënë ti duti na mara ti bibe ti ala so.

⁵ A-ange ti Jéhovah ayeke tâ na kota nzara ti mbeni kusala so mara ni ayeke pëpe, na so abâ e. Kusala wa? E lingbi ti wara kiringo tënë ni na Apocalypse 14:6: “Mbi bâ mbeni ange ayeke hulu na nduzu, lo yeke na Tene-nzoni ti lakue lakue ti fa na azo so asala kodoro na ndo sese, na ti fa na amara kue, akete mara kue, azo ti yanga nde nde kue, na azo nde nde kue.” “Tene-nzoni ti lakue lakue” so ague tâ oko na ‘Tene-nzoni ti royaume’ so, tongana ti so Jésus atene kozoni, “fade a fa [ni] na sese so kue teti tënë ti témoin na amara kue” kozoni si aye ti ngoi ti laso ahunzi (Matthieu 24:14). Tâ tënë, a yeke a-ange ni mveni si ayeke fa tënë ni pëpe. Jésus amû kota kusala so na azo (Matthieu 28:19, 20). A yeke tâ ye ti mungo ngangu na e ti hinga so tongana e yeke sala ni, e yeke wara mungo maboko so alondo na a-ange ti nzoni-kue, azo ti yingo so ayeke na ndara nga na ngangu.

⁶ Aye ayeke mingi so afa atene a-ange ayeke mû maboko na kusala ti e. Na tapande, na ngoi so e yeke na fango tënë, e yeke mä ka mbeni zo so ayeke tene aTémoin ti Jéhovah atingbi na ni tâ gi na peko ti so ni londo ti sambela Nzapa ti mû maboko na ni ti wara tâ tënë. Teti so aye ni so ayeke si ka fani mingi, e lingbi pëpe ti tene so a yeke aye so asi nga gi tongaso. Ye ti peko ti mungo maboko ti a-ange ayeke so, azo mingi mingi ayeke manda ti sala ye so ange so “ayeke hulu na nduzu” afa: “I kpe mbito ti Nzapa, i mû gloire na Lo.”​—Apocalypse 14:7.

⁷ Mo ye mingi ti wara mungo maboko ti angangu ange ti Jéhovah? Tongaso, sala ye kue so mo lingbi ti sala ti bi tele ti mo kue na yâ kusala ti fango tënë (1 aCorinthien 15:58). Tongana e yeke zia tele ti e mveni na yâ kusala so Jéhovah amû na e na so mbeni ti lingbi na ni ayeke pëpe, e lingbi ti duti biani na beku ti wara mungo maboko ti a-ange.

Mungo maboko na lege ti mokonzi ti a-ange

⁸ Jéhovah ayeke mû nga maboko na e na lege ti mbeni ange nde. Apocalypse 10:1 afa mbeni “ange ti ngangu” so “lê ti lo ayeke tongana lâ”. Ange so, so a bâ lo na yâ suma, aduti biani fä ti Jésus Christ so awara ngangu ti gloire na yayu (Apocalypse 1:13, 16). Jésus ayeke mbeni ange biani? Na mbeni lege, e lingbi ti yeda, teti so lo yeke archange (1 aThessalonicien 4:16). Tënë archange aye ti tene nyen? A ye ti tene “kozo ange ni” wala “mokonzi ti a-ange”. Jésus ayeke na ngangu ahon tanga ti amolenge ti Jéhovah ti yingo kue. Jéhovah azia Jésus ti komande a-ange kue so ayeke aturugu ti Lo. Mokonzi ti a-ange so ayeke biani mbeni ngangu lingu ti mungo maboko. Tongana nyen?

⁹ Kangba bazengele Jean asû lani na mbeti: “Tongana mbeni zo asala siokpari, e yeke na Avocat na tele ti Babâ, Jésus Christ, Zo Ti Mbilimbili.” (1 Jean 2:1). Ngbanga ti nyen Jean atene so Jésus ayeke “Avocat” wala wagbungo koko ti e mbilimbili na ngoi so e ‘sala siokpari’? Bâ kete, lâ oko oko e yeke sala siokpari, na siokpari ayeke gue na zo na kuâ (Zo-ti-fa-tene 7:20; aRomain 6:23). Ye oko, Jésus amû lani fini ti lo tongana sandaga teti asiokpari ti e. Nga lo yeke na tele ti Babâ ti e ti be-nzoni ti gbu koko ti e. E oko oko kue e yeke na bezoin ti mungo maboko so. Tongana nyen e lingbi ti yeda na ni? A lingbi e gbian bê ti e ngbanga ti asiokpari ti e na e gi ti wara pardon na lege ti sandaga ti Jésus. A lingbi e kpe nga ti kiri ti sala asiokpari ni.

¹⁰ Na ndo ti so lo kui teti e, Jésus azia na e mbeni tapande so ayeke nzoni-kue (1 Pierre 2:21). Tapande ti lo ayeke fa lege na e, a mû maboko na e ti leke salango ye ti e si e lingbi ti kpe akota siokpari nga e nzere na lê ti Jéhovah Nzapa. E yeke tâ na ngia ti wara mara ti mungo maboko so, ni la pëpe? Jésus azê lani na adisciple ti lo so a yeke mû na ala mbeni wamungo maboko nde.

Mungo maboko ti yingo vulu

¹¹ Jésus amû lani zendo so: “Fade Mbi hunda Babâ, na fade Lo mû na i mbeni Consolateur [“wamungo maboko”, NW ] si Lo lingbi duti na i lakue lakue, même Yingo Ti Tene-biani, Lo so sese so alingbi kamata Lo pëpe.” (Jean 14:16, 17). “Yingo Ti Tene-biani” so wala yingo vulu, ayeke mbeni zo pëpe, me a yeke mbeni ngangu: ngangu ti Jéhovah ti sala na ye. A yeke mbeni ngangu so katikati ni ayeke dä pëpe. A yeke ngangu so Jéhovah asala na kusala lani ti leke dunia, ti sala na akota ye ti kpene nga na ti fa aye so bê ti lo aye na lege ti asuma wala abango li. Teti so Jéhovah ayeke sala kusala na ni tongaso laso pëpe, a ye ti tene so e yeke na bezoin ni pëpe?

¹² Oko pëpe! Na “lâ ti ye ti ngangu” so e yeke dä, e yeke na bezoin ti yingo ti Jéhovah so mingi ahon ti kozo (2 Timothée 3:1). A yeke kpengba e ti gbu ngangu na yâ ti atara. A yeke mû maboko na e ti gi ti duti na anzoni lengo wala asalango ye so ayeke sala si e ga ndulu mingi na Jéhovah nga na aita ti e ti koli na ti wali na lege ti yingo (aGalate 5:22, 23). Tongaso, tongana nyen e lingbi ti wara nzoni na lege ti pendere mungo maboko so alondo na Jéhovah?

¹³ Kozoni, a lingbi e sambela ti hunda ti wara yingo vulu ni. Jésus atene: “Tongana i so i yeke sioni, i hinga lege ti mû matabisi ti nzoni na amolenge ti i, fade Babâ ti i na yayu aye mingi ahon pëpe ti mû Yingo Vulu na ala so ahunda Lo?” (Luc 11:13). Biani, Jéhovah ayeke nzoni Babâ ahon tanga ti ababâ kue. Tongana, na mabe, e hunda yingo vulu na lo na bê ti e kue, lo lingbi lâ oko pëpe ti gbanzi e na matabisi so. Tongaso, hundango tënë ni ayeke so: E yeke hunda ti wara yingo vulu ni? A lingbi e hunda ni na yâ ti asambela ti e ti lâ oko oko.

¹⁴ Use ni, e yeke yeda na matabisi so na salango ye alingbi na ye so lo fa na e. Zia e mû mbeni tapande: Bâ so mbeni Chrétien ayeke tiri na bibe ti bango alimon wala ambeti so ayeke fa bungbingo ti koli na wali. Lo sambela ti hunda ti wara yingo vulu ti mû maboko na lo ti ke sioni salango ye so. Lo gi wango na mbage ti a-ancien, na ala wa lo ti sala ngangu ti hon ndo ni, nga ti gue même ndulu pëpe na mara ti aye ti buba tongaso (Matthieu 5:29). Ye nyen ayeke si tongana lo dö wango ni lo zia na lo ngbâ ti bâ aye ni so? Lo sala ye alingbi na sambela so na yâ ni lo hunda ti wara yingo vulu ti mû maboko na lo? Wala lo yeke ndulu ti mû vundu na yingo ti Nzapa na ti girisa matabisi so? (aEphésien 4:30). Biani, e kue e yeke na bezoin ti sala ye kue so e lingbi ti sala si e duti na beku ti ngbâ ti wara pendere mungo maboko so alondo na Jéhovah.

Mungo maboko na lege ti Tënë ti Nzapa

¹⁵ A sala angu mingi awe so Bible ayeke mbeni lingu ti mungo maboko teti awakua be-ta-zo ti Jéhovah. Ahon ti tene e bâ Bible tongana mbeni senge buku, a lingbi e zia na li ti e so Bible ayeke mbeni kpengba lingu ti mungo maboko. Ti yeda na mungo maboko so, a hunda na e ti sala ngangu. A lingbi e sala si dikongo Bible aga mbage ti aye so e yeke sala ka lâ oko oko.

¹⁶ Na ndo zo so salango ye ti lo anzere na Nzapa, Psaume 1:2, 3 atene: “Ngia ti lo ayeke na yâ Ndia ti L’Eternel, na lo bi bê ti lo na lege ti Ndia so lâ na bï. Lo yeke tongana keke so a lu na tele ti [angu, NW ] so ayeke sua, keke so alë na ngoi ti lo, kugbe ti lo ahule nga pëpe. Na ye kue so zo so asala aga nzoni.” Mo bâ kota tënë so ayeke na yâ ti aversê so? A yeke ngangu pëpe ti diko atënë so na ti tene na nda ni so a sala tënë ti mbeni senge pendere ye so zo ayeke bâ: mbeni keke so asigigi na tele ti ngu na so gbe ti dê ayeke dä. A yeke nzere mingi ti lango kete na gbe ti mara ti keke tongaso na mbeni peko ti midi! Me psaume so atisa e ti pensé na senge hungo tele pëpe. Nde na so, a yeke sala na e tënë ti salango kua ngangu. Tongana nyen?

¹⁷ Bâ so keke ni ayeke pëpe gi mbeni senge keke so gbe ti dê ni ayeke dä na so asigigi na bê ti lo mveni na tele ti ngu. A yeke mbeni keke so ayeke lë lengo, na so “a lu” ni na mbeni ndo so asoro ni sorongo: “na tele ti angu so asua” (NW ). Tongana nyen si keke oko alingbi ti sigigi ndulu na tele ti angu mingi? Zia e mû mbeni tapande: na yâ ti mbeni yaka ti orange, wa ti yaka ni alingbi ti zi adû na yâ ni ti sala si ngu alingbi ti sua ti ga na gunda ti akeke ti lo so ayeke aye ti ngele mingi. Fadeso e si na tënë so e ye ti gboto lê na ndo ni. Tongana laso e maï nzoni na lege ti yingo tongana keke so, a yeke ngbanga ti so a sala akusala mingi ndali ti e. E ga na yâ ti mbeni bungbi so azia anzoni ngu ti tâ tënë tâ ndulu na e, me a lingbi nga e mveni e sala mbeni ye. A lingbi e mveni e gi ti wara nzoni na lege ti ngu ti ngele ngangu so, na gbungo li nga na gingo nda ti aye so atia e si e yôro atâ tënë ti Tënë ti Nzapa na yâ bê nga na bibe ti e. Na lege so, e nga e yeke lë ande anzoni lengo.

¹⁸ E yeke wara nzoni na lege ti Bible gi tongana e zi ni na e diko ni. Bible ni ayeke tongana mbeni waraga pëpe so na ndo kue so e zi ni dä, akiringo tënë ti e kue asigigi na gbele e. Tongana e ye ti mû adesizion, e yeke na bezoin ti gi ‘hingango ye ti Nzapa’ tongana ti so a yeke gi na mbeni mosoro so a honde (aProverbe 2:1-5). Mingi ni, e yeke na bezoin ti gi ndo ngangu si e wara wango ti Mbeti ti Nzapa so alingbi tâ na ye so e ye. E yeke na ambeti mingi so alingbi ti mû maboko na e na yâ gingo nda ti ye ti e. Tongana e yeke sala kusala na ambeti so ti gi na bê kue amosoro ti ndara na yâ Tënë ti Nzapa, e yeke wara biani aye ti nzoni na lege ti mungo maboko ti Jéhovah.

Mungo maboko na lege ti amba ti e Chrétien

¹⁹ Ngbele ye giriri juska laso, awakua ti Jéhovah ayeke mbeni lingu ti mungo maboko na popo ti ala. Jéhovah agbian kode so? Oko pëpe. Kite ayeke pëpe so e oko oko kue e lingbi ti dabe ti e na ambeni ye so na yâ ni e wara tâ mungo maboko so e yeke na bezoin ni nga na tâ ngoi ni na lege ti amba ti e Chrétien. Na tapande, mo dabe mo na mbeni article ti Tour ti Ba Ndo wala ti Réveillez-vous! so adë bê ti mo wala amû maboko na mo ti leke mbeni kpale so andu mabe ti mo na ngoi so mo yeke na bezoin ni? Jéhovah amû maboko so na mo na lege ti “ngba be-ta-zo na ti ndara” so Lo zia ti mû na e kobe ti yingo “na tâ ngoi ni”.​—Matthieu 24:45-47, NW.

²⁰ Ye oko, fani mingi, e yeke wara mungo maboko ni tâ gi na lege ti amba ti e Chrétien. Mbeni ancien alingbi ti mû mbeni diskur so andu bê ti e; na lege ti kua ti lo ti berger, lo lingbi ti mû maboko na e na ngoi ti ngangu, wala na nzobe, lo lingbi ti mû na e wango so ayeke mû maboko na e ti bâ mbeni wokongo ti e na ti hon ndo ni. Mbeni Chrétien so ayeke na bê ti kiri singila asala tënë so na ndo maboko so mbeni ancien amû na lo: “Na ngoi so e yeke na fango tënë, lo mû ngoi ti hunda na mbi ye so ayeke na bê ti mbi. Andâ na bï ni so, mbi sambela fade Jéhovah ti wara mbeni zo so mbi lingbi ti fa atënë ti bê ti mbi na lo. Gi na ndade ni, ita-koli so asala tënë na mbi na nzobe. Lo mû maboko na mbi ti bâ tongana nyen Jéhovah amû maboko na mbi teti angu mingi. Singila na Jéhovah so atokua na mbi ancien so.” Na salango aye tongaso, a-ancien ayeke fa so ala yeke ‘amatabisi ti azo’, so Jéhovah amû ala na lege ti Jésus Christ ti mû maboko na e ti ngbâ ti gbu ngangu na ndo lege ti fini.​—aEphésien 4:8.

²¹ Na ndo ti a-ancien, Chrétien oko oko so ayeke be-ta-zo aye ti bata komandema so a sû na gbe ti yingo ti Nzapa so ahunda ti “gi ye teti [lo] mveni pëpe, me [lo] gi ye teti ambeni zo nga.” (aPhilippien 2:4). Tongana azo ti kongregation asala ye alingbi na wango so, anzoni kusala ti nzobe ayeke ga na pekoni. Na tapande, mbeni sewa awara ambeni ye ti ngangu na ngoi so ala ku tele ti ala na ni pëpe. Babâ ni amû molenge ti lo ti wali ti gue ti vo ye. Na kiringo ti ala na yanga-da, ala sala ndao. Molenge ni akui; babâ ni awara akota kä. Na peko ti so lo sigigi na hôpital, tele ti babâ ni angbâ ti so ngangu si lo lingbi pëpe ti sala mbeni ye teti lo mveni. Vundu ahon ndo ti wali ni, tongaso lo oko lo lingbi ti bata koli ti lo pëpe. Tongaso, mbeni koli na wali ti kongregation ni amû ala na da ti ala ti bâ lege ti ala teti ayenga mingi.

²² Tâ tënë, akusala kue ti nzobe andu pëpe mara ti ye ti ngangu nga na bibe ti gbanzingo ye na tele tongaso. Ambeni mungo maboko so e yeke wara ayeke gi kete. Me, atâa nzobe so a fa na mbage ti e ayeke tongana nyen, e yeke bâ ni na nene ni, a yeke tongaso pëpe? Mo dabe mo na mbeni tënë so mbeni ita atene na mo na nzobe, wala mbeni ye so lo sala ti fa so lo bi bê na mo na so akanga dû ti mungo maboko so mo ye fade ti wara? Mingi ni, a yeke na lege so si Jéhovah ayeke bâ lege ti e.​—aProverbe 17:17; 18:24.

²³ Mo ye si Jéhovah asala kusala na mo ti mû maboko na ambeni zo? Lege azi na mo ti wara matabisi so. Biani, tongana mo yeke sala ngangu tongaso, Jéhovah ayeke bâ ni na nene ni mingi. Tënë ti lo atene: “Zo so asala be-nzoni na awanzinga, lo [sala bon, NW ] na L’Eternel, na fade L’Eternel afuta lo teti nzo kusala ti lo.” (aProverbe 19:17). Mungo tele ti e mveni ti sala na aita ti e ti koli na ti wali ayeke ga na e kota ngia (Kusala 20:35). Azo so aye ti duti gi ala oko ayeke hinga pëpe ngia so ayeke ga na lege ti mungo maboko tongaso wala warango ni (aProverbe 18:1). Tongaso, zia e ga lakue na abungbi si e lingbi ti kpengba tele na popo ti e.​—aHébreu 10:24, 25.

²⁴ A yeke ye ti ngia mingi ti bâ tongana nyen Jéhovah ayeke mû maboko na e. Atâa so e yeke pëpe na mbeni ngoi so Jéhovah ayeke sala akota ye ti kpene ti sala si ye so lo ye aga tâ tënë, a lingbi e bâ tele ti e pëpe tongana azo so ye amanke ala. Ye so ayeke kota biani ayeke so Jéhovah ayeke mû na e maboko kue so e yeke na bezoin ni si e ngbâ be-ta-zo. Na tongana e kue e gbu ngangu legeoko na yâ mabe, e yeke bâ ande akusala ti Jéhovah so apika bê na so asi na gloire mingi ahon na yâ mbaï kue ti azo. Zia e leke na bê ti e ti yeda nga ti wara aye ti nzoni mingi na lege ti maboko so Jéhovah ayeke mû na e na ndoye, si e nga e lingbi ti tene oko tënë ti yâ ti versê ti e ti ngu 2005: ‘Ye ti bata mbi alondo na Jéhovah.’​—Psaume 121:2.

Mo tene ti mo nyen?

Laso, tongana nyen Jéhovah ayeke mû na e maboko so e yeke na bezoin ni:

• Na lege ti a-ange?

• Na lege ti yingo vulu ti lo?

• Na lege ti Tënë ti lo so a sû na gbe ti yingo ti lo?

• Na lege ti amba ti e Chrétien?

[Kete tënë na gbe ni]

1, 2. Ngbanga ti nyen a yeke kota ye teti e ti yeda na mungo maboko nga na fango lege ti Jéhovah na yâ fini ti e?

3. Ahundango tënë wa e yeke gi nda ni ande na yâ lisoro so?

4. Ngbanga ti nyen awakua ti Nzapa ti laso alingbi ti hinga biani so a-ange ayeke mû maboko na ala?

5. Tongana nyen Bible afa so a-ange nga ayeke mû mbage ti ala na kusala ti fango tënë laso?

6, 7. (a) Ye nyen afa so a-ange ayeke mû maboko na e na ya kusala ti e ti fango tënë? (b) Tongana nyen e lingbi ti duti biani na beku ti wara mungo maboko ti a-ange ti Jéhovah?

8. Kota ndo wa Jésus ayeke na ni na yayu? Na ngbanga ti nyen a yeke mbeni ye so adë bê ti e?

9, 10. (a) Tongana nyen Jésus ayeke sala kusala tongana “Avocat” ti e na ngoi so e sala siokpari? (b) Maboko wa e lingbi ti wara ni na lege ti tapande ti Jésus?

11, 12. Yingo ti Jéhovah ayeke nyen? Ngangu ni ayeke tongana nyen? Na ngbanga ti nyen e yeke na bezoin ni laso?

13, 14. (a) Ngbanga ti nyen e lingbi ti duti na beku so Jéhovah ayeke ndulu ti mû yingo vulu ti lo na azo ti lo? (b) Na lege ti salango ye wa e lingbi ti fa so e yeda biani pëpe na matabisi ti yingo vulu?

15. Tongana nyen e lingbi ti fa so e bâ Bible tongana senge buku pëpe?

16, 17. (a) Tongana nyen Psaume 1:2, 3 afa aye ti nzoni ti dikongo ndia ti Nzapa? (b) Tongana nyen Psaume 1:3 afa so a lingbi e sala kusala ngangu?

18. Ti wara akiringo tënë ti Bible na ahundango tënë ti e, a lingbi e sala nyen?

19. (a) Ngbanga ti nyen a lingbi e bâ a-article ti Tour ti Ba Ndo na ti Réveillez-vous! tongana mungo maboko so e wara na lege ti amba ti e Chrétien? (b) Tongana nyen mo wara mungo maboko na lege ti mbeni article ti Tour ti Ba Ndo na ti Réveillez-vous!?

20. Na lege wa a-ancien ayeke fa so ala yeke ‘amatabisi ti azo’?

21, 22. (a) Ye nyen ayeke si tongana aita ti kongregation asala ye alingbi na aPhilippien 2:4? (b) Ngbanga ti nyen même akete kete kusala ti nzobe ayeke kota mingi?

23. Tongana e yeke sala ngangu ti mû maboko na mba, Jéhovah ayeke bâ ni tongana nyen?

24. Ngbanga ti nyen a lingbi e bâ tele ti e pëpe so ye amanke e ndali ti so e bâ pëpe akota ye ti kpene so Jéhovah asala ândö?

[Foto na lembeti 18]

A yeke ye ti nzoni mingi ti hinga so a-ange ayeke mû maboko na kusala ti fango tënë

[Foto na lembeti 21]

Jéhovah alingbi ti sala kusala na mbeni mba ti e Chrétien ti mû na e maboko so e yeke na bezoin ni