Lettre ti Wabatango Bungbi

¹ Na ngoi so e yeke to nda ti akozo ngu ti siècle 21 so, a yeke na ngia si e sû mbeti na i, ‘bungbi ti aita kue’ na ndo sese, na ti gonda i teti ngangu kusala so i yeke sala. (1 Pi. 2:17) A sala ndulu na ngu 2 000 awe, Jésus ahunda lani: “Me tongana Molenge Ti Zo asi, fade Lo wara mabe na sese?” (Luc 18:8) Kusala so i sala na wâ na ngoi ti ngu so ahon akiri tënë na hundango tënë ti Jésus: Biani, mabe ayeke dä! Ndali ti mabe ti i, a yeke bâ ambeni na popo ti i na sioni lê, na a yeke he ala na ngia. Na yâ akodoro mingi, i yeke gbu ngangu na ngoi ti abira, aye ti ngangu ti ndagigi, akobela nga na nzala. (Luc 21:10, 11) Me teti so i yeke na wâ teti kusala ti mbilimbili, Jésus alingbi lakue ti “wara mabe na sese.” Biani, yayu ayeke wara ngia teti aye so!

² E hinga so gbungo ngangu ayeke kete ye pëpe. Bâ atara so asi na aita ti e na yâ mbeni kodoro ti Asie ti do. Salango ngangu na aTémoin ti Jéhovah na yâ kodoro ni ayeke mbeni ye so ayeke si fani mingi. Ade ti ninga pëpe, aita 700 abungbi ti sala mbeni kota bungbi na yâ siriri. Me aturugu ti police aga abuba yâ ni. Azo akanga lege so ambeni 1 300 alingbi fade ti hon dä ti gue na kota bungbi ni, na a sala si ala gue pëpe. Nga, gbâ ti azo, ahonde lê ti ala na gbe ti bongo, so ambeni ayeke aturugu ti police, abuba ndo ti kota bungbi ni, apika azo mingi so alondo na akodoro nde nde ti gue na kota bungbi ni, na ala bi wâ na ndo so a leke fade ti sala na kusala teti kota bungbi ni. Na ambeni ngoi nde, ambeni zo ti lege ti vorongo, na so ayeke na wâ ahon ndo ni, apika aita ti e ngangu mingi na akeke so apika apointe na tele ni.

³ Asalango ngangu tongaso ayeke so bê mingi, me adö bê ti e pëpe. Yingo ti Nzapa apusu lani bazengele Paul ti sû na mbeti: “Azo kue so aye ti tambela na lege ti batango tënë ti Nzapa na yâ Christ Jésus, fade ala hu pono ti ye ti ngangu.” (2 Tim. 3:12) Na kozo siècle, ayeke sala lani ngangu na aChrétien na lege ti atënë ti yanga, ti pika, na a fâ ambeni même. Me ala gbu ngangu. (Kus. 5:40; 12:2; 16:22-24; 19:9) Mara ti ye tongaso asi lani na yâ siècle 20, na kite ayeke dä pëpe so fade a yeke si nga na yâ siècle 21 ni. Me Jéhovah atene na e: “Ye ti bira so azo asala ti ke mo na ni alingbi sala ye na mo pëpe.” (Es. 54:17) So tâ kpengba tënë ti dengo bê! Tâ tënë, e yeke na ngele mingi na lê ti Jéhovah. A yeke ngbanga ni si lo tene na lege ti prophète Zacharie: “Zo so andu mo, lo ndu lê ti L’Eternel mveni.” (Zach. 2:8) Awato ti awakua ti Jéhovah ayeke na pasa oko pëpe ti hon na ngangu. Fade tâ vorongo ayeke hon na ngangu!

⁴ Na tapande, na yâ kodoro so a sala tënë ni na nduzu ge awe, aTémoin ti Jéhovah ayeke na ngia ti wara afini kota wungo use ti awafango tënë, na ngoi ti ngu ti kusala so ahon. Biani, aita ti e angbâ lakue ti gbu ngangu na yâ ti akpale so. E hinga so na ndo kue aita ti e ayeke sala tongaso nga. Na yâ ngu ti kusala so ahon, a lingbi ti tene so yenga oko oko, azo 5 066 amû batême, na fango na gigi mungo tele ti ala na Jéhovah. Fadeso, ala ga na abungbi na e ti “luti tongana azo so alingbi kue, na ti hinga na bê biani ye kue so Nzapa aye.”​—aCol. 4:12.

⁵ Bâ nga ye so ague na li ni na Grèce ade ti ninga pëpe. Atâa so Église Orthodoxe ti Grèce akanga lege ngangu teti angu mingi, ngorogbia ti kodoro ni ayeda fadeso na aTémoin ti Jéhovah tongana mbeni “lege ti vorongo so a hinga ni.” Mbela so afa tënë ni akiri atene ada ti Béthel ti Grèce “ayeke mbeni ndo so a zia ni nde, so a leke ni teti vorongo Nzapa.” E yeke nga na ngia ti tene na i so na ngoi ti ngu ti kusala so ahon, ada-ngbanga amû anzoni desizion so andu vorongo ti e na akodoro tongana Amerika, Bulgarie, Canada, Japon, Roumanie, Russie, nga na Zamani. Bâ tongana nyen e kiri singila na Jéhovah teti lo sala si lege ti kusala angbâ lakue ti zi na yâ akodoro so!

⁶ Tongana e gbu li na ndo alege so Jéhovah ayeke mû maboko na awakua ti lo na lâ ti nda ni so, e yeke bâ so lo yeke biani kamarade ti nzoni ahon, so e lingbi ti duti na ni. E yeke wara kota ngia teti so e yeke na songo na lo, teti e hinga so lo ndoye e, lo yeke fa ye na e, nga lo yeke mû na e wango ti sengo-ndo. Biani, fade atara ti mabe ayeke ngbâ lakue ti si na e. Ye oko, e yeke sigigi na yâ ni tongana mabe ti e na mbage ti Jéhovah ayengi pëpe. Jacques asû lani na mbeti: “Aita ti mbi, tongana ye nde nde atara i, i bâ ye so kue tongana ye ti tâ ngia; teti i hinga ye so atara mabe ti i asala si bê ti i azia pëpe.” (Jacq. 1:2, 3) Na ndo ni, gbungo ngangu ti e afa na gigi ndoye so e yeke na ni na mbage ti Jéhovah, na a yeke mû na e ngia mingi ahon! Aita so e ndoye mingi, zia i hinga biani so fade Jéhovah ayeke mû maboko na e oko oko kue. Tongana e ngbâ lakue be-ta-zo, kite ayeke pëpe so fade lo yeke mû maboko na e ti lï na yâ fini sese. Lo ye ti tene e hon na ngangu.

⁷ Aita-koli na aita-wali, apendere nga na ambakoro: e wa i mingi ti glisa pëpe apendere deba nzoni so a yeke ku e. Zia bango ndo ti e ague legeoko na ti bazengele Paul, so asû lani na mbeti: “Bê ti mbi atene pono ti fadeso alingbi pëpe ti lingbi na gloire so fade asi na e mbeni lâ.” (aRom. 8:18) Atâa ye ti ngangu wa asi na i, i zia bê kue na ndo Jéhovah. I gbu ngangu, i zia pëpe. Fade vundu ayeke gbu ande e lâ oko pëpe, lâ oko pëpe. Mbeti ti Nzapa adë bê ti e: “Fade zo ti mbilimbili ayeke na fini na lege ti mabe ti lo.”​—Hab. 2:4.

Aita ti i,

Wabatango Bungbi ti aTémoin ti Jéhovah