Tongana nyen la mbeni zo apeut ti ga Témoin ti Jéhovah?
Na Matthieu 28:19, 20, Jésus afa aye so zo apeut ti sara ti ga mbeni Témoin ti Jéhovah. Versê so afa ye so mbeni so zo adoit ti sara ti ga mbeni disciple ti Christ, ye ni so andu fango tënë ti Jéhovah na azo.
Kozo ye ni: Gi ti hinga aye so Bible afa. Jésus atene lani na azo so amû peko ti lo ti ‘sara si azo aga adisciple nga ti fa ye na ala.’ (Matthieu 28:19, 20). Tënë so a kiri peko ni na “disciple” aye ti sara tënë ti “mbeni zo so ayeke manda ye.” Na yâ ti afango ye ti Jésus so a wara ni na yâ ti Bible, mo yeke wara awango so apeut ti aidé mo ti duti na ngia na yâ ti gigi ti mo (2 Timothée 3:16, 17). A nzere na e ti aidé mo ti hinga aye so Bible afa na lege so e yeke manda Bible na mo senge senge.—Matthieu 10:7, 8; 1 aThessalonicien 2:13.
Use ye ni: Sara ye alingbi na aye so mo manda. Jésus atene so azo so ayeke manda ye adoit nga ti ‘bata aye kue so lo mû yanga na ala ti sara.’ (Matthieu 28:20). Tënë ni so aye ti tene ape so mandango Bible ayeke sarango mbeni examen. Me, a yeke pusu mo ti changé asarango ye ti mo nga na apensé ti mo (Kusala 10:42; aÉphésien 4:22-29; aHébreu 10:24, 25). Na peko ti so zo ni asara ye alingbi na yanga so Jésus amû, lo wani lo yeke mû desizion ti mû peko ti Jésus na lege so lo mû terê ti lo na Jéhovah Nzapa.—Matthieu 16:24.
Ota ye ni: Wara batême. Bible ahaka batême na lungo mbeni kuâ. (Bâ aRomain 6:2-4.) Ye so aye ti fa so zo ni akui na lege ti angbene sarango ye ti lo na lo komanse mbeni fini gigi. Batême ayeke fango polele na lê ti azo so mo sara ye alingbi na akozo ye use so Jésus afa, na a fa so mo yeke na mbeni nzoni conscience na gbele Nzapa.—aHébreu 9:14; 1 Pierre 3:21.
Nyen la mo peut ti sara tongana mo bâ so mo yeke prêt awe ti wara batême?
Mo peut ti hinga so mo yeke prêt awe ti wara batême, na lege so mo yeke gue ti sara tënë ni na a-ancien ti congrégation ti mo. Ala yeke sara lisoro na mo ti bâ wala mo gbu nda ti aye so mo manda, mo sara ye alingbi na ni nga mo mû terê ti mo na Jéhovah awe.—Kusala 20:28; 1 Pierre 5:1-3.
Eskê aye ota so abâ nga amolenge so ababâ na amama ti ala ayeke aTémoin?
En. E yeke bata amolenge ti e na lege ti “fango lege nga na wango ti gbotongo mê so alondo na Jéhovah,” gï tongana ti so Bible atene (aÉphésien 6:4). Me, tongana amolenge ni ayeke kono, ala wani la ayeke mû desizion ti manda ye, ti yeda na ni nga ti sara ye alingbi na aye so Bible afa kozo ti tene ala wani abâ so ala lingbi awe ti wara batême (aRomain 12:2). Ti hunzi na ni, zo oko oko la adoit ti mû desizion na ndö ti tënë ti vorongo Nzapa.—aRomain 14:12; aGalate 6:5.