Lettre ti Bebungbi

Aita ti e ti koli na ti wali:

E yeke na ngia mingi ti tokua mbeti so na ala na tongo nda ti ngu so zo alingbi ti girisa ni ape so. Na hunzingo ti ngu 2014, a yeke sara ande ngu 100 awe la si Gbia ti e Jésus Christ ato nda ti komande lani na popo ti awato ti lo.​—Ps. 110:​1, 2.

Na tongo nda ti ngu ti kusala so, na ngoi ti kota bungbi ti ngu oko oko ti Watch Tower Bible and Tract Society of Pennsylvania, Komite ti kiringo na peko ti Mbeti ti Nzapa ti fini dunia akiri asigigi na fini Mbeti ti Nzapa ti fini dunia na Anglais so a kiri a bâ atënë ti yâ ni nzoni. A yeke biani mbeni Bible so ayeke nde mingi na tanga ti aBible kue so azo alingbi ti wara. A sara angu mingi awe, Jéhovah asara kusala na amolenge ti lo ti yingo ti sigigi na Mbeti ti Nzapa ti fini dunia (aRom. 8:​15, 16). Oko ye so asara si fini Bible so ayeke nde mingi, ni la ape?

Teti angu mingi, ye so Komite ti Bebungbi so ayeke bâ ndo na ndo ti sungo ambeti aluti na ndo ni mingi ayeke kua ti kiringo na peko ti Bible. Laso, a yeke wara Mbeti ti Nzapa ti fini dunia kue wala gi mbage ni na ayanga ti kodoro ahon 121. E wa ala ti fa na Jéhovah so ala ye Bible so mingi. Ala diko ni nga ala gbu li na ndo ni lâ oko oko. Na sarango tongaso, ala yeke ga nduru mingi na Jéhovah so ayeke wa ti Bible ni.​—Jacq. 4:8.

Vundu asara e tongana e mä tënë ti akpale so ambeni ita ti e ayeke tingbi na ni. Kite ayeke dä pëpe so, na ambeni ngoi a yeke ngangu na ala ti duti na ngia tongana tanga ti aita ti ala. Na tapande, ade ti ninga ape, na Asie gigi ti mbeni sewa achangé na ngoi so tere ti mama ni kue aparalysé. A yeke mbeni ye so asi gi hio tongaso. Akota docteur atene so mbeni ye ti sarango ni ndali ti lo ayeke dä pëpe. So ye ti mawa! Fadeso koli ti lo ayeke lakue na tere ti lo ti bâ lege ti lo. Molenge ti ala ti koli oko na ti wali use azia mbeni nzoni tapande na lege so ala mû maboko na babâ na mama ti ala. Pendere sewa so nga na ala kue so ahon ndo ti mara ti atara nde nde, alingbi ti wara ngia so aga na peko ti gbungo ngangu na yâ ti atara (Jacq. 1:​2-4). Atâa e yeke na popo ti aChrétien so a soro ala ti gue na yayu wala ti ambeni ngasangbaga, Jéhovah adë bê ti e so e kue e yeke wara ngia tongana e ngbâ ti gbu ngangu na yâ ti atara, ngbanga ti so e yeke wara ande matabisi so ayeke fini ti lakue lakue!​—Jacq. 1:12.

Na ngu so ahon, wungo ti azo kue so aga na Mémorial ayeke 19 252. A yeke ye ti kota ngia ti bâ azo mingi so aga ti sepela Jéhovah na Jésus Christ na ngoi ti kota bungbi so awakua ti Jéhovah asara na yâ ti ngu ni so! Na ngoi ti Mémorial ni, azo kutu mingi agonda Jéhovah na mungo kua ti pionnier auxiliaire na nze ti mars nga na avril. A yeke biani ye ti ngia mingi! Ala mä so aita so amû kua ti pionnier auxiliaire na ngoi ti vizite ti surveillant ti circonscription alingbi ti mû mbage na bungbi ti apionnier so lo yeke sara nga ti ngbâ dä juska ahunzi, même tongana vizite ti lo ni ayeke pëpe na nze ti mars wala avril. Ye so anzere na ala ape? Aita so akpengba na lege ti yingo so ayeke sara ye na ndara abâ so a yeke kota ye ti ngbâ ti mû mbage mingi na kua ti fango tënë nga na ti congrégation. Ti mû mbage mingi na kua ti Jéhovah ayeke mû maboko na e ti luti ngangu nga ti yengi pëpe, si e tï pëpe na gbe ti atara ti Satan so aye ti woko mabe ti e nga ti sara si e zia ti kpe loro ti e aChrétien.​—1 aCor. 15:58.

A yeke biani ye so a mû ngangu na zo ti bâ so na yâ ti ngu ti kusala so ahon, azo 277 344 amû tere ti ala na Jéhovah na lege ti batême, na nga ala yeke fadeso na ndo ti lege so ague na fini na tere ti aita ti ala ti dunia kue (Mat. 7:​13, 14). Afini azo so ayeke na bezoin ti mungo maboko ti e tongaso si ­“ala yengi pëpe na yâ ti mabe”. (aCol. 2:7). Zia ala ngbâ lakue ti mû maboko na mba ti gbu ngangu juska na nda ni (Mat. 24:​13). ‘Ala sara tënë so adë bê ti a-âme so vundu asara ala mingi, ala mû maboko na azo so awoko nga ala kanga bê ti ala ­na azo kue.’ (1 aThes. 5:​14). Ti hunzi na ni, a lingbi e oko oko kue e “ngbâ ti sambela lakue”, e tene: “Zia royaume ti mo aga.”​—1 aThes. 5:​17; Mat. 6:10.

Zia si atondo so ayeke na yâ ti Annuaire so anzere na ala, nga ala kue so andoye Jéhovah zia ala hinga so e ye ala oko oko kue mingi!

Aita ti ala,

Bebungbi ti aTémoin ti Jéhovah