Mbeti ti Job apeut ti aidé mo na ngoi so mo yeke bâ pasi

1-2. Ngbanga ti nyen la a yeke nzoni e diko mbeti ti Job?

ESKÊ ade ti ninga ape mo diko mbeti ti Job? A sû ni asara ngu 3500 tongaso awe, me azo mingi abâ so a yeke mbeni oko ti apendere mbeti so a sû ni. Azo agonda zo so asû mbeti so ndali ti so lo sara kua na atënë so ayeke ngangu ape ti mä yâ ni, so ayeke pendere nga andu bê ti zo mingi. A yeke Moïse la asû mbeti so me vrai Wa ni ayeke Jéhovah Nzapa.—2 Tim. 3:16.

² Mbeti ti Job ayeke mbeni mbeti ti Bible so ayeke kota mingi. Ngbanga ti nyen? Ngbanga ti so a fa polele kota tënë so ayeke na gbele a-ange nga na azo: sarango si iri ti Jéhovah aga nzoni-kue. Mbeti ni afa nga na e ye na ndö ti apendere sarango ye ti Jéhovah, aye tongana ndoye, ndara, mbilimbili nga na ngangu ti lo. Na tapande, fani 31 mbeti ti Job airi Jéhovah “Nzapa so ngangu ti lo ahon angangu kue”; tongana a diko wungo ti tënë ni so na yâ ti tanga ti ambeti ti Bible kue, a si fani 31 ape. Mbeti ti Job akiri nga tënë na ahunda mingi so azo ayeke na ni na ndö ti fini, so na popo ni mo yeke wara mbeni so asara si li ti azo mingi aga kirikiri: Ngbanga ti nyen la Nzapa azia lege na pasi?

3. Aye ti nzoni wa la e peut ti wara tongana e manda mbeti ti Job?

³ E peut ti haka dikongo mbeti ti Job na montengo mbeni hoto. Na ngoi so mo si na li ni, mo peut ti bâ aye polele. Na ngoi so e yeke diko mbeti ti Job, e peut ti bâ polele pensé ti Jéhovah na ndö ti pasi ti e. Zia e bâ tongana nyen la mbeti ti Job apeut ti aidé e na ngoi so e yeke bâ pasi. E yeke gue ti bâ tongana nyen la azo ti Israël apeut lani ti bâ nzoni na lege ti mbaï ti Job nga tongana nyen la e peut ti bâ nzoni dä laso. E yeke bâ nga tongana nyen la e peut ti sara kua na mbaï so ti aidé azo.

NZAPA AZIA LEGE NA JOB TI BÂ PASI

4. Kota kangbi wa la ayeke na popo ti Job na azo ti Israël so ayeke lani na Égypte?

⁴ Na ngoi so azo ti Israël ayeke bâ pasi tongana angbâa na Égypte, mbeni koli so iri ti lo Job alango na kodro ti Uz, peut-être Uz ayeke lani na est ti Sese ti zendo nga na nord ti Arabie. Na ngoi so azo ti Israël ayeke lani na Égypte, ambeni avoro ayanda me Job avoro ti lo Jéhovah be-ta-zo (Jos. 24:14; Ézéch. 20:8). Jéhovah atene na ndö ti Job, atene: “Na ndö ti sese, mbeni zo tongana lo ayeke dä pëpe.”a (Job 1:8). Job ayeke na mosoro mingi nga lo yeke kota mingi ahon azo ti Est kue (Job 1:3). Kite ayeke dä ape so bê ti Satan ason ti bâ koli so, so azo ahinga lo nga ane lo mingi, avoro Jéhovah be-ta-zo.

5. Ngbanga ti nyen la Jéhovah azia si Job aba pasi? (Job 1:​20-22; 2:​9, 10).

⁵ Satan atene so tongana Job abâ pasi, lo yeke zia ti voro Jéhovah (Job 1:​7-11; 2:​2-5). Jéhovah aye lani Job mingi, me lo zia lege na Satan ti fa wala tënë so lo tene na ndö ti Job ayeke tâ tënë wala mvene (Job 1:​12-19; 2:​6-8). Satan asara si Job aperdre anyama ti lo, lo fâ amolenge ti lo bale-oko nga lo sara si afuroncle so ason mingi amû terê ti lo kue. Me, Job angbâ lakue ti voro Jéhovah be-ta-zo atâa so Satan asara si lo bâ pasi mingi. (Diko Job 1:​20-22; 2:​9, 10.) A si na mbeni ngoi, Jéhovah asava Job, lo mû na lo gbâ ti amosoro nga lo sara si lo dü encore amolenge bale-oko. Na lege ti mbeni miracle, lo zia nga ngu 140 na ndö ti fini ti Job, a sara si lo bâ molongo ti ahale ti lo osio (Job 42:​10-13, 16). Tongana nyen la mbaï so apeut lani ti aidé azo ti ândö? Tongana nyen la a peut ti aidé e laso?

6. Tongana nyen la mbaï ti Job apeut lani ti aidé azo ti Israël? (Bâ nga foto.)

⁶ Lege so mbaï so apeut lani ti aidé azo ti Israël. Gigi ti azo ti Israël akpengba lani mingi na Égypte. Na tapande, Josué na Caleb apassé ngoi ti maseka ti ala kue na kua ti ngbâa. Na pekoni, ala sara ngu 40 na yâ ti benyama ndali ti so ambeni zo ti Israël ake yanga ti Jéhovah. Tongana fade azo ti Israël ahinga mbaï na ndö ti akpale so Job awara nga na ye so asi na lo na nda ni, kite ayeke dä ape so a yeke aidé ala nga na ahale ti ala ti hinga zo so asara si ala bâ pasi. Ala peut nga lani ti hinga nzoni mingi ndani so Nzapa azia lege na pasi nga tongana nyen la dutingo be-ta-zo ayeke kota ye mingi na lê ti lo.

7-8. Tongana nyen la mbeti ti Job apeut ti aidé e na ngoi so e yeke bâ pasi? Fa mbeni ye so asi so afa ni.

⁷ Lege so mbaï so apeut ti aidé e. Ye ti mawa ni ayeke so azo mingi ayeke na mabe na Nzapa encore ape ndali ti so ala comprendre ape ndani so asioni ye ayeke si na anzoni zo. Bâ tapande ti Ita-wali Hazelb so ayeke na Rwanda. Na ngoi so lo ngbâ kete, lo mä na bê na Nzapa. Me na pekoni, aye achangé. Babâ na mama ti lo asara divorce. Mama ti lo asara mariage na mbeni koli so asara ye na Hazel na lege ni ape. Na ngoi so lo ngbâ maseka, mbeni koli alango na lo na ngangu. Hazel ague na da ti bungbi ti lo ti wara dengo bê me lo wara ni ape. Ambeni ngoi na pekoni, Hazel asû mbeni lettre na Nzapa, lo tene: “Nzapa, mbi sambela mo lani, mbi tara ti sara ye na lege ni, me mo sara si mbi bâ pasi. Mbi yeke voro mo encore ape na mbi yeke sara gï ye so bê ti mbi aye.” Mawa ti azo tongana Hazel asara e, ndali ti so a fa na ala so Nzapa la asara si ala bâ pasi.

⁸ Na lege ti mbeti ti Job, e hinga so Nzapa la asara si e bâ pasi ape me ayeke Satan. E hinga nga so tongana azo ayeke bâ pasi, a yeke nzoni e pensé ape so a yeke ndali ti so ala sara mbeni ye ti sioni. Bible atene so ‘ye so azo aku terê ti ala na ni pëpe’ apeut ti si na ala na ngoi kue (Zo-ti. 9:11; Job 4:​1, 8). Na e manda so tongana e sara na Jéhovah be-ta-zo na angoi ti kpale, a yeke mû lege na lo ti fa so Satan ayeke zo ti mvene (Job 2:3; aProv. 27:11). E kiri singila na Nzapa ndali ti so grâce na Bible e hinga ndani so e nga na azo so e ye ala e yeke bâ pasi. Ambeni ngoi na pekoni, aTémoin ti Jéhovah amanda Bible na Hazel na lo ga ti bâ so Nzapa la asara si lo bâ pasi ape. Lo tene: “Mbi kiri mbi sambela Nzapa ti fa na lo vrai ye so ayeke na bê ti mbi. Atâa so mbi tene na Jéhovah so mbi yeke voro lo encore ape, a yeke vrai ye so mbi ye lani ti sara la ape. Mbi tene tënë ni so lani ndali ti so mbi hinga lo lani nzoni ape. Laso, mbi comprendre so Jéhovah aye mbi. Mbi yeke na ngia laso mingi.” E kiri singila mingi so e hinga ndani so Nzapa azia lege na pasi. Zia e bâ fadeso tongana nyen la tapande ti Job apeut ti aidé e na ngoi so e yeke bâ pasi.

LEGE SO MBAÏ TI JOB A-AIDÉ E TI GBU NGANGU

9. Nyen la Job asara lani na ngoi so lo yeke bâ pasi? (Jacques 5:11).

⁹ Imaginé pasi so Job abâ lani. Lo duti na yâ ti mburu ti wâ, afuroncle amû terê ti lo kue na ason lo mingi. Poro ti terê ti lo abuba mingi nga lo nge. Job so afatigué mingi amû fango ta si lo yeke kpaka na terê ti lo. Fani mingi, lo dema ndali ti songo ti afuroncle ni. Job angbâ lani gï na fini ape me lo gbu ngangu. (Diko Jacques 5:11.) Nyen la a-aidé lani lo ti gbu ngangu?

10. Nyen la afa so Job ayeke lani na kpengba songo na Jéhovah?

¹⁰ Job afa lani atënë ti bê ti lo na Jéhovah (Job 10:​1, 2; 16:20). Na tapande, na chapitre 3, Job afa vundu so asara lo ndali ti aye ti ngangu so asi na lo. Lo pensé so a yeke Jéhovah la asara si lo wara akpale ni so. Na pekoni, akamarade ti lo ota angbâ gï ti tene na lo so Nzapa la ayeke punir lo ndali ti asiokpari so lo sara. Me Job angbâ lani ti tene so lo yeke be-ta-zo na Jéhovah. Atënë ti Job afa so teti mbeni ngoi, lo bâ so lo yeke mbilimbili ahon Nzapa (Job 10:​1-3; 32:​1, 2; 35:​1, 2). Me ti vrai ni, lo tene so na ambeni ngoi atënë so lo tene ti fa so lo yeke be-ta-zo ayeke ‘dikongo tënë kirikiri’. (Job 6:​3, 26). Na chapitre 31, Job aye lani ti tene Nzapa atene na lo so lo sara mbeni ye ti sioni ape so alingbi ti tene a punir lo ndali ni (Job 31:35). Me, so Job angbâ ti hunda na Nzapa ti fa na lo ndani so lo yeke bâ pasi ayeke na lege ni ape.

11. So Job atene so lo yeke sara ye lakue mbilimbili, Jéhovah atene nyen na lo?

¹¹ Laso, e comprendre so fason so Job asara tënë na Jéhovah afa so lo yeke na kpengba songo na lo nga lo hinga na bê ti lo kue so Jéhovah ayeke fâ ngbanga ti lo mbilimbili. Na ambeni ngoi, Jéhovah asara si mbeni kota pupu aya na lo sara tënë na Job na yâ ni. Me lo fa na Job ape ndani so lo yeke bâ pasi. Na Jéhovah apunir lani Job ape ndali ti so lo fa atënë ti bê ti lo wala ndali ti so lo tene so lo sara sioni ye ape. Me, tongana mbeni nzoni babâ, na nzoni bê Jéhovah afa na Job nzoni fason so lo doit ti pensé na ni. A yeke tâ nzoni lege ti aidé lo la. A sara si Job asara terê ti lo kete, lo yeda so lo hinga ye mingi ape nga lo hunda pardon ndali ti atënë so lo tene sân ti gbu li (Job 31:6; 40:​4, 5; 42:​1-6). Tongana nyen la mbaï so apeut lani ti aidé azo ti ândö? Tongana nyen la a peut ti aidé e laso?

12. Tongana nyen la mbaï ti Job apeut lani ti aidé azo ti Israël?

¹² Lege so mbaï so apeut lani ti aidé azo ti Israël. Ye so asi na Job apeut lani ti aidé azo ti Israël. Gbu li na ndö ti tapande ti Moïse. A yeke lani kete ye ape na Moïse ti fa lege na azo ti mara ti Israël. Fani mingi, ala ke yanga ti Jéhovah nga ala zia vundu na bê ti Moïse. Na ngoi so aye aga ngangu, fani mingi azo ti Israël akasa Jéhovah, me ti Moïse, na ngoi so aye aga ngangu, lo sambela Jéhovah ti aidé lo (Ex. 16:​6-8; Nom. 11:​10-14; 14:​1-4, 11; 16:​41, 49; 17:5). Moïse adoit nga lani ti kanga bê na ngoi so Jéhovah asuku na lo. Na tapande, kete kozo si azo ti Israël alï na Sese ti zendo, bê ti Moïse ason na terê ti ala na “lo tene tënë hio sân ti gbu li.” Lo mû na Jéhovah ape gonda so lo lingbi na ni (Ps. 106:​32, 33). Ye so asara si Jéhovah amû lege na lo ape ti lï na Sese ti zendo (Deut. 32:​50-52). Atâa so vundu asara Moïse, lo sara terê ti lo kete na lo manda ye na lege ni. Mbaï ti Job apeut lani ti aidé azo ti Israël so avivre na peko ti ngoi ti Moïse ti ngbâ be-ta-zo. Ala peut lani ti gbu li na ndö ti mbaï ti Job na ti fa na Jéhovah tâ ye so ayeke na bê ti ala. Me ala doit nga ti girisa ape so ala yeke mbilimbili ahon Jéhovah ape. Ala peut nga lani ti sara terê ti ala kete ti yeda na sengo ndo ti Jéhovah.

13. Tongana nyen la mbaï ti Job a-aidé e ti gbu ngangu? (aHébreu 10:36).

¹³ Lege so mbaï so apeut ti aidé e. So e yeke aChrétien, e nga kue e bezoin ti gbu ngangu. (Diko aHébreu 10:36.) Peut-être terê ti e ason mingi, vundu asara e, e gi bê ti e mingi wala e yeke na kpale na yâ ti sewa ti e. Peut-être mbeni sewa ti e wala mbeni kamarade ti e akui wala e yeke na mbeni ngangu kpale nde. Na ambeni ngoi, mbeni zo apeut ti tene mbeni tënë wala ti sara mbeni ye so asara si kpale ti e ni akiri aga ngangu mingi (aProv. 12:18). Me, mbeti ti Job afa na e so e peut ti fa atënë ti bê ti e na Jéhovah na e hinga biani so lo yeke mä e (1 Jean 5:14). Bê ti Jéhovah ayeke son ape tongana e fa na lo atënë ti bê ti e, même tongana na ambeni ngoi e yeke “diko tënë gï kirikiri”. Me, Nzapa ayeke mû na e ngangu nga na ndara so e bezoin ni ti gbu ngangu (2 Chron. 16:9; Jacq. 1:5). Lo peut nga ti kiri na e na nzoni lege tongana bezoin ni ayeke dä tongana ti so lo sara na Job. Mbeti ti Job afa nga na e tongana nyen ti gbu ngangu na ngoi so Jéhovah amû na e wango na lege ti Bible, bungbi ti lo wala na lege ti akamarade ti e so ayeke na kpengba songo na lo (aHéb. 12:​5-7). Legeoko tongana ti so Job awara ye ti nzoni na ngoi so lo sara terê ti lo kete lo yeda na wango so Jéhovah amû na lo, e nga kue e peut ti wara ye ti nzoni tongana e yeda ti tene a kiri na e na nzoni lege (2 aCor. 13:11). So apendere ye la e manda na lege ti mbeti ti Job! Fadeso, zia e bâ tongana nyen la e peut ti sara kua na mbaï ti Job ti aidé azo.

SARA KUA NA MBETI TI JOB TI AIDÉ AZO

14. Mbeni lege so e peut ti fa ndani so e yeke bâ pasi ayeke so wa?

¹⁴ Eskê na fango tënë mo tingbi awe na mbeni zo so ahunda na mo ndani so e yeke bâ pasi? Mo kiri tënë lani na lo tongana nyen? Peut-être mo fa na lo tënë so Bible atene na ndö ti ye so asi lani na yaka ti Éden. Peut-être mo komanse na tenengo so Satan, so ayeke mbeni sioni yingo, atene mvene na kozo koli na kozo wali na ague na ala ti sara kpengba-li na Nzapa (Gen. 3:​1-6). Na pekoni, mo peut ti tene so na peko ti so Adam na Ève ake yanga ti Nzapa, azo ayeke bâ pasi nga ala yeke kui (aRom. 5:12). Na nda ni, mo peut ti fa na lo so Nzapa azia si mbeni ngoi so alingbi ahon, ti fa so tënë so Satan atene ayeke mvene nga ti fa na azo nzoni tënë so na yâ ti ngoi so ayeke ga, azo ayeke ga ande mbilimbili-kue (Apoc. 21:​3, 4). So ayeke mbeni nzoni lege ti kiri tënë na hunda so, na kiringo tënë ni a-aidé gbâ ti azo ti hinga ndani so anzoni zo ayeke bâ pasi.

15. Tongana nyen la e peut ti sara kua na mbeti ti Job ti aidé mbeni zo so ahunda na e ndani so e yeke bâ pasi? (Bâ nga afoto.)

¹⁵ Mbeni lege so e peut ti fa na mbeni zo ndani so e yeke bâ pasi ayeke ti fa na lo mbaï ti Job. Na tongo nda ni, mo peut ti tene na lo so pendere hunda la lo hunda so. Na pekoni, mo peut ti tene na lo so Job, so ayeke mbeni zo so ayeke be-ta-zo so abâ lani pasi mingi, ahunda lani mara ti tënë so. Lo pensé lani so Nzapa la asara si lo bâ pasi (Job 7:​17-21). Li ti zo so mo yeke sara lisoro na lo apeut ti kpe ti bâ so aninga mingi awe la azo akomanse ti hunda tënë so. Na pekoni, mo peut ti fa na lo na kode so a yeke Zabolo la asara si Job abâ pasi me Nzapa ape. Zabolo atene so azo ayeke voro Nzapa gï ndali ti aye so lo mû na ala, me tongana ala bâ pasi, ala yeke zia ti voro lo. Mo peut nga ti tene so atâa so Nzapa la asara pëpe si Job abâ pasi, so lo zia lege na ni, lo fa so lo yeke na confiance so azo so ayeke be-ta-zo na lo ayeke fa so Satan ayeke zo ti mvene. Na nda ni, mo peut ti fa na lo so na mbeni ngoi, Nzapa asara tufa na ndö ti Job ndali ti so lo ngbâ lani be-ta-zo. Tongaso, e peut ti dë bê ti azo na tenengo na ala so Jéhovah la asara si ala bâ pasi ape.

16. Fa mbeni ye so asi so afa tongana nyen la mbeti ti Job apeut ti aidé mbeni zo so ayeke bâ pasi.

¹⁶ Bâ tongana nyen la mbeti ti Job a-aidé Mario. Mbeni lâ na ngu 2021, mbeni ita-wali ayeke fa lani tënë na téléphone. Kozo zo so lo iri lo ayeke Mario. Lo diko na lo mbeni versê so afa so Nzapa ayeke mä asambela ti e nga lo mû zendo ti mbeni pendere gigi ti kekereke. Lo hunda na Mario ti fa tënë ti bê ti lo na ndö ti versê ni, lo tene so lo ngbâ ti sara mbeni lettre ti zia kozo si lo fâ terê ti lo na ngoi so lo iri ndo. Lo tene: “Mbi mä na bê na Nzapa, me mbi hunda terê ti mbi na ndapre so wala Nzapa adö mbi azia awe.” Ita-wali ni akiri airi lo, na lo sara lisoro na lo na ndö ti pasi so Job abâ lani. Mario amû desizion ti diko mbeti ti Job kue. Ita-wali ni atokua na lo lien ti Bible na ndö ti jw.org. Ye ti peko ni ayeke nyen? Mario ayeda ti manda Bible nga a nzere na lo ti manda ye mingi na ndö ti Nzapa ti ndoye so abi bê na lo.

17. Ngbanga ti nyen la mo kiri singila na Jéhovah so lo zia mbeti ti Job na yâ ti Bible? (Job 34:12).

¹⁷ Bible ayeke na ngangu ti changé fini ti e nga même ti dë bê ti azo so ayeke bâ pasi (aHéb. 4:12). Job ahunda lani na Jéhovah ti sû mbaï ti lo na mbeti. E kiri singila na Jéhovah so lo sara ni ndali ti so e peut ti diko mbaï ni so na yâ ti Bible (Job 19:​23, 24). Mbeti ti Job adë bê ti e so “ti tâ tënë ni, Nzapa ayeke sara ye ti sioni pëpe”. (Diko Job 34:12.) A fa nga na e ndani so Jéhovah azia si e bâ pasi nga tongana nyen la e peut ti gbu ngangu dä. A aidé nga e ti dë bê ti azo so ayeke bâ pasi. Na yâ ti article ti peko, e yeke bâ tongana nyen la mbeti ti Job apeut ti aidé e na ngoi so e yeke mû wango na mbeni zo.