“A yeke hinga so ndara ayeke mbilimbili na lege ti akusala ti lo”
1. Ambeni zo abâ kusala ti e tongana nyen?
1 A yeke si ka so azo ake ti mä e teti so ala gbu nda ti tënë ti e pëpe wala a tene na ala atënë ti mvene na ndo ti aTémoin ti Jéhovah. Peut-être aye so ala mä na radio wala ala bâ na télévizion wala ala diko na yâ ti ambeti-sango la asara ngangu na ndo ti bango ndo ti ala. Na ambeni ndo airi e “sioni secte”. A lingbi e sara ye tongana nyen na ngoi so e yeke na gbele ti amara ye tongaso?
2. Nyen la alingbi ti mû maboko na e ti woko pëpe na gbele akasango ndo?
2 Ngbâ ti duti na nzoni bango ndo: Na ngoi ti Jésus na ti akozo Chrétien, fani mingi azo agbu nda ti tënë ti ala pëpe, na a tene asioni tënë na ndo ti ala (Kus. 28:22). Me, ala zia si akasango ndo asara si kamene ti fango tënë asara ala pëpe. Jésus atene: “a yeke hinga so ndara ayeke mbilimbili na lege ti akusala ti lo.” (Mat. 11:18, 19). Na mbeto pëpe, lo ngbâ ti sara ye so Babâ ti lo aye, lo hinga na bê ti lo kue so azo so ayeke gi tâ tënë ayeke bâ nene ti nzoni tënë ni. Tongana e dabe ti e so aye tongaso asi nga na Molenge ti Nzapa ayeke sara si e nze pëpe.
3. Ngbanga ti nyen a yeke nzoni bê ti e adö pëpe tongana a tene asioni tënë na ndo ti e nga tongana a kanga lege na e?
3 Lani, Jésus afa so fade dunia so ayeke ke adisciple ti lo tongana ti so ake lo (Jean 15:18-20). Ni la, a lingbi bê ti e adö pëpe tongana a tene asioni tënë na ndo ti e nga tongana a kanga lege na e. Ti tâ tënë ni, a lingbi e ku ti tene aye tongaso asi na e na ngoi so e lï mingi na alango ti nda ni na ngonzo ti Satan ayeke ga gi kota ahon ti kozo (Apoc. 12:12). Tere ti e alingbi ti nzere teti so aye so afa so na yâ ti kete ngoi ayeke futi dunia ti Satan.
4. Tongana azo ake ti mä nzoni tënë, a yeke nzoni e sara nyen?
4 Kiri tënë nzoni: Tongana azo ake ti mä e, a yeke nzoni e kiri lakue tënë nzoni nga yeke (aProv. 15:1; aCol. 4:5, 6). Tongana lege ayeke dä, e lingbi ti fa na mbeni zo so bê ti lo ayeke nzoni, so, a tene atënë ti mvene mingi na ndo ti aTémoin ti Jéhovah wala ti hunda lo ngbanga ti nyen lo ke ti mä e. Tënë so e yeke kiri na ni yeke na lo alingbi ti sara si lo hunda tënë na e na ndo ti ye so lo mä na ndo ti aTémoin ti Jéhovah na ti mä e tongana ti peko e ga ti sara vizite na lo. Me, tongana ngonzo agbu zo ni mingi, a yeke nzoni e hunda pardon na e hon yeke. A lingbi e hinga so atâa azo abâ e tongana nyen, Jéhovah abâ fango tënë ti e na nene ni.—És. 52:7.