Wato-ti-Christ ayeke zo wa?

Kiringo tënë ti Bible

Wato-ti-Christ ayeke pëpe mbeni zo oko, ndali ti so Bible atene so ‘awato-ti-Christ ayeke mingi.’ (1 Jean 2:​18). Tënë “wato-ti-Christ” alondo na tënë ti Grec so aye ti tene “zo so ake Christ (wala aye ti mû place ti Christ)”. Tënë ni so aye ti sara tënë ti:

• Azo so ake ti yeda so Jésus ayeke Christ (wala Messie) wala ala ke ti yeda so lo yeke Molenge ti Nzapa.​—1 Jean 2:​22.

• Azo so ake Christ, Lo so Nzapa asoro lo.—Psaume 2:​1, 2; Luc 11:23.

• Azo asara ye mo bâ mo tene ala yeke Christ.​—Matthieu 24:24.

• Azo so asara ye ti ngangu na adisciple ti Christ, ndali ti so Jésus abâ so tongana a sara ye ti ngangu na ala ayeke mo bâ mo tene a sara ye ti ngangu na lo.​—Kusala 9:5.

• Azo so atene ala yeke aChrétien, me ala yeke kpe ndia ape nga ala yeke handa azo.​—Matthieu 7:22, 23; 2 aCorinthien 11:13.

Bible afa so awato-ti-Christ ayeke sara mara ti aye tongaso. Bible asara nga tënë ti bungbi ti ala kue tongana “wato-ti-Christ.” (2 Jean 7). Wato-ti-Christ abâ gigi lani na ngoi ti abazengele na lo ngbâ juska laso. A yeke ye so Bible asara tënë ni kozo awe.​—1 Jean 4:3.

A yeke hinga awato-ti-Christ tongana nyen?

• Ala fa atënë so ayeke na lege ni ape na ndö ti Jésus (Matthieu 24:​9, 11). Na tapande, azo so afa na azo tënë ti Trinité wala so afa so Jésus ayeke Nzapa so ngangu ti lo ahon angangu kue, tënë ni so ague nde na fango ti Jésus, so lo tene: “Babâ ayeke kota ahon mbi.”​—Jean 14:28.

• Awato-ti-Christ ake tënë so Jésus atene na ndö ti fason so Royaume ti Nzapa ayeke sara kua. Na tapande, ambeni kota zo ti bungbi ti nzapa atene so Christ ayeke sara kua na lege ti agouvernement ti azo. Me, tënë ni so ague nde na fango ye ti Jésus so atene: “Royaume ti mbi ayeke ti dunia so pëpe.”​—Jean 18:36.

• Ala tene so Jésus ayeke Seigneur ti ala, me ala sara ye alingbi na acommandement ti lo ape, so na popo ni a yeke wara fango nzoni tënë ti Royaume.​—Matthieu 28:19, 20; Luc 6:46; Kusala 10:42.