Fini kapa ti kota bungbi ti circonscription

Na yâ ndangba ngoi ti sioni ngbele sese ti fadeso, a yeke kota ye ti bata bongo ti e na lege ti yingo nga na ye so afa e tongana Chrétien (Apoc. 16:15). A yeke tâ na lege ni so kota li ti tënë ti kota bungbi ti e ti circonscription ti ngu ti kusala 2006 ayeke “I yü zo-ti-fini.”​—aCol. 3:10.

Kozo lango ni: Kozo diskur na mbage ota, “Fa na yâ aye nde nde so mo yü zo-ti-fini,” ayeke gboto lê na ndo tongana nyen yungo zo ti fini ayeke ga na aye ti nzoni na ambage kue ti fini ti e. Tongana nyen si e lingbi ti yü zo ti fini? Andangba use diskur ti kozo lango ni, “Sala ngangu ti ga zo so agbu li nzoni” nga “Fango ye so aleke zo-ti-fini ti e” ayeke kiri tënë na hundango tënë so.

Use lango ni: Tongana nyen si yungo zo ti fini ayeke sala ngangu na ndo lege so e yeke sala kusala na menga ti e? E yeke bâ kiringo tënë ni na yâ use diskur na mbage ota, “Gi ti wara menga ti awandara.” Li ti tënë ti Kota diskur ayeke “Mo yeke hon zo ti sioni na ngangu?” Diskur so ayeke gboto lê ande na ndo nene ti ngbâ ti sala hange na amayele ti Satan. Andangba use diskur ti kota bungbi ni ayeke “Bata tele ti mo si mo ga sioni pëpe na lege ti sese so” na “Sala si zo-ti-ya-ni ti mo awara ngangu lâ na lâ.” Adiskur so ayeke mû lege ande na e ti kpe abango ndo nga na asalango ye so ake tele na alege ti Nzapa so ayeke mbilimbili, na ti ngbâ ti duti na bê so azia pëpe na yâ vorongo ti Jéhovah.

So tâ ngia si e yeke na ni ti ku kungo ti wara mungo maboko so ayeke pusu e ti yü zo ti fini!