Molenge ti mo alingbi ti mû mbeni kpengba desizion?
1. Nyen la amaseka Témoin ti Jéhovah asara lani na ndo tënë ti mungo mênë? Mû mbeni tapande.
1 Kpengba desizion na ndo ti nyen? Na ndo mungo mênë. Na yâ mbeni article ti Tour ti Ba Ndo ti 1 novembre 1991, so li ti tënë ni ayeke “E tambela alingbi na awango ti Jéhovah”, a sara tënë ti amolenge ti aTémoin ti Jéhovah so amû lani mbeni kpengba desizion. Desizion ni ayeke ti fa so nzara ti ala ti kpe ndia ti Nzapa na ndo tënë ti mênë ayeke kota ye mingi na lê ti ala tongana ti so a yeke kota ye na lê ti ababâ na mama ti ala. Tënë so alingbi ti ndu nga molenge ti mo so ngu ti lo ade ti si 18 pëpe?
2. Ndia wa mbeni da-ngbanga abâ so a lingbi na mbeni molenge so ngu ti lo ade ti si 18 pëpe na so ake ti tene a mû mênë na lo? Na ye so afa nyen na ababâ na mama Chrétien nga na amolenge ti ala?
2 Ndia ti kodoro atene ti lo nyen? Na Amerika, kota da-ngbanga ti kodoro ti Illinois ayeda ti tene maseka so ngu ti lo ade ti si 18 pëpe ake ti tene a mû mênë na lo. Na ngoi so ala yeke bâ tënë ti mbeni ita-wali so ayeke na ngu 17, da-ngbanga ni asigigi na mbeni mbela, lo tene: “Tongana a bâ biani so molenge ni akpengba alingbi na ni, lo hinga ye so alingbi ti si ndali ti desizion so lo mû ni na lo yeke bâ ndo tongana kota zo, ndia so (ti kodoro ti Illinois) amû lege na lo ti yeda wala ti ke mbeni kode so a ye ti kaï na kobela ti lo.” Tongaso, ti bâ wala mbeni molenge akpengba awe ti mû desizion lo wani, adocteur ni wala akota zo ti kodoro ni alingbi ti sara lisoro na molenge ni ti tene lo mveni lo fa na ala ngbanga ti nyen lo ye ti mû mênë pëpe. Ni la, a lingbi molenge ni ahinga kamême so kobela ti lo ni ayeke ngangu, nga lo hinga ye so alingbi ti si ndali ti kode so lo soro ti tene a kaï na kobela ti lo ni. A lingbi lo fa nga na ala polele tënë ti mabe ti lo na ndo ndia so Nzapa amû na ndo mênë, nga so lo yeke ngbâ na ndo ti tënë ti lo ni.
3. Atënë wa a lingbi ababâ na mama abâ ni nzoni, na ngbanga ti nyen?
3 Molenge ti mo ayeke tene ande nyen? Amolenge ti mo alingbi ti fa tënë ti bê ti ala na ndo tënë so? Ala hinga na bê ti ala kue so Nzapa la ahunda na azo ti lo ti ‘ke mênë’? (Kus. 15:29; 21:25). Ala lingbi ti fa atënë ti mabe ti ala na lege ti Bible? Tongana adocteur atene so ala lingbi peut-être ti kui, amolenge ni ayeke luti ngangu na ndo tënë ti kengo mênë ni, même tongana ababâ na mama ti ala ayeke na tere ti ala pëpe? Ndali ti so ‘lâ na pasa ayeke si na e kue’, tongana nyen mo lingbi ti leke amolenge ti mo ti luti na gbele mbeni ye so ala ku tere ti ala na ni pëpe, so alingbi ti tara mabe ti ala?—Zo-ti. 9:11; aEph. 6:4.
4, 5. (a) A yeke ti ababâ na mama ti sara nyen? Na ala lingbi ti sara ni tongana nyen? (b) A sigigi na aye wa ti mû maboko na ala?
4 Babâ wala mama, mo lingbi ti sara nyen? A yeke ti mo ti fa na amolenge ti mo bango ndo ti Nzapa na ndo mênë (2 Tim. 3:14, 15). Mo lingbi ti wara tënë dä polele na yâ ti buku Comment raisonner, na lembeti 359-362. Manda ni nzoni na amolenge ti mo. Sara kusala na li ti tënë “Si quelqu’un vous dit:” na lembeti 362-364 ti hunda tënë na amolenge ti mo, si ala nga kue akiri tënë na mo. Ye so ayeke sara si ala yeke hinga ande nzoni ti fa tënë na ndo ye so ala mä na bê dä nga ngbanga ti nyen (1 Pi. 3:15). Bâ ambeni ye so a sigigi na ni ti mû maboko na e ti hinga ye nzoni na ndo tënë ti mungo mênë. A yeke aye tongana brochure Comment le sang peut-il vous sauver la vie?, Tour ti Ba Ndo ti 15 juin 2004, lembeti 14-24, kasete vidéo Alternatives à la transfusion—Le droit et les besoins des patients nga na Pas de sang: la médecine relève le défi. E lingbi ti wara alimon so na ndo ti DVD, so li ti tënë ni ayeke Des alternatives à la transfusion—Documentaires. Aye so kue afa polele so ti kaï kobela na mungo mênë na zo pëpe ayeke tâ na lege ni, nga a sara nzoni na zo. Mo na amolenge ti mo, ala bâ akasete vidéo so awe na yâ ti alango so ahon ade ti ninga pëpe? Ala sara lisoro na ndo ni awe?
5 Mû maboko na amolenge ti mo ti “hinga ye so Nzapa aye [na ndo tënë ti mênë], ye so ayeke nzoni, ye so alingbi na lê ti Lo, na ye so alingbi kue.” Tongaso, ala lingbi ti mû mbeni kpengba desizion so anzere na Jéhovah.—aRom. 12:2.