Jéhovah andoye zo so amû matabisi na ngia
1 Mbeti ti Nzapa afa Jéhovah tongana Lo so amû ye mingi na Lo yeke nduru ti mû ye, ‘Lo lungula maboko ti Lo, na Lo mû ye alingbi na nzara ti ye kue so ayeke na fini.’ (Psaume 145:16). Matabisi ti kota ahon so lo mû ayeke Molenge ti lo so lo mû ti zi na azo (Jean 3:16). Nga, gbu li na ndo ti aye ti nzoni kue ti yingo na ti mitele so e wara lâ na lâ na maboko ti lo! Biani, Jéhovah ayeke kota tapande ti “zo so amû matabisi na ngia.” (2 aCorinthien 9:7). Ni la, Bible awa e ti “sara legeoko tongana Nzapa asara”.—aÉphésien 5:1.
2 E yeke mû ye na ngia na ngoi so e fa nzo tënë ti Royaume na azo so e tingbi na ala na yâ ti territoire ti e nga na fango tënë na lege kue so azi. Ngu oko oko, azo ti Jéhovah ayeke mû ngbonga ahon ngbundangbu oko ti mû ye na azo na lege so. Na yâ ti kusala ti e ti fango tënë, e kangbi apériodique, abrochure na abuku kutu ngbangbo mingi senge senge.
3 Na ndo ni, na yâ ti akodoro so ayeke na mosoro mingi pëpe, tongana ti e, bungbi ti Jéhovah amû maboko na akongregation mingi ti leke aDa ti Royaume. Laso, gi na sese ti Afrika so ayeke na mosoro mingi pëpe, a leke aDa ti Royaume ahon 8 600. A ku ti tene akongregation abata ada so nzoni, nga ti mû nginza so alingbi na ngangu ti ala ndali ti ada so a yeke sara. Anginza so amû lege na ambeni kongregation ti wara fini Da ti Royaume na ngoi ni.
4 Wabatango Bungbi, na lege ti afiliale ahon 100, ayeke mû li ni na yâ ti kusala ti fango tënë na ndo ti sese kue. A yeke aita-koli na aita-wali nduru na 20 000 si ayeke sara kusala na yâ ti afiliale so. Ambeni filiale ni ayeke na amasini ti petengo mbeti, na ati fungo ni na ti kolengo ni ndali ti fango tënë. Gbu li kete na ndo ti aye so a mû teti akota kusala ti petengo mbeti so. A hunda akota da ti zia amasini so na yâ ni. A hunda akugbe-mbeti mingi na ambeni kungba ti nginza mingi ti sara na apériodique nga na ambeti. A hunda a-ordinateur nga na ambeni gbakuru teti kiringo na peko ti ambeti nga teti akusala ti biröo. Na mbage, aBéthelite ayeke na bezoin ti ndo ti lango. A mû aye so kue teti maïngo na kusala ti fango tënë.
5 Ambeni ye so ahunda nginza mingi so bungbi ayeke bâ lege ni ayeke amissionnaire na apionnier spécial saki mingi so a tokua ala na ando so a hunda awafango tënë dä mingi. Na ndo ni, e yeke na asurveillant saki mingi so ayeke tambela na ando nde nde ti bâ akongregation, ti kpengba mabe ti aita na ti mû ngangu na ala na yâ ti kusala ti fango tënë.
6 Tongana mo bâ kota kusala so a yeke sara na ndo ti sese kue, mo ye ti hinga ndo so anginza so alondo dä si a yeke sara na aye so kue. A londo na aita kutu mingi (awamosoro na awanzinga) nga na azo ti nzoni-be so ahinga nene ti kota kusala so Jésus akomande e ti sara (Matthieu 24:14; 28:19, 20). Amatabisi so kue ayeke tongana akete kete ngu-nduzu so atï si na pekoni asua ti ga kete ngu. Kete ngu so aga kota bale so na nda ni asua ngangu. A-Témoin ti Jéhovah ayeke hon na sembe na gbele azo ti ro nginza na tïtî ala na ngoi ti abungbi ti ala pëpe wala ti hunda nginza na azo pëpe. Azo kue so amû maboko na lege ti nginza na kota kusala so asara ni ngbanga ti so ala ndoye Jéhovah.
7 Mungo matabisi nde nde na bê kue ndali ti vorongo ti Jéhovah so ayeke nzoni-kue ayeke mbeni ye so a hinga na atâ wavorongo Jéhovah ngbene ye giriri. Lâ ni so Jéhovah amû yanga na Moïse ti sara tabernacle na yando, mara ni amû ye mingi. Tënë so ayeke na Exode 35:21 atene: “Azo oko oko kue so bê ti ala aye aga na offrande ti L’Eternel teti kusala”. Tâ tënë, na ‘bê ti ala’ mveni, ala mû amatabisi ti aye ti ngere ngangu nga na ambeni kungba so ala yeke na ni, na so lege ti tene ala wara mbeni na place ni hio ayeke pëpe. Bê ti ala mveni si aye ti maï kusala ti vorongo tâ Nzapa.
8 Laso nga a yeke legeoko. Mungo maboko ndali ti kusala ti Royaume na ndo ti sese kue alondo na azo so bê ti ala apusu ala ti mû matabisi ndali ni. Mingi ti ala ayeke na mosoro pëpe, me ala mû nginza ndali ti kusala ti fango tënë; na mingi ni ala mû ye kue so ala yeke na ni, tongana ti so womua so ayeke wanzinga asara na ngoi ti Jésus so Luc 21 asara tënë ti lo. Na bango kete matabisi ni, Jésus atene na abazengele ti lo: “Biani, Mbi tene na i, womua so, so ayeke wanzinga, amû matabisi kota ahon ala kue. Teti ala so kue azia na yâ sanduku ni gi nginza so ayeke senge na lê ti ala; me womua so azia ye ti nzinga ti lo na yâ ni, même ye kue so ayeke na lo ti vo kobe ti lo.” (Luc 21:2-4). Mbaï so afa na e so même kete matabisi ti aita so ayeke na ye mingi pëpe ayeke kota mingi na anzere na Jéhovah nga na Molenge ti lo, Jésus Christ.
9 A yeke nzoni ti tene e bâ bê ti e na ndo ti tënë ti mungo maboko na kusala ti Royaume. Ngoi na ngoi, ambeni ita atene so ani yeke na nginza pëpe ti mû teti kusala ti fango tënë wala ti batango Da ti Royaume, me andâ ala yeke na nginza teti ambeni ye so ayeke kota ye pëpe. Tongana andu tënë ti sarango mariage, nginza mingi ayeke hon teti lango oko senge, wala gi teti kete ngbonga. So afa nyen? A fa so ti ambeni zo ye so agbu bê ti ala ayeke tâ nde tongana andu tënë ti mungo nginza ndali ti kusala ti Royaume.—aPhilippien 1:10.
10 Ambeni ahinga peut-être mbilimbili pëpe tongana nyen mungo matabisi teti ambeti so a kangbi ayeke tambela. Tongana e mû mbeni mbeti wala périodique na Da ti Royaume, a yeke ti e ti mû matabisi ndali ni. Na lege so, e sara ngangu ti kanga dû ti ambeni ye so a futa ti sara na ni. Tongana e mû ambeti na azo na yâ ti kusala ti fango tënë ti e, e fa na ala so e kangbi ambeti ti e senge senge. Na ngoi so e kiri ti bâ azo so tënë ni anzere na ala wala azo so e manda Bible na ala, a yeke nzoni ti fa na ala tënë ti mungo matabisi, na e zia lege na ala ti sara ni ndali ti fango tënë na ndo ti sese kue (Matthieu 24:14). Mingi ti ala, na ngoi so ala hinga kota ti kusala so e yeke sara na ndo ti sese kue, ayeke na ngia ti mû mbeni matabisi.
11 Gbia David afa tënë so pendere mingi na ngoi so lo na azo ti Israël amû ye mingi ti leke na temple. Lo sambela Jéhovah, lo tene: “Mbi yeke zo nyen? na azo ti mbi ayeke azo nyen? si e lingbi mû ye tongaso na Mo na nzobe. Ye kue aga na lege ti Mo, ye so e mû na Mo ayeke gi ye ti maboko ti Mo mveni.” (1 Chronique 29:14). Biani, a yeke nzoni zo oko oko aleke na bê ti lo, a lingbi na ngangu ti lo, ti mû ye so lo ye ti mû. Fade Jéhovah ayeke iri tënë nzoni na ndo ti azo kue so amû ye na ngia nga na singila na bê.
12 Amatabisi so a mû teti kusala na ndo ti sese kue a lingbi a tokua ni na filiale wala a zia ni na yâ ti sanduku na Da ti Royaume. Tongana bungbi ahunzi awe, lakue a lingbi a duti aita-koli use si adiko nginza ni na ala sara mbeti ti nginza so alï. Tongana aita-koli so ayeke na ndo ti kusala so abata amatabisi so nzoni, fade aita ayeke gi bê ti ala pëpe ti zia matabisi na yâ ti asanduku na Da ti Royaume (1 aCorinthien 4:2). Matabisi kue so a mû na kongregation teti kusala na ndo ti sese mobimba a lingbi a tokua ni na filiale na nda ti nze oko oko.
13 Giriri, Jéhovah airi tënë nzoni mingi na ndo ti azo ti Israël tongana na bê kue ala mû akungba ti ala teti kusala ti vorongo tâ Nzapa. E lingbi ti hinga na bê kue so e nga e yeke wara tënë nzoni tongana na bê ti e kue e mû maboko ndali ti kusala ti fango tënë ti Royaume, na ti ‘yä iri ti [Jéhovah] na lege ti ye ti e’.—aProverbe 3:9, 10.
[Ahundango tënë ti manda na ye]
1, 2. (a) Ye wa afa so Jéhovah ayeke “zo so amû matabisi na ngia” ahon azo kue? (b) Na nzoni lege wa awakua ti Jéhovah ayeke mû tapande ti lo?
3. Ye wa bungbi ti Jéhovah aleke teti akodoro tongana ti e so ayeke na mosoro mingi pëpe? na ye so aga na kungba wa na ndo ti e?
4, 5. Fa ambeni ye so a yeke mû lege ti maï na kusala ti fango tënë.
6. Nginza so a sara na akusala so kue alondo na ndo wa? Fa nda na ni na lege ti mbeni tapande.
7, 8. (a) Laso, legeoko tongana ti giriri, ye wa apusu azo ti nzoni bê ti mû na ngia akungba ti maï na kusala ti vorongo tâ Nzapa? (b) Tongana nyen ti hinga mara ti matabisi wa anzere na Jéhovah na Molenge ti lo, Jésus Christ?
9. Ye nyen afa so a yeke pëpe amembre ti kongregation kue si ayeke bâ tënë ti mungo nginza teti kusala ti Royaume tongana kota ye?
10. Mungo matabisi teti kusala ti fango tënë ayeke tambela tongana nyen? na ye wa alingbi ti si tongana azo ahinga tënë polele na ndo ni?
11. Tënë wa David atene na peko ti so, na bê kue, lo mû aye mingi teti kusala ti temple? na ngbanga ti nyen ti sara tongana lo?
12. Na alege wa a lingbi ti tokua amatabisi so amû teti kusala na ndo ti sese kue? (b) Tongana nyen aita-koli so ayeke bâ tënë ti anginza ti kongregation alingbi ti sara kusala so?
13. Tënë wa a lingbi azo so amû matabisi agirisa pëpe?