Bango ndo ti aTémoin ti Jéhovah na ndö ti aye so a yeke sara na ngoi ti lungo kuâ ayeke tongana nyen?
Bango ndo ti e nga na aye so e yeke sara na ngoi ti lungo kuâ aluti na ndö ti aye so Bible afa. Bâ ambeni ye so a fa na gbe ni ge:
A yeke na lege ni ti toto mbeni zo so e ye lo so akui. Adisciple ti Jésus atoto lani azo ti ala so ala ye ala so akui (Jean 11:33-35, 38; Kusala 8:2; 9:39). Tongaso, e yeke bâ ngoi ti lungo kuâ tongana mbeni ngoi ti ngia ape (Zo-ti-fa-tene 3:1, 4; 7:1-4). Me, e yeke bâ ni tongana mbeni ngoi so e yeke zia terê ti e na place ti amba ti e.—aRomain 12:15.
Akuâ ahinga ye oko ape. Atâa mara ti e wala ndo so e kono dä ayeke so wa, e yeke kpe acoutume wala asarango ye so alondo na yâ ti Bible ape so a tene akuâ ahinga ndo nga ala peut ti sara mbeni ye na azo so angbâ na fini (Zo-ti-fa-tene 9:5, 6, 10). Acoutume ni so andu aye tongana langongo na place ti kuâ, ti sara akota matanga ti lungo kuâ ni, ti sara a-anniversaire ti kuâ ti zo ni, ti sara asacrifice na zo so akui, ti sara tënë na zo so akui wala ti hunda lo ti mû maboko na mo nga ti sara gura. E ke acoutume nga na sarango aye so kue na lege so e yeke sara ye alingbi na tënë so Bible atene: “Ala duti nde, ala zia ti ndu sioni ye.”—2 aCorinthien 6:17.
Mbeni beku ayeke dä ndali ti azo so akui. Bible atene so a yeke zingo ande akuâ nga atene so mbeni ngoi ayeke ga ande so zo oko ayeke kui ande ape (Kusala 24:15; Apocalypse 21:4). Gï tongana ti so beku so a-aidé lani akozo Chrétien, beku ni so ayeke aidé e ti sara mawa ahon ndö ni ape.—1 aThessalonicien 4:13.
Bible awa e ti sara terê ti e kete (aProverbe 11:2). A lingbi e bâ ngoi ti lungo kuâ pëpe tongana mbeni lege so azi na e ti sara “baba ti akungba” so e yeke na ni ti fa dutingo ti e nga na nginza so e yeke na ni (1 Jean 2:16). E yeke sara pëpe akota matanga ti lungo kuâ gï ti tene azo asara ngia wala ti gboto lê na ndö ti acercueil so ayeke cher mingi nga na abongo so ayeke gboto lê ti azo so aga.
E yeke forcé azo ape ti sara ye alingbi na aye so e mä na bê na ni na ndö ti tënë ti lungo kuâ. Na ndö ti tënë ni so, e yeke sara ye alingbi na mama-ndia so atene: “Zo oko oko na popo ti e ayeke kiri tënë ande na Nzapa ndali ti lo wani.” (aRomain 14:12). Me, tongana lege ayeke dä, e yeke gi ti fa aye so e mä na bê na ni “na ngangu pëpe nga na nengo zo mingi.”—1 Pierre 3:15.
A yeke lu kuâ ti mbeni Témoin ti Jéhovah tongana nyen?
Ndo ni: Tongana asewa ni afa ndo so ala ye ti tene a mû diskur ti lungo kuâ ni dä, a peut ti sara ni na Da ti Royaume, na mbeni place so ala loué ni, na yanga-da, na place so a yeke zö kuâ ni dä wala na cimétière.
Aye so a yeke sara na ngoi ti lungo kuâ ni: A yeke mû mbeni diskur ti dë bê ti asewa ni na lege so a yeke fa ye so Bible atene na ndö ti kuâ nga na beku ti zingongo ti akuâ (Jean 11:25; aRomain 5:12; 2 Pierre 3:13). Na yâ ti diskur ni, a yeke fa apendere sarango ye so zo ni so akui so ayeke na ni nga na aye so e peut ti manda na lege ti tapande ti dutingo be-ta-zo ti lo.—2 Samuel 1:17-27.
A yeke he mbeni bia so atënë ni aluti na ndö ti aversê ti Bible (aColossien 3:16). A yeke hunzi diskur ni na lege ti mbeni sambela so adë bê ti zo.—aPhilippien 4:6, 7.
Bingo quête: Akua so a yeke sara na yâ ti abungbi ti e a yeke payé ni ape, andu nga tënë ti lungo kuâ. A yeke bi nga quête na ngoi ti abungbi ti e ape.—Matthieu 10:8.
Azo so aga: Azo so ayeke aTémoin ti Jéhovah ape ayeke ga nga na ngoi ti lungo kuâ na Da ti Royaume. Tongana ti tanga ti abungbi ti e, azo kue apeut ti ga.
Eskê aTémoin ti Jéhovah ayeke gue na lungo kuâ so ambeni eglize la a-organisé ni?
Témoin oko oko la ayeke mû desizion so ague oko na conscience ti lo so Bible afa lege na ni (1 Timothée 1:19). Me, e yeke mû mbage pëpe na aye so a-eglize ni ayeke sara so ague nde na ye so Bible afa.—2 aCorinthien 6:14-17.