Tongana nyen la aTémoin ti Jéhovah ayeke sara ye na mbage ti azo so a zi ala na yâ ti bungbi ti ala?

E yeke sara ye na mbage ti azo kue na ndoye, na nzoni bê nga na nengo zo. Tongana mbeni Témoin ti Jéhovah ayeke sara encore ape aye so e yeke sara ka ti voro na Nzapa, e yeke gi ti causé na lo, e yeke fa na lo so e ye lo nga e yeke gi ti aidé lo ti kiri ti ga nduru na Nzapa.—Luc 15:4-7.

Na yâ ti ambeni ye, asarango ye ti zo ni apeut ti sara si a zi lo na yâ ti congrégation (1 aCorinthien 5:13). Me, ndali ti so e ye aita ti e so e na ala e sara bungbi oko mingi, e yeke sara kue ti aidé ita ni kozo ti tene a zi lo na bungbi. Nga même tongana a zi lo na bungbi, e yeke ngbâ ti ye lo nga ti ne lo, gï tongana ti so Bible awa e ti sara.—Marc 12:31; 1 Pierre 2:17.

Nyen la apeut ti sara si a zi mbeni zo na yâ ti congrégation?

Bible afa polele so tongana mbeni Chrétien asara mbeni kota siokpari na lo ke ti changé bê ti lo, a doit ti zi lo na yâ ti congrégationa (1 aCorinthien 5:11-13). Bible afa akota siokpari so apeut ti sara si a zi mbeni zo na yâ ti congrégation. Na tapande, aye tongana lango-sioni, nyongo sämba ahon ndö ni, fango zo, sarango ye ti ngangu na zo na yâ ti sewa nga na nzi.—1 aCorinthien 6:9, 10; aGalate 5:19-21; 1 Timothée 1:9, 10.

Me, e yeke zi gï hio tongaso ape na yâ ti congrégation mbeni zo so asara mbeni kota siokpari. Kozoni kue, a-ancienb ti congrégation ayeke gi ti aidé zo ni ti changé sarango ye ti lo (aRomain 2:4). Ala yeke gi ti gue na lo ti changé sarango ye ti lo na lege so ala yeke sara ye na lo na ngangu ape, na ndoye nga na nzoni bê (aGalate 6:1). Sarango aye ni so ayeke sara si li ti zo so asara kota siokpari ni aga dä na lo yeke hinga so lo sara faute nga lo peut ti changé bê ti lo (2 Timothée 2:24-26). Me, atâa a-effort kue so a sara ti aidé lo si lo ngbâ ti sara aye so Bible ake na lo changé ape, a doit ti zi lo na yâ ti congrégation. A-ancien ayeke tene mbeni tokua ti fa na congrégation so zo ni ayeke Témoin ti Jéhovah encore ape.

Aye ti nzoni wa la ayeke ga na peko ti so a zi mbeni zo so asoro ti ngbâ ti sara siokpari? Mbeni ye ti nzoni ni ayeke so, congrégation asara ye alingbi na andia ti Nzapa so andu tënë ti dutingo na sioni oko pëpe nga ti tene ambeni zo amû peko ti sioni sarango ye ti zo ni ape (1 aCorinthien 5:6; 15:33; 1 Pierre 1:16). Na ndö ni, ye so ayeke pusu zo so asara ye ti sioni ti zia lege ti sioni sarango ye ti lo nga ti sara kue ti changé.—aHébreu 12:11.

Tongana nyen la aTémoin ti Jéhovah ayeke sara ye na mbage ti azo so a zi ala na yâ ti congrégation?

Bible atene so a lingbi aChrétien ‘azia ti sara songo’ na mbeni zo so a zi lo na yâ ti congrégation, “na même ti tene ala te kobe na mara ti zo tongaso pëpe.” (1 aCorinthien 5:11). Tongaso, e yeke sara songo pëpe na mbeni zo so a zi lo na yâ ti congrégation. Me, e ke lo biani biani ape. E yeke sara ye na lo na nengo zo. E yeke yamba lo na ngoi ti abungbi ti e, nga e peut ti bara lo.c Lo peut nga ti hunda na a-ancien ti aidé lo ti kiri na bungbi.

Ka tongana a zi mbeni koli na yâ ti congrégation, me wali ti lo nga na amolenge ti lo angbâ Témoin ti Jéhovah? Atâa so lo peut ti mû mbage encore ape na yâ ti aye so ala yeke sara ka ti voro na Jéhovah na yâ ti sewa, songo so koli ni ayeke na ni na azo ti sewa ti lo ayeke ngbâ. Ndali ti so ala lango ndo oko, songo ti lo na wali ti lo nga na amolenge ti lo ayeke ngbâ nga a lingbi ala kue angbâ ti sara ye na lo na ndoye.

Mbeni zo so a zi lo na yâ ti bungbi apeut ti hunda na a-ancien ti sara vizite na lo, nga ala yeke mû awango ti Bible na lo ti tene lo changé bê ti lo na ala yeke encouragé lo ti kiri na mbage ti Jéhovah (Zacharie 1:3). Tongana lo zia lege ti sioni sarango ye ti lo nga lo ye ti sara ye alingbi na afango ye ti Bible, a peut ti kiri na lo na bungbi. Aita ayeke ‘pardonné lo na bê ti ala kue nga ala yeke dë bê ti lo,’ gï tongana ti so aChrétien so ayeke na Corinthe asara lani na mbage ti mbeni wasiopkari so achangé bê ti lo.—2 aCorinthien 2:6-8.

Tënë ti bê ti azo so a zi ala lani na yâ ti bungbi ayeke so wa?

Bâ atënë so ambeni Témoin ti Jéhovah so a zi ala lani na bungbi atene na peko ti so ala kiri na mbage ti Jéhovah.

“Na temps so mbi mû desizion ti kiri na yâ ti congrégation, mbi pensé lani so a-ancien aye ti hinga aye kue so mbi sara na yâ ti angu bale-oko so ahon depuis so a zi mbi na yâ ti bungbi. Me, ala tene gï na mbi atene: ‘E ye ti tene mo zia li ti mo na ndö ti ye so mo doit ti sara fadeso.’ Na peko ti tënë ni so, bê ti mbi adë.”—Maria, na États-Unis.

“Aita ti congrégation ayeke ku lani kungo ti tene mbi kiri na bungbi. Mbi bâ so ala ye mbi. Ala sara si mbi bâ so Jéhovah apardonné mbi, na ye so a-aidé mbi ti pensé pëpe na ndö ti aye ti sioni so mbi sara lani. A-ancien ayeke lakue dä ti aidé mbi ti kiri ti duti na nzoni songo na Jéhovah. Ala dë bê ti mbi nga ala aidé mbi ti bâ so Jéhovah angbâ ti bâ mbi na nene ni nga lo ye mbi.”—Malcom, na Sierra Leone.

“Anzere na mbi ti bâ so Jéhovah aye azo ti lo mingi nga lo yeke sara kue ti bata congrégation si ye ti sioni aduti dä ape. Ye so apeut ti son bê ti azo so ayeke aTémoin ti Jéhovah ape, me a yeke mbeni ye so ayeke na lege ni na a sara ni na ndoye. Mbi kiri singila na Babâ ti e ti yayu so ayeke Nzapa ti ndoye nga so ayeke pardonné zo.”—Sandi, na États-Unis.