Yapu na kua ti fango tënë tongana Jésus

1. Mbeni sarango ye so asara si awakua ti Jéhovah ayeke nde na azo ti dunia so ayeke so wa?

MBENI ye so asara si awakua ti Jéhovah ayeke nde na aChrétien ti wataka ayeke so ala yapua na kua ti fango tënë (Tite 2:14). Me na ambeni ngoi, peut-être nzara ti fango tënë asara mo oko ape. Peut-être tënë ti bê ti mo ague oko na ti mbeni ita so ayeke ancien so asara kua ngangu so atene: “Na ambeni ngoi, mbi yeke na nzara ti gue na fango tënë ape.”

2. Nyen la apeut ti sara si na ambeni ngoi a yeke ngangu na e ti ngbâ ti yapu na kua ti fango tënë?

² Peut-être a nzere na e mingi ti sara ambeni ye so e yeke sara ka ti voro na Jéhovah ahon ti gue na fango tënë. Ngbanga ti nyen? Ngbanga ti so tongana e leke aDa ti Royaume wala e bâ lege ni ti tene angbâ nzoni, e mû maboko na aita ti e so ayeke bâ pasi, wala e kpengba ala na ambeni ngoi, e yeke bâ anzoni ye ti peko ni hio na ayeke nzere na e. A nzere na e ti sara kua na terê ti aita ti e na yâ ti siriri nga ti bâ so e na ala e ye terê. Nga e hinga so aye so e sara ndali ti amba ti e anzere na ala. Me peut-être e yeke fa tënë na yâ ti oko territoire teti angu mingi na e bâ anzoni ye ti peko ni mingi ape. Wala e peut ti tingbi na azo so ake ti mä e. E hinga so, so Nzapa aga nduru ti futi dunia so, azo ayeke ke e mingi (Mat. 10:22). Nyen la apeut ti aidé e ti ngbâ ti yapu wala ti yapu ahon ti kozo na kua ti fango tënë?

3. Nyen la e manda na mbage ti Jésus na lege ti tapande so ayeke na Luc 13:​6-9?

³ E peut ti manda ti yapu na kua ti fango tënë na lege ti tapande ti Jésus. Na ngoi so lo yeke lani na sese, lakue lo yapu na kua ti fango tënë. Ti vrai ni, tongana ngoi ayeke hon, lo fa tënë mingi. (Diko Luc 13:​6-9.) Na yâ ti mbeni toli, Jésus ahaka kua ti lo ti fango tënë na kua ti zo ti sarango kua ti vigne so na yâ ti ngu ota lo sara kua ngangu ti bâ lege ti mbeni keke ti figue, me alë ape. Legeoko nga, Jésus afa tënë na aJuif na yâ ti ngu ota, me mingi ti ala aga adisciple ti lo ape. Ye oko, gï tongana ti so zo ti sarango kua ti vigne so angbâ ti sara kua ti lo, Jésus azia lani pëpe ti fa tënë na azo nga lo ngbâ ti yapu na kua ni. Lo sara même ngangu mingi ti ndu bê ti azo.

4. Aye osio wa la e yeke manda na lege ti tapande ti Jésus?

⁴ Na yâ ti article so, e yeke bâ tongana nyen la Jésus afa so lo yapu na fango tënë, mbilimbili na yâ ti tanga ti anze omene ti kua ti fango tënë ti lo. Tongana e manda ye na lege ti aye so lo fa nga e mû tapande ti lo, e yeke ngbâ ti yapu na kua ti fango tënë. Fadeso, zia e bâ aye osio so e peut ti manda na lege ti tapande ti Jésus: (1) Lo zia lani li ti lo gï na ndö ti ye so Jéhovah aye, (2) lo comprendre lani aprophétie ti Bible nga lo sara ye ague oko na ni, (3) Lo zia lani bê ti lo na Jéhovah ti aidé lo nga (4) lo ngbâ lani ti duti na confiance so ambeni zo ayeke mä lo.

LO ZIA LANI LI TI LO GÏ NA NDÖ TI YE SO JÉHOVAH AYE

5. Tongana nyen la Jésus afa so ti sara ye so Jéhovah aye ti tene lo sara ayeke lani kota mingi na lê ti lo?

⁵ Jésus ayapu lani ti fa “nzoni tënë” ndali ti so lo hinga so kua so Jéhovah aye ti tene lo sara la (Luc 4:43). Ti Jésus, fango tënë ayeke lani kua so ayeke kota mingi na yâ ti fini ti lo. Même nduru na hunzingo ti kua ti lo, lo tambela “na yâ ti agbata oko oko nga na yâ ti akete kodro oko oko” ti fa ye na azo (Luc 13:22). Lo fa nga ye na gbâ ti adisciple ti lo ti fa nzoni tënë tongana lo.—Luc 10:1.

6. Tongana nyen la kua ti fango tënë ague oko na ambeni kua nde so e peut ti sara na yâ ti kua ti Jéhovah? (Bâ nga foto.)

⁶ Laso nga kue, kua ti fango nzoni tënë ayeke kota kua so Jéhovah na Jésus aye ti tene e sara (Mat. 24:14; 28:​19, 20). Kua kue so e sara ndali ti Jéhovah ague tâ oko na kua ti fango tënë. Na tapande, tongana e leke ada so a yeke sara kua ti Jéhovah dä wala e sara kua na Béthel ayeke ti mû maboko na kua ti fango tënë. Tongana e mû maboko na aita na ngoi ti akota kpale ayeke ti aidé ala ti wara aye so ala bezoin ni nga ti aidé ala ti kiri ti sara aye so ala yeke sara ka ti voro Jéhovah, na tapande fango tënë. Tongana e hinga so a yeke kota ye ti fa tënë nga e dabe ti e so a yeke kota kua so Jéhovah aye ti tene e sara, a yeke pusu e ti fa tënë lakue. János, so ayeke ancien na Hongrie, atene: “Mbi yeke dabe ti mbi lakue so mbeni kua nde so e yeke sara ndali ti Jéhovah so apeut ti mû place ti kua ti fango tënë ayeke dä ape; kota kua so e doit ti sara la.”

7. Ngbanga ti nyen la Jéhovah aye ti tene e ngbâ ti fa tënë? (1 Timothée 2:​3, 4).

⁷ E peut ti yapu mingi na fango tënë tongana e bâ azo tongana ti so Jéhovah abâ ala. Lo ye ti tene azo mingi amä nzoni tënë nga ala yeda na ni. (Diko 1 Timothée 2: 3, 4.) So nzoni tënë apeut ti sö fini ti azo, Jéhovah a-aidé e ti maï kode ti fango tënë ti e. Na tapande, brochure Ndoye azo: Sara adisciple afa na e tongana nyen ti komanse lisoro na azo tongaso si tongana ngoi ayeke hon ala peut ti manda Bible na ala ga ande adisciple ti Jésus. Même si azo ayeda ti voro Jéhovah laso ape, ala peut ti soro ti sara na lo kozo si kota ye ti vundu ahunzi. Aye so e yeke fa na ala laso apeut ti pusu ala ti yeda ti voro Jéhovah ande. Me a peut ti si tongaso gï tongana e ngbâ ti fa tënë.

LO COMPRENDRE LANI APROPHÉTIE TI BIBLE

8. So Jésus ahinga aprophétie ti Bible apusu lo ti sara nyen?

⁸ Jésus ahinga lani so ambeni prophétie ti Bible ayeke ga tâ tënë. Lo hinga so lo yeke fa tënë teti ngu ota na ndambo (Dan. 9:​26, 27). Lo hinga nga aprophétie so afa ngoi nga na fason so lo yeke kui na ni (Luc 18:​31-34). Aye so lo hinga apusu lo ti sara kua nzoni na ngoi ti lo. Ye so asara si lo yapu na fango tënë tongaso si lo hunzi kua so Nzapa amû na lo ti sara.

9. Tongana e mä yâ ti aprophétie ti Bible ayeke aidé e tongana nyen?

⁹ Tongana e mä yâ ti aprophétie apeut ti pusu e ti yapu na fango tënë. E hinga so fafadeso Nzapa ayeke futi aye ti dunia so. E hinga nga so aye so ayeke si fadeso nga na bango ndo ti azo laso ayeke aye so Bible afa so a yeke hinga na lâ ti nda ni. Aprophétie ti Bible atene nga so gbia ti nord na gbia ti sud ayeke tiri na mba “na ngoi ti nda ni”. E comprendre so aye ti sara tënë ti tiri so ayeke na popo Grande-Bretagne na États-Unis, so ayeke na ngangu komandema na yâ ti dunia, na Russie na akodro so ayeke mû maboko na lo (Dan. 11:40). E comprendre nga so Grande-Bretagne na États-Unis so ayeke na ngangu komandema na yâ ti dunia aye ti sara tënë ti gere ti image so a sara tënë ni na Daniel 2:​43-45. Tongana ti so prophétie ni afa, e hinga biani so fafadeso Royaume ti Nzapa ayeke futi agouvernement ti azo. Aprophétie so kue afa so Nzapa aga tâ nduru awe ti futi dunia so, tongaso e doit ti sara kua nzoni mingi na ngoi ti e ti fa nzoni tënë.

10. Ambeni prophétie wa ti Bible la apeut ti pusu e ti yapu na fango tënë?

¹⁰ Aprophétie ti Bible asara nga si e yeke na mbeni tënë so e ye mingi ti fa ni na azo. Ita-wali Carrie, so ayeke na République Dominicaine, atene: “Tongana mbi gbu li na ndö ti apendere ye so Jéhovah amû zendo ti sara na yâ ti angoi so ayeke ga, mbi bâ so mbi doit ti sara tënë ni na azo.” Lo kiri lo tene: “Tongana mbi bâ akpale so azo ayeke tingbi na ni laso, mbi bâ so ala bezoin ti hinga so Jéhovah amû zendo ti sara apendere ye ndali ti ala nga.” Aprophétie ti Bible afa so Jéhovah angbâ ti aidé e ti fa tënë na amû na e ngangu ti ngbâ ti fa ni. Leïla so ayeke na Hongrie atene: “Ésaïe 11:​6-9 afa so Jéhovah apeut ti sara si zo achangé atâa lo yeke tongana nyen. Ye so apusu mbi ti fa nzoni tënë même na azo so na bango ni akpa azo so apeut ti mä mbi ape.” Ita-koli Christopher so ayeke na Zambie atene: “Tongana ti so Marc 13:10 afa kozo awe, nzoni tënë ni ayeke mû ndö ti sese kue, na a nzere na mbi so mbi yeke mû mbage dä.”

LO ZIA LANI BÊ TI LO NA JÉHOVAH TI AIDÉ LO

11. Ngbanga ti nyen la Jésus abezoin lani ti zia bê ti lo na Jéhovah ti aidé lo ti ngbâ ti yapu na kua ti fango tënë? (Luc 12:​49, 53).

¹¹ Jésus azia lani bê ti lo na Jéhovah ti aidé lo ti ngbâ ti yapu na fango tënë. Na fango tënë, Jésus ayeke sara lani tënë na azo na nengo zo me lo hinga so tënë ti Royaume apeut ti sara ambeni zo ngonzo nga gbâ ti azo ayeke kanga lege na ni. (Diko Luc 12:​49, 53.) Akota zo ti nzapa aye lani ape aye so Jésus ayeke fa, ni la fani mingi ala gi ti fâ lo (Jean 8:59; 10:​31, 39). Me Jésus angbâ lani ti fa tënë ndali ti so lo hinga so Jéhovah ayeke na lo. Lo tene: “Mbi yeke gï mbi oko pëpe, me Babâ so atokua mbi ayeke na mbi. . . . Lo so atokua mbi ayeke na mbi. Lo zia mbi gï mbi oko pëpe, ngbanga ti so mbi yeke sara lakue aye so anzere na bê ti lo.”—Jean 8:​16, 29.

12. Tongana nyen la Jésus aleke lani adisciple ti lo ti ngbâ ti fa tënë même tongana azo akanga lege na ala?

¹² Jésus adabe ti adisciple ti lo so ala peut ti zia bê ti ala na Jéhovah ti aidé ala. Fani mingi lo tene na ala so Jéhovah ayeke aidé ala même na ngoi so azo asara aye ti ngangu na ala (Mat. 10:​18-20; Luc 12:​11, 12). So Jésus ahinga atene azo mingi ayeke kanga ande lege na nzoni tënë, lo tene na adisciple ti lo ti sara ye na hange (Mat. 10:16; Luc 10:3). Lo tene nga na ala so zo so aye ti mä ala ape, ala forcé lo ape (Luc 10:​10, 11). Lo tene nga na ala ti kpe tongana a sara aye ti ngangu na ala (Mat. 10:23). Atâa so Jésus ayapu lani nga lo yeke na confiance na Jéhovah, lo zia fini ti lo na lê ti kpale senge senge ape.—Jean 11:​53, 54.

13. Ngbanga ti nyen la mo peut ti duti sûr so Jéhovah ayeke aidé mo?

¹³ E bezoin mungo maboko ti Jéhovah si e ngbâ ti yapu na fango tënë na ngoi so a kanga lege na e (Apoc. 12:17). Ngbanga ti nyen la mo peut ti duti sûr so Jéhovah ayeke aidé mo? Gbu li na ndö ti sambela ti Jésus so ayeke na Jean chapitre 17. Jésus ahunda lani na Jéhovah ti bâ ndo na ndö ti abazengele ti lo na Jéhovah akiri tënë na sambela so. Mbeti ti Kusala afa tongana nyen la lo aidé abazengele ti yapu na fango tënë atâa so a sara aye ti ngangu na ala. Na yâ ti sambela so, Jésus ahunda nga na Jéhovah ti bâ ndo na ndö ti azo so ayeke mä na bê na tënë so abazengele afa. Mo nga kue mo yeke na popo ni. Jéhovah angbâ ti kiri tënë na sambela ti Jésus so, lo yeke aidé mo tongana ti so lo aidé lani abazengele.—Jean 17:​11, 15, 20.

14. E hinga tongana nyen so e peut ti ngbâ ti yapu na kua ti fango tënë? (Bâ nga foto.)

¹⁴ So nda ni ayeke pusu nduru nduru, a peut ti duti ngangu mingi na e ti fa nzoni tënë. Me Jésus atene so e yeke wara mungo maboko so e bezoin ni ti ngbâ ti yapu na kua so (Luc 21:​12-15). Tongana ti Jésus na adisciple ti lo, e yeke zia azo asoro ti mä e wala ti ke ti mä e, na e yeke papa na ala ape. Même na yâ ti akodro so a kanga lege na ambeni kua ti e, aita awara lege ti fa nzoni tënë ndali ti so ala zia bê ti ala na Jéhovah me na ngangu ti ala wani ape. Gï tongana ti so na ngoi ti akozo Chrétien Jéhovah amû ngangu na awakua ti lo, laso lo yeke mû na e ngangu si e “fa tënë ni kue” tongana ti so lo ye (2 Tim. 4:17). Mo peut ti duti sûr so tongana mo zia bê ti mo na Jéhovah mo peut ti ngbâ ti yapu na kua ti fango tënë.

LO YEKE LANI NA CONFIANCE SO AMBENI ZO AYEKE MÄ LO

15. Nyen la afa so Jésus ayeke lani na confiance so anzoni ye ayeke ga na peko ti fango tënë ti lo?

¹⁵ Jésus angbâ lani ti duti na confiance so ambeni zo ayeke mä lo. A aidé lo ti ngbâ ti duti na ngia nga ti ngbâ ti fa tënë ngangu. Na tapande, na hunzingo ti ngu 30, Jésus abâ so gbâ ti azo ayeke nduru ti mä nzoni tënë na lo haka ala na akobe ti yaka so abe awe ti tene a ko ni (Jean 4:35). Ngu oko tongaso na pekoni, lo tene na adisciple ti lo: “Akobe ti fango ni ayeke mingi.” (Mat. 9:​37, 38). Ambeni ngoi na pekoni, lo kiri lo tene: “Akobe ti fango ni ayeke mingi . . . Ala voro yanga na Wa ti kua ni ti tokua azo ti kua ti fâ akobe ti yaka ti lo.” (Luc 10:2). Jésus angbâ lani ti duti na confiance so azo ayeke mä nzoni tënë na lo yeke na ngia na ngoi so ala mä ni.—Luc 10:21.

16. Atoli ti Jésus afa nyen na ndö ti kua ti fango tënë? (Luc 13:​18-21). (Bâ nga foto.)

¹⁶ Jésus a-aidé lani adisciple ti lo ti ngbâ ti yapu na fango tënë na lege so lo fa na ala so tënë so ala yeke fa na azo ayeke ga na anzoni ye so ahon gbungo li ti zo. Na tapande, gbu li na ndö ti atoli ti lo use. (Diko Luc 13:​18-21.) Na yâ ti mbeni toli ni, Jésus asara kua na lê ti keke ti moutarde ti fa so tënë ti Royaume ayeke mû ndo na mbeni fason so apika bê mingi na ye oko ayeke kanga lege na ni ape. Na yâ ti use toli ni, lo haka tënë ti Royaume na levure, ndali ti so ayeke fa tënë ti Royaume na yâ ti akodro mingi na yâ ti dunia na tënë ni ayeke pusu azo ti sara achangement atâa so a peut ti bâ achangement ni so hio ape. Atoli ti Jésus so asara si adisciple ti lo abâ so tënë so ala yeke fa ayeke aidé gbâ ti azo.

17. Araison wa la e yeke na ni ti ngbâ ti duti na nzoni bango ndo na ndö ti kua ti fango tënë?

¹⁷ Tongana e gbu li na ndö ti fason so kua ti fango tënë ayeke aidé gbâ ti azo na yâ ti dunia laso, a pusu e ti ngbâ ti fa tënë. Ngu oko oko, azo kutu mingi so aye ti hinga ye na ndö ti Nzapa ayeke ga na Mémorial nga ayeke manda Bible. Azo saki ngbangbo mingi ayeke wara batême nga ala yeke fa tënë legeoko na e. E hinga ape azo oke la apeut ti yeda na tënë so e yeke fa, me e hinga so Jéhovah ayeke bungbi azo mingi mingi so ayeke sö kuâ ande na ngoi ti kota ye ti vundu so ayeke ga (Apoc. 7:​9, 14). Jéhovah la ayeke Wa ti kua ni nga lo hinga biani so gbâ ti azo ayeke yeda na nzoni tënë, tongaso e yeke ngbâ ti fa tënë.

18. Nyen la e ye ti tene azo ahinga na ndö ti e?

¹⁸ A hinga adisciple ti Jésus lakue na yapungo na kua ti fango tënë. Na tapande, abazengele afa tënë lani sân mbeto na so ala yapu tongaso, azo ‘aga ti hinga so ala yeke azo so ayeke lani na terê ti Jésus.’ (Kus. 4:13). Tongana azo abâ e na fango tënë, ala peut ti bâ so e nga kue e mû tapande ti Jésus so ayapu lani na kua ti fango tënë.