Bible atene nyen na ndö ti sarango maquillage nga na yungo aye ti baba?

Kiringo tënë ti Bible

Atâa so Bible amû adétail mingi ape na ndö ni, lo fâ ngbanga pëpe na ndö ti sarango maquillage, yungo aye ti baba wala ambeni fason ti lekengo terê. Me, ahon ti tene e luti gï na ndö ti pendere ti terê, Bible agboto lê na ndö ti “yungo bongo so alingbi ti buba pëpe so ayeke bibe ti dutingo na siriri nga ti sarango ye na ngangu pëpe.”​—1 Pierre 3:​3, 4.

Yungo aye ti baba ayeke sioni ape

• Awali so ayeke be-ta-zo so Bible asara tënë ti ala ayü lani aye ti baba. Abraham amû lani na Rébecca so ayeke ga wali ti molenge ti lo Isaac mbeni bague ti hôn ti lor, aye ti maboko ti lor nga na ambeni ye ti baba so ayeke cher mingi kozo na mariage ti lo (Genèse 24:22, 30, 53). Esther nga kue ayeda lani ti tene a sara na lo ‘aye so asara si lo kiri lo ga pendere mingi’ ti tene lo ga ande gbia-wali ti kodro ti Perse (Esther 2:​7, 9, 12). Aye ni so peut-être andu “aye ti baba” wala “aye ti sarango na maquillage nde nde.”​—New International Version; Easy-to-Read Version.

• Atapande ti Bible so a sara kua na aye ti baba ti haka na ambeni nzoni ye. Na tapande, mbeni zo so ayeke mû anzoni wango ayeke tongana “ye ti mê ti lor” ndali ti ‘zo so ayeda na ni.’ (aProverbe 25:12). Legeoko nga, Nzapa wani ahaka sarango ye ti lo na mbage ti azo ti Israël na mbeni koli so ayü na wali ti lo aye ti maboko, ye ti go nga na aye ti mê. Aye ti baba ni so asara si mara ni akiri aga “tâ pendere mingi.”​—Ézéchiel 16:11-13.

Atënë so azo atene so ayeke na lege ni ape na ndö ti sarango maquillage nga na yungo aye ti baba

Tënë so ayeke na lege ni ape: So sioni Gbia-wali Jézabel asara lani fard na lê ti lo afa so sarango maquillage ayeke sioni.​—2 aGbia 9:​30.

Tâ tënë ni: A dë lani ngbanga ti kuâ na li ti Jézabel ndali ti asioni sarango ye ti lo so andu sarango yorö nga na fango zo, me pëpe ndali ti sarango maquillage.​—2 aGbia 9:​7, 22, 36, 37.