Eskê mbeni lâ bibe ti kengo zo so ayeke pusu azo ti sara ye ti ngangu na amba ti ala ayeke hunzi ande? Bible atene nyen na ndö ni?

Bibe ti kengo zo ayeke pusu azo ti sara ye ti ngangu na amba ti ala, na ye ni so amû ndo laso mingi. Azo ayeke ke amba ti ala senge senge ndali ti tënë ti mara, yanga ti kodro, bungbi ti Nzapa, zo ni ayeke koli wala wali, wala ndali ti ambeni raison nde. Mara ti sarango ye tongaso ayeke sara si mbeto ahon ndö ti azo na ala yeke bâ pasi na peko ni aninga. Nga, ambeni zo apeut même ti kui ndali ti mara ti aye tongaso.

Bible afa kozo awe so na ngoi ti e, azo ayeke ga “asioni zo, azo so andoye nzoni ye pëpe” nga “azo so aye amba ti ala zo pëpe.” (2 Timothée 3:1-5). Tongaso, eskê mbeni lâ bibe ti kengo zo so ayeke pusu azo ti sara ye ti ngangu na amba ti ala ayeke hunzi ande? Bible atene nyen na ndö ni?

Tongana nyen la bibe ti kengo zo so ayeke pusu azo ti sara ye ti ngangu na amba ti ala ayeke hunzi ande?

Bible adë bê ti e so Nzapa apeut ti hunzi sarango ye ti ngangu na zo nga lo yeke sara ni ande.

• “A yeke futi azo ti sioni . . . Me azo so asara terê ti ala kete, sese ayeke ga ye ti ala, na ala yeke duti na ngia mingi na yâ ti siriri so amû ndo.” (Psaume 37:9-11). Nzapa ayeke zia ande lege ape na azo ti sioni ti ngbâ ti sara ye ti ngangu na amba ti ala.

• ‘Nzapa ayeke mbô ande ngu ti lê kue na lê ti ala, kuâ ayeke duti ande dä mbeni pëpe; mua, wala toto, wala pasi ayeke duti dä mbeni pëpe.’ (Apocalypse 21:4). Nzapa ayeke zi ande aye ti sioni kue so sarango ye ti ngangu na zo aga na ni.

• ‘A yeke zingo ande akuâ.’ (Kusala 24:15). Nzapa ayeke zingo ande azo million mingi so akui, so na popo ni, a yeke wara azo so akui ndali ti so a sara ye ti ngangu na ala.

Lege ti hon ndö ti bibe ti kengo zo laso

Bible amû na e beku nga a-aidé e ti hon ndö ti bibe ti kengo zo so amû ndo laso mingi. Gi ti wara kiringo tënë ti Bible na akota hunda so:

• Nyen la e peut ti sara laso ti hon ndö ti bibe ti kengo zo so ayeke pusu azo ti sara ye ti ngangu na amba ti ala? Bâ ye so Bible afa na yâ ti Tour ti Ba Ndo so li ni ayeke “Hon ndö ti bibe ti kengo zo.”

• Ngbanga ti nyen la Nzapa azia si azo angbâ ti bâ pasi? Bâ tënë so Bible afa na ndö ni na yâ ti vidéo Ngbanga ti nyen la Nzapa azia lege si azo abâ pasi?