Tâ Vorongo Abungbi Azo Oko
ATÄ so mingi ni lege ti vorongo aye ti kangbi azo, vorongo oko tâ Nzapa ayeke na ngangu ti bungbi azo oko. Na ngoi so Israël ayeke la ni mara so Nzapa asoro ni, tâ vorongo agboto aGentil mingi ti be-ti-mbilimbili. Na tapande, Ruth azia anzapa ti Moab, kodoro so a dü lo dä, na lo tene na Naomi: “Fade azo ti mo aga azo ti mbi, na Nzapa ti mo aga Nzapa ti mbi.” (Ruth 1:16) Na kozo siècle ti N.E., gbâ ti aGentil aga awavorongo tâ Nzapa. (Kusala 13:48; 17:4) Na pekoni tongana abazengele ti Jésus ato nda ti tambela na ayongoro ndo ti fa nzo tene, a bungbi oko ambeni zo ti be-ti-mbilimbili na yâ vorongo tâ Nzapa. Bazengele Paul asû na mbeti: “I zia ayanda, i ga na Nzapa, ti sala na tâ Nzapa so ayeke na fini.” (1 aThessalonicien 1:9) Vorongo tâ Nzapa ayeke lakue na ngangu tongaso ti bungbi azo oko laso?
Awadengo kite angbâ lakue ti tene so a yeke na lege ni pepe ti sala tene ti “atâ wavorongo” wala ti “tâ Nzapa.” Ala lingbi ti tene tongaso teti ala hinga pepe lingu so na lege ni a lingbi ti manda tâ tene. Me azo so alondo na ando nde nde so agi tâ tene aba so vorongo ayeke pepe gi tene ti ye so bê ti zo mveni aye. Zo oko so alingbi na vorongo ti e ayeke Wasalango aye kue, Jéhovah Nzapa. (Apocalypse 4:11) Lo yeke tâ Nzapa, na lo yeke na droit ti fa tongana nyen a lingbi a voro lo.
Ti mu maboko na e ti ba nda ti aye so lo hunda, Jéhovah asala tene na e na lege ti Tene ti lo, Bible. Ndulu na azo kue na ndo sese laso ayeke na Bible kue wala ambeni mbage ni na yanga so ala lingbi ti diko ni. Nga, Molenge ti Nzapa atene: “Tongana i duti na yâ tene ti Mbi, . . . fade i hinga tâ tene.” (Jean 8:31, 32, NW) Tongaso, lege ayeke dä ti hinga tâ tene. Na azo ti be-ti-mbilimbili kutu mingi so alondo na alege ti vorongo nde nde ayeda na mbito pepe na tâ tene so na a yeke bungbi ala beoko na yâ tâ vorongo.—Matthieu 28:19, 20; Apocalypse 7:9, 10.
Beoko na ndo Sese Kue Laso!
Mbeni pendere prophétie na yâ buku ti Tsephania asala tene ti bungbingo oko azo mingi so alondo na ando nde nde. Lo tene: “Na lâ ni kâ fade mbi [Jéhovah Nzapa a] mu na azo mbeni fini yanga ti kodoro so ayeke nzoni-kue, si ala kue adi iri ti Jéhovah, ti tene ala sala na lo maboko na maboko.” (Tsephania 3:9, NW) So tâ pendere fango peko ti azo so agbian ti sala na Nzapa na yâ beoko!
Ye so ayeke si lawa? Tsephania 3:8 (NW) atene: “‘I ngbâ ti ku mbi,’ so ayeke tene ti Jéhovah, ‘juska na la ni so fade mbi londo ti gbu ye ti pekoni, teti ye so mbi leke ti fâ na ngbanga ayeke ti bungbi amara, si mbi bungbi oko aroyaume, ti tuku kota ngonzo ti mbi na ndo ti ala, ngonzo ti wâ ti mbi kue; teti fade sese kue afuti na lege ti wâ ti mbanda ti mbi.’” Biani, na ngoi so Jéhovah ayeke bungbi amara me kozoni si lo tuku na ndo ti ala ngonzo ti wâ ti lo, lo mu na azo ti sese so ayeke na tâ be-ti-molenge mbeni fini yanga ti kodoro so ayeke nzoni-kue. Ngoi so asi awe, teti bungbingo amara kue teti bira ti kota lâ ti Nzapa, Lo Ti Ngangu Ahon Kue, na Har–Maguédôn ato nda ni awe.—Apocalypse 16:14, 16.
Ti bungbi azo ti lo oko, Jéhovah amu na ala mbeni yanga ti kodoro so ayeke nzoni-kue. Fini yanga ti kodoro so andu mbilimbili gbungo nda ti tâ tene ti Bible na ndo ti Nzapa nga na aye so lo leke ti sala. Tenengo yanga ti kodoro so ayeke nzoni-kue andu mango na bê na tâ tene, fango tâ tene ni na azo, nga dutingo na fini alingbi na andia nga na akpengba-ndia ti Nzapa. A hunda ti kpe atene ti poroso so aga na kangbi kirikiri na ti gboto na gigi ti bê ti zo gunda ti asalango ye ti kion, tongana tene ti mara nga na vorongo kodoro so aga na tene ti kangbi so ayeke fä ti sese so. (Jean 17:14; Kusala 10:34, 35) Azo kue ti be-ti-mbilimbili so andoye tâ tene alingbi ti manda yanga ti kodoro so. Ba tongana nyen azo oku so a sala tene ti ala na yâ article so ahon, atä so ala kangbi la ni ngangu mingi na lege ti vorongo, aduti beoko fadeso na yâ vorongo oko tâ Nzapa, Jéhovah.
Ala Duti Beoko na yâ Tâ Vorongo
Tongana Fidelia, wali so amu tele ti lo kue na église ti Catholique, avo mbeni Bible ti tene molenge ti lo ti wali amanda ni na ekole, lo hunda na prêtre ti lo ti fa na lege ti Bible ye so asi na amolenge ti lo oku so akui awe. Lo tene: “So tene ti suingo bê!” Tongaso tongana aTémoin ti Jéhovah aga na ndo ti lo, lo hunda na ala oko tene so. Na dikongo na yâ Bible ti lo mveni tâ tene na ndo dutingo ti akinda, lo ba tongana nyen église ahanda lo. Lo manda so akinda ahinga ye oko pepe na tongaso ala ba pasi pepe na yâ ti Limbo wala mbeni ndo nde. (Psaume 146:4; Zo-ti-fa-tene 9:5) Fidelia alungula ayanda ti lege ti vorongo ti lo kue, lo zia église ni, na lo to nda ti manda Bible. (1 Jean 5:21) Teti angu bale oko so ahon, lo wara ngia ti fa tâ tene ti Mbeti ti Nzapa na ambeni zo.
Tara, so ayeke ti kodoro ti Katmandou, ague na mbeni kodoro so a wara atemple ti aHindou dä mingi pepe. Tongaso lo gue na mbeni église ti aMéthodiste na bibe ti kaï nzala ti lo na lege ti yingo. Me lo wara kiringo tene oko pepe na ahundango tene ti lo na ndo pasi ti azo. Na pekoni aTémoin ti Jéhovah awara lo na ala hunda na lo ti manda Bible na ala. Tara atene: “Mbi ga ti hinga so Nzapa ti ndoye alingbi pepe ti duti na gunda ti pasi kue so ayeke na yâ sese . . . Beku ti fini sese so siriri na mango tele ayeke duti ande dä amu ngia na bê ti mbi mingi.” (Apocalypse 21:3, 4) Tara alungula ayanda ti lo ti aHindou, lo zia lege ti angobo ti vorongo ti kodoro ti lo, na lo wara tâ ngia na yâ mungo maboko na azo ti wara aye so atia ala na lege ti yingo tongana mbeni Témoin ti Jéhovah.
Panya, Bouddhiste ni, ayeke la ni mbeni wagingo bendo tongana aTémoin ti Jéhovah aga na lo ti kozoni na Bangkok, tongaso aprophétie ti Bible agbu bê ti lo mingi. Panya atene: “Tongana mbi manda ngbanga ti nyen dutingo ti aye ti fadeso ayeke nde na ye so Wasalango ye aleke kozoni giriri ti sala, nga tongana nyen lo leke ti tene ye so azo so ake lo na yanga-ti-komande ti lo abuba akiri aga nzoni, ye ni ayeke tongana mo ba mo tene a zi mbeni bongo na lê ti mbi. Ye kue so andu tokua ti Bible ague oko. Mbi ga ti ndoye Jéhovah tongana mbeni zo; ye so apusu mbi ti sala ye alingbi na ye so mbi hinga ayeke na lege ni. Mbi yeke la ni na kota nzala ti mu maboko na ambeni zo ti ba kangbi so ayeke na popo ti ndara ti zo na ndara ti Nzapa. Tâ ndara agbian biani fini ti mbi.”
Tongana ngoi ayeke hon, Virgil ato nda ti duti na atene ti kite mingi na ndo atene ti mabe ti lege ti vorongo ti lo. A hon ti sambela Nzapa ti fa lege ti mu maboko na azo vuko nga teti ye so lo ba a yeke tongana mbeni bungbi ti mara so amaï tene ti kengo amunzu, lo sambela ti wara tâ tene, atä a yeke nyen, atä ndo so a lingbi ti duti dä. Virgil adabe lo: “Tongana mbi zingo na ndade ni na peko ti sambela so mbi tene na Nzapa na bê kue, mbi wara mbeni Tour ti Ba Ndo na yâ ti da. . . . Mbeni zo ayôro ni na gbe ti yanga-da.” Ngoi kete na pekoni, na wâ lo yeke manda Bible na aTémoin ti Jéhovah. Lo kiri lo tene: “Ti fani oko ni na yâ fini ti mbi, mbi ba so a kaï nzala ti mbi. . . . Mbeni kete beku ato nda ti sigigi na yâ mbi.” A ninga pepe Virgil abungbi oko na ala so amu na azo oko tâ beku tongana ti so a sigigi na yâ Tene ti Nzapa, Bible.
Bê ti Charo, ti kodoro ti Amérika ti Mbongo, apika tongana mbeni Témoin so iri ti lo ayeke Gladys aba so lo yeke na kpale na akete molenge ti lo na lo to nda ti mu maboko na Charo na mungo lo ti gue na gala. Na pekoni, Charo ayeda na ye so Gladys ahunda na lo: ti manda Bible na lo senge senge. Tongana Charo amanda na yâ Bible ti lo mveni so a yeke pepe azo kue ti nzoni si ayeke gue na yayu me so Jéhovah ayeke hiri ande nga deba nzoni na ndo ti azo na sese na mungo na ala fini ti lakue lakue, bê ti lo adö. (Psaume 37:11, 29) Charo mveni ayeke kangbi beku so na ambeni zo a sala angu 15 awe.
Bi bê kete, azo ti be-ti-mbilimbili na ndo lê sese kue aduti beoko na yâ vorongo Jéhovah, oko tâ Nzapa! A yeke pepe tene ti bango li senge. A yeke ye so Jéhovah amu zendo ni. Na lege ti prophète ti lo Tsephania, Nzapa atene: ‘Awanzinga so ayeke na vundu, fade Mbi zia ala ti ngbâ na yâ mo, na ala wara ndo ti bata tele ti ala na iri ti L’Eternel. Fade . . . ala sala sioni pepe wala ala sala mvene pepe; a wara menga ti handa na yanga ti ala pepe. Fade . . . zo ti mu mbito na ala ayeke pepe.’ (Sophonie 3:12, 13) Tongana zendo so anzere na mo, bata na bê wango ti Bible so: “I gi Jéhovah, i azo kue ti tâ be-ti-molenge so ayeke na ndo sese, i so i yeke bata kpengba-tene ti Lo mveni. I gi mbilimbili, i gi tâ be-ti-molenge. Peut-être fade a honde i na lâ ti ngonzo ti Jéhovah.”—Tsephania 2:3, NW.