Mandango Bible achangé gigi ti ala

Lanh azia lege ti tombango peko ti nginza na fadeso lo yeke na tâ ngia

Na ngoi so Lanh Văn Nguyễn angbâ lani kete, lo vivre ye so a iri ni bira, akpale so alondo ndali ti aye ti poroso nga na yere. Yeke yeke, lo komanse ti pensé so mbeni zo apeut ti duti na ngia, gï tongana lo yeke na gbâ ti nginza. Tongaso, na ngu 1988, lo quitté lo gue na Allemagne ti gi kua. Lo sara kua ngangu, bï na lâ, ti gi nginza.

Ngu bale-oko na pekoni, aTémoin ti Jéhovah afa tënë na Lanh. Ala fa na lo mbeti ti aProverbe, na anzere na lo mingi ndali ti so lo ye ka ti diko atënë ti ndara so ayeke na yâ ni. So ala fa na lo awango ti ndara so ayeke na yâ ti Bible, lo ye ti hinga ye mingi na ndö ni. Lo hunda na mbeni ita ni ti vo na lo Bible. Ita-wali ni atene na Lanh so, ti peko tongana lo na koli ti lo aga ti tene ala sara lisoro na lo na ndö ti Bible, ala yeke ga na lo mbeni Bible na lo yeke payé ni ape. Na temps so ala ga ti peko, ala ga na lo mbeni Bible nga na buku Hingango Ye So Ague na Fini ti Lakue Lakue na ala komanse ti manda Bible na lo.

Na temps so aTémoin ti Jéhovah ayeke manda Bible na Lanh, lo hunda na ala atënë na ndö ti affaire ti lo so lo yeke sara so andu vongo angombe nga na kango ni. Kete na pekoni, lo ga ti bâ so lo doit ti zia lege ni. Na peko ti so lo zia lege ni, lo yeke encore na nginza mingi ape. Tongaso, lo fa akpale ti lo ni na Jéhovah na yâ ti sambela na lo komanse ti kä ambeni ye nde. Yeke yeke, lo komanse ti wara gbâ ti nginza.

Lanh amû desizion ti mû ngoi ti lo mingi ti fa ye na azo na ndö ti Bible. Lo ye ti fa na ambeni zo aye so lo manda, me, lo hinga ti tene yanga ti Allemand nzoni ape. Ye so asara si, lo kiri na Vietnam tongaso si lo peut ti fa tënë ti Nzapa na azo na yanga ti kodro ti lo.

Mandango Bible a-aidé Lanh ti changé aye na yâ ti gigi ti lo. Fadeso lo, wali ti lo nga na amolenge ti ala ayeke na ngia.

Thắng ayeke lani zo so ayeke sara sioni na azo, me fadeso gigi ti lo ayeke na sens

A dü Thắng Viết Phùng, na ngu 1976 na Nghe An, na Vietnam, na lo ye lani mingi ti ga zo ti mosoro. Na temps so lo yeke na ngu 19, lo quitté afami ti lo ti gue ti sara aye so apeut ti mû lege na lo ti ga zo ti mosoro. Fason so lo gue lani na Allemagne ayeke na lege ni ape, na kâ lo lï na yâ ti groupe ti ambeni bandit so ayeke sara aye ti sioni mingi. Lo yeke lakue na ngombe na terê ti lo, même na temps so lo yeke lango a yeke na gbe ti coussin ti lo. Ndali ti so a hinga lo mingi tongana zo so ayeke gbu azo na ngangu ahon na ni, a arrêté lo nga a dë ngbanga ti ngu omene na li ti lo. Na gï ngu use na pekoni, a zi lo.

Thắng akiri alï na yâ ti groupe ti ambeni bandit ni na lo komanse ti sara aye ti sioni. A kiri a arrêté lo, me a dë ngbanga na li ti lo ape ndali ti so mbeto asara azo so ahinga tënë ti ye so lo sara ti gue ti fa peko ti aye ni. Lo ga mbeni zo so azo ahinga lo mingi na sarango ye ti sioni. Na nda ni, a kiri a arrêté lo na a dë ngbanga ti ngu bale-oko na li ti lo, kâ ambeni zo ti kanga ni nga na agarde ni abâ so lo ye sarango ye ti ngangu mingi na zo.

Mbeni lâ, mbeni mba ti Thắng so ayeke zo ti kanga a-invité lo na bungbi ti aTémoin ti Jéhovah so a sara ni na da ti kanga ni. Na début ni lani, Thắng ake ti gue, me na temps so lo yeda ti gue, lo bâ so lo yeke na siriri. Na temps ti bungbi ni, a mû na lo buku Bible afa nyen biani? so aTémoin ti Jéhovah la asigi na ni. Na bï ni, lo diko buku ni kue. Mbeni chapitre ti buku ni afa aversê ti Bible so atene so akuâ ahinga ye oko ape, me ala yeke lango (Zo-ti-fa-tene 9:5; Jean 11:11-14). Kozo, Thắng amä na bê so afami ti lo so akui ayeke bata lo, na lo hunda terê ti lo, lo tene ngbanga ti nyen la ala kanga lege na lo ape ti sara aye ti sioni.

Thắng angbâ lakue ti gue na abungbi ti aTémoin ti Jéhovah, so kâ azo ni ayeke manda ye lakue na ndö ti Bible. Mbeni ye so Thắng amanda ayeke so, Nzapa andoye azo mingi na lo ndoye lo nga kue. Lo manda nga ti zia kangbi na popo ti ye ti nzoni na ye ti sioni, na lo sara kue ti zia lege ti tombango peko ti aye ti sese nga na sarango ye ti ngangu na zo. Mbeni ye so ayeke lani ngangu na lo mingi ti zia lege ni ayeke sarango ngonzo. Me, lo sambela Jéhovah ndali ni na lo sara kue ti zia lege ni. Na ngu 2009, lo wara lani batême na lo ga Témoin ti Jéhovah na temps so lo yeke na da ti kanga. Kete na pekoni, Thắng akiri na Vietnam. Lo tene: “Laso, mbi na azo ti sewa ti mbi e yeke na ngia ti voro Jéhovah Nzapa legeoko. Jéhovah asö fini ti mbi na lo sara gbâ ti atufa na ndö ti mbi. Tongana mbi gbu li ti mbi na ndö ti gigi ti mbi ti ândö, mbi hunda terê ti mbi, mbi tene: ‘Gigi ti mbi ayeke duti fade tongana nyen tongana mbi hinga Jéhovah ape?’”

Mandango Bible a-aidé azo ti ga anzoni molenge ti kodro

Changement so Lanh na Thắng asara afa so mandango Bible ayeke ga na aye ti nzoni. Ala yeke mû encore ape, ngoi nga na ngangu ti ala ti gi na nginza. Lanh apensé lani so gango zo ti mosoro la apeut ti sara si lo duti na ngia. Me fadeso, lo na azo ti sewa ti lo ayeke na ngia ndali ti so lo hinga Nzapa. Thắng so asara lani aye ti sioni mingi ayeke fa na azo fadeso ti sara ye na lege ni nga ti sara ye alingbi na ndia. Akoli use so aye lani ti ga azo ti mosoro, me laso ala yeke aidé azo ti hinga amama-ndia ti Bible so apeut ti sara si azo ni aduti na ngia na yâ ti gigi ti ala, nga ti tene ala ga anzoni molenge ti kodro.