Osio mbage ni: Salango a-étude so ayeke gue na li ni
Fa na awamandango ye ti leke étude ni
1 Mbeni wamandango ye so adiko ye ti manda ni kozoni, asû kamba na gbe ti akiringo tënë ni na lo gbu li ti lo ti fa pekoni na lege ti atënë so alondo na bê ti lo alingbi ti gue na li ni hio mingi na lege ti yingo. Ni la, tongana mbeni étude aluti nzoni awe, leke legeoko na wamandango ye ni mbeni ye ti manda oko ti fa na lo tongana nyen lo lingbi ti sala ni. Na azo mingi so ayeke manda, a lingbi ti duti nzoni ti leke legeoko na ala mbeni chapitre kue wala mbeni ye ti manda oko kue.
2 Sungo kamba nga na akete tënë: Fa tongana nyen ti wara tâ kiringo tënë na ahundango tënë ni so a sû. Fa na wamandango ye ni buku ti mo so na yâ ni mo sû akamba gi na gbe ti akota tënë ni. Na ngoi so i yeke manda ye ni, lo lingbi ti mû tapande ti mo na sungo na yâ buku ti lo gi ye so a hunda ti mû lege na lo ti dabe na akiringo tënë ni (Luc 6:40). Na pekoni, hunda na lo ti kiri tënë ni lo mveni. Salango tongaso ayeke mû ande maboko na mo ti bâ wala lo gbu nda ti tënë ni nzoni.
3 Ti bâ nzoni aversê so a fa tënë ti yâ ni pëpe ayeke nga mbeni kota mbage na yâ lekengo tele ti wamandango ye ni (Kus. 17:11). Mû maboko na lo ti hinga so aversê so a fa tënë ti yâ ni pëpe ayeke gunda ti mbeni tënë na yâ ti paragraphe ni. Fa na lo ti sû akete tënë na tele ti aparagraphe ni na yâ ti mbeti ti lo. Kozoni kue, fa na lo so Bible ayeke gunda ti aye so lo yeke manda. Wa lo ti sala kusala nzoni na aversê so a fa tënë ti yâ ni pëpe na yâ ti akiringo tënë ti lo na ngoi ti étude ni.
4 I bâ ndulu tënë ti ndo ni nga i sala dango bê ti nda ni: Kozoni si wamandango ye ni ato nda ti leke étude ti lo mbilimbili, a yeke nzoni teti lo ti bâ akota mbage ti ye ti manda ni. Fa na lo so lo lingbi ti sala ni na bingo lê kete na ndo li ti tënë ti chapitre ni, akete li ti tënë ni na afoto so ayeke dä. Tene na lo so kozoni ti hunzi lekengo étude ni, a yeke nzoni ti mû ngoi ti kiri ti bâ akota tënë ti yâ ti ye ti manda ni, peut-être na salango kusala na lege ti encadré ti dango bê, tongana a yeke dä. Ti kiri na ndo atënë tongaso ayeke mû ande maboko na lo ti bata atënë ni.
5 Fango na wamandango ye ni ti leke tele ti lo nzoni teti étude ti lo ayeke mû ande maboko na lo ti kiri tënë nzoni mingi na abungbi. A yeke mû nga ande maboko na lo ti maï mbeni nzoni kode ti mandango ye so ayeke sala ande nzoni na lo teti angoi mingi na pekoni tongana étude ti lo ahunzi.