“Mbi hinga lani ye mingi pëpe na ndo Nzapa”

MBENI koli so alango na Kerala, Inde, asû atënë so: “Na ngu so ahon, aTémoin ti Jéhovah ayeke ga na mbi, ala yeke fa apendere tënë na ndo Royaume ti Nzapa. Mbi yeke lani Catholique ngu miombe, me mbi hinga ye mingi pëpe na ndo Nzapa. Me tâ gi na yâ oko ngu ni so, mbi manda aye mingi na ndo ti lo.” Lo kiri lo tene: “Mbi yeke na ngia mingi ti hinga so a sigigi na Tour ti Ba Ndo na ayanga ti kodoro 139 [fadeso 146]. Ti bâ tongana nyen azo ti ayanga ti kodoro kue ayeke mä fadeso tokua ti Nzapa ayeke ye ti dongo bê mingi.”

Atâa so mingi ti awasenda-ndara atene so lege ayeke dä pëpe ti tene zo ahinga Nzapa, bazengele Paul afa polele so lege ayeke biani dä. Na ambeni zo ti Athènes so ayeke sambela na ndo ti mbeni balaga so a leke ni ndali ti ‘nzapa so a hinga lo pëpe’, Paul atene: “Ye so i yeke sambela so i dë i hinga pëpe, mbi fa ye so na i. Nzapa so asala sese na ye kue so ayeke na yâ ni . . . ayeke mû fini, na mbö, na ye kue na azo kue; na Lo sala amara kue na lege ti zo oko si ala duti na lê ti sese kue”.​—Kusala 17:23-26.

Paul awa azo so amä lo ti gi ti hinga Wasalango ye, teti ‘lo yeke yongoro pëpe na e oko oko kue’. (Kusala 17:27). A-Témoin ti Jéhovah ayeke duti ande na ngia ti mû maboko na mo ti manda ti hinga tâ Nzapa, nga na apendere lengo ti lo.