666​—Pëpe gi mbeni senge ye ti ndima

“Mbeni zo alingbi vo ye wala kä ye pëpe, gi ala so ayeke na marque ni, marque ni so ayeke iri ti nyama ni wala nombre ti iri ti lo. Ndara ayeke so: zo so ayeke na ndara, zia lo diko nombre ti nyama ni, teti a yeke nombre ti zo, na nombre ti lo ayeke ngbangbo omene na bale-omene na ndo ni omene.”​—Apocalypse 13:17, 18.

TËNË ti prophétie so andu marque wala iri ti ndima ti “nyama” ti ngonda ni (nombre 666) ayeke na popo ti ambeni tënë ti Bible so azingo mingi nzara nga na gingo bê ti azo. Na lege ti singale nga na Internet, na yâ alimon, abuku nga na ambeti-sango, azo ayeke fa tënë ti bê ti ala nde nde na ndo marque ti nyama ti ngonda so.

Ambeni zo amä na bê so 666 ayeke marque ti wato ti Christ so a sala tënë ti lo na yâ ti Bible. Ambeni zo nde nga atene so a yeke mbeni fä so amû lege ti hinga na azo ni na ngangu, tongana mbeni nzoroko so a sala na ndo poro ti tele wala mbeni kete kete ye ti senda-kode so a yôro na yâ ti tele ti zo, na so amû lege ti hinga na zo ni so tongana mbeni wakua ti nyama ni. Ye oko, ambeni zo nga nde amä na bê so 666 ayeke marque ti komandema ti pape ti aCatholique. Ala zia na place ti agere-mbeti ti kota iri ti pape, Vicarius Filii Dei (zo so ayeke na peko ti Molenge ti Nzapa), anombre ti aRomain, ala tara ti tingbi ni na lege ti kode ti ala, na ala wara 666. Ambeni zo nde atene so a lingbi ti sala nga tongaso legeoko na iri ti yanga ti Latin ti Togbia ti Rome Dioclétien, nga na iri ti yanga ti Hébreu ti César Néron.a

Ye oko, amara ti fango peko ti atënë so azo asigigi na ni gi na li ti ala tongaso na so a leke pekoni na kode ti azo ague tâ nde mingi na atënë so Bible mveni afa na ndo marque ti nyama ti ngonda ni, tongana ti so e yeke bâ ni ande na yâ article ti peko. Bible afa biani so fade ngonzo ti Nzapa ayeke tï na ndo azo so ayeke na marque ti nyama ti ngonda so na tele ti ala, na ngoi so lo yeke ga ti futi aye ti sese ti fadeso (Apocalypse 14:9-11; 19:20). Tongaso, gbungo nda ti 666 andu ye mingi ahon gi senge gingo lege ti leke mbeni tënë ti ndima. Ye ti nzoni ni ayeke so, Jéhovah Nzapa, lo so lo mveni lo yeke tâ ndoye na Lingu ti lumière ti yingo, azia pëpe awakua ti lo na yâ bingo na ndo kota tënë so.​—2 Timothée 3:16; 1 Jean 1:5; 4:8.

[Kete tënë na gbe ni]