Mo leke tere ti mo awe ti fa tënë na alege kue so azi?

1. Tapande wa afa so fango tënë na alege kue so azi alingbi ti lë lengo?

¹ Fango tënë na alege kue so azi alingbi ti lë lengo. Bible asi singo na ambeni tapande ni so aye ti nzoni aga na pekoni (Jean 4:7-15). Nyen la e lingbi ti sara ti leke tere ti e ti fa tënë na alege kue so azi?

2. Tongana nyen yungo bongo nga na lekengo tere ti e pendere alingbi ti mû maboko na e ti fa tënë?

² Yungo bongo nga na lekengo tere pendere: Tongana e yü bongo nzoni nga e leke tere ti e pendere na ngoi kue, ye oko ayeke kanga lege na e pëpe ti fa tënë ti mabe ti e na ambeni zo (1 Tim. 2:9, 10). Tongana e bâ so bongo so e yü ane Jéhovah pëpe, ye so ayeke kanga peut-être lege na e ti fa tënë. Nde na so, gi yungo bongo nga na lekengo tere ti e pendere alingbi ti pusu ambeni zo ti hunda ngbanga ti nyen e yü bongo tongaso. Na tapande, na ngoi so ala yeke na voyage, mbeni ita-koli na wali ti lo so ala use kue ayü bongo nzoni, aduti na tere ti mbeni koli so asara nzapa ti Arabo. Tongana koli so abâ yungo bongo ti ala, lo hunda ti hinga wala ala yeke aChrétien. Ye so ague na ala ti sara lisoro na ndo ti Bible teti l’heure ota.

3. Na tapande ti Jésus, mo yeke to nda ti lisoro tongana nyen?

³ Lege ti to nda ti lisoro: Na ngoi so Jésus atingbi na wali ti kodoro ti Samarie na tere ti dungu ti Jacob, lo to nda ti lisoro gi na hundango na wali ni ti mû na lo ngu ti nyon. Legeoko nga, e lingbi ti to nda ti lisoro na lege ti mbeni nduru tënë wala na lege ti mbeni hundango tënë so ayeke ngangu pëpe. Atâa so na ambeni ngoi bê ti e alingbi ti gi e, me na ziango bê na Jéhovah, e lingbi ti “zi mbeto na yâ ti e” na ti to nda ti lisoro.​—1 aThes. 2:2.

4. Tongana nyen e lingbi ti leke tere ti e ti fa tënë na alege kue so azi?

⁴ Gi alege ti sara ni: Mingi ti awafango tënë awara lege ti fa tënë na alege kue so azi. Kiri mo bâ dutingo ti mo, na gbu li na ndo ti azo so peut-être mo lingbi ti tingbi na ala na yâ ti lango oko oko. Mû na tere ti mo kete Bible nga na ambeti so mo yeke na bezoin ni. Hinga ti bâ ndo nzoni na bi bê na azo so ayeke nduru na mo. Tongana mo gbu li ti mo kozoni na ndo ti alege kue so alingbi ti zi na mo na yâ ti lango ni ti fa tënë, mo yeke leke tere ti mo ti fa tënë nzoni.​—aPhil. 1:12-14; 1 Pi. 3:15.

5. Ngbanga ti nyen a yeke nzoni ti leke tere kozoni ti fa tënë na alege kue so azi?

⁵ E yeke na anzoni nda ti tënë use ti gi ti fa tënë na alege kue so azi: ndoye ti e na mbage ti Nzapa nga na mbage ti amba ti e (Mat. 22:37-39). Teti so kusala ti fango tënë ayeke kota ye mingi, a lingbi e leke tere ti e kozoni ti fa tënë na alege kue so azi. A lingbi e duti nduru ti gbu alege kue so azi ti fa nzoni tënë ti Royaume na ambeni zo na yâ ti ngoi so angbâ.​—aRom. 10:13, 14; 2 Tim. 4:2.