Mû tapande ti a-ange so ayeke be-ta-zo

1-2. (a) Na alege wa la e yeke nde na a-ange? (b) Na alege wa la e na a-ange e yeke oko?

NA NGOI so Jéhovah agboto mo na yâ ti tâ tënë, lo tisa mo na yâ ti sewa ti awakua ti lo so ayeke nde nde, so aye terê, so a-ange kutu mingi so ayeke be-ta-zo ayeke na yâ ni (Dan. 7:​9, 10). Tongana e gbu li na ndö ti a-ange, e peut ti pensé so ala yeke nde mingi na e. Na tapande, a-ange ayeke na fini aninga mingi kozo si e azo e bâ gigi (Job 38:​4, 7). Ala yeke na ngangu mingi ahon e. Ala yeke nzoni-kue nga mbilimbili ahon e ndali ti so e yeke mbilimbili-kue ape.—Luc 9:26.

² Atâa so e yeke nde na a-ange, gbâ ti ambeni ye ayeke dä so na yâ ni e na ala e yeke oko. Na tapande, tongana ti a-ange, e peut ti duti na asarango ye ti Jéhovah. E yeke na liberté ti soro ye tongana a-ange. A-ange ayeke na iri, ala yeke na asarango ye nga akua so ala yeke sara na Jéhovah ayeke nde nde. Ti e nga ayeke tongaso. Nga legeoko tongana a-ange, e bezoin ti voro Lo so acréé e.—1 Pi. 1:12.

3. Nyen la e peut ti manda na lege ti tapande ti a-ange so angbâ be-ta-zo?

³ So na yâ ti aye mingi e na a-ange e yeke oko, nzoni tapande ti ala apeut ti kpengba e nga ti zi lê ti e. Ti vrai ni, e peut ti manda aye mingi na mbage ti ala. Na yâ ti article so, e yeke bâ tongana nyen la e peut ti mû tapande ti a-ange so ayeke be-ta-zo so asara terê ti ala kete, so aye azo, so agbu ngangu nga so asara kue ti bata congrégation si sioni aduti dä ape.

A-ANGE ASARA TERÊ TI ALA KETE

4. (a) Na alege wa la a-ange afa so ala sara terê ti ala kete? (b) Ngbanga ti nyen la a-ange asara terê ti ala kete? (Psaume 89:7).

⁴ A-ange so ayeke be-ta-zo asara terê ti ala kete. Atâa so a-ange ahinga ye mingi, ala yeke na ngangu mingi nga ala yeke na ndara mingi, ala yeke mä yanga ti Jéhovah (Ps. 103:20). Na ngoi so ala yeke sara akua so Jéhovah amû na ala, ala pika kate lâ oko ape na ndö ti aye so ala sara wala ala sara kua na ngangu ti ala ti gboto lê na ndö ti ala ape. Na ngia ala yeke sara ye so bê ti Nzapa aye atâa a hinga iri ti ala apea (Gen. 32:​24, 29; 2 aGbia 19:35). Ala ke ti yeda na agloire kue so ayeke ti Jéhovah. Ngbanga ti nyen la a-ange asara terê ti ala kete mingi? Ngbanga ti so ala ye Jéhovah nga ala ne lo mingi.—Diko Psaume 89:7.

5. Tongana nyen la mbeni ange afa so lo sara terê ti lo kete na ngoi so lo kiri na bazengele Jean na nzoni lege? (Bâ nga foto.)

⁵ Bâ mbeni ye so asi so afa so a-ange asara terê ti ala kete. Na ngu 96 tongaso, mbeni ange so a fa iri ti lo ape afa mbeni kpengba vision na bazengele Jean (Apoc. 1:1). Na ngoi so Jean abâ vision ni, lo sara ye lani tongana nyen? Lo kuku ti voro ange ni. Me hio, ange so ake na lo, lo tene: “Hange! Sara ye tongaso ape! Mbi kue mbi yeke gï mba ti mo ngbâa, mbi yeke nga gï ngbâa tongana aita ti mo . . . Mo voro Nzapa!” (Apoc. 19:10). Ange so asara terê ti lo kete mingi. Lo ye lani ti tene a gonda lo ape. Hio, lo gboto lê ti Jean na ndö ti Jéhovah Nzapa. Na oko ngoi ni, ange ni abâ Jean tongana mbumbuse zo ape. Atâa so ange so asara na Jéhovah teti angu mingi nga lo yeke ngangu mingi ahon Jean, lo sara terê ti lo kete lo tene so lo yeke mba ti lo ngbâa. Nga même atâa so ange ni adoit ti kiri na Jean na nzoni lege, lo suku na lo sukungo ape. Me, lo sara tënë na lo na nzoni bê. Peut-être lo hinga so ye so Jean abâ ahon gbungo li ti lo.

6. Tongana nyen la e peut ti sara terê ti e kete tongana a-ange?

⁶ Tongana nyen la e peut ti sara terê ti e kete tongana a-ange? E nga kue, e peut ti sara akua ti e sân ti pika kate wala ti gi ti gboto lê na ndö ti e (1 aCor. 4:7). Na ndö ni, a yeke nzoni ape ti tene e bâ so e yeke kota ahon amba ti e tongana e sara na Jéhovah aninga ahon ala wala e yeke na ambeni kua so ala yeke na ni ape. Ti vrai ni, tongana e yeke na akua mingi, a yeke nzoni a pusu e ti bâ amba ti e kota ahon e (Luc 9:48). Legeoko tongana a-ange, e ye ti sara kua ndali ti amba ti e. E ye ape ti sara si azo apensé so e yeke kota ahon ala.

7. Tongana nyen la e peut ti fa so e sara terê ti e kete tongana e doit ti kiri na mbeni zo na nzoni lege wala e doit ti mû wango na lo?

⁷ E peut nga ti fa so e sara terê ti e kete tongana e doit ti mû wango na mbeni ita wala molenge ti e. Na ngoi so e yeke mû wango, peut-être e bezoin ti sara tënë polele. Me legeoko tongana ti so na nzoni bê ange so akiri na Jean na nzoni lege, e peut ti sara tënë polele sân ti sara si zo ni adécouragé. Tongana e bâ terê ti e kota ape, e yeke mû na azo wango ti Bible na mbeni lege so ane zo nga na ndoye.—aCol. 4:6.

A-ANGE AYE AZO

8. (a) Ti gue oko na Luc 15:​10, tongana nyen la a-ange afa so ala ye azo? (b) A-ange ayeke aidé e na yâ ti kua ti fango tënë tongana nyen? (Bâ nga foto.)

⁸ A-ange ayeke sara pëpe sanka ti aye so ayeke si na azo wala ala pensé ape so azo ayeke ambumbuse zo, me ala ye azo. Ala yeke na ngia tongana mbeni zo so asara siokpari achangé bê ti lo, so ti tene, tongana mbeni taba so agirisa lege akiri na Jéhovah wala tongana mbeni zo asara achangement lo ga na yâ ti tâ tënë. (Diko Luc 15:10.) A-ange ayeke mû nga maboko na e na ngoi so e yeke fa tënë ti Royaume (Apoc. 14:6). Atâa so ala yeke fa tënë droit na azo ape, ala peut ti fa lege na mbeni wafango tënë ti gue na mbage ti mbeni zo so aye ti hinga ye na ndö ti Jéhovah. Tâ tënë, e lingbi pëpe ti tene so e yeke sûr so a-ange la ague na e na mbage ti mbeni zo ti fa tënë na lo. Jéhovah apeut nga ti sara kua na ambeni ye nde, na tapande yingo vulu ti lo, ti aidé azo ti hinga lo wala ti gue na awakua ti lo na mbage ti ala (Kus. 16:​6, 7). Me lo yeke sara nga kua na a-ange ti lo ti aidé e na fango tënë. Tongaso, na ngoi so e yeke fa nzoni tënë, e peut ti hinga biani so a-ange ayeke na terê ti e ti mû maboko na e.—Bâ encadré “A kiri tënë na asambela ti ala.”b

9. Tongana nyen la e peut ti ye azo tongana a-ange?

⁹ Tongana nyen la e peut ti ye azo tongana a-ange? Tongana e mä mbeni tokua na ngoi ti bungbi atene so mbeni zo akiri na bungbi, e peut ti duti na ngia tongana a-ange. E peut ti sara kue ti fa na ita ni so e ye lo nga e yeke na ngia so lo kiri ti sara na Jéhovah (Luc 15:​4-7; 2 aCor. 2:​6-8). E peut nga ti sara ye tongana a-ange tongana e sara ye kue so e peut ti sara na fango tënë (Zo-ti. 11:6). Tongana ti so a-ange ayeke aidé e ti fa nzoni tënë, e peut ti gi alege ti aidé aita ti e na yâ ti kua ti ala ti fango tënë. Na tapande, e peut ti leke ti fa tënë na mbeni wafango tënë so akomanse ti fa tënë ade ti ninga ape. Wala e peut ti aidé aita ti e so aga mbakoro wala so ayeke na kpale ti seni ti fa tënë.

10. Nyen la e peut ti manda na lege ti ye so asi na Sara?

¹⁰ Ka tongana dutingo ti e akanga lege na e ti sara ye kue so e ye ti sara na yâ ti kua ti Jéhovah? E peut ti wara ambeni lege nde ti tene e na a-ange e fa tënë. Bâ ye so asi na Sara,c mbeni ita-wali na Inde. Na peko ti so lo sara kua ti pionnier teti ngu 20, terê ti lo ason na lo ngbâ gï na gbogbo. Lo découragé ngangu. Me na nda ni, Sara akiri awara ngia ti lo grâce na mungo maboko ti aita ti congrégation nga na dikongo Bible ti lo lakue. Ti vrai ni, lo doit ti gi afini lege ti fa tënë. So lo peut même ti duti na nduzu ti sû alettre ape, lo fa tënë gï na lege ti téléphone. Tongaso, lo iri avizite ti lo na ala fa na lo ambeni zo so asara nzara ti mä tënë ni. Ye ti peko ni ayeke nyen? A sara anze mingi ape, Sara awara azo 70 so aye ti manda Bible, me lo peut ti sara ni na ala kue ape. Tongaso, lo leke ti tene ambeni ita amanda Bible na ambeni. Mingi ti azo ni ayeke ga fadeso na abungbi. So ngia la a-ange adoit ti duti na ni ti sara kua na terê ti aita tongana Sara so asara ye kue so ala peut ti sara ti fa tënë!

A-ANGE AYEKE GBU NGANGU

11. Tongana nyen la a-ange so ayeke be-ta-zo afa so ala gbu ngangu?

¹¹ A-ange so ayeke be-ta-zo azia na e pendere tapande ti gbungo ngangu. Teti angu saki mingi, ala kanga bê na ngoi so ala yeke bâ sarango ye ti kirikiri nga na asioni sarango ye. Ala bâ Satan nga na gbâ ti a-ange, so ala na ala ayeke voro Jéhovah lani, asara kpengba-li na lo (Gen. 3:1; 6:​1, 2; Jude 6). Bible asara tënë ti mbeni ange so ayeke be-ta-zo so mbeni sioni yingo so ayeke na ngangu mingi akanga lege na lo (Dan. 10:13). Na ndö ni, na yâ ti mbaï ti azo, a-ange abâ gï kete wungo ti azo la avoro Nzapa na lege ni. Atâa so kue, a-ange be-ta-zo so angbâ ti voro Jéhovah na ngia na ala yapu ti sara ni. Ala hinga so na tâ ngoi ni, Nzapa ayeke zi asarango ye ti kirikiri kue.

12. Nyen la apeut ti aidé e ti gbu ngangu?

¹² Tongana nyen la e peut ti gbu ngangu tongana a-ange? Tongana ti a-ange, e peut ti bâ sarango ye ti kirikiri wala a peut ti kanga lege na e. Me tongana ala, e hinga na bê ti e kue so Nzapa ayeke zi asioni ye kue na tâ ngoi ni. Tongaso, tongana a-ange so ayeke be-ta-zo, “zia e dö lege ti sarango ye ti nzoni e zia pëpe”. (aGal. 6:9). Nzapa amû nga zendo ti aidé e ti gbu ngangu (1 aCor. 10:13). E peut ti sambela Jéhovah ti mû na e yingo vulu ti lo ti kanga bê nga ti duti na ngia (aGal. 5:22; aCol. 1:11). Ka tongana a kanga lege na mo? Zia bê ti mo kue na Jéhovah na sara mbeto ape. Jéhovah ayeke mû maboko lakue na mo nga lo yeke kpengba mo.—aHéb. 13:6.

A-ANGE AYEKE BÂ SI SIONI ADUTI NA YÂ TI CONGRÉGATION APE

13. Kota kua wa la a-ange ayeke na ni na lâ ti nda ni so? (Matthieu 13:​47-49).

¹³ Na lâ ti nda ni so, Jéhovah amû na a-ange mbeni kota kua. (Diko Matthieu 13:​47-49.) Azo kutu mingi na yâ ti dunia aye ti mä nzoni tënë. Ambeni zo ni asara achangement na yâ ti gigi ti ala ti sara ye alingbi na aye so Jéhovah ahunda, me ambeni asara ni ape. A mû na a-ange kua ti “zi azo ti sioni na popo ti azo ti nzoni.” So ti tene ala yeke bâ si sioni aduti na yâ ti congrégation ape. So aye ti tene ape so zo kue so azia ti voro Jéhovah ndali ti mbeni raison apeut lâ oko ape ti kiri. A ye nga ape ti tene so akpale ayeke duti lâ oko ape na yâ ti congrégation. Me e peut ti hinga biani so a-ange ayeke sara ngangu ti tene sioni aduti na yâ ti congrégation ape.

14-15. Tongana nyen la e peut ti mû tapande ti a-ange ti fa so e ye si sioni aduti na yâ ti congrégation ape? (Bâ nga afoto.)

¹⁴ Tongana nyen la e peut ti mû tapande ti a-ange ti fa so e ye si sioni aduti na yâ ti congrégation ape? E doit ti sara ngangu ti bata songo ti e na Jéhovah. E yeke sara ni na lege so e soro akamarade so aye lo nga e ke ti sara aye so apeut ti buba songo ti e na lo. Tongana e sara tongaso, sioni ye ayeke duti na yâ ti congrégation ape (Ps. 101:3). E peut nga ti aidé amba ti e Chrétien ti ngbâ be-ta-zo na Jéhovah. Na tapande, tongana e hinga so mbeni mba ti e Chrétien asara mbeni kota siokpari, nyen la a yeke nzoni e sara? So e ye lo, e yeke wa lo ti sara tënë ni na a-ancien. Tongana lo sara ni ape, e yeke sara tënë ni na ala. E ye si aita ti e so songo ti ala na Jéhovah abuba aleke ni hio.—Jacq. 5:​14, 15.

¹⁵ Mawa ni ayeke so a doit ti zi na yâ ti congrégation ambeni ita so asara kota siokpari. Tongana a si tongaso, e yeke “zia ti sara songo” na alad (1 aCor. 5:​9-13). Sarango tongaso ayeke bata congrégation si sioni aduti dä ape. Na ndö ni, tongana e soro ti sara songo pëpe na azo so a zi ala na yâ ti congrégation, e fa so e sara ye na ala na nzoni bê la. So e sara songo na ala ape apeut ti sara si li ti ala aga dä. Tongana li ti ala aga dä, e na Jéhovah nga na a-ange e yeke duti na ngia.—Luc 15:7.

16. Na yâ ti aye wa la e yeke gi ti mû tapande ti a-ange?

¹⁶ So Jéhovah amû lege na e ti hinga ye na ndö ti a-ange nga ti sara kua maboko na maboko na ala ayeke mbeni kota pasa. Zia e sara ye tongana a-ange so asara terê ti ala kete, ala ye azo, ala gbu ngangu nga ala yeke bâ si sioni aduti na yâ ti congrégation ape. Tongana e mû tapande ti a-ange so ayeke be-ta-zo, e nga kue e peut ti duti na yâ ti sewa ti awakua ti Jéhovah teti lakue lakue.