Akiringo tënë na ahunda na ndö ti Bible / Nzapa / Bible atene nyen na ndö ti liberté so azo ayeke na ni ti soro ye? Eskê Nzapa adiko kozo awe aye so ayeke si na e?
Kiringo tënë ti Bible
Nzapa ane e na lege so lo mû na e liberté ti soro ye nga ti tene e wani la e mû adesizion, a yeke pëpe Nzapa wala aye so a diko kozo awe ti tene asi na e la afa ye so e yeke sara. Bâ ambeni ye so Bible afa na ndö ni.
Nzapa acréé azo na image ti lo (Genèse 1:26). Nde na anyama, so a yeke sara ye gï tongaso, e azo e kpa Nzapa na lege so e yeke na ngangu ti duti na ambeni sarango ye tongana ndoye nga na sarango ye mbilimbili. Nga tongana ti Nzapa, e yeke na liberté ti soro ye.
E yeke mû desizion na ndö ti aye nde nde so e yeke sara na yâ ti gigi ti e. Bible awa e ti ‘soro fini na lege so e mä yanga ti Nzapa’, so ti tene, e soro ti sara ye alingbi na acommandement ti lo (Deutéronome 30:19, 20). Tënë so ayeke ande na sens ape, wala même na lege ni ape, tongana e yeke na liberté ti soro ye ape. Ahon ti tene Nzapa aforcé e ti sara ye so bê ti lo aye, lo gboto mê ti e, lo tene: “Tongana fade mo dengi mê na acommandement ti mbi, ka siriri ti mo ayeke ga tongana kota ngu.”—Ésaïe 48:18.
Tongana aye so e sara aga nzoni wala atï na ngu ayeke pëpe mbeni ye so a diko ni kozo awe. Tongana e ye ti tene ye so e ye ti sara aga nzoni, e doit ti sara effort. Bible atene: “Ye kue so maboko ti mo awara ti sara, sara ni na ngangu ti mo kue”. (Zo-ti-fa-tene 9:10). Bible atene nga so: “Tongana azo so asara kua ngangu aleke gere ti akua ti ala, ye ni ayeke ga gï nzoni.”—aProverbe 21:5.
Liberté so azo ayeke na ni ti soro ye ayeke mbeni pendere cadeau so alondo na Nzapa, lo mû lege na e ti “ndoye” lo na ‘bê ti e kue’ ndali ti so e wani la e soro ti ndoye lo.—Matthieu 22:37.
Eskê Nzapa ayeke contrôlé aye kue?
Bible afa so Nzapa ayeke Lo so ngangu ti lo ahon angangu kue nga ngangu ti mbeni zo alingbi na ti lo ape (Job 37:23; Ésaïe 40:26). Me, lo yeke sara kua na ngangu ti lo ti contrôlé aye kue ape. Na tapande, Bible atene so Nzapa ‘akanga bê’ lani na azo ti kodro ti Babylone, so ayeke awato ti azo ti lo (Ésaïe 42:14, Mbeti ti Nzapa, Tënë so amu fini). Legeoko nga laso, lo ngbâ ti kanga bê na azo so ayeke mû liberté so ala yeke na ni ti soro na ye ti sara ye ti sioni na amba ti ala. Me, Nzapa ayeke ngbâ ande ti kanga bê gï lakue tongaso ape.—Psaume 37:10, 11.