Eskê a yeke kota ye ti duti na yâ ti mbeni bungbi ti vorongo Nzapa?
Kiringo tënë ti Bible
En, a yeke kota ye ti duti na yâ ti mbeni bungbi ti vorongo Nzapa ndali ti so Nzapa aye ti tene azo abungbi ndo oko ti voro lo. Bible atene: “Zia e bi lê na ndö ti mba ti zia na bê ti mba nzara ti duti na ndoye na ti sara anzoni kusala, e zia pëpe lege ti guengo lakue na bungbi ti e.”—aHébreu 10:24, 25, kete tënë na gbe ni.
Jésus atene lani so adisciple ti lo ayeke formé mbeni groupe ndani la lo tene na ala, lo tene: “A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.” (Jean 13:35). Mbeni kozo lege so adisciple ti Christ adoit ti fa ndoye ni so, a yeke ti bungbi ndo oko na amba ti ala. Ala yeke bungbi na yâ ti acongrégation ti wara terê lakue ti voro Nzapa (1 aCorinthien 16:19). Tongana ala bungbi ndo oko, ala yeke ga sewa ti aita na yâ ti dunia kue.—1 Pierre 2:17.
Ti duti na yâ ti mbeni bungbi ti vorongo Nzapa alingbi ape
Bible afa so azo adoit ti bungbi ndo oko ti voro Nzapa, me aye ti tene ape so tongana mbeni zo ayeke na yâ ti mbeni bungbi ti Nzapa la lo nzere na lê ti Nzapa. Ti nzere na lê ti Nzapa, mbeni zo so ayeke na yâ ti bungbi ti vorongo Nzapa adoit ti sara ye alingbi na andia ti Nzapa na yâ ti gigi ti lo ti lâ oko oko. Na tapande, Bible atene: “Bungbi ti Nzapa so ayeke na sioni pëpe nga so saleté ayeke dä pëpe na lê ti Nzapa Babâ ti e ayeke so: ti bâ lege ti anyindu na awali-mua na yâ ti pasi ti ala, nga ti kpe terê ti mo si mbeni saleté ti dunia so andu mo pëpe.”—Jacques 1:27, kete tënë na gbe ni.