Prophétie ayeke nyen?

Kiringo tënë ti Bible

Mbeni prophétie ayeke mbeni tënë so alondo na Nzapa so asara tënë ti aye so ayeke si ande. Bible atene so aprophète “asara tënë ti ye so alondo na Nzapa tongana yingo vulu afa lege ni na ala.” (2 Pierre 1:​20, 21). Tongaso, mbeni prophète ayeke mbeni zo so awara tokua so alondo na Nzapa na lo fa peko ni na azo.​—Kusala 3:​18.

Tongana nyen la aprophète ayeke wara lani atokua so alondo na Nzapa?

Nzapa asara lani kua na akode nde nde ti fa apensé ti lo na aprophète:

• Tënë so a sû na lê ti mbeti. Mbeni lâ, Nzapa asara lani kua na kode ni so ti mû na Moïse aCommandement bale-oko so a sû ni.​—Exode 31:18.

• Tënë so a fa peko ni na yanga na lege ti a-ange. Na tapande, Nzapa asara lani kua na mbeni ange ti fa na Moïse tokua so lo doit lani ti tene ni na Pharaon so ayeke gbia ti Égypte (Exode 3:​2-4, 10). Tongana atënë ni ayeke lani mbeni kpengba tënë, Nzapa asara lani kua na a-ange ti fa tokua ti lo, tongana ti so lo tene na Moïse, lo tene: “Sû atënë so na mbeti, ndali ti so a yeke na lege ti atënë ni so la si mbi yeke te mbeni mbele na mo nga na Israël.”​—Exode 34:27.a

• Avision. Parfois, mbeni prophète apeut ti bâ mbeni vision na lê ti lo tongaso sân ti tene lo lango (Ésaïe 1:1; Habakuk 1:1). Ti ambeni vision ni, azo so ayeke na terê ti zo ni ayeke bâ na lê ti ala aye so ayeke si na zo ni (Luc 9:​28-​36; Apocalypse 1:10-17). Na ambeni ngoi, zo ni ayeke bâ avision ni mo bâ mo tene lo yeke lango (Kusala 10:10, 11; 22:17-​21). Nzapa ayeke fa nga lani atënë ti lo na mbeni prophète na yâ ti bango li na temps so zo ni ayeke lango.​—Daniel 7:1; Kusala 16:​9, 10.

• Lo fa apensé ti lo na ala. Nzapa afa lani apensé ti lo na aprophète na lege ti atënë ti lo. Ni la, Bible atene: “Tënë kue ti Mbeti ti Nzapa alondo na yanga ti Nzapa.” Tënë “alondo na yanga ti Nzapa” a peut nga ti kiri peko ni na “Nzapa ahûru pupu na ndö ni.” (2 Timothée 3:​16; La Sainte Bible en Sango). Nzapa asara kua na yingo vulu ti lo wala ngangu ti lo ti sara na aye, so ti tene, lo “hûru” apensé ti lo na yâ ti li ti awakua ti lo. Tënë ni alondo na Nzapa, me aprophète ni la ayeke soro atënë ni.​—2 Samuel 23:​1, 2.

Eskê aprophétie andu gï lakue aye so ayeke si ande?

Ên-ën, aprophétie ti Bible andu gï lakue ape aye so ayeke si ande. Me, mingi ti atokua so alondo na Nzapa so andu aye so ayeke si ande, apeut même ti sara tënë ti ambeni ye nde. Na tapande, fani mingi aprophète ti Nzapa agboto lani mê ti azo ti Israël ndali ti asioni sarango ye ti ala. So aprophète ni ayeke gboto mê ti azo ni, ala fa atufa so azo ni ayeke wara tongana ala sara ye alingbi na gbotongo mê ni nga na aye ti sioni so ala yeke wara tongana ala sara ye alingbi na ni ape (Jérémie 25:​4-6). Gigi ti azo ti Israël adépend lani na ye so ala yeke soro ti mû peko ni.​—Deutéronome 30:19, 20.

Atapande ti aprophétie ti Bible so asara tënë na ndö ti aye so ayeke si ande ape

• Mbeni lâ tongana azo ti Israël ahunda na Nzapa ti aidé ala, lo tokua mbeni prophète ti fa na ala so ndali ti so ala ke ti sara ye alingbi na acommandement ti lo, lo yeke aidé ala ape.​—aJuge 6:​6-​10.

• Na temps so Jésus asara lani tënë na mbeni wali ti Samarie, lo fa aye so wali ni asara ândö so gï yingo ti Nzapa la apeut ti fa ni na lo. Wali ni abâ so lo yeke mbeni prophète même si lo fa mbeni ye so ayeke si ande ape.​—Jean 4:​17-​19.

• Na ngoi so a yeke sara ye ti ngangu na Jésus, awato ti lo akanga lê ti lo, ala pika lo na ala tene: “Tongana mo yeke prophète, zo wa la apika mo so?” Ala hunda na Jésus ti fa na ala ape aye so ayeke si ande, me ti fa na ala na lege ti ngangu ti Nzapa zo so apika lo.​—Luc 22:63, 64.