Atënë so azo ahunda

Esaïe 30:21 atene so a mä go ti Jéhovah “na peko ti i”; me versê 20 ni afa ti lo so Jéhovah ayeke na devant, teti versê ni atene: “Fade lê ti i abâ Maître ti i”; ngbanga ti nyen tongaso?

E diko na Esaïe 30:20, 21: “Fade Maître ti i ahonde tele ti Lo mbeni pëpe, na fade lê ti i abâ Maître ti i. Tongana i gue na koti, wala na gati, fade mê ti i amä yanga na peko ti i, so atene, So ayeke lege ni, i tambela dä.”

Mbeni zo so ayeke diko versê so alingbi ti pensé so Jéhovah, so ayeke Maître ni, ayeke na devant ti lo, me lo yeke mä go ti Lo na peko ti lo. Ye oko, atënë ni ayeke ti mû na lege ti fä, na a lingbi a gbu nda ni na lege so.

Kode ti salango tënë so versê 20 ni aye ti fa ayeke ti mbeni wakua so ayeke ndulu ti sala na maître ti lo, lakue ndulu biani ti sala ye hio tongana maître ni amû yanga. Legeoko tongana mbeni wakua so ayeke zia lê ti lo gi na ndo maboko ti maître ti lo ti duti ndulu ti sala ye tongana maître ni amû yanga, azo ti Jéhovah laso ayeke ndulu ti zia lê ti ala gi na atënë so aluti na ndo Bible na so Jéhovah ayeke mû yeke yeke na lege ti bungbi ti lo ge na sese (Psaume 123:1, 2). Ala sala ye alingbi na yanga so lo mû, na dutingo ndulu ti sala ye kue so Jéhovah ayeke fa na lege ti ‘ngbâa be-ta-zo na ti ndara’.​—Matthieu 24:45-47.

Me e lingbi ti tene nyen na ndo go so awakua ni amä na peko ti ala? A yeke na lege ni ti tene so go ni so alondo na mbage ti peko so ayeke go wala tënë ti Nzapa giriri, so a sû ni na yâ Mbeti ti lo na so ‘wabatango ye be-ta-zo’ ayeke mû lege na e ti gbu nda ni nzoni (Luc 12:42). Awakua ti Nzapa laso ayeke mä go ti Lo na mandango Bible na bê kue nga na batango akpengba-ndia ni na yâ fini ti ala, na salango kusala na ambeti so ‘ngbâa be-ta-zo na ti ndara’, ‘wabatango ye be-ta-zo’ aleke ni. Tongana awakua ti Jéhovah azia lê ti ala kue na mbage ti fango lege so Maître ni ayeke mû tâ na ngoi ni, na ala yeke ndulu ti sala ye alingbi na ni, nga tongana ala manda Tënë ti Nzapa, so a sû ni a sala fadeso angu mingi awe, fade a yeke duti mo bâ mo tene ala yeke bâ lo na devant ti ala, na ala yeke mä go ti lo na peko ti ala.​—aRomain 15:4.