Hinga ti sara kusala na Bible
1. Bible amû maboko na e ti sara nyen?
1 Ti hinga ti sara kusala nzoni na Bible ayeke mû maboko na e ti fa tâ tënë nzoni na ti sigigi na nda ti afango ye ti wataka nga na angobo ti azo.—2 Tim. 2:15; 1 Pi. 3:15.
2. Nyen la alingbi ti mû maboko na e ti wara aversê hio na yâ ti Bible?
2 Hinga atënë ti yâ ni nzoni: E yeke hinga ti sara kusala nzoni na mbeni gbakuru gi tongana e sara kusala na ni fani mingi. Ti Bible nga, tongana e yeke diko ni a to nda ni na Genèse ti si na Apocalypse, e yeke hinga angbongboro tënë so andu mama-tene ni. Ye so ayeke mû nga maboko na e ti dabe ti e na aversê nga ti wara ni hio. Na ngoi so e yeke hinga tënë ti yâ ti Bible nzoni ahon ti kozo, e yeke sara nga tënë na mbeto pëpe nga e hinga tënë so e yeke tene na ngoi so e yeke fa tënë na territoire wala na alege kue so azi.—1 aThes. 1:5.
3, 4. (a) Ambeni ye wa e lingbi ti sara ti hinga na atënë ti yâ ti Bible nzoni? (b) Mo yeke na ambeni kode nde so amû maboko na mo ti hinga Bible nzoni?
3 Na ngoi ti abungbi, tongana a yeke diko mbeni versê, zi Bible ti mo na bâ ni na yâ ni legeoko na ita ni. Na ngoi so mo yeke manda ye mo mveni nga mo yeke leke abungbi, diko na yâ ti Bible aversê so a fa atënë ti yâ ni pëpe na bâ tongana nyen mo lingbi ti sara ye alingbi na ni. Mingi ti aita abâ so ti diko aversê tâ gi na yâ ti Bible asara si, tongana ala yeke fa tënë, ala yeke wara aversê ni hio na yâ ti Bible ahon ti diko ni na lê ti mbeni masini wala ti sara copie ni na lê ti mbeni mbeti.—Jean 14:26.
4 Ambeni sewa aleke mbeni ngoi ti manda ambeni versê na li. A lingbi ti sara ni na lege ti ambeni nduru mbeti so na mbeni mbage ni a zia aversê ti Bible na lê ni nga na mbeni mbage ni a fa atënë ti yâ ti aversê ni. Na tour na tour, zo oko oko ayeke soro ti lo mbeni nduru mbeti ni na lo tara ti fa atënë ti yâ ti versê ni wala ndo so a yeke wara atënë ni dä. Na yanga-da, tongana e tara peko ti akode ti fango tënë nga e sara kusala na Bible ti kiri tënë na azo tongana ala hunda tënë na e wala ala gi ti kanga lege na e ti fa tënë ayeke sara nga si e hinga Bible nzoni mingi.
5. Ngbanga ti nyen e ye ti gi ti hinga atënë ti yâ ti Bible nzoni?
5 Mbeni mbeti ti lingbi na Bible ayeke ti lo dä pëpe. A yeke gi na yâ ti Bible si e yeke wara atënë so ayeke sara si azo ‘awara ndara ti wara na salut’. (2 Tim. 3:15). Teti so mingi ti azo ti territoire ti e ahinga pëpe apendere ye so ayeke na yâ ti Bible, ni la a yeke nzoni e gi ti hinga Bible nzoni ti fa na ala tâ ye so ayeke na yâ ni.—aProv. 2:1-5.